កូនរបស់អ្នកស្រី ម៉ែន សំអន និងកូនរបស់លោក ប្រាក់ សុខុន ត្រូវបានតែងតាំងជាអភិបាលខេត្តស្វាយរៀង និងខេត្តសៀមរាប រួមទាំងកូនថ្នាក់ដឹកនាំ និងមន្ត្រីជាន់ខ្ពស់គណបក្សប្រជាជនកម្ពុជាមួយចំនួនទៀត ក៏ត្រូវបានតែងតាំងក្នុងមុខតំណែងផ្សេងៗផងដែរ។
ក្នុងព្រះរាជក្រឹត្យដាច់ដោយឡែកពីគ្នាដែលឡាយព្រះហស្តលេខាដោយព្រះករុណា ព្រះបាទសម្ដេច បរមនាថ នរោត្ដម សីហមុនី កាលពីថ្ងៃទី២៣ ខែសីហា ឆ្នាំ២០២៣ បានត្រាស់បង្គាប់តែងតាំងលោក ប្រាក់ សោភ័ណ្ឌ ជាអភិបាលខេត្តសៀមរាប ចាប់ពីថ្ងៃនេះតទៅ។ លោក ប្រាក់ សោភ័ណ្ឌ ជាកូនប្រុសរបស់លោក ប្រាក់ សុខុន ដែលជាអតីតរដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នៃគណបក្សប្រជាជនកម្ពុជា។
ចំណែកកូនប្រុសពៅរបស់លោក ប្រាក់ សុខុន ម្នាក់ទៀត គឺលោក ប្រាក់ ដាវីដ ត្រូវបានតែងតាំងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ខណៈកូនប្រសារបស់លោក គឺលោក ហ៊ែម វណ្ណឌី ឡើងជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ចំណែកព្រះរាជក្រឹត្យមួយទៀតដែលឡាយព្រះហស្តលេខាដោយព្រះករុណា ព្រះបាទសម្ដេចបរមនាថ នរោត្ដម សីហមុនី នៅថ្ងៃដដែល ព្រះអង្គក៏បានត្រាស់បង្គាប់តែងតាំងលោក ប៉េង ពោធិ៍សា ជាអភិបាលខេត្តស្វាយរៀង ចាប់ពីថ្ងៃនេះតទៅ។
លោក ប៉េង ពោធិ៍សា ជាកូនរបស់អ្នកស្រី ម៉ែន សំអន ដែលជាអនុប្រធានគណបក្សប្រជាជនកម្ពុជា ហើយក៏ជាតំណាងរាស្ត្រមណ្ឌលស្វាយរៀង។ លោកស្រី ម៉ែន សំអន ក៏ជាអតីតរដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ផងដែរ។ កូនរបស់អ្នកស្រីម្នាក់ទៀត គឺលោក ប៉េង ពោធិ៍នា បានឡើងកាន់តំណែងជារដ្ឋមន្ត្រីក្រសួងសាធារណការ និងដឹកជញ្ជូន។
ការតែងតាំងកូនមន្ត្រីជាន់ខ្ពស់គណបក្សប្រជាជនកម្ពុជា នាថ្ងៃទី២៣ ខែសីហា ឆ្នាំ២០២៣ ធ្វើឡើងបន្ទាប់ពីរដ្ឋាភិបាលដឹកនាំលោក ហ៊ុន ម៉ាណែត ទូលថ្វាយទៅព្រះអង្គក្រោយពីលោកទទួលបានតំណែងជានាយករដ្ឋមន្ត្រីកាលពីថ្ងៃទី២២ ខែសីហា។
មិនមែនតែកូនរបស់អ្នកស្រី ម៉ែន សំអន និងលោក ប្រាក់ សុខុន ដែលត្រូវរដ្ឋាភិបាលដឹកនាំដោយលោក ហ៊ុន ម៉ាណែត តែងតាំងនោះទេ ក៏មានកូនប្រុសពៅរបស់អតីតរដ្ឋមន្ត្រីក្រសួងមហាផ្ទៃលោក ស ខេង គឺលោក ស រដ្ឋា ក៏ត្រូវបានតែងតាំងជាអគ្គស្នងការរងនៃអគ្គស្នងការដ្ឋាននគរបាលជាតិ ខណៈលោក ស សុខា ដែលជាកូនប្រុសច្បងរបស់លោក ស ខេង ជារដ្ឋមន្ត្រីក្រសួងមហាផ្ទៃ។
ការតែងតាំងកូនៗ និងសាច់ញាតិនៅក្នុងក្រសួង និងស្ថាប័នរដ្ឋនេះ អនុប្រធានវេទិកាពលរដ្ឋលោក ម៉ែន ណាត ហៅការដាក់កូនៗ និងសាច់ញាតិនេះថាជាការបង្កើតប្រព័ន្ធអំពើពុករលួយជាប្រព័ន្ធដែលអាក្រក់ជាងគេបំផុតនៅក្នុងប្រទេសជាសមាជិកអាស៊ាន។ មួយវិញទៀត វាក៏ជាការបង្កើតប្រព័ន្ធបក្ខពួក គ្រួសារនិយម និងសាច់ញាតិនិយម ដូច្នេះរដ្ឋាភិបាលលោក ហ៊ុន ម៉ាណែត នេះ លោកថាមិនបានជួយជាតិឡើយ ផ្ទុយមកវិញ គឺជារដ្ឋាភិបាលដែលបំផ្លាញប្រទេសជាតិបន្ថែមទៀត។
ក្រៅពីតែងតាំងកូនៗរបស់ថ្នាក់ដឹកនាំ និងមន្ត្រីជាន់ខ្ពស់ក្នុងជួរបក្សប្រជាជនកម្ពុជាហើយ រដ្ឋាភិបាលថ្មីសម្រាប់អាណត្តិទី៧ នេះដែលទើបឡើងកាន់អំណាច លោក ហ៊ុន ម៉ាណែត ក៏បានតែងតាំងរដ្ឋលេខាធិការ អនុរដ្ឋលេខាធិការ និងទីប្រឹក្សានៅតាមក្រសួងរាប់ពាន់នាក់។
អ្នកវិភាគនយោបាយ និងមន្ត្រីបក្សប្រឆាំងចាត់ទុកការតែងតាំងនេះថា រដ្ឋាភិបាលលោក ហ៊ុន ម៉ាណែត កើតមកក្បាលធំ ហើយបង្កើតបក្ខពួកហែកកម្ពុជាចែកគ្នាស៊ី និងឲ្យពលរដ្ឋចិញ្ចឹម មិនមែនកើតមកដើម្បីចិញ្ចឹមពលរដ្ឋនោះឡើយ។
អង្គការតម្លាភាពអន្តរជាតិ (Transparency International) ដែលចេញផ្សាយរបាយការណ៍ថ្មីមួយកាលពីដើមឆ្នាំ២០២៣ នេះ បានដាក់ចំណាត់ថ្នាក់អំពើពុករលួយកម្ពុជាឆ្នាំ២០២២ ស្ថិតនៅក្នុងលេខរៀង១៥០ ក្នុងចំណោម ១៨០ប្រទេស ស្ថិតក្នុងចំណាត់ថ្នាក់អាក្រក់ទី២ ក្នុងចំណោមប្រទេសជាសមាជិកអាស៊ាន និងអាក្រក់ជាងគេលំដាប់លេខ៣ នៅតំបន់អាស៊ីប៉ាស៊ីហ្វិក។
ចំណាត់ថ្នាក់នេះ ធ្វើឲ្យកម្ពុជាជាប់ក្នុងកម្រិតប្រទេសមានអំពើពុករលួយធ្ងន់ធ្ងរ ឬអាក្រក់ ៥ឆ្នាំជាប់គ្នា បើទោះបីជាកម្ពុជាទទួលបានពិន្ទុកើនឡើងពី ២០ពិន្ទុក្នុងឆ្នាំ២០១៨ ដល់ ២៤ពិន្ទុក្នុងឆ្នាំ២០២២ ដែលពិន្ទុ ១០០ ជាចំណាត់ថ្នាក់ពិន្ទុល្អ គ្មានអំពើពុករលួយ។
របាយការណ៍សកលនោះបញ្ជាក់ថា កត្តាដែលនៅតែបន្តរារាំងកម្ពុជាមិនឲ្យទទួលបានពិន្ទុខ្ពស់ និងចំណាត់ថ្នាក់ល្អ គឺការខ្វះខាតនូវកិច្ចខិតខំប្រឹងប្រែងក្នុងការធ្វើឲ្យប្រសើរឡើងនូវអភិបាលកិច្ចល្អ លទ្ធិប្រជាធិបតេយ្យ និងនីតិរដ្ឋ៕