នៅថ្ងៃទី៣១ សីហា នេះ ព្រឹត្តិការណ៍នយោបាយដ៏សំខាន់ពីរកំពុងវិវឌ្ឍនៅក្នុងរាជាណាចក្រថៃ ជាប្រទេសជិតខាងនៃរាជាណាចក្រកម្ពុជា។
គេថាព្រឹត្តិការណ៍ពីរដ៏សំខាន់ដែលស្ថិតក្នុងក្រសែភ្នែករបស់ប្រជាជនថៃ រាប់លាននាក់ និងអ្នកនយោបាយក្នុងតំបន់ គឺអតីតមេរដ្ឋប្រហារឆ្នាំ២០១៤ ដែលតោងអំណាចជានាយករដ្ឋមន្ត្រីដល់ខែសីហា ឆ្នាំ២០២៣ នេះ លោក ប្រាយុទ្ធ ចាន់អូចា បានប្រមូលគណៈរដ្ឋមន្ត្រីរបស់លោកធ្វើពិធីលាលែងពីតំណែង ហើយសម្រាប់លោក ប្រាយុទ្ធ ខ្លួនលោកផ្ទាល់ ត្រូវចាកចេញពីវិមានរដ្ឋាភិបាល។
ចំណែកព្រឹត្តិការណ៍មួយទៀត លោក ថាក់ស៊ីន ស៊ីណាវ៉ាត្រា ត្រូវបានកាសែតបាងកកប៉ុស្តិ៍ ចុះផ្សាយថា អតីតនាយករដ្ឋមន្ត្រីដែលជាប់ពិរុទ្ធរូបនេះបានថ្វាយលិខិតសុំព្រះមហាក្សត្រប្រទានការលើកលែងទោសឱ្យរូបលោក។
កាសែតបាងកកប៉ុស្តិ៍ចុះផ្សាយថា ព្រឹត្តិការណ៍ពីរនេះកើតនៅពេលដំណាលគ្នា។ តាមប្រភពដដែលនេះ លោក ប្រាយុទ្ធ និងគណៈរដ្ឋមន្ត្រីរបស់មកពីគណបក្សប៉ាល្ល័ងប្រាចារ៉ាត់ និងគណបក្សថៃរួបរួមជាតិ បានទៅប្រមូលគ្នាក្នុងពិធីលាគ្នានៅខាងមុខទីសក្ការៈមួយក្នុងបរិវេណវិមានរដ្ឋាភិបាល។ ក្រោយពីចប់កម្មវិធី អ្នកកាសែតបានចោមរោមសួរលោក ប្រាយុទ្ធ អំពីជីវិតនយោបាយចុងក្រោយរបស់លោក។
លោក ប្រាយុទ្ធ បានថ្លែងថា លោកអស់ពេលវិលចូលវិមានរដ្ឋាភិបាលវិញហើយ។ លោកបញ្ជាក់ថា ទោះជាលោកនៅសល់ពេលតិចតួចជានាយករដ្ឋមន្ត្រីចាំផ្ទះ ក៏ដូចជាពេលវេលារបស់លោកអស់ចាប់ពីពេលនេះហើយ។
លោក ប្រាយុទ្ធ បានថ្លែងជូនពរដល់រដ្ឋាភិបាល និងគណៈរដ្ឋមន្ត្រីថ្មី ឱ្យជួបនឹងរឿងដែលល្អៗ និងជួយប្រទេសមានសន្តិភាពរីកចម្រើន។ លោកបានថ្លែងចុងក្រោយថា៖ «ខ្ញុំសូមជម្រាបលាអស់លោកចាប់ពីពេលនេះហើយ»។
ក្នុងឱកាសនោះ អ្នកកាសែតភាគច្រើនបានតាមកត់ត្រា និងពិនិត្យមើលទឹកមុខរបស់លោក ប្រាយុទ្ធ ប៉ុន្តែលោក ប្រាយុទ្ធ នៅតែមានទឹកមុខស្រស់ញញឹម គឺមិនបានសម្រក់ទឹកភ្នែកមួយតំណក់អ្វីទេ ខណៈលោកអស់សិទ្ធិជានាយករដ្ឋមន្ត្រីថៃ។ លោក ប្រាយុទ្ធ បានប្រកាសហើយថាលោកលែងចង់បានតំណែងអ្វីទាំងអស់ សូម្បីសមាជិកសភាក៏ដោយ។ លោកប្រកាសលាលែងពីប្រធានគណបក្សថៃរួបរួមជាតិ ហើយសម្រេចលែងធ្វើនយោបាយ។
តែអ្នកសង្កេតការណ៍ថា លោក ប្រាយុទ្ធ ជាអ្នកនយោបាយហ៊ានទទួលស្គាល់ពីការចុះខ្សោយខ្លាំងនូវការគាំទ្រ ព្រោះបក្សរបស់លោកដណ្ដើមបានអាសនៈសភាតិចតួចបំផុត បើធៀបនឹងការបោះឆ្នោតឆ្នាំ២០១៩។
នៅពេលជាមួយគ្នានេះដែរ សារព័ត៌មាន The Straits Times នៃប្រទេសសិង្ហបុរី បានចុះផ្សាយដោយស្រង់សម្ដីលោក Wissanu Krea-ngam រដ្ឋមន្ត្រីក្រសួងយុត្តិធម៌នៃរដ្ឋាភិបាលចាំផ្ទះរបស់លោក ប្រាយុទ្ធ អំពីអតីតនាយករដ្ឋមន្ត្រីថៃ លោក ថាក់ស៊ីន ដែលបានថ្វាយលិខិតទៅព្រះបរមរាជវាំងដើម្បីទូលថ្វាយព្រះមហាក្សត្រចេញសារលិខិតលើកលែងទោស។
លោក ថាក់ស៊ីន បានត្រឡប់ចូលប្រទេសថៃវិញកាលពីថ្ងៃទី២២ ខែសីហា បន្ទាប់ពីបាននិរទេសខ្លួននៅក្រៅប្រទេសជិត ១៧ឆ្នាំ។
លោកបានប្រើយន្តហោះឯកជនផ្ទាល់ខ្លួនមកប្រទេសវិញ បន្ទាប់មកលោកត្រូវបាននាំខ្លួនទៅពន្ធនាគារដើម្បីដាក់ទោស ៨ឆ្នាំពីបទរំលោភអំណាច និងទំនាស់ផលប្រយោជន៍អំឡុងលោកកាន់តំណែងនាយករដ្ឋមន្ត្រីពីឆ្នាំ២០០១ ដល់ឆ្នាំ២០០៦។ តែនៅក្នុងឆ្នាំ២០០៦ លោកត្រូវបានពួកយោធាធ្វើរដ្ឋប្រហារ។
យ៉ាងណា លោក ថាក់ស៊ីន បានបដិសេធចំពោះការចោទទាំងនេះ ដោយចាត់ទុកថាជារឿងនយោបាយ។
តែប៉ុន្មានម៉ោងបន្ទាប់ពីការមកដល់ប្រទេសថៃវិញ បេក្ខជនម្នាក់មកពីគណបក្សភឿថៃ ដែលលោក ថាក់ស៊ីន នៅពីក្រោយ គឺលោក Srettha Thavisin ត្រូវបានសភាបោះឆ្នោតក្លាយជានាយករដ្ឋមន្ត្រីដែលអ្នកវិភាគខ្លះគិតថាលោក ថាក់ស៊ីន បានធ្វើឱ្យមានកិច្ចព្រមព្រៀងជាមួយពួកយោធា និងក្រុមរាជានិយមថៃ ទើបលោក ថាក់ស៊ីន អាចវិលចូលប្រទេសវិញដោយមិនមានការរារាំង ទោះជាលិខិតឆ្លងដែនរបស់លោកត្រូវអាជ្ញាធរថៃ លុបចោលសុពលភាពក៏ដោយ។
ជាមួយគ្នានេះដែរ មេធាវីរបស់លោក ថាក់ស៊ីន បានថ្លែងឱ្យដឹងថា កូនក្ដីលោកបានស្នើសុំការលើកលែងទោសពីព្រះមហាក្សត្រហើយ។
មេធាវីរបស់លោក ថាក់ស៊ីន គឺលោក Winyat Chartmontri បានប្រាប់អ្នកសារព័ត៌មានថា លោក ថាក់ស៊ីន បានរៀបចំឯកសារនេះដោយខ្លួនឯងថ្វាយទៅព្រះមហាក្សត្រ។
ភ្លាមៗក្រោយពីនាំខ្លួនចូលទៅឃុំខ្លួនក្នុងពន្ធនាគារបានមួយយប់ នៅយប់ដំបូងពេលមកដល់ប្រទេសថៃ លោក ថាក់ស៊ីន ត្រូវបានបញ្ជូនទៅមន្ទីរពេទ្យប៉ូលិសដោយសារលោកចុកក្នុងទ្រូង និងឡើងសម្ពាធឈាម។
នៅខណៈនេះ លោក ថាក់ស៊ីន កំពុងសម្រាកព្យាបាលនៅមន្ទីរពេទ្យនៅឡើយ។
កាលពីថ្ងៃទី៣០ សីហា កូនស្រីរបស់លោក គឺអ្នកស្រី ផៃថងថាន ដែលបានទៅសួរសុខទុក្ខឪពុក បានបង្ហើបរួចហើយអំពីលទ្ធភាពដែលលោក ថាក់ស៊ីន ត្រូវស្វែងរកការលើកលែងទោសពីព្រះមហាក្សត្រ។ អ្នកស្រី ផៃថងថាន ជាអ្នកនយោបាយដ៏មានឥទ្ធិពលនៅក្នុងបក្សភឿថៃ ដែលកំពុងដឹកនាំរដ្ឋាភិបាលចម្រុះ ១១បក្ស ហើយក្នុងនោះក៏មានបក្សរបស់ពួកយោធាផងដែរ។
នៅពេលចុះពីយន្តហោះនៅព្រលានយន្តហោះដងមឿង នាក្រុងបាងកក កាលពីព្រឹកថ្ងៃទី២២ សីហា លោក ថាក់ស៊ីន បានដាក់កម្រងផ្កាហើយឱនក្បាលគោរពប្រណិប័តន៍ព្រះឆាយាល័ក្ខណ៍ព្រះមហាក្សត្រ។
ក្រុមអ្នកសង្កេតការណ៍បានព្យាករទុកជាមុនហើយថា លោក ថាក់ស៊ីន ដែលត្រូវឆ្មាំគុកដឹកទៅសម្រាកនៅមន្ទីរពេទ្យ ពិតជាមានជំងឺ ប៉ុន្តែអ្នកនយោបាយវ័យ ៧៤ឆ្នាំរូបនេះបានសម្រេចលែងប្រឈមមុខនឹងក្រុមយោធាដែលផ្ដួលរំលំលោកទៅហើយ ម្ល៉េះហើយការផ្សះផ្សាជាតិពិតណាស់នឹងផ្ដល់ឱកាសឱ្យលោក ថាក់ស៊ីន វិលចូលប្រទេសថៃវិញ ក្រោមការស្វែងរកការលើកលែងទោសពីព្រះមហាក្សត្រ៕