29 C
Phnom Penh

នាយករដ្ឋមន្ត្រី​ថ្មី​ព្រមាន​ដក​ក្របខ័ណ្ឌ​រដ្ឋ​ពី​មន្ត្រី​រាជការ​ដែល​ទទួល​បាន​តំណែង​ជា​ទីប្រឹក្សា​ឬ​ជំនួយការ ហើយ​សុំ​ឋានៈ​ស្មើ​នឹង​តំណែង​ជាន់ខ្ពស់​ផ្សេង​ទៀត

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ដែល​ទើប​នឹង​ស្នង​អំណាច​បន្ត​ពី​ឪពុក លោក ហ៊ុន ម៉ាណែត ព្រមាន​ដក​ក្របខ័ណ្ឌ​រដ្ឋ​ពី​មន្ត្រី​រាជការ​ស៊ីវិល មន្ត្រី​នគរបាល​ជាតិ និង​យោធិន ជាដើម ដែល​ទទួល​បាន​តំណែង​ជា​ទីប្រឹក្សា ឬ​ជា​ជំនួយការ​ហើយ ប៉ុន្តែ​នៅតែ​ស្នើសុំ​ឋានៈ​ស្មើ​នឹង​តំណែង​ជាន់ខ្ពស់​ក្នុង​ជួរ​រដ្ឋាភិបាល​ផ្សេង​ទៀត ដែល​បង្ក​ឱ្យ​មាន​ភាព​ច្របូកច្របល់​ពេញ​ក្រសួង​ស្ថាប័ន។

លោក ហ៊ុន ម៉ាណែត បញ្ជាក់​ថា លើកលែងតែ​មន្ត្រី​នយោបាយ ដូចជា​រដ្ឋលេខាធិការ និង​អនុរដ្ឋលេខាធិការ​ប៉ុណ្ណោះ​ដែល​អាច​ទទួល​បាន​តំណែង​ជា​ទីប្រឹក្សា ហើយ​នៅតែ​អាច​ទទួល​បាន​ឋានៈ​ជាន់ខ្ពស់​ក្នុង​ជួរ​រដ្ឋាភិបាល​ដូច​មុន​បន្ត​ទៀត។

ការ​អះអាង​របស់​លោក ហ៊ុន ម៉ាណែត ធ្វើឡើង​នៅ​ក្នុង​ពិធី​ជួប​ជាមួយ​កម្មករ​និយោជិត​នៅ​ក្រុង​តាខ្មៅ ខេត្ត​កណ្តាល នៅ​ថ្ងៃទី​១ ខែ​កញ្ញា ឆ្នាំ​២០២៣ នេះ​ថា មន្ត្រី​រាជការ​ស៊ីវិល មន្ត្រី​នគរបាល​ជាតិ និង​យោធិន​ទាំងអស់​ដែល​ទទួល​បាន​តំណែង​ជា​ទីប្រឹក្សា ឬ​ជំនួយការ​ទាំងនេះ​មាន​ជម្រើស​ពីរ បើ​ពួកគេ​ចង់​បាន​ឋានៈ​ស្មើ​នឹង​រដ្ឋលេខាធិការ ឬ​ស្មើ​នឹង​រដ្ឋមន្ត្រី ពួកគេ​ត្រូវតែ​ដាក់​ឱ្យ​ស្ថិត​នៅ​ក្រៅ​ក្របខ័ណ្ឌ​ការងារ​របស់​ខ្លួន​ជា​មុន​សិន ដែល​នេះ​មាន​ន័យ​ថា អ្នក​ទាំងអស់​នោះ​លែង​ជា​ប្រធាន​នាយកដ្ឋាន ឬ​មាន​តួនាទី​ក្នុង​ក្របខ័ណ្ឌ​បន្ត​ទៀត​ហើយ។

នាយករដ្ឋមន្ត្រី​ថ្មី​ដែល​ដឹកនាំ​ប្រទេស​តាម​របប​ក្រុម​គ្រួសារ​និយម​លោក ហ៊ុន ម៉ាណែត បញ្ជាក់​ថា បើ​ពួកគេ​ចង់​រក្សា​តំណែង​ក្នុង​ក្របខ័ណ្ឌ​របស់​ខ្លួន​ឱ្យ​នៅ​បន្ត​ទៀត​នោះ ពួកគេ​គ្រាន់​តែ​មាន​តួនាទី​ជា​ទីប្រឹក្សា​បាន​ហើយ ប៉ុន្តែ​មិន​ត្រូវ​បាន​ផ្តល់​ឋានៈ​ស្មើ​នឹង​តំណែង​ណា​មួយ​ផ្សេង​ទៀត​ទេ ដែល​នេះ​គឺជា​ជម្រើស​ឈ្នះ​ឈ្នះ ព្រោះ​ថា​អ្នក​ទាំងនោះ​នៅតែ​អាច​មាន​តួនាទី​ជា​ទីប្រឹក្សា​ដដែល ហើយ​នៅតែ​អាច​រក្សា​តំណែង​ក្នុង​ក្របខ័ណ្ឌ​រដ្ឋ​បាន​ទៀត។

នាយករដ្ឋមន្ត្រី​ដែល​ទើប​នឹង​ត្រូវ​បាន​លើក​បន្តុប​ពី​ឪពុក​លោក ហ៊ុន ម៉ាណែត បញ្ជាក់​ថា កន្លងមក ការ​ផ្តល់​តួនាទី​ជា​ទីប្រឹក្សា ឬ​ជំនួយការ បាន​បង្ក​ឱ្យ​មាន​បញ្ហា​មួយ​ចំនួន​ដែល​ប៉ះពាល់​ដល់​ដំណើរការ​ការងារ ដោយសារតែ​មន្ត្រី​រាជការ​ខ្លះ​មាន​តួនាទី​ត្រឹម​អភិបាល​រង​ខណ្ឌ តែ​មាន​ឋានៈ​ស្មើ​រដ្ឋមន្ត្រី ឬ​មន្ត្រី​ខ្លះ​ទៀត​មាន​តួនាទី​ត្រឹម​អនុប្រធាន​ការិយាល័យ ប៉ុន្តែ​មាន​ឋានៈ​ស្មើ​អនុរដ្ឋលេខាធិការ ជាដើម ដែល​ជា​ហេតុ​ធ្វើ​ឱ្យ​ប៉ះពាល់​អារម្មណ៍ និង​ពិបាក​ក្នុង​ការ​អនុវត្ត​នូវ​បញ្ជា។

ការ​អះអាង​នេះ ធ្វើឡើង​ស្រប​ពេល​ដែល​រដ្ឋាភិបាល​អាណត្តិ​ទី​៧ នេះ ដែល​កំពុង​ដឹកនាំ​ដោយ​លោក ហ៊ុន ម៉ាណែត កំពុង​តែងតាំង​ទីប្រឹក្សា និង​ជំនួយការ​ព្រោងព្រាត​ដែល​មាន​ចំនួន​កើនឡើង​ដល់​ជាង ១​ពាន់​នាក់​ហើយ​នៅ​ពេលនេះ។

ក្រោយ​ថ្ងៃ​ប្រកាស​អនុម័ត​សមាសភាព​ក្បាលម៉ាស៊ីន​រដ្ឋាភិបាល​ថ្មី កាលពី​ថ្ងៃទី​២២ សីហា ព្រះមហាក្សត្រ​បាន​ចេញ​ព្រះរាជក្រឹត្យ​តែងតាំង​ទីប្រឹក្សា ជំនួយការ​របស់​នាយករដ្ឋមន្ត្រី របស់​រាជរដ្ឋាភិបាល និង​មន្ត្រី​ជាន់ខ្ពស់​ផ្សេងៗ រួម​ទាំង​ទីប្រឹក្សា និង​ជំនួយការ​អម​ក្រសួង​ស្ថាប័ន​នានា​ជា​បន្តបន្ទាប់ ដែល​មក​ទល់​នឹង​ពេលនេះ​មាន​ចំនួន​ជាង ១៦០០​នាក់ (១៦៨៤​នាក់) ហើយ។

ទីប្រឹក្សា និង​ជំនួយការ​ដែល​ត្រូវ​តែងតាំង​តាម​ក្រសួង​ស្ថាប័ន​នីមួយៗ​មាន​ចំនួន​រាប់​រយ​នាក់ ដូចជា៖

  • ទីប្រឹក្សា និង​ជំនួយការ​របស់​នាយករដ្ឋមន្ត្រី​ចំនួន ១៧៤​នាក់
  • ទីប្រឹក្សា​រាជរដ្ឋាភិបាល ៣៦៣​នាក់
  • ទីប្រឹក្សា និង​ជំនួយការ​ក្រសួង​យុត្តិធម៌​មាន​ចំនួន ២៣៩​នាក់
  • ទីប្រឹក្សា​ក្រសួង​ព័ត៌មាន​ចំនួន ៤១៥​នាក់
  • ព្រមទាំង​ទីប្រឹក្សា និង​ជំនួយការ​តាម​ក្រសួង​ស្ថាប័ន​នានា​ជាច្រើន​ទៀត ដែល​កំពុងតែ​តែងតាំង​ជា​បន្តបន្ទាប់​នៅ​ពេលនេះ។

មន្ត្រី​មួយ​រូប​នៃ​រដ្ឋាភិបាល​ថ្មី​របស់​លោក ហ៊ុន ម៉ាណែត បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​១ កញ្ញា នេះ​ថា កន្លងមក​ការ​ផ្តល់​ឋានៈ​ដល់​ទីប្រឹក្សា និង​ជំនួយការ​ដល់​មន្ត្រី​រដ្ឋាភិបាល​មួយ​ចំនួន បាន​បង្ក​ឱ្យ​មាន​ភាព​ច្របូកច្របល់​ពេញ​ក្រសួង​ស្ថាប័ន ដោយសារតែ​មន្ត្រី​ខ្លះ​មាន​តួនាទី​ក្នុង​ក្របខ័ណ្ឌ​រដ្ឋ​ត្រឹមតែ​ជា​អនុប្រធាន​ការិយាល័យ​ប៉ុណ្ណោះ ប៉ុន្តែ​ត្រូវ​បាន​តែងតាំង​ជា​ទីប្រឹក្សា​របស់​មន្ត្រី​រដ្ឋាភិបាល​ជាន់ខ្ពស់ និង​មាន​ឋានៈ​ស្មើ​នឹង​ទេសរដ្ឋមន្ត្រី ជាដើម ខណៈ​ប្រធាន​ការិយាល័យ​មិន​ត្រូវ​បាន​តែងតាំង​ជា​ទីប្រឹក្សា​ទេ ហើយ​ក៏​គ្មាន​ឋានៈ​ស្មើ​នឹង​ទេសរដ្ឋមន្ត្រី​ដូច​អនុប្រធាន​ការិយាល័យ​របស់​ខ្លួន​ដែរ ដូច្នេះ​ការ​ដាក់​បទបញ្ជា​ទៅ​ថ្នាក់​ក្រោម គឺ​មិន​មាន​ប្រសិទ្ធភាព​ទេ ដោយសារតែ​ថ្នាក់​ក្រោម​របស់​ខ្លួន​មាន​ឋានៈ​ខ្ពស់​ជាង​ខ្លួន។

ប្រភព​ដដែល​បញ្ជាក់​ថា បើ​ទោះបីជា​លោក ហ៊ុន ម៉ាណែត មិន​ផ្តល់​ឋានៈ​ដល់​ទីប្រឹក្សា និង​ជំនួយការ​ទាំងនោះ​ក៏ដោយ ក៏​ការ​អនុវត្ត​ការងារ​នៅតែ​មាន​បញ្ហា​ដដែល ត្បិត​មន្ត្រី​ជាន់ខ្ពស់​ដែល​គ្មាន​តំណែង​ជា​ទីប្រឹក្សា គឺ​នៅតែ​មាន​អំណាច​តូច​ជាង​មន្ត្រី​ថ្នាក់​ក្រោម​របស់​ខ្លួន​ដែល​មាន​តួនាទី​ជា​ទីប្រឹក្សា​ដដែល ដូច្នេះ​បទបញ្ជា​ពី​ថ្នាក់​លើ​ទៅ​មន្ត្រី​ថ្នាក់​ក្រោម នៅតែ​មិន​អាច​អនុវត្ត​ទៅ​បាន​ដដែល ដែល​នេះ​គឺជា​បញ្ហា​ក្នុង​ការ​តែងតាំង​ទីប្រឹក្សា និង​ជំនួយការ​ទាំងនេះ។

ក្រុម​អ្នក​សង្កេតការណ៍​លើកឡើង​ថា លោក ហ៊ុន ម៉ាណែត ទំនង​ជា​កំពុង​រក​វិធី​កាត់បន្ថយ​ភាព​ស្មុគស្មាញ​ក្នុង​រដ្ឋាភិបាល​ដែល​បន្សល់​ទុក​ពី​ជំនាន់​របស់​លោក ហ៊ុន សែន ដែល​ជា​ឪពុក​ក្នុង​បំណង​បង្ហាញ​ស្នាដៃ​ដឹកនាំ​រដ្ឋាភិបាល​ថ្មី​នេះ​ឱ្យ​មាន​ប្រសិទ្ធភាព​លើ​ការ​អនុវត្ត​គោលនយោបាយ​របស់​ខ្លួន ប៉ុន្តែ​គាត់​ក៏​នឹង​ទំនង​ជា​មិន​អាច​ដោះស្រាយ​ភាព​ស្មុគស្មាញ​នេះ​បាន​ដែរ បើ​គាត់​នៅតែ​ប្រកាន់​គំនិត​រក្សា​សមាជិក​រដ្ឋាភិបាល​ចាស់ បង្កើន​សមាជិក​រដ្ឋាភិបាល​ថ្មី ដូច​ការ​ណែនាំ​របស់​លោក ហ៊ុន សែន ដោយ​គ្មាន​ការ​ជម្រុះ​មន្ត្រី​រដ្ឋាភិបាល​ដែល​ធ្វើ​ការងារ​មិន​កើត​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស