30 C
Phnom Penh

លោក ហ៊ុន ម៉ាណែត៖ កម្ពុជា​នឹង​សហការ​ជាមួយ​ប្រទេស​នៅ​អាស៊ាន​ដើម្បី​ទប់ស្កាត់​ឧក្រិដ្ឋកម្ម​ឆ្លងដែន

ដោយ ឌឹ ខេមបូឌា ដេលី

បទវិភាគ

លោក ហ៊ុន ម៉ាណែត អះអាង​ថា កម្ពុជា​នឹង​សហការ​ជាមួយ​បណ្ដា​ប្រទេស​ក្នុង​តំបន់​អាស៊ាន ដើម្បី​បើក​ការ​ទប់ស្កាត់​អំពើ​ភេរវកម្ម និង​ប្រយុទ្ធ​ប្រឆាំង​ឧក្រិដ្ឋកម្ម​ឆ្លងដែន។

ឪពុក​របស់​នាយករដ្ឋមន្ត្រី​បាន​សរសេរ​ជំនួស​ឲ្យ​កូនប្រុស​របស់​ខ្លួន​នៅ​លើ​ទំព័រ​ហ្វេសប៊ុក កាលពី​ថ្ងៃទី​០៥ ខែ​កញ្ញា ដោយ​សង្ខេប​ខ្លឹមសារ​នៃ​ជំនួប​ទ្វេភាគី​រវាង​លោក ហ៊ុន ម៉ាណែត ជាមួយ​មេដឹកនាំ​នៃ​បណ្ដា​ប្រទេស​ក្នុង​តំបន់​អាស៊ាន នៅ​អំឡុង​ពេល​ទៅ​ចូលរួម​កិច្ចប្រជុំ​កំពូល​អាស៊ាន​លើក​ទី​៤៣ និង​កិច្ចប្រជុំ​ពាក់ព័ន្ធ​នៅ​ប្រទេស​ឥណ្ឌូនេស៊ី។

ក្នុង​ជំនួប​ពិភាក្សា​ទ្វេភាគី​ជាមួយ​មេដឹកនាំ​បណ្ដា​ប្រទេស​មួយ​ចំនួន ដូចជា​ប្រធានាធិបតី​ឥណ្ឌូនេស៊ី លោក ចូកូ វីដូដូ នាយករដ្ឋមន្ត្រី​ម៉ាឡេស៊ី លោក អាន់វ៉ា អ៊ីប្រាហ៊ីម និង​មេដឹកនាំ​អាស៊ាន​មួយ​ចំនួន​ទៀត ដោយ​ផ្ដោត​ទៅ​លើ​ការ​បង្កើន​កិច្ច​សហប្រតិបត្តិការ​ពាណិជ្ជកម្ម ការ​វិនិយោគ ការ​អប់រំ សន្តិសុខ ថាមពល ក្នុង​ទិដ្ឋភាព​នយោបាយ ការងារ ការ​ផ្សារភ្ជាប់​វិស័យ​ឯកជន​តាមរយៈ​សភា​ពាណិជ្ជកម្ម ជាដើម។

ក្រៅពី​នោះ លោក ហ៊ុន ម៉ាណែត និង​មេដឹកនាំ​ទាំងនោះ ក៏​ប្ដេជ្ញា​បង្កើន​កិច្ច​សហប្រតិបត្តិការ​ទប់ស្កាត់ ការ​ប្រយុទ្ធ​ប្រឆាំង​ភេរវកម្ម និង​ប្រយុទ្ធ​ប្រឆាំង​នឹង​ឧក្រិដ្ឋកម្ម​ឆ្លងដែន​ផង​ដែរ។

ការ​បង្កើន​កិច្ច​សហប្រតិបត្តិការ​នេះ ស្រប​ពេល​ដែល​ឧក្រិដ្ឋកម្ម​ឆ្លងដែន​នៅ​កម្ពុជា​បាន​កើនឡើង បន្ទាប់ពី​មាន​ចំនួន​វិនិយោគិន​ចិន និង​ពលករ​ចំណាកស្រុក​មាន​ការ​កើនឡើង​នៅ​កម្ពុជា។

ជាក់ស្ដែង​រយៈពេល​ប៉ុន្មាន​ឆ្នាំ​ចុងក្រោយ​នេះ កម្ពុជា​ត្រូវ​បាន​ប្រើប្រាស់​ជា​កន្លែង​បោក​បញ្ឆោត​តាម​ប្រព័ន្ធ​អ៊ីនធឺណិត (Scam) ដោយ​ប្រើប្រាស់​កម្លាំង​ពលកម្ម​បរទេស​ធ្វើការ​នៅ​តាម​អគារ​ខ្ពស់ៗ​នៅ​កម្ពុជា រហូត​មាន​សេចក្តី​រាយការណ៍​អំពី​ការ​បង្ខាំង​ទុក​ពួកគេ​មិន​ឲ្យ​មាន​សេរីភាព ធ្វើ​ទារុណកម្ម និង​ជំរិត​ទារ​ប្រាក់ ជាដើម។

អតីត​រដ្ឋមន្ត្រី​ក្រសួង​មហាផ្ទៃ លោក ស ខេង កាលពី​ថ្ងៃទី​២២ ខែ​សីហា ឆ្នាំ​២០២២ បាន​បញ្ជា​ទៅ​អាជ្ញាធរ​ពាក់ព័ន្ធ​នានា​ត្រៀម​ចុះ​ពិនិត្យ​អគារ​នានា​នៅ​ទូទាំង​ប្រទេស ខណៈ​មាន​សេចក្តី​រាយការណ៍​ថា កម្ពុជា​ត្រូវ​បាន​ប្រើប្រាស់​ជា​កន្លែង​ជួញដូរ​មនុស្ស​តាមរយៈ​ការ​ប្រើប្រាស់​កម្លាំង​បរទេស​ឲ្យ​ធ្វើការ​ជា​អ្នក​ឆបោក​តាម​បច្ចេកវិទ្យា ឬ​ហៅថា Scam។

កាលពី​ពេល​ថ្មីៗ​នេះ ឧត្ដមស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស បាន​ចេញ​របាយការណ៍​មួយ​កាលពី​ថ្ងៃទី​២៩ ខែ​សីហា ឆ្នាំ​២០២៣ ថា មនុស្ស​ប្រហែល ១០​ម៉ឺន​នាក់​រង​ការ​បង្ខំ​ឲ្យ​ធ្វើការ​ខុស​ច្បាប់​នៅ​កម្ពុជា។

ចំណែក​សហរដ្ឋ​អាមេរិក​វិញ ក៏​បាន​ទម្លាក់​កម្ពុជា​ពី​ចំណាត់ថ្នាក់​កម្រិត​ពីរ (Tier 2) មក​កម្រិត​បី (Tier 3) ដែល​ជា​ចំណាត់ថ្នាក់​ទាប​បំផុត​មួយ​ក្នុង​ការ​ទប់ស្កាត់​អំពើ​ជួញដូរ​មនុស្ស។

របាយការណ៍​របស់​ក្រសួង​ការបរទេស​អាមេរិក បញ្ជាក់​ថា កម្ពុជា​ដើរ​ថយក្រោយ និង​គ្មាន​ឆន្ទៈ​ក្នុង​ការ​លុបបំបាត់​ការ​ជួញដូរ​មនុស្ស ដោយសារតែ​បញ្ហា​អំពើពុករលួយ​ជា​ប្រព័ន្ធ​ដែល​បាន​រារាំង​ដល់​ការ​អនុវត្ត​ច្បាប់​លើ​ក្រុម​ជនល្មើស​ដែល​ជាប់​ពាក់ព័ន្ធ​នឹង​ករណី​ជួញដូរ​មនុស្ស​នៅ​កម្ពុជា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស