ប្រធានាធិបតីសហរដ្ឋអាមេរិកលោក ចូ បៃដិន (Joe Biden) បានធ្វើដំណើរទៅចូលរួមកិច្ចប្រជុំកំពូលប្រទេស G-20 ក្នុងប្រទេសឥណ្ឌា ដែលប្រព្រឹត្តឡើងនៅចុងសប្តាហ៍នេះ ដោយមានគោលដៅធំៗជាច្រើនដោយក្តីសង្ឃឹមថា ក្រុមប្រទេសមានសេដ្ឋកិច្ចជឿនលឿន និងប្រទេសកំពុងអភិវឌ្ឍទាំង ២០ អាចធ្វើការរួមគ្នាដោះស្រាយលើបញ្ហាធំៗដែលពិភពលោកកំពុងជួបវិបត្តិ។ នេះបើយោងតាមសេតវិមាន ដែលបានប្រកាសឱ្យដឹងកាលពីថ្ងៃអង្គារ។
តែទោះជាយ៉ាងណា មេដឹកនាំកំពូលពីរនាក់មិនមានវត្តមានទេ គឺលោកប្រធានាធិបតីចិន ស៊ី ជីនពីង និងលោក វ្លាឌីមៀ ពូទីន បុរសខ្លាំងនៅក្រុងមូស្គូ។ នេះបើតាមទីភ្នាក់ងារសារព័ត៌មាន AFP ចុះផ្សាយនៅថ្ងៃសុក្រ ទី៨ ខែសីហា។
នៅមុនការចេញដំណើរទៅប្រទេសឥណ្ឌា មានមន្ទិលអំពីសុខភាពរបស់លោកប្រធានាធិបតី ក្រោយពីភរិយារបស់លោក គឺអ្នកស្រី Jill Biden បានធ្វើតេស្ដឃើញវិជ្ជមានកូវីដ-១៩។ តែតាមអ្នកនាំពាក្យសេតវិមាន អ្នកស្រី Karine Jean-Pierre លោក Biden គ្មានចេញរោគសញ្ញាអ្វីទេ ហើយសុខភាពលោក បៃដិន មិនមានបញ្ហាអ្វីទេ។
អ្នកស្រីបន្ថែមថា លោក Biden បានធ្វើតេស្ដឃើញអវិជ្ជមានកាលពីព្រឹកថ្ងៃអង្គារ ហើយនឹងធ្វើតេស្ដម្ដងទៀតតាមកាលកំណត់ដោយវេជ្ជបណ្ឌិតរបស់លោក ក៏ពុំឃើញមានរោគសញ្ញាកូវីដដែរ។
ជាមួយគ្នានេះ ទីប្រឹក្សាសន្តិសុខជាតិលោក Jake Sullivan បាននិយាយថា ប្រតិភូរបស់លោក Biden នឹងផ្ដោតលើបញ្ហាមួយចំនួនដូចជាការប្រែប្រួលអាកាសធាតុ ការរៀបចំបំណុលឡើងវិញ និងបញ្ហាដ៏សំខាន់ គឺសង្គ្រាមនៅអ៊ុយក្រែន។
តាមប្រភពរបស់ AFP កិច្ចប្រជុំកំពូលនៃមេដឹកនាំ G-20 ចាប់ផ្តើមនៅថ្ងៃសៅរ៍ក្នុងរដ្ឋធានីញូវដែលី នៃប្រទេសឥណ្ឌា។ លោក Sullivan បញ្ជាក់ថា កិច្ចប្រជុំកំពូល G-20 នេះនឹងបង្ហាញថា ប្រទេសមានសេដ្ឋកិច្ចជឿនលឿនលើពិភពលោកអាចធ្វើការជាមួយគ្នាគ្រាដែលពិភពលោកប្រឈមនឹងវិបត្តិធំដូចជាសង្គ្រាមនៅអ៊ុយក្រែន ជាដើម។
កាលពីជំនួបកំពូលរបស់ប្រទេស G-20 នៅប្រទេសឥណ្ឌូនេស៊ី ធ្វើឡើងនៅកោះបាលី នៅក្នុងខែវិច្ឆិកា ឆ្នាំ២០២២ ប្រធានាធិបតីចិន លោក ស៊ី ជីនពីង មានវត្តមាន តែលោក វ្លាឌីមៀ ពូទីន ពុំមានវត្តមានទេ។ លោក ពូទីន នៅឆ្នាំ២០២៣ នេះ ក៏ពុំមានវត្តមានដែរ។
តែមេដឹកនាំវិមានក្រឹមឡាំងរូបនេះចាត់តាំងលោក ហ្សេហ្គេ ឡារ៉ូវ ទៅជំនួសលោក គឺដូចឆ្នាំទៅមិញដែរ។ នាយករដ្ឋមន្ត្រីឥណ្ឌា លោក Narendra Modi គឺជាម្ចាស់ផ្ទះ និងជាអ្នកសម្របសម្រួលកិច្ចប្រជុំ។
តែសម្រាប់លោក បៃដិន និយាយថា លោកមានការខកចិត្តដែរចំពោះមេដឹកនាំចិន មិនមកចូលរួមកិច្ចប្រជុំកំពូលនេះ។ លោកប្រធានាធិបតីចិន ស៊ី ជីនពីង មិនអញ្ជើញមកចូលរួមក្នុងជំនួបកំពូល G-២០ ក្នុងឆ្នាំនេះនៅប្រទេសឥណ្ឌា ទេ។
ដូច្នេះគ្មានទេការជួបពិភាក្សាមួយទល់នឹងមួយរវាងលោក បៃដិន និងលោក ស៊ី ដូចកាលនៅជំនួបកំពូលក្រុងបាលី កាលពីឆ្នាំទៅ។
ចំណែកលោក ពូទីន វិញ អវត្តមានពីរឆ្នាំជាប់គ្នាហើយ។ តែគេថាលោក ចូ បៃដិន សម្លឹងឃើញអវត្តមានរបស់មេដឹកនាំរុស្ស៊ី និងចិន ជាប្រយោជន៍សម្រាប់អាមេរិកទៅវិញទេ។ បើប្រធានាធិបតីចិន មក ឥណ្ឌាអាចនឹងមិនសូវមានទទួលស្វាគមន៍ច្រើនទេ។
ក្រុមអ្នកវិភាគនិយាយថា ទោះជាអវត្តមានមេដឹកនាំសំខាន់ពីររូប គឺប្រធានាធិបតីរុស្ស៊ីលោក ពូទីន និងលោក ស៊ី ជីនពីង នឹងមិនប៉ះពាល់ដល់ដំណើរការកិច្ចប្រជុំនោះទេ។ តែអ្នកវិភាគព្រមានថា អាចនឹងពុំមានសេចក្ដីថ្លែងការណ៍រួមទេចំពោះវិបត្តិធំៗដែលពិភពលោកកំពុងប្រឈមដូចជាសង្គ្រាមរុស្ស៊ីឈ្លានពានអ៊ុយក្រែន ជាដើម។
គេនៅចាំបានថា កាលពីជំនួបថ្នាក់រដ្ឋមន្ត្រីសេដ្ឋកិច្ច G-20 ក៏មិនអាចចេញសេចក្ដីថ្លែងការណ៍រួមបានដែរ ដោយសារសង្គ្រាមរុស្ស៊ីឈ្លានពានអ៊ុយក្រែន ក្នុងកិច្ចប្រជុំរយៈពេល ២ថ្ងៃនៃក្រុមរដ្ឋមន្ត្រីសេដ្ឋកិច្ចមកពីប្រទេសសេដ្ឋកិច្ចជឿនលឿន G-20 ដែលធ្វើឡើងនៅលើទឹកដីនៃប្រទេសឥណ្ឌា កាលពីថ្ងៃទី១៨ ខែកក្កដាឆ្នាំ២០២៣ ពេលនោះបានបិទបញ្ចប់ដោយពុំអាចចេញសេចក្ដីថ្លែងការណ៍រួម ដើម្បីធ្វើការបូកសរុបលទ្ធផលនៃកិច្ចប្រជុំដោយសារតែមានការខ្វែងគំនិតគ្នាខ្លាំងឈានដល់ការបែងចែកបក្ខពួក ព្រោះតែករណីសង្គ្រាមរុស្ស៊ីឈ្លានពានអ៊ុយក្រែន។
អំឡុងកិច្ចប្រជុំនៅពេលនោះ ឥណ្ឌាដែលជាប្រធាន G-20 ឆ្នាំ២០២៣ នេះ បានព្យាយាមបង្កើតការឯកភាពគ្នាលើកំណែទម្រង់ក្នុងវិស័យធនាគារពហុភាគី នាំទៅរកគោលការណ៍ណែនាំសកលស្ដីពីរូបិយប័ណ្ណ Crypto និងសំដៅពន្លឿនការដោះស្រាយបំណុលរបស់ប្រទេសងាយរងគ្រោះ ប៉ុន្តែវិបត្តិជម្លោះរុស្ស៊ី-អ៊ុយក្រែន បានក្លាយជាស្រមោលលើការងារការទូតរបស់ពិភពលោកដ៏តានតឹង។
ក្នុងជំនួបនោះ គេសង្កេតឃើញប្រទេសលោកខាងលិចភាគច្រើន រួមទាំងសហរដ្ឋអាមេរិក ចក្រភពអង់គ្លេស អាល្លឺម៉ង់ និងបារាំង បានជំរុញឲ្យមានការថ្កោលទោសយ៉ាងម៉ឺងម៉ាត់ចំពោះរុស្ស៊ី ដែលបង្កើតសង្គ្រាមឈ្លានពានប្រទេសអ៊ុយក្រែន។
តែក្នុងនោះ រុស្ស៊ី និងចិន បានជំទាស់ ហើយឥណ្ឌា ក្នុងនាមជាប្រទេសម្ចាស់ផ្ទះ មិនអាចធ្វើសេចក្តីព្រាងសេចក្តីប្រកាសចុងក្រោយ ដែលអាចទទួលយកបានសម្រាប់គ្រប់សមាជិកទាំងអស់បាននោះទេ ខណៈប្រទេសមួយចំនួនទទូចឲ្យហៅជម្លោះនោះថាជាសង្គ្រាមឈ្លានពាន។
សម្រាប់រុស្ស៊ីខ្លួនគេផ្ទាល់ បានស្នើឱ្យហៅថាប្រតិបត្តិការសឹកពិសេស។ មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែន ក្រោមប្រតិបត្តិការសឹកពិសេសនេះឈានចូល ១៩ខែហើយ៕