29 C
Phnom Penh

សមាជិក​សភា​ថៃ​សួរ​ដេញដោល​ពី​គោលនយោបាយ​ជួយ​សម្រាល​បំណុល​និង​ប្រាក់​មួយ​ម៉ឺន​បាត​ឱ្យ​ពលរដ្ឋ​ម្នាក់ៗ

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ថ្មី​នៃ​រាជាណាចក្រ​ថៃ កាលពី​ថ្ងៃ​ចន្ទ ទី​១១ ខែ​កញ្ញា បាន​ព្យាយាម​ពន្យល់​សមាជិក​សភា​អំពី​គោលនយោបាយ​ស្រោចស្រង់​សេដ្ឋកិច្ច​ថៃ ដែល​សមាជិក​សភា​ក្រុម​បក្ស​ប្រឆាំង​មកពី​គណបក្ស​ចលនា​ឆ្ពោះ​ទៅ​មុខ និង​បក្ស​ប្រជាធិបតេយ្យ បាន​ចោទ​សួរ​ថា តើ​គោលនយោបាយ​នេះ​អាច​ដំណើរការ​ដោយ​រលូន និង​មាន​តម្លាភាព​ដែរ​ឬ​ទេ?

រដ្ឋាភិបាល​ថ្មី​នៃ​រាជាណាចក្រ​ថៃ ដែល​ដឹកនាំ​ដោយ​លោក ស្រេតថា ថាវិស៊ីន ជា​នាយករដ្ឋមន្ត្រី​មកពី​បក្ស​ភឿថៃ លោក​បាន​ដាក់​ចុះ​នូវ​គោលនយោបាយ​ដើម្បី​ជួយ​សម្រាល​ទុក្ខ​លំបាក​របស់​ប្រជាជន​ថៃ ដោយសារ​សេដ្ឋកិច្ច​រង​ផល​ប៉ះពាល់​ពី​ជំងឺ​រាតត្បាត​កូវីដ-១៩ រយៈពេល ៣​ឆ្នាំ។

ក្នុង​គោលនយោបាយ​នោះ រដ្ឋាភិបាល​ចម្រុះ ១១​បក្ស​នោះ​មាន​ផែនការ​នឹង​ធ្វើការ​ពិនិត្យ​ឡើងវិញ​ជា​បន្ទាន់ ដោយ​ការ​ទម្លាក់​ថ្លៃ​ប្រេងសាំង ថ្លៃ​ប្រេងឥន្ធនៈ​ផ្សេងៗ ថ្លៃ​ភ្លើង​អគ្គិសនី និង​ការ​បញ្ចេញ​កញ្ចប់​ថវិកា​រាប់​ពាន់​លាន​បាត ដើម្បី​ជួយ​ដល់​ប្រជាជន​ថៃ។

តាមរយៈ​គោលនយោបាយ​នេះ ប្រជាជន​ថៃ​ច្រើន​លាន​នាក់​ដែល​មាន​អាយុ​ចាប់ពី ១៦​ឆ្នាំ​ឡើង​ទៅ នឹង​ទទួល​ប្រាក់​មួយ​ម៉ឺន​បាត ឬ​ស្មើ​នឹង ២៨២​ដុល្លារ​ក្នុង​ម្នាក់ៗ។ ជាមួយ​គ្នា​នេះ រដ្ឋាភិបាល​ចម្រុះ​ដែល​ដឹកនាំ​ដោយ​លោក ស្រេតថា ថាវិស៊ីន ក៏​បាន​ដាក់​ចេញ​នូវ​ផែនការ​ទាក់ទាញ​អ្នក​ទេសចរ​បរទេស​ឱ្យ​មាន​សន្ទុះ​ខ្លាំង​ថែម​ទៀត។

នៅ​ក្នុង​ការ​ថ្លែង​អំពី​គោលនយោបាយ​របស់​លោក​ទៅ​កាន់​សភា​ជា​លើកដំបូង​នៅ​ថ្ងៃទី​១១ ខែ​កញ្ញា ក្រោយ​ចូល​កាន់​តំណែង​នាយករដ្ឋមន្ត្រី លោក ស្រេតថា ថាវិស៊ីន បាន​លើកឡើង​ថា ពេលនេះ​សេដ្ឋកិច្ច​ថៃ កំពុង​មាន​ភាព​ផុយ​ស្រួយ​ដោយ​បំណុល​របស់​ប្រជាជន​មាន​កម្រិត​ខ្ពស់​ខ្លាំង។ ត្រង់​ចំណុច​នេះ លោក ស្រេតថា ដែល​ជា​រដ្ឋមន្ត្រី​ហិរញ្ញវត្ថុ​ផង​ដែរ ក៏​បាន​បញ្ជាក់​ដែរ​ថា បំណុល​របស់​ប្រជាជន​បាន​កើន​ដល់ ៩១% បើ​ធៀប​នឹង​ផលទុន​ក្នុង​ស្រុក​សរុប GDP ហើយ​បំណុល​សាធារណៈ​បាន​កើន​ដល់ ៦១% នៃ​ផលទុន​សរុប។

ដោយ​មើល​ឃើញ​ដូចនេះ លោក ស្រេតថា បាន​ប្ដេជ្ញា​ដោះស្រាយ​បញ្ហា​បំណុល​របស់​កសិករ បំណុល​សាធារណៈ សហគ្រាស​ធុន​តូច និង​មធ្យម និង​ប្រជាជន​ថៃ ដែល​ជួប​ផលវិបាក។ លោក ស្រេតថា បាន​ទទូច​ថា ការ​ដោះស្រាយ​បំណុល​ដែល​កសិករ​បាន​ខ្ចី​ធនាគារ ឬ​ប្រភព​ហិរញ្ញវត្ថុ​ផ្សេងៗ អាច​រួម​បញ្ចូល​នឹង​ការ​ពន្យារ​ពេល​ការ​សង​ថ្លៃ​ដើម និង​ការប្រាក់។ លោក ស្រេតថា ពន្យល់​សមាជិក​សភា​ថា សេដ្ឋកិច្ច​ថៃ កំពុង​ជួប​បញ្ហា​ប្រឈម​ជាច្រើន ខណៈ​ចំនួន​ទេសចរ​បរទេស​មិន​មាន​ការ​ហក់​ឡើង ដែល​អាច​ធ្វើ​ឱ្យ​សេដ្ឋកិច្ច​ថៃ​បន្ត​ជួប​ឱនភាព។

ជាមួយ​នឹង​ការ​ពន្យល់​ដូចនេះ លោក ស្រេតថា បាន​បញ្ជាក់​ថា លោក​បាន​ត្រៀម​ខ្លួន​ជា​ស្រេច​ក្នុង​ការ​ដាក់​ចេញ​វិធានការ​ជួយ​ជំរុញ​សេដ្ឋកិច្ច ដោយ​ក្នុង​នោះ​រួម​ទាំង​ការ​ផ្តល់​ប្រាក់ ១​ម៉ឺន​បាត ឬ ២៨២​ដុល្លារ​ដល់​ពលរដ្ឋ​ថៃ​ដែល​មាន​អាយុ​ចាប់ពី ១៦​ឆ្នាំ​ឡើង​ទៅ។

ជាមួយ​គ្នា​នេះ លោក​បន្ត​បញ្ជាក់​ថា រដ្ឋាភិបាល​របស់​លោក​នឹង​កាត់​បន្ថយ​តម្លៃ​ប្រេងសាំង ប្រេង​ម៉ាហ្ស៊ូត ហ្គាស៍ និង​អគ្គិសនី។

បើ​តាម​សេចក្ដី​ថ្លែងការណ៍​របស់​លោក ស្រេតថា កសិករ​ថៃ​ប្រើ​ជា​ចាំបាច់​នូវ​ប្រេង​ម៉ាហ្ស៊ូត​ដែល​លោក​ថា រដ្ឋាភិបាល​នឹង​កំណត់​តម្លៃ​របស់​វា​ត្រឹមតែ ៣១​បាត​ប៉ុណ្ណោះ។ លោក​បន្ត​ថា លោក​សូម​ប្ដេជ្ញា​ថា​នឹង​ធ្វើ​ឱ្យ​សេដ្ឋកិច្ច​មាន​សន្ទុះ​យ៉ាងតិច ៥% ជា​រៀង​រាល់​ឆ្នាំ។

ក្នុង​ស្ថានភាព​ដែល​មាន​ការ​សួរ​ដេញដោល​ខ្លាំង​ពី​សមាជិក​សភា​មកពី​ក្រុម​បក្ស​ប្រឆាំង លោក ស្រេតថា ស្នើ​ឱ្យ​មាន​ការ​ទុកចិត្ត​មក​លើ​រដ្ឋាភិបាល​របស់​លោក ដោយ​ប្ដេជ្ញា​ថា​នឹង​ធ្វើ​ឱ្យ​បាន​តាម​គោលនយោបាយ​ថ្មី​នេះ។

ប៉ុន្តែ​សមាជិក​សភា​នៃ​ក្រុម​បក្ស​ចលនា​ឆ្ពោះ​ទៅ​មុខ រិះគន់​ថា មាន​ភាព​មិន​ច្បាស់លាស់ មិន​មាន​ពេលវេលា​អនុវត្ត​ឱ្យ​បាន​ត្រឹមត្រូវ ពុំ​មាន​គម្រោង​ច្បាស់លាស់ និង​ពុំ​មាន​ការ​បង្ហាញ​ទំហំ​សាច់ប្រាក់​ដែល​ត្រូវ​ជួយ​សម្រាល​បន្ទុក​របស់​ប្រជាជន​ថៃ។

តែ​បើ​តាម​ប្រភព​ក្រៅ​ផ្លូវការ ទំហំ​ថវិកា​ចំណាយ​ទៅ​លើ​ពលរដ្ឋ​ម្នាក់ៗ​ពី​អាយុ ១៦​ឆ្នាំ​ឡើង​ទៅ អាច​ត្រូវ​ចំណាយ​រហូត​ដល់​ទៅ ៥៦០​ពាន់​លាន​បាត​ឯណោះ។

អ្នកស្រី Sirikanya Tansakul អនុប្រធាន​បក្ស​ចលនា​ឆ្ពោះ​ទៅ​មុខ បាន​ហៅ​គោលនយោបាយ​របស់​នាយករដ្ឋមន្ត្រី ស្រេតថា ថា​ល្អ ព្រោះ​បាន​បញ្ជាក់​ពី​ទិសដៅ និង​វិធីសាស្ត្រ​ក្នុង​ការ​អនុវត្ត​គោលនយោបាយ​ឱ្យ​បាន​សម្រេច។ តែ​សមាជិក​សភា​រូប​នេះ​ព្រមាន​ថា ការ​បញ្ចេញ​កញ្ចប់​ថវិកា​ផ្ដល់​ពលរដ្ឋ​ថៃ​ម្នាក់​មួយ​ម៉ឺន​បាត ប្រយ័ត្ន​រុញ​សេដ្ឋកិច្ច​ដាំ​ក្បាល​ចុះ​ថែម​ទៀត។ អ្នកស្រី​សរសើរ តែ​ទាមទារ​ឱ្យ​មាន​ការ​ប្រុងប្រយ័ត្ន។

អ្នកស្រី Sirikanya Tansakul បន្ត​ថា គោលនយោបាយ​នេះ​មិន​ខុសពី​ឯកសារ​របស់​បក្ស​ភឿថៃ ដែល​ត្រូវ​បាន​បញ្ចេញ​ក្នុង​ការ​ឃោសនា​រក​សន្លឹកឆ្នោត​នោះ​ទេ។

តែ​ជាមួយ​គ្នា​នេះ សមាជិក​សភា​មកពី​ក្រុម​បក្ស​ប្រជាធិបតេយ្យ លោក Jurin Laksanawisit ដែល​ធ្លាប់​កាន់​តំណែង​រដ្ឋមន្ត្រី​ពាណិជ្ជកម្ម បាន​ចោទ​សួរ​ថា តើ​ជា​ល្បែង​ប្រជាភិថុតិ​ឬ​ទេ ព្រោះតែ​ត្រូវការ​សន្លឹកឆ្នោត​ពី​ប្រជាជន។ លោក​អះអាង​ថា បក្ស​របស់​លោក​បាន​មើល​ឃើញ​ថា ប្រាក់ខែ​អ្នក​រាជការ​ថ្នាក់​ទាប​គួរតែ​ហក់​ឡើង​ជាង ២​ម៉ឺន ៥​ពាន់​បាត ដែល​បក្ស​ប្រជាធិបតេយ្យ​បាន​កំណត់​ក្នុង​គោលនយោបាយ​របស់​ខ្លួន​ផង​ដែរ។

នៅ​ក្នុង​រដ្ឋសភា​ថៃ បក្ស​ប្រឆាំង​មាន​ពីរ​បក្ស គឺ​បក្ស​ចលនា​ឆ្ពោះ​ទៅ​មុខ (MFP) ដែល​មាន​សមាជិក​សភា ១៥១​នាក់ និង​បក្ស​ប្រជាធិបតេយ្យ (DP) មាន ២៥​នាក់។ រដ្ឋសភា​ថៃ មាន​សមាជិក​សរុប ៥០០​រូប៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស