35 C
Phnom Penh

អាមេរិក​នឹង​ប្រគល់​វត្ថុ​បុរាណ​ខ្មែរ​៣៣​ដុំ​ឱ្យ​កម្ពុជា​បន្ទាប់ពី​រឹបអូស​ពី​គ្រួសារ Lindemann នៅ​អាមេរិក

ដោយ ឌឹ ខេមបូឌា ដេលី

បទវិភាគ

អាជ្ញាធរ​សហរដ្ឋ​អាមេរិក នឹង​ប្រគល់​វត្ថុ​បុរាណ​ខ្មែរ​ចំនួន ៣៣​ដុំ​ឲ្យ​មក​ប្រទេស​កម្ពុជា​វិញ បន្ទាប់ពី​រឹបអូស​បាន​ពី​គ្រួសារ Lindemann នៅ​សហរដ្ឋ​អាមេរិក ខណៈ​វត្ថុ​បុរាណ​នេះ​ត្រូវ​បាន​ចោរ​លួច​យក​ចេញពី​កម្ពុជា​ក្នុង​អំឡុង​ទសវត្សរ៍​១៩៩០។

ក្នុង​សេចក្ដី​ជូនដំណឹង​របស់​ក្រសួង​វប្បធម៌ និង​វិចិត្រសិល្បៈ ចុះ​ថ្ងៃទី​១៣ ខែ​កញ្ញា ឆ្នាំ​២០២៣ ឲ្យ​ដឹង​ថា មុន​នឹង​ដកហូត​រូប​ចម្លាក់ រដ្ឋាភិបាល​សហរដ្ឋ​អាមេរិក​តាមរយៈ​ការិយាល័យ​រដ្ឋអាជ្ញា​ប្រចាំ​សង្កាត់​ភាគ​ខាងត្បូង​នៃ​ក្រុង​ញូវយ៉ក ឬ​ហៅ​កាត់​ថា “USAO-SDNY” និង​ការិយាល័យ​ស៊ើបអង្កេត​សន្តិសុខ​មាតុភូមិ បាន​ឈាន​ដល់​កិច្ចព្រមព្រៀង​ជាមួយ​អ្នក​កាន់កាប់​សមុច្ច័យ​ឯកជន គឺ​គ្រួសារ Lindemann ទាក់ទង​នឹង​វត្ថុ​បុរាណ​ខ្មែរ​ចំនួន​៣៣។

វត្ថុ​បុរាណ​ខ្មែរ​ទាំង ៣៣​ដុំ សហរដ្ឋ​អាមេរិក​នឹង​ប្រគល់​មក​ឲ្យ​កម្ពុជា​វិញ ក្នុង​នោះ​មាន​បដិមា​ព្រះវិស្ណុ និង​បដិមា​អឌ្ឍនារីស្វរ/អធ៌នារីស្វរ (មួយ​ចំហៀង​ជា​ភេទ​ប្រុស និង​មួយ​ចំហៀង​ជា​ភេទ​ស្រី) ដែល​គេ​ជឿជាក់​ថា​មាន​ប្រភព​មកពី​ប្រាសាទ​ក្រចាប់ ស្ថិត​ក្នុង​អតីត​រាជធានី​កោះកេរ។

ក្រសួង​ថា យោង​តាម​សាក្សី រូប​ចម្លាក់​ទាំងនេះ​ត្រូវ​បាន​លួច​យក​ចេញ​ក្នុង​ទសវត្សរ៍​១៩៩០ ជា​ប្រាសាទ​តែ​មួយ​ដែល​តម្កល់​បដិមា​ព្រះឥសូរ និង​ព្រះស្កន្ទ និង​បដិមា​ព្រះស្កន្ទ​គង់​លើ​ក្ងោក។

ក្នុង​ចំណោម​វត្ថុ​ដែល​ប្រគល់​មក​វិញ​នេះ ក៏​មាន​ចម្លាក់​ទេព​មួយ​អង្គ​ដែល​គេ​ជឿ​ថា​ជា​បដិមា​ព្រះធូស្ថទ្យុមន៍ (មេទ័ព​នៃ​បណ្ឌពក្សត្រ) ដែល​មាន​ប្រភព​មកពី​ប្រាសាទ​ចិន ក្នុង​រមណីយដ្ឋាន​ប្រាសាទ​កោះកេរ ផង​ដែរ។

ប្រភព​ដដែល​ថា ក្នុង​កិច្ច​សហការ​រវាង​រដ្ឋាភិបាល​នៃ​ប្រទេស​ទាំង​ពីរ និង​ការ​ខិតខំ​ប្រឹងប្រែង​អស់​រយៈពេល​ជាង​បី​ឆ្នាំ​មក​នេះ ដោយ​ទទួល​បាន​រូប​ចម្លាក់​ជា​បន្តបន្ទាប់ ក្នុង​នោះ​រូប​ចម្លាក់​ព្រះធូស្ថទ្យុមន៍ គឺជា​បដិមា​ដ៏​សំខាន់​មួយ​សម្រាប់​បេតិកភណ្ឌ​វប្បធម៌​នៃ​មនុស្ស​ជាតិ​ក្នុង​ចំណោម​បដិមា​ទេព​ទាំង ៩​អង្គ​ដែល​មាន​ប្រភព​មកពី​ប្រាសាទ​ចិន នៅ​កោះកេរ។

បដិមា​ព្រះធូស្ថទ្យុមន៍ នេះ ត្រូវ​បាន​គេ​លួច​នៅ​ក្នុង​អំឡុង​ពេល​សង្គ្រាម​ស៊ីវិល ហើយ​បាន​ដាក់​លក់​ដេញ​ថ្លៃ​នៅ​ឆ្នាំ​១៩៩៤ ដោយ​ក្រុមហ៊ុន Chinese Porcelain Company ដែល​មាន​មូលដ្ឋាន​នៅ​ទីក្រុង​ញូវយ៉ក។

ក្រោយ​មក រូបភាព​បដិមា​នេះ​ត្រូវ​បាន​បង្ហាញ​នៅ​ក្នុង​ទស្សនាវដ្ដី Architectural Digest ខណៈ​បដិមា​សំខាន់ៗ​ចំនួន​ពីរ​ទៀត​ដែល​មាន​ប្រភព​មកពី​ប្រាសាទ​ក្រចាប់ នៅ​កោះ​កេរ នឹង​ត្រូវ​ប្រគល់​ត្រឡប់​មក​វិញ​ដែរ គឺ​បដិមា​ព្រះវិស្ណុ​ផ្ទំ និង​បដិមា​អឌ្ឍនារីស្វរ ដែល​ត្រូវ​បាន​លួច​ក្នុង​ឆ្នាំ​១៩៩៧។

សម្រាប់​បដិមា​ព្រះវិស្ណុ​ផ្ទំ​វិញ ត្រូវ​បាន​គេ​លួច​យក​ចេញពី​តួ​ប៉ម​កណ្ដាល​នៃ​ប្រាសាទ​ក្រចាប់ ដែល​មាន​សារសំខាន់​នៃ​ព្រះសិរ្សអសុរា និង​ទេព ដែល​មាន​អាយុកាល​ក្នុង​សម័យ​អង្គរ​នៃ​រាជ្យ​ព្រះមហាក្សត្រ​ដ៏​អស្ចារ្យ​បំផុត​មួយ គឺ​ព្រះបាទ​ជ័យវរ្ម័ន​ទី​៧។

នេះ​មិនមែន​ជា​លើក​ទី​១ ដែល​សហរដ្ឋ​អាមេរិក​ប្រគល់​វត្ថុ​បុរាណ​ឲ្យ​ប្រទេស​កម្ពុជា​វិញ កន្លងមក រដ្ឋាភិបាល​សហរដ្ឋ​អាមេរិក​តែងតែ​យក​វត្ថុ​បុរាណ ឬ​ចម្លាក់​របស់​ខ្មែរ​ប្រគល់​ជូន​កម្ពុជា បន្ទាប់ពី​សមត្ថកិច្ច​អាមេរិក​រឹបអូស​បាន។

ក្រៅពី​សហរដ្ឋ​អាមេរិក ថ្មីៗ​កាលពី​ថ្ងៃទី​៤ ខែ​កញ្ញា ឆ្នាំ​២០២៣ រដ្ឋាភិបាល​បារាំង ក៏​បាន​ប្រគល់​ចម្លាក់​លិប​មួយ​ផ្ទាំង​ដែល​ត្រូវ​បាន​ភ្នាក់ងារ​គយ​បារាំង​រឹបអូស​បាន ដល់​កម្ពុជា​វិញ បន្ទាប់ពី​ចម្លាក់​នេះ​ត្រូវ​បាន​គេ​លួច​កាលពី​ដើម​ទសវត្សរ៍​ឆ្នាំ​១៩៩០ និង​ត្រូវ​បាន​ភ្នាក់ងារ​គយ​បារាំង​រឹបអូស​បាន​នៅ​ក្នុង​ប្រតិបត្តិការ​ចុះ​ត្រួតពិនិត្យ​ទីតាំង​របស់​ក្រុមហ៊ុន​លក់​ដេញថ្លៃ​វត្ថុ​បុរាណ​មួយ​កន្លែង​នៅ​ទីក្រុង​លីយ៉ុង កាលពី​ខែ​កុម្ភៈ ឆ្នាំ​២០២០។

ចម្លាក់​លិប​ដែល​បារាំង​ប្រគល់​ឲ្យ​កម្ពុជា​វិញ​នេះ ជា​ចម្លាក់​ធ្វើ​ពី​ថ្មភក់ មាន​ប្រាំ​បំណែក កសាង​ឡើង​នៅ​សតវត្សរ៍​ទី​១២ ឬ​ទី​១៣ និង​មាន​ទម្ងន់​ប្រហែល ៣០០​គីឡូក្រាម អាច​មាន​ប្រភព​មកពី​ប្រាសាទ​ព្រះខ័ន​កំពង់ស្វាយ ឬ​ពី​ប្រាសាទ​បន្ទាយឆ្មារ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស