 ដែលថាស្ថានភាពសិទ្ធិមនុស្សនៅកម្ពុជាធ្លាក់ចុះជាបន្តបន្ទាប់ ខណៈការបោះឆ្នោតឆ្នាំ២០២៣ ធ្វើឡើងក្រោមការរឹតត្បិតលំហសេរីភាពពលរដ្ឋយ៉ាងធ្ងន់ធ្ងរនោះ ថាគ្មានលក្ខណៈថ្លឹងថ្លែង និងគ្មានការពិត។){kind=link}
រដ្ឋាភិបាលកម្ពុជាច្រានចោលចំពោះការលើកឡើងរបស់អង្គការឃ្លាំមើលសិទ្ធិមនុស្សអន្តរជាតិ Human Rights Watch (HRW) ដែលថាស្ថានភាពសិទ្ធិមនុស្សនៅកម្ពុជាធ្លាក់ចុះជាបន្តបន្ទាប់ ខណៈការបោះឆ្នោតឆ្នាំ២០២៣ ធ្វើឡើងក្រោមការរឹតត្បិតលំហសេរីភាពពលរដ្ឋយ៉ាងធ្ងន់ធ្ងរនោះ ថាគ្មានលក្ខណៈថ្លឹងថ្លែង និងគ្មានការពិត។
ក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី១៤ ខែកញ្ញា ឆ្នាំ២០២៣ បានចេញសេចក្ដីថ្លែងការណ៍របស់ខ្លួនដោយអះអាងថា ទោះបីជាក្រុមបក្សប្រឆាំងមួយចំនួនបានប្រើវោហារសាស្ត្រជេរប្រមាថ បង្កាច់ញុះញង់ឲ្យមានអំពើហិង្សា និងស្អប់ខ្ពើមជាតិសាសន៍ ព្រមទាំងអំពាវនាវឲ្យមានការបះបោរប្រឆាំងរដ្ឋាភិបាលកម្ពុជាក្ដី ក៏អង្គការ Human Rights Watch តែងតែធ្វើមិនដឹងមិនឮដែរ។
ក្រសួងការបរទេសកម្ពុជា ហៅសកម្មភាពរបស់បក្សប្រឆាំងថាមិនមែនជាការបញ្ចេញមតិប្រកបដោយភាពទទួលខុសត្រូវ និងតាមបែបលទ្ធិប្រជាធិបតេយ្យនោះទេ ហើយថាកម្ពុជាបានអនុវត្តចំពោះសិទ្ធិមនុស្សដោយស្មើៗគ្នា ឈរលើជំហរតែមួយ និងមានទម្ងន់ដូចគ្នា។
ចំណែកការបោះឆ្នោតកាលពីខែកក្កដា ឆ្នាំ២០២៣ កន្លងទៅវិញ កម្ពុជាអះអាងថាមានគណបក្សចំនួន ១៨ ចូលរួមប្រកួតប្រជែងគ្នា ហើយមានពលរដ្ឋទៅចូលរួមបោះឆ្នោតជិត ៨៥% បើទោះបីមានការអំពាវនាវឲ្យធ្វើពហិការចំពោះការបោះឆ្នោតពីសំណាក់អ្នកនយោបាយបក្សប្រឆាំងនៅក្រៅស្រុកក្ដី។
ក្រសួងការបរទេសកម្ពុជាបញ្ជាក់ថា ចំនួនពលរដ្ឋដែលទៅចូលរួមបោះឆ្នោតកាលពីខែកក្កដា មានច្រើនលើសលប់ ជាការបញ្ជាក់ពីភាពចាស់ទុំខាងលទ្ធិប្រជាធិបតេយ្យរបស់កម្ពុជា ខណៈអ្នកសង្កេតការណ៍ជាតិ និងអន្តរជាតិដែលតំណាងឲ្យចំនួន ៦៥ប្រទេសដែលចាត់ទុកការបោះឆ្នោតនៅកម្ពុជាបានប្រព្រឹត្តទៅដោយសេរី យុត្តិធម៌ តម្លាភាព និងសន្តិភាព ព្រមទាំងបានប្រកាន់ខ្ជាប់យ៉ាងម៉ឺងម៉ាត់ចំពោះច្បាប់ជាធរមាន។
ការច្រានចោលនេះ ធ្វើឡើងបន្ទាប់ពីក្រុមអង្គការសិទ្ធិមនុស្សអន្តរជាតិបានដាក់លិខិតមួយទៅក្រុមប្រឹក្សាសិទ្ធិមនុស្សនៃអង្គការសហប្រជាជាតិ កាលពីថ្ងៃទី៨ ខែកញ្ញា ដោយស្នើឲ្យអនុម័តដំណោះស្រាយសំខាន់ៗដើម្បីជំរុញទៅរដ្ឋាភិបាលកម្ពុជាឲ្យដោះស្រាយវិបត្តិសិទ្ធិមនុស្សនៅក្នុងប្រទេស។
ការជំរុញឲ្យអនុម័តនេះ ដោយក្រុមអង្គការសិទ្ធិមនុស្សអន្តរជាតិរកឃើញថា រដ្ឋាភិបាលកម្ពុជាបានរំលោភសិទ្ធិមនុស្ស ព្រមទាំងសិទ្ធិពលរដ្ឋ និងនយោបាយក្នុងរយៈពេលពីរឆ្នាំនៅមុនការបោះឆ្នោតកាន់តែធ្ងន់ធ្ងរ។
លិខិតដដែលអះអាងថា រដ្ឋាភិបាលកម្ពុជាបានប្រើប្រាស់ប្រព័ន្ធតុលាការ ដើម្បីបង្ក្រាបក្រុមអ្នកតវ៉ាដោយការផ្ដន្ទាទោសប្រធានសហជីពកញ្ញា ឈឹម ស៊ីថរ និងបុគ្គលិកក្រុមហ៊ុនណាហ្គាវើលដ៍ ព្រមទាំងសកម្មជនសិទ្ធិដីធ្លីនៅខេត្តកោះកុង ហើយនិងមេដឹកនាំគណបក្សប្រឆាំងលោក កឹម សុខា ជាដើម។
ការស្នើរបស់អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (HRW) អង្គការលើកលែងទោសអន្តរជាតិ (Amnesty International) និងអង្គការសិទ្ធិមនុស្សអន្តរជាតិផ្សេងទៀត ធ្វើឡើងមុនពេលតំណាងអចិន្ត្រៃយ៍នៃសមាជិក និងអ្នកសង្កេតការណ៍នៃក្រុមប្រឹក្សាសិទ្ធិមនុស្សអង្គការសហប្រជាជាតិ បើកកិច្ចប្រជុំក្រុមប្រឹក្សាសិទ្ធិមនុស្សលើកទី៥៤ នៅទីក្រុងហ្សឺណែវ (Geneva) ប្រទេសស្វីស ចាប់ពីថ្ងៃទី១១ ខែកញ្ញា ដល់ថ្ងៃទី១៣ ខែតុលា ខាងមុខនេះ៕