26 C
Phnom Penh

ក្រសួង​មហាផ្ទៃ​អនុញ្ញាត​ឱ្យ​តំណាង​គណបក្ស​ភ្លើង​ទៀន​ចូល​ជួប​រឿង​លិខិត​ចុះបញ្ជី​ច្បាប់​ដើម

ដោយ ឌឹ ខេមបូឌា ដេលី

បទវិភាគ

ក្រសួង​មហាផ្ទៃ​អនុញ្ញាត​ឲ្យ​តំណាង​គណបក្ស​ភ្លើង​ទៀន​ចំនួន ៥​រូប​ចូល​ជួប​បន្ទាប់ពី​បាន​ដាក់​សំណើ​កាលពី​ថ្ងៃទី​៧ ខែ​កញ្ញា ឆ្នាំ​២០២៣ ដើម្បី​សុំ​ឲ្យ​រដ្ឋមន្ត្រី​ក្រសួង​មួយ​នេះ​ជួយ​ផ្ដល់​លិខិត​ចុះបញ្ជី​ច្បាប់ដើម​របស់​គណបក្ស។

ថ្នាក់​ដឹកនាំ​របស់​គណបក្ស​ភ្លើង​ទៀន បាន​ដាក់​លិខិត​ជា​ថ្មី​ទៀត​នេះ​ដោយ​ស្នើសុំ​ជួប​រដ្ឋមន្ត្រី​ក្រសួង​មហាផ្ទៃ ធ្វើឡើង​បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត មិន​ឲ្យ​ចូលរួម​ការ​បោះឆ្នោត​កាលពី​ថ្ងៃទី​២៣ ខែ​កក្កដា ឆ្នាំ​២០២៣។

ក្នុង​លិខិត​ចុះ​ថ្ងៃទី​១៩ ខែ​កញ្ញា ឆ្នាំ​២០២៣ ក្រសួង​មហាផ្ទៃ​អនុញ្ញាត​ឲ្យ​តំណាង​គណបក្ស​ភ្លើង​ទៀន​ចំនួន ៥​រូប​ចូល​ជួប​តំណាង​ក្រសួង​មហាផ្ទៃ នៅ​ថ្ងៃទី​២១ ខែ​កញ្ញា នេះ នៅ​សាល​ប្រជុំ «ខេត្ត​ស្ទឹងត្រែង» នៃ​អគារ​ទីស្ដីការ​ក្រសួង​មហាផ្ទៃ។

ការ​សម្រេច​អនុញ្ញាត​ឲ្យ​តំណាង​គណបក្ស​ភ្លើង​ទៀន​ចូល​ជួប​នេះ ធ្វើឡើង​បន្ទាប់ពី​ក្រសួង​មហាផ្ទៃ​បាន​បដិសេធ​សំណើ​សុំ​ជួប​ជាមួយ​រដ្ឋមន្ត្រី​ក្រសួង​មួយ​នេះ​នៅ​មុន​ការ​បោះឆ្នោត កាលពី​ខែ​កក្កដា និង​កាលពី​ដើម​ខែ​សីហា កន្លងទៅ ដោយ​ក្រសួង​ប្រាប់​ឲ្យ​គណបក្ស​ភ្លើង​ទៀន រង់ចាំ​រហូត​ដល់​មាន​រដ្ឋាភិបាល​ថ្មី។

គណបក្ស​ភ្លើង​ទៀន​សុំ​ជួប​ក្រសួង​មហាផ្ទៃ ម្ដង​ហើយ​ម្ដង​ទៀត​នេះ បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) មិន​ទទួលស្គាល់ និង​មិន​អនុញ្ញាត​ឲ្យ​គណបក្ស​ភ្លើង​ទៀន​ចូលរួម​ក្នុង​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ កាលពី​ថ្ងៃទី​២៣ ខែ​កក្កដា ឆ្នាំ​២០២៣ ដោយ​លើក​ហេតុផល​ថា ឯកសារ​ដែល​គណបក្ស​នេះ​ដាក់​សុំ​ចុះបញ្ជី​មិនមែន​ជា​ឯកសារ​ច្បាប់ដើម។

តែ​យ៉ាងណា គណបក្ស​ភ្លើង​ទៀន​អះអាង​ថា ខ្លួន​បាន​បាត់​ឯកសារ​ដើម​នៃ​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ អំឡុង​ពេល​មាន​ចម្រូងចម្រាស​គ្នា​រវាង​អតីត​គណបក្ស​សង្គ្រោះ​ជាតិ និង​អាជ្ញាធរ​គណបក្ស​កាន់​អំណាច ដោយ​គណបក្ស​ភ្លើង​ទៀន​បាន​ជ្រក​ក្រោម​ដំបូល​ជាមួយ​គ្នា​នៅ​ពេល​នោះ។

ប៉ុន្តែ​លោក ហ៊ុន សែន អតីត​នាយករដ្ឋមន្ត្រី និង​ជា​ប្រធាន​គណបក្ស​ប្រជាជន​កម្ពុជា ប្រកាស​ថា មិន​បាន​ជឿ​លើ​ការ​លើកឡើង​នេះ​ទេ ដោយ​លោក​បាន​ដាក់​ការ​សង្ស័យ​ថា ការ​ធ្វើ​ឲ្យ​បាត់បង់​ឯកសារ​ចុះបញ្ជី​ច្បាប់ដើម​របស់​គណបក្ស​ភ្លើង​ទៀន ជា​ហេតុ​មិន​អាច​ឲ្យ​គណបក្ស​នេះ​ចុះបញ្ជី​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ បាន​នោះ គឺជា​ឧបាយកល​ធ្វើ​ឲ្យ​បរទេស​ដាក់​សម្ពាធ​លើ​រដ្ឋាភិបាល​កម្ពុជា។

ទោះជា​យ៉ាងណា​ក៏ដោយ ក្រុម​អ្នក​សង្កេតការណ៍​និយាយ​ថា ការ​រារាំង​មិន​ឲ្យ​បក្ស​ភ្លើង​ទៀន​ចូលរួម​ការ​បោះឆ្នោត ដោយសារតែ​លោក ហ៊ុន សែន ខ្លាច​ចាញ់​ការ​ប្រកួតប្រជែង​ជាមួយ​បក្ស​មួយ​នេះ​ដែល​មាន​កម្លាំង​គាំទ្រ​គួរសម​ដែរ​នោះ និង​ម្យ៉ាង​ទៀត​ដោយសារ​លោក ហ៊ុន សែន ខ្លាច​បរាជ័យ​ក្នុង​ការ​លើក​បន្តុប​កូនប្រុស​របស់​លោក​ឲ្យ​ឡើង​ស្នង​តំណែង​ជា​នាយករដ្ឋមន្ត្រី​ត​ពូជ​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស