37 C
Phnom Penh

ក្រសួង​មហាផ្ទៃ​ទាមទារ​ឱ្យ​គណបក្ស​បញ្ញា​ទំនើប​ចុះបញ្ជី​ដើម្បី​ទទួល​បាន​សុពលភាព​និង​ធ្វើ​សកម្មភាព

ដោយ ឌឹ ខេមបូឌា ដេលី

បទវិភាគ

ក្រសួង​មហាផ្ទៃ​ទាមទារ​ឲ្យ​តំណាង​ស្ថាបនិក​គណបក្ស​បញ្ញា​ទំនើប ត្រូវ​រៀបចំ​បែបបទ និង​បំពេញ​លក្ខខណ្ឌ​ដោយ​ចុះបញ្ជី​នៅ​ក្រសួង​មហាផ្ទៃ ដើម្បី​ទទួល​បាន​សុពលភាព និង​ធ្វើ​សកម្មភាព​ដោយ​ស្រប​ច្បាប់​ក្នុង​ឋានៈ​ជា​នីតិបុគ្គល។

តំណាង​ស្ថាបនិក​គណបក្ស​បញ្ញា​ទំនើប លោក អ៊ឹម សួនិត បាន​ដាក់​លិខិត​ទៅ​អតីត​រដ្ឋមន្ត្រី​ក្រសួង​មហាផ្ទៃ លោក ស ខេង កាលពី​ដើម​ខែ​សីហា ឆ្នាំ​២០២៣ ដោយ​ស្នើសុំ​បង្កើត «គណបក្ស​បញ្ញា​ទំនើប» សរសេរ​អក្សរ​កាត់​ថា “គ.ប.ទ”។

ឆ្លើយតប​នឹង​សំណើ​នេះ ក្រសួង​មហាផ្ទៃ​បាន​ណែនាំ​ទៅ​គណបក្ស​បញ្ញា​ទំនើប ដែល​ទីស្នាក់ការ​កណ្តាល​ស្ថិត​នៅ​ផ្ទះ​លេខ​៩៩ ផ្លូវ​C ភូមិ​ភូផ្អែម សង្កាត់​គោករកា ខណ្ឌ​ព្រែកព្នៅ រាជធានី​ភ្នំពេញ ត្រូវ​រៀបចំ​បែបបទ និង​បំពេញ​លក្ខខណ្ឌ​ស្នើសុំ​ចុះបញ្ជី​នៅ​ក្រសួង​មហាផ្ទៃ ស្រប​តាម​កថាខណ្ឌ​ទី​២ មាត្រា​៩ មាត្រា​១៨​ថ្មី មាត្រា​១៩​ថ្មី និង​មាត្រា​២០ នៃ​ច្បាប់​ស្ដីពី​គណបក្ស​នយោបាយ។

សេចក្ដី​ជូនដំណឹង​របស់​ក្រសួង​មហាផ្ទៃ កាលពី​ថ្ងៃទី​១៨ ខែ​សីហា ឆ្នាំ​២០២៣ ដែល​ទើប​ត្រូវ​បាន​ផ្សាយ​នា​ថ្ងៃទី​២១ កញ្ញា នេះ​ថា ការ​ទាមទារ​ដូច្នេះ​ដើម្បី​ទទួល​បាន​សុពលភាព និង​អាច​ធ្វើ​សកម្មភាព​ដោយ​ស្រប​ច្បាប់​ក្នុង​ឋានៈ​ជា​នីតិបុគ្គល​នៅ​ក្នុង​រយៈពេល ១៨០​ថ្ងៃ បន្ទាប់ពី​បាន​បង្កើត «គណបក្ស​បញ្ញា​ទំនើប» រួច​ហើយ។

មាត្រា​១៨២​ថ្មី​នៃ​ច្បាប់​ស្ដីពី​គណបក្ស​នយោបាយ ចែង​ថា ពលរដ្ឋ​ទាំង​ពីរ​ភេទ​ដែល​មាន​សញ្ជាតិ​ខ្មែរ​ពី​កំណើត និង​មាន​អាយុ​យ៉ាងតិច ២៥​ឆ្នាំ អាច​ធ្វើ​ជា​ប្រធាន ឬ​អនុប្រធាន​នៃ​គណបក្ស​នយោបាយ ឬ​ធ្វើ​ជា​សមាសភាព​នៃ​អង្គការ​ដឹកនាំ​នៃ​គណបក្ស​នយោបាយ​បាន។

ប្រធាន និង​អនុប្រធាន​នៃ​គណបក្ស​នយោបាយ និង​សមាសភាព​នៃ​គណៈកម្មាធិការ​នាយក ឬ​គណៈកម្មាធិការ​អចិន្ត្រៃយ៍ ឬ​អង្គការ​សមមូល​នឹង​គណៈកម្មាធិការ​នាយក ឬ​គណៈកម្មាធិការ​អចិន្ត្រៃយ៍​នៃ​គណបក្ស​នយោបាយ មិន​ត្រូវ​ជា​បុគ្គល​ដែល​ជា​ទណ្ឌិត​ជាប់​ទោស​ដាក់​ពន្ធនាគារ​ពី​បទ​ឧក្រិដ្ឋ ឬ​បទមជ្ឈិម​ដោយ​គ្មាន​ការ​ព្យួរ​ទោស​ឡើយ ជាដើម។

ចំណែក​មាត្រា​១៩​ថ្មី ចែង​ថា ក្នុង​រយៈពេល​យ៉ាង​យូរ ១៨០​ថ្ងៃ​បន្ទាប់ពី​គណបក្ស​នយោបាយ​ត្រូវ​បាន​បង្កើត​ឡើង​ស្រប​តាម​មាត្រា​៩ នៃ​ច្បាប់​នេះ គណបក្ស​នយោបាយ​នោះ​ត្រូវ​ស្នើសុំ​ចុះបញ្ជី​នៅ​ក្រសួង​មហាផ្ទៃ ដើម្បី​ទទួល​បាន​សុពលភាព និង​អាច​ធ្វើ​សកម្មភាព​បាន​ដោយ​ស្រប​ច្បាប់​ក្នុង​ឋានៈ​ជា​នីតិបុគ្គល ដោយ​ត្រូវ​មាន​សមាជិក​យ៉ាងតិច ៤​ពាន់​នាក់ និង​ត្រូវ​បំពេញ​បែបបទ និង​លក្ខខណ្ឌ​ដូច​មាន​ចែង​ក្នុង​មាត្រា​២០ នៃ​ច្បាប់​នេះ។

ទោះបីជា​ក្រសួង​មហាផ្ទៃ បាន​ណែនាំ​ដូច្នេះ ប៉ុន្តែ​អាជ្ញាធរ​ខេត្ត​បន្ទាយមានជ័យ កាលពី​ថ្ងៃទី​៨ និង​ទី​៩ ខែ​កញ្ញា ឆ្នាំ​២០២៣ ចាប់​ខ្លួន​មន្ត្រី​បក្ស​ភ្លើង​ទៀន​ចំនួន ៦​នាក់ និង​បញ្ជូន​ទៅ​តុលាការ​ដោយ​ចោទប្រកាន់ «បទ​ញុះញង់» ពាក់ព័ន្ធ​នឹង​រឿង​ប្រមូល​ស្នាម​មេដៃ​ប្រជាពលរដ្ឋ​បង្កើត​គណបក្ស​ថ្មី។ មន្ត្រី​បក្ស​ភ្លើង​ទៀន​ទាំង ៦​នាក់ ក្នុង​នោះ​លោក ស៊ិន វត្ថា ប្រធាន​ខេត្ត ហើយ​លោក ទេព សម្បត្តិ វឌ្ឍនោ អនុប្រធាន​ស្រុក​មង្គលបុរី លោក ឡុង ឡាវី អនុប្រធាន​ខេត្ត និង​លោក ទួត វាសនា ប្រធាន​ស្រុក​មង្គលបុរី រួម​ទាំង​លោក ឈុំ ស៊ីណាត និង​លោក វ៉ាន់ ស៊ីអ៊ីវ។

ការ​បន្ត​ធ្វើ​ទុក្ខបុកម្នេញ​លើ​សកម្មជន​គណបក្ស​នយោបាយ និង​សកម្មជន​សង្គម​ក្រោម​រដ្ឋាភិបាល​អាណត្តិ​ទី​៧ នៃ​ការ​ដឹកនាំ​របស់​លោក ហ៊ុន ម៉ាណែត នេះ ត្រូវ​សាធារណជន និង​ឃ្លាំមើល រិះគន់​ថា របប​ដឹកនាំ​ដោយ​លោក ហ៊ុន ម៉ាណែត ក៏​មិន​ខុស​ពី​ឪពុក​របស់​លោក គឺ​លោក ហ៊ុន សែន ដែរ ដែល​បាន​ប្រើប្រាស់​ប្រព័ន្ធ​តុលាការ​ធ្វើ​ទុក្ខបុកម្នេញ​លើ​ក្រុម​បក្ស​ប្រឆាំង​ដើម្បី​បង្ខំ​ឲ្យ​ពួកគេ​ចុះចូល​ជាមួយ​គណបក្ស​ប្រជាជន​កម្ពុជា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស