31 C
Phnom Penh

រដ្ឋមន្ត្រី​ព័ត៌មាន​ថា​វិស័យ​សារព័ត៌មាន​កម្ពុជា​ផ្ដោត​សំខាន់​លើ​គុណភាព ជាពិសេស​ពង្រឹង​ក្រម​សីលធម៌​វិជ្ជាជីវៈ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​ព័ត៌មាន បាន​លើកឡើង​ថា វិស័យ​សារព័ត៌មាន​នៅ​កម្ពុជា​ផ្ដោត​ជា​សំខាន់​ទៅ​លើ​គុណភាព​សារព័ត៌មាន ដែល​សំដៅ​ធ្វើ​យ៉ាង​ណា​ឱ្យ​មាន​គុណភាព ស៊ីជម្រៅ ពិសេស​ពង្រឹង​ក្រមសីលធម៌​វិជ្ជាជីវៈ​ដល់​អ្នក​សារព័ត៌មាន​ឱ្យ​កាន់តែ​រឹងមាំ។

រដ្ឋមន្ត្រី​ក្រសួង​ព័ត៌មាន ដែល​ទើប​ឡើង​កាន់​តំណែង​ថ្មី លោក នេត្រ ភក្ត្រា លើកឡើង​ក្នុង​ជំនួប​ជាមួយ​លោក ចូសែហ្វ សូវ័រ អ្នក​សម្របសម្រួល​អង្គការ​សហប្រជាជាតិ​ប្រចាំ​នៅ​កម្ពុជា កាលពី​ថ្ងៃទី​២០ ខែ​កញ្ញា ឆ្នាំ​២០២៣ នេះ​ថា កម្ពុជា​នឹង​រៀបចំ​ឱ្យ​មាន​ស្តង់ដារ​ប្រតិបត្តិ​រួម​មួយ​សម្រាប់​អ្នក​សារព័ត៌មាន​ទាំងអស់ ឱ្យ​អនុវត្ត​ប្រកប​ដោយ​វិជ្ជាជីវៈ និង​មាន​គុណភាព ដើម្បី​ការពារ​ដល់​អ្នក​សារព័ត៌មាន ពិសេស​ពង្រឹង​គុណភាព​សារព័ត៌មាន​ឱ្យ​បាន​ល្អ​ថែម​ទៀត។

លោក នេត្រ ភក្ត្រា លើកឡើង​ថា កិច្ចការ​អាទិភាព​របស់​ក្រសួង​ព័ត៌មាន​សម្រាប់​រដ្ឋាភិបាល​ថ្មី​នេះ គឺ​ការ​ធ្វើ​ទំនើបកម្ម​ស្ថាប័ន​រដ្ឋបាល​ទំនើប ពង្រឹង​សមត្ថភាព​របស់​មន្ត្រី និង​ការ​បណ្តុះបណ្តាល​ដល់​អ្នក​សារព័ត៌មាន ដើម្បី​បង្កើន​ធនធាន​មនុស្ស​ផ្នែក​សារព័ត៌មាន​ឱ្យ​កាន់តែ​សម្បូរ​បែប និង​ប្រកប​ដោយ​គុណភាព​នៅ​ក្នុង​ប្រទេស​កម្ពុជា ដែល​នឹង​ត្រូវ​អនុវត្ត​ចាប់ពី​ឆ្នាំ​២០២៣ នេះ​ទៅ​តែម្តង។

កាលពី​ថ្ងៃទី​៥ ខែ​មេសា ឆ្នាំ​២០២៣ ក្រសួង​ព័ត៌មាន បាន​បញ្ចេញ​របាយការណ៍​របស់​ខ្លួន​ថា កម្ពុជា​បាន​បើក​ឱ្យ​មាន​សិទ្ធិ​សេរីភាព​បញ្ចេញមតិ និង​សេរីភាព​ខាង​សារព័ត៌មាន​យ៉ាង​ទូលំទូលាយ ដោយសារតែ​បច្ចុប្បន្ន​នេះ សារព័ត៌មាន​ដែល​បាន​ចុះបញ្ជី​នៅ​ក្រសួង​ព័ត៌មាន​មាន​ចំនួន​ដល់​ទៅ​ជាង ៦០០​អង្គភាព គេហទំព័រ និង​ទូរទស្សន៍​អនឡាញ​មាន​ចំនួន ៨៧៨​អង្គភាព វិទ្យុ FM ដែល​កំពុង​ដំណើរការ​ផ្សាយ​មាន​ចំនួន ២២១​ស្ថានីយ និង​ទូរទស្សន៍​ផ្សាយ​ផ្ទាល់​មាន​ចំនួន​រហូត​ដល់​ជាង ១៩០​ស្ថានីយ។

បែប​នេះ​ក្តី អង្គការ​អ្នក​សារព័ត៌មាន​គ្មាន​ព្រំដែន (Reporters Without Borders) បាន​ដាក់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា​សម្រាប់​ឆ្នាំ​២០២២ ស្ថិត​ក្នុង​លំដាប់​លេខ​រៀង​ទី​១៤២ ក្នុង​ចំណោម​ប្រទេស​១៨០ ដែល​ជា​ចំណាត់ថ្នាក់​ដ៏​អាក្រក់​មួយ ក្រោយ​គេ​រក​ឃើញ​ថា ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា​ត្រូវ​បាន​បំផ្លិចបំផ្លាញ និង​បោស​សម្អាត​ដោយ​រដ្ឋាភិបាល​កម្ពុជា​ចាប់តាំងពី​អំឡុង​ឆ្នាំ​២០១៧ និង​ឆ្នាំ​២០១៨ រហូត​មក ដែល​ធ្វើ​ឱ្យ​សេរីភាព​សារព័ត៌មាន​នៅ​ប្រទេស​កម្ពុជា​បន្ត​ធ្លាក់​ចុះ​ជា​បន្តបន្ទាប់​រហូត​មក​ដល់​ពេលនេះ។

សកម្មជន​សហគមន៍​ខ្មែរ​ក្នុង​ទីក្រុង​ឡងប៊ិច នៃ​រដ្ឋ​កាលីហ្វ័រនីញ៉ា លោក មួង ណារ៉េត បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​២០ ខែ​កញ្ញា នេះ​ថា សារព័ត៌មាន​នៅ​កម្ពុជា​សព្វថ្ងៃ​នេះ​មាន​ច្រើន​តែ​បរិមាណ ប៉ុន្តែ​គ្មាន​គុណភាព ព្រោះ​ថា​សារព័ត៌មាន​ភាគច្រើន​នៅ​ក្នុង​ស្រុក​មិន​បាន​ជួយ​ផ្តល់​ព័ត៌មាន​ពិត​ដែល​កំពុង​កើតឡើង​ក្នុង​សង្គម​ជុំវិញ​ការ​ធ្វើ​ទុក្ខបុកម្នេញ​លើ​ប្រជាពលរដ្ឋ​នោះ​ទេ។

លោក មួង ណារ៉េត លើកឡើង​ថា តួនាទី​របស់​អង្គភាព​សារព័ត៌មាន គឺ​ត្រូវ​ស៊ើប​អង្កេត​លើ​ចំណុច​អវិជ្ជមាន​នានា​ដែល​កើតឡើង​ក្នុង​សង្គម ប៉ុន្តែ​សារព័ត៌មាន​នៅ​កម្ពុជា​ដែល​ស្ថិត​ក្រោម​ការ​គាប​សង្កត់​របស់​រដ្ឋាភិបាល គឺ​មិន​បាន​បំពេញ​តួនាទី​របស់​ខ្លួន​ឱ្យ​បាន​ត្រឹមត្រូវ​ឡើយ គឺ​ត្រឹមតែ​ចុះផ្សាយ​លើក​សរសើរ​អ្នក​មាន​អំណាច​ប៉ុណ្ណោះ ក្នុង​នោះ ជាក់ស្តែង សារព័ត៌មាន​ខ្លះ​បាន​សរសើរ​លោក ហ៊ុន ម៉ាណែត ដែល​ទៅ​ចូលរួម​កិច្ចប្រជុំ​អាស៊ាន ថា​ជា​តារា​រះ​នៅ​វេទិកា​អាស៊ាន ខណៈ​លោក ហ៊ុន ម៉ាណែត គ្មាន​គុណសម្បត្តិ​អ្វី​សោះ​ចំពោះ​អាស៊ាន ក្រោយ​ការ​ឡើង​ជា​នាយករដ្ឋមន្ត្រី​របស់​កម្ពុជា​ក្នុង​រយៈពេល​ខ្លី​នេះ។

ចំណែក​អតីត​ប្រធាន​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លោក ប៉ា ងួនទៀង បាន​លើកឡើង​ក្នុង​កម្មវិធី​ពិភាក្សា​នេះ​ដែរ​ថា ប្រទេស​កម្ពុជា​សព្វថ្ងៃ​នេះ​កំពុង​ធ្លាក់​ចូល​ទៅ​ក្នុង​វិបត្តិ​សង្គម​ធំ​មួយ​ក្នុង​ចំណោម​វិបត្តិ​ធំៗ​ជាច្រើន​ទៀត គឺ​ការ​បាត់បង់​សារព័ត៌មាន​ឯករាជ្យ ហើយ​ការ​បាត់បង់​ប្រព័ន្ធ​ផ្សព្វផ្សាយ​ឯករាជ្យ គឺជា​ការ​ខាតបង់​ប្រយោជន៍​យ៉ាង​ធំ​សម្រាប់​សង្គម​ជាតិ និង​ធ្វើ​ឱ្យ​ប្រជាពលរដ្ឋ​បាត់បង់​នូវ​ព័ត៌មាន​ពិត​ទាំងស្រុង​ថែម​ទៀត ជាពិសេស​គឺ​ទាក់ទង​នឹង​ការ​ជ្រើសរើស​មេដឹកនាំ​តែម្តង។

លោក ប៉ា ងួនទៀង លើកឡើង​ថា បើ​រដ្ឋាភិបាល​ចង់​ឱ្យ​សេរីភាព​សារព័ត៌មាន​នៅ​កម្ពុជា​មាន​ភាព​ល្អ​ប្រសើរ​ឡើង​វិញ គឺ​មាន​តែ​បើក​លំហ​ដល់​ប្រព័ន្ធ​ផ្សព្វផ្សាយ​ឯករាជ្យ​អាច​ដំណើរការ​សកម្មភាព​ឡើងវិញ​ប៉ុណ្ណោះ ប៉ុន្តែ​បើ​រដ្ឋាភិបាល​រឹត​បន្តឹង​សារព័ត៌មាន​ឯករាជ្យ​ដូច​សព្វថ្ងៃ​នេះ អ្នក​ដែល​ទទួល​រង​នូវ​ឥទ្ធិពល​ក៏​អាក្រក់​នេះ គឺ​មាន​តែ​ប្រទេស​ជាតិ និង​ប្រជាពលរដ្ឋ​ប៉ុណ្ណោះ។

ទាក់ទិន​នឹង​បញ្ហា​នេះ អង្គការ​អ្នក​សារព័ត៌មាន​គ្មាន​ព្រំដែន ធ្លាប់​បង្ហាញ​របាយការណ៍​របស់​ខ្លួន​កាលពី​ពេល​កន្លងទៅ​ថា ពលរដ្ឋ​កម្ពុជា​អាច​ទទួល​បាន​ព័ត៌មាន​តែ​ពី​ស្ថាប័ន​ដែល​ស្និទ្ធ​នឹង​លោក​នាយករដ្ឋមន្ត្រី ហ៊ុន សែន តែប៉ុណ្ណោះ។ ជាក់ស្តែង កូនស្រី​លោក ហ៊ុន សែន គឺ​អ្នកស្រី ហ៊ុន ម៉ាណា ត្រូវ​គេ​រក​ឃើញ​ថា​ជា​ប្រធាន​ក្រុមហ៊ុន​ដ៏​ធំ​សម្បើម​មួយ​ដែល​កាន់កាប់​កាសែត ទស្សនាវដី្ត ស្ថានីយ​វិទ្យុ បណ្ដាញ​ទូរទស្សន៍ និង​គេហទំព័រ​អ៊ីនធឺណិត​នៅ​កម្ពុជា​ទាំងអស់ ដូចជា​សារព័ត៌មាន Fresh News ជាដើម ដែល​ជា​ស្ថាប័ន​ឃោសនា​នយោបាយ​ឱ្យ​បក្ស​កាន់​អំណាច​របស់​លោក ហ៊ុន សែន សព្វថ្ងៃ​នេះ។

កាលពី​ឆ្នាំ​២០១៨ សេរីភាព​សារព័ត៌មាន​នៅ​ប្រទេស​កម្ពុជា​បាន​ជាប់​ចំណាត់ថ្នាក់​លេខ​១៤២ ឆ្នាំ​២០១៩ ជាប់​លេខ​១៤៣ ខណៈ​ឆ្នាំ​២០២០ និង​ឆ្នាំ​២០២១ បាន​ជាប់​ចំណាត់ថ្នាក់​លេខ​១៤៤ ពីរ​ឆ្នាំ​ជាប់​គ្នា ដោយឡែក​ឆ្នាំ​២០២២ កម្ពុជា​បាន​វិល​ទៅ​រក​ចំណាត់ថ្នាក់​លេខ​១៤២ ដូច​ឆ្នាំ​២០១៨ វិញ ដែល​ជា​ឆ្នាំ​ដែល​រដ្ឋាភិបាល​កម្ពុជា​បោស​សម្អាត​អ្នក​សារព័ត៌មាន​ឯករាជ្យ​គ្មាន​សល់​នៅ​ក្នុង​ប្រទេស៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស