28 C
Phnom Penh

លោក ហ៊ុន សែន សម្ដែង​មោទនភាព​ដែល​ក្លាយ​ជា​ឪពុក​របស់​នាយករដ្ឋមន្ត្រី​កម្ពុជា

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន ដែល​កំពុង​ក្តោប​ក្តាប់​អំណាច​ពិតប្រាកដ​នៅ​ពី​លើ​នាយករដ្ឋមន្ត្រី​ដែល​ត្រូវ​ជា​កូនប្រុស​របស់​ខ្លួន លើកឡើង​ថា នៅ​ពេលនេះ លោក​បាន​ឡើង​ឋានៈ​ជា​ឪពុក​របស់​នាយករដ្ឋមន្ត្រី​ជិត ១​ខែ​ហើយ ហើយ​នេះ​ក៏​ជា​ការពិត​មួយ​ដែល​កំពុង​បង្ហាញ​ទៅ​កាន់​ក្រុម​ប្រឆាំង​ដែល​តែងតែ​ពេបជ្រាយ​ដាក់​លោក​កន្លងមក​ដែរ ចំពោះ​ការ​លើកឡើង​ថា លោក​នឹង​ក្លាយ​ជា​ឪ​នាយករដ្ឋមន្ត្រី​នៅ​ថ្ងៃ​ណា​មួយ​នោះ។

អតីត​មេ​កម្មាភិបាល​ខ្មែរក្រហម​លោក ហ៊ុន សែន បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​២១ ខែ​កញ្ញា ឆ្នាំ​២០២៣ នេះ​ថា កន្លងមក​លោក​ធ្លាប់​បាន​និយាយ​ច្រើន​ដង​ណាស់​ថា ថ្ងៃ​នេះ​លោក​ជា​នាយករដ្ឋមន្ត្រី ប៉ុន្តែ​នៅ​ពេល​ខាងមុខ លោក​នឹង​ក្លាយ​ទៅ​ជា​ឪពុក​នាយករដ្ឋមន្ត្រី​ជា​មិន​ខាន តែ​ក្រុម​ប្រឆាំង​តែងតែ​ពេបជ្រាយ​ការ​លើកឡើង​របស់​លោក​ជានិច្ច។

លោក ហ៊ុន សែន ដែល​កំពុង​កាន់​អំណាច​បញ្ជា​ពី​លើ​នាយករដ្ឋមន្ត្រី​ដែល​ជា​កូន​របស់​ខ្លួន លើកឡើង​ថា កាលពី​ឆ្នាំ​២០២២ កន្លងទៅ គឺ​នៅ​ថ្ងៃទី​២២ កញ្ញា លោក​បាន​ចេញ​ដំណើរ​ទៅ​ចូលរួម​កិច្ចប្រជុំ​នៅ​អង្គការ​សហប្រជាជាតិ ប៉ុន្តែ​នៅ​ថ្ងៃទី​២២ ខែ​កញ្ញា ឆ្នាំ​២០២៣ នេះ នាយករដ្ឋមន្ត្រី​ថ្មី​ដែល​ជា​កូនប្រុស​បង្កើត​របស់​លោក បាន​ចេញ​ដំណើរ​ទៅ​ចូលរួម​កិច្ចប្រជុំ​នៅ​អង្គការ​សហប្រជាជាតិ​លើ​ទឹកដី​សហរដ្ឋ​អាមេរិក​ជំនួស​លោក​វិញ។

កាលពី​ថ្ងៃទី​២២ ខែ​សីហា ឆ្នាំ​២០២៣ ក្នុង​សន្និសីទ​សារព័ត៌មាន លោក ហ៊ុន សែន អះអាង​ថា គោល​បំណង​របស់​លោក​ដែល​ចង់​ឱ្យ​លោក ហ៊ុន ម៉ាណែត ធ្វើ​ជា​នាយករដ្ឋមន្ត្រី បាន​ក្លាយ​ជា​ការពិត​ហើយ ហើយ​រូបលោក​ផ្ទាល់​ក៏​កំពុង​ក្លាយ​ខ្លួន​ជា​ឪពុក​របស់​នាយករដ្ឋមន្ត្រី​ដែរ។

ទាក់ទិន​នឹង​បញ្ហា​នេះ កាលពី​ថ្ងៃទី​២២ ខែ​កុម្ភៈ ឆ្នាំ​២០២២ ក្នុង​ពិធី​បើក​ការដ្ឋាន​សាងសង់​ស្ថានីយ​ប្រព្រឹត្តិកម្ម​ទឹក​កខ្វក់​បឹង​ជើងឯក ក្នុង​ខណ្ឌ​មានជ័យ រាជធានី​ភ្នំពេញ លោក ហ៊ុន សែន លើកឡើង​ថា នៅ​ពេល​ដែល​ឱកាស​មក​ដល់ លោក​នឹង​ក្លាយ​ជា​ឪ​របស់​នាយករដ្ឋមន្ត្រី​ជា​មិន​ខាន ហើយ​លោក​ក៏​បាន​ដាក់​កំណត់​ឲ្យ​ចៅ​របស់​លោក​ត្រូវតែ​ប្រកួតប្រជែង​យក​តំណែង​នាយករដ្ឋមន្ត្រី​ក្នុង​រយៈពេល ២០​ឆ្នាំ​ក្រោយ​ផង​ដែរ។

លោក ហ៊ុន សែន លើក​ឡើង​ថា កូន​អ្នក​ដទៃ​ធ្វើ​បាន រឿង​អី​កូន និង​ចៅ​របស់​លោក​ដែល​ទទួល​បាន​ការ​បណ្តុះបណ្តាល​ខ្ពង់ខ្ពស់​ដែរ​រហូត​មក ធ្វើ​មិន​បាន?

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​២២ កញ្ញា នេះ​ថា អ្វី​ដែល​លោក ហ៊ុន សែន គួរ​លើកឡើង គឺ​ការ​ណែនាំ​ឱ្យ​កូនប្រុស​របស់​គាត់​ឱ្យ​ធ្វើ​នយោបាយ​បង្រួបបង្រួម​ជាតិ ផ្សះផ្សា​រវាង​អ្នក​ប្រជាធិបតេយ្យ​ដើម្បី​ឱ្យ​ប្រជាពលរដ្ឋ​មើល​ឃើញ​ពី​នយោបាយ​បក្ស​កាន់​អំណាច និង​ការ​ដឹកនាំ​របស់​លោក ហ៊ុន ម៉ាណែត ជា​នយោបាយ​ឆ្ពោះ​ទៅ​រក​ការ​ឯកភាព​ជាតិ មិនមែន​ណែនាំ​ឱ្យ​ដឹកនាំ​ទៅ​រក​ការ​បែកបាក់​សាមគ្គី​ជាតិ​កាន់តែ​ខ្លាំង​ឡើងៗ​នោះ​ទេ។

លោក មាជ សុវណ្ណារ៉ា លើកឡើង​ថា ការ​លើកឡើង​របស់​លោក ហ៊ុន សែន គ្រាន់តែ​បង្ហាញ​ឱ្យ​អន្តរជាតិ​ឃើញ​ពី​ការ​ផ្ទេរ​អំណាច​ទៅ​កូនប្រុស​របស់​គាត់​ជា​ការ​ផ្ទេរ​អំណាច​បន្ត​ពូជ​ប៉ុណ្ណោះ ហើយ​ការ​ប្រើ​សម្ដី​បែប​នេះ ក៏​ជា​ហេតុ​នាំ​ទៅ​រក​ការ​បង្ក​ជម្លោះ​ជាតិ​ឯង​ដែរ ព្រោះ​ជា​សម្ដី​ដែល​ឌឺដង ពេបជ្រាយ​ទៅ​ក្រុម​អ្នក​នយោបាយ​ដែល​ប្រឆាំង​នឹង​ការ​ដឹកនាំ​របស់​ខ្លួន គឺ​មិន​បាន​នាំ​អ្វី​ចំណេញ​អ្វី​ដល់​ជាតិ​ឡើយ ហើយ​សម្ដី​បែប​នេះ​ក៏​មិន​គួរ​ចេញពី​មាត់​អ្នក​នយោបាយ​ជាន់ខ្ពស់​ដែរ។

ចំណែក​តំណាងរាស្ត្រ​អតីត​គណបក្ស​សង្គ្រោះ​ជាតិ​លោក អ៊ុំ សំអាន បាន​លើក​ឡើង​កាលពី​ពេល​ថ្មីៗ​នេះ​ថា ប្រទេស​កម្ពុជា​បាន​ធ្លាក់​ចូល​ទៅ​ក្នុង​ការ​គ្រប់គ្រង​ផ្ដាច់មុខ​នៃ​គ្រួសារ​និយម​របស់​ត្រកូល​ហ៊ុន​ថែម​មួយ​កម្រិត​ទៀត​ហើយ ក្រោយ​ការ​ផ្ទេរ​អំណាច​ពី​លោក ហ៊ុន សែន ទៅ​លោក ហ៊ុន ម៉ាណែត និង​ការ​រៀបចំ​តែងតាំង​សាច់ញាតិ​ខ្លួនឯង​ឱ្យ​ចូល​ទៅ​កាន់​តួនាទី​កាន់តែ​ខ្ពស់ៗ​ដោយ​កម្ចាត់​អ្នក​ដទៃ​ឱ្យ​ចេញ​ផុត​ពី​តួនាទី​សំខាន់ៗ​ក្នុង​ជួរ​រដ្ឋាភិបាល​នៅ​ពេលនេះ។

រីឯ​អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ​លោក គឹម សុខ ធ្លាប់​បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា ក្រុម​គ្រួសារ​ត្រកូល​ហ៊ុន​កំពុង​រៀបចំ​ឱ្យ​មាន​អង្គការ​ចាត់តាំង​តាម​របៀប​ប្រព័ន្ធ​គ្រប់គ្រង​របស់​ខ្មែរក្រហម ដើម្បី​រក្សា​អំណាច​នៃ​វង្ស​ត្រកូល​របស់​ខ្លួន។

លោក គឹម សុខ បញ្ជាក់​ថា ការ​រៀបចំ​អំណាច​ដឹកនាំ​ប្រទេស​ឱ្យ​ស្ថិត​ក្រោម​ការ​គ្រប់គ្រង​របស់​គណបក្ស ទោះ​អាក្រក់​យ៉ាង​ណា ក៏​នៅតែ​គ្រាន់បើ​ជាង​ការ​រៀបចំ​អំណាច​ដឹកនាំ​ប្រទេស​ឱ្យ​ស្ថិត​ក្រោម​ការ​គ្រប់គ្រង​ក្រុម​គ្រួសារ​និយម​ដែរ ដូច្នេះ​ការ​រៀបចំ​អំណាច​ក្តោប​ក្តាប់​ប្រទេស​កម្ពុជា​ក្នុង​វង្ស​ត្រកូល​របស់​លោក ហ៊ុន សែន បែប​នេះ នឹង​ទាញ​កម្ពុជា​ឱ្យ​វិល​ធ្លាក់​ទៅ​ក្នុង​ការ​ដឹកនាំ​ដូច​អតីតកាល​ឡើង​វិញ ដែល​នឹង​នាំ​វាសនា​អាក្រក់​ដល់​ប្រទេស​ជាតិ និង​ប្រជាជន​នា​ពេល​អនាគត​ជា​មិន​ខាន។

ជុំវិញ​ការ​ប្រកាស​ផ្ទេរ​អំណាច​ពី​ឪពុក​ទៅ​កូន​សម្រាប់​ដឹកនាំ​ប្រទេស​កម្ពុជា​នេះ សមាគម​អ្នក​សារព័ត៌មាន​កម្ពុជា ខេមបូចា បាន​លាតត្រដាង​ក្នុង​របាយការណ៍​ស៊ើបអង្កេត​របស់​ខ្លួន​កាលពី​ពេល​ថ្មីៗ​នេះ​ថា ពួកគេ​បាន​រក​ឃើញ​សែស្រឡាយ​បក្ខពួក​របស់​លោក ហ៊ុន សែន ជាច្រើន​នាក់​តាមរយៈ​បញ្ជី​ឈ្មោះ​បេក្ខជន​តំណាងរាស្ត្រ​របស់​គណបក្ស​ប្រជាជន​កម្ពុជា​ដែល​មាន​រហូត​ដល់​ទៅ​ជិត ១​ភាគ​៤ ដែល​ត្រូវ​បាន​ដាក់​ឱ្យ​ឈរឈ្មោះ​ជា​បេក្ខជន​តំណាងរាស្ត្រ​សម្រាប់​ការ​បោះឆ្នោត​អាណត្តិ​ទី​៧ នេះ។ លើស​ពី​នេះ ក៏​មាន​ការ​តែងតាំង​ខ្សែ​បណ្ដាញ​បក្ខពួក​របស់​ពួកគេ​ឱ្យ​កាន់​តួនាទី​សំខាន់ៗ​ក្នុង​ជួរ​រដ្ឋាភិបាល​ថ្មី​នេះ​ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស