36 C
Phnom Penh

បក្ស​ភ្លើង​ទៀន​គ្រោង​ស្នើ​លោក ហ៊ុន ម៉ាណែត ឱ្យ​ជួយ​អន្តរាគមន៍​ទៅ​ក្រសួង​មហាផ្ទៃ​ចេញ​លិខិត​បញ្ជាក់​ការ​ចុះបញ្ជី​បក្ស

ដោយ ឌឹ ខេមបូឌា ដេលី

បទវិភាគ

គណបក្ស​ភ្លើង​ទៀន គ្រោង​ស្នើ​ទៅ​នាយករដ្ឋមន្ត្រី​ត​ពូជ​លោក ហ៊ុន ម៉ាណែត ឲ្យ​ជួយ​អន្តរាគមន៍​ទៅ​ក្រសួង​មហាផ្ទៃ ចេញ​លិខិត​បញ្ជាក់​ការ​ចុះបញ្ជី​គណបក្ស​នយោបាយ​ឲ្យ​គណបក្ស​ភ្លើង​ទៀន ដើម្បី​យក​មក​ប្រើប្រាស់។

គម្រោង​សរសេរ​លិខិត​ស្នើសុំ​កិច្ច​អន្តរាគមន៍​នេះ ធ្វើឡើង​បន្ទាប់ពី​ក្រសួង​មហាផ្ទៃ កាលពី​ថ្ងៃទី​២១ ខែ​កញ្ញា នេះ បាន​ប្រកាស​មិន​ចេញ​លិខិត​បញ្ជាក់​ថ្មី​ស្ដីពី​ការ​ចុះបញ្ជី​គណបក្ស​នយោបាយ​ឲ្យ​គណបក្ស​ភ្លើង​ទៀន ខណៈ​ឯកសារ​ច្បាប់ដើម គណបក្ស​ភ្លើង​ទៀន​ថា​បាន​បាត់បង់​កាលពី​អំឡុង​ឆ្នាំ​២០១៧។

ក្នុង​សេចក្ដី​ប្រកាស​ព័ត៌មាន​ស្ដីពី​លទ្ធផល​នៃ​កិច្ចប្រជុំ​គណៈកម្មាធិការ​នាយក​នៃ​គណបក្ស​ភ្លើង​ទៀន នា​ថ្ងៃទី​២៥ ខែ​កញ្ញា ឆ្នាំ​២០២៣ ឲ្យ​ដឹង​ថា គណបក្ស​ភ្លើង​ទៀន​នឹង​សរសេរ​លិខិត​ដាក់​ទៅ​លោក ហ៊ុន ម៉ាណែត នាយករដ្ឋមន្ត្រី​ត​ពូជ​ថ្មី។

ប្រភព​ដដែល​ឲ្យ​ដឹង​ថា ការ​ស្នើ​ទៅ​លោក ហ៊ុន ម៉ាណែត នេះ ដើម្បី​សុំ​ឲ្យ​លោក​ជួយ​ធ្វើ​អន្តរាគមន៍​ទៅ​ក្រសួង​មហាផ្ទៃ ចេញ​ប្រកាស​ស្ដីពី​ការ​ចុះឈ្មោះ​ក្នុង​បញ្ជី​គណបក្ស​នយោបាយ និង​ជួយ​ផ្ដល់​ដំណោះស្រាយ​ពាក់ព័ន្ធ​ឯកសារ​លិខិត​បញ្ជាក់​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ របស់​គណបក្ស​ភ្លើង​ទៀន សម្រាប់​ឲ្យ​គណបក្ស​នេះ​យក​មក​ប្រើប្រាស់​ក្នុង​ការ​ចុះបញ្ជី​គណបក្ស​នយោបាយ​ឈរឈ្មោះ​បោះឆ្នោត​នា​ពេល​ខាងមុខ។

ក្រៅពី​គ្រោង​សរសេរ​លិខិត​នេះ​ហើយ គណបក្ស​ភ្លើង​ទៀន​អះអាង​ថា ខ្លួន​នឹង​ប្រកាស​ចង “សម្ព័ន្ធភាព​ឆ្ពោះ​ទៅ​អនាគត​ជាមួយ​បក្ស​មួយ​ចំនួន​ដែល​មាន​ទស្សនៈ និង​គោលជំហរ​នយោបាយ​ដូច​គ្នា”។

ការ​បន្ត​សុំ​លិខិត​បញ្ជាក់​ពី​ក្រសួង​មហាផ្ទៃ​នេះ ធ្វើឡើង​បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) មិន​ទទួលស្គាល់ និង​មិន​អនុញ្ញាត​ឲ្យ​គណបក្ស​ភ្លើង​ទៀន​ចូលរួម​ក្នុង​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ កាលពី​ថ្ងៃទី​២៣ ខែ​កក្កដា ឆ្នាំ​២០២៣ ក្រោម​ហេតុផល​ថា ឯកសារ​ដែល​គណបក្ស​នេះ​ដាក់​សុំ​ចុះបញ្ជី​មិន​មែន​ជា​ឯកសារ​ច្បាប់ដើម បើ​ទោះបីជា​ក្រសួង​មហាផ្ទៃ​ជា​អ្នក​ចេញ​ឲ្យ​គណបក្ស​ភ្លើង​ទៀន​ក៏ដោយ។

គណបក្ស​ភ្លើង​ទៀន អះអាង​ថា គណបក្ស​បាន​បាត់​ឯកសារ​ដើម​នៃ​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ អំឡុង​ពេល​នៃ​ការ​ចម្រូងចម្រាស​គ្នា​រវាង​អតីត​គណបក្ស​សង្គ្រោះ​ជាតិ និង​អាជ្ញាធរ​គណបក្ស​កាន់​អំណាច ដោយ​គណបក្ស​ភ្លើង​ទៀន​បាន​ជ្រក​ក្រោម​ដំបូល​ជាមួយ​គ្នា​នោះ​ផង​ដែរ។

ប៉ុន្តែ​លោក ហ៊ុន សែន អតីត​នាយករដ្ឋមន្ត្រី និង​ជា​ប្រធាន​គណបក្ស​ប្រជាជន​កម្ពុជា មិន​បាន​ជឿ​ទៅ​លើ​ការ​លើកឡើង​របស់​គណបក្ស​ភ្លើង​ទៀន​នេះ​ទេ ដោយ​លោក​បាន​ដាក់​ការ​សង្ស័យ​ថា ការ​ធ្វើ​ឲ្យ​បាត់បង់​ឯកសារ​ចុះបញ្ជី​ច្បាប់ដើម​របស់​គណបក្ស​ភ្លើង​ទៀន ហើយ​មិន​អាច​ឲ្យ​គណបក្ស​នេះ​ចុះបញ្ជី​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ បាន​នោះ វា​គឺជា​ឧបាយកល​ធ្វើ​ឲ្យ​បរទេស​ដាក់​សម្ពាធ​លើ​រដ្ឋាភិបាល​កម្ពុជា។

ជុំវិញ​រឿង​នេះ អ្នក​ឃ្លាំមើល និង​មន្ត្រី​បក្ស​ប្រឆាំង​យល់​ថា លោក ហ៊ុន សែន ដឹង​ថា​កូនប្រុស​របស់​លោក គឺ​លោក ហ៊ុន ម៉ាណែត គ្មាន​សមត្ថភាព​ប្រកួត​ឈ្នះ​គណបក្ស​ភ្លើង​ទៀន ដូច្នេះ​ចង់​មិន​ចង់ លោក ហ៊ុន សែន រក​វិធី​ដើម្បី​បិទ​គណបក្ស​ភ្លើង​ទៀន​មិន​ឲ្យ​ធ្វើ​សកម្មភាព ហើយ​បញ្ជា​ទៅ​ក្រសួង​មហាផ្ទៃ មិន​ឲ្យ​ចេញ​លិខិត​បញ្ជាក់​ជា​ថ្មី​ទៅ​គណបក្ស​មួយ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស