29 C
Phnom Penh

ប្រជាជន​ប៉ាឡេស្ទីន​ជិត​២០​ម៉ឺន​នាក់​រត់​ភៀស​ខ្លួន​ចេញពី​នៅ​តំបន់​ហ្កាហ្សា ខណៈ​អ៊ីស្រាអែល​បន្ត​បាញ់​ស្រោច

ដោយ ឌឹ ខេមបូឌា ដេលី

បទវិភាគ

អង្គការ​សហប្រជាជាតិ បាន​បញ្ចេញ​របាយការណ៍​អំពី​សង្គ្រាម​រវាង​អ៊ីស្រាអែល និង​ប៉ាឡេស្ទីន ដែល​ចូល​ដល់​ថ្ងៃទី​៤ នៅ​ថ្ងៃ​អង្គារ ទី​១០ ខែ​តុលា។

យោង​តាម​របាយការណ៍​របស់​អង្គការ​សហប្រជាជាតិ ប្រជាជន​ជិត​ដល់ ២០០០០០​នាក់​បាន​រត់​ភៀស​ខ្លួន​ចេញពី​លំនៅឋាន​របស់​ពួកគេ​ក្នុង​តំបន់ Gaza Strip គិត​ចាប់តាំងពី​មាន​ការ​វាយប្រហារ​ទ្រង់ទ្រាយ​ធំ​របស់​ក្រុម Hamas ទៅ​លើ​អ៊ីស្រាអែល កាលពី​ថ្ងៃ​សៅរ៍​ចុង​សប្តាហ៍​មុន ដែល​បាន​ជំរុញ​ឱ្យ​អ៊ីស្រាអែល​ឆ្លើយតប​វិញ​តាមរយៈ​ការ​វាយប្រហារ​តាម​ផ្លូវ​អាកាស និង​ការ​បាញ់​ផ្លោង​ស្រោច​លើ​តំបន់​នេះ។ នេះ​បើ​តាម​ការ​ចេញ​ផ្សាយ​ដោយ​ទីភ្នាក់ងារ​សារព័ត៌មាន AFP នៅ​ថ្ងៃ​អង្គារ ទី​១០ ខែ​តុលា។

យោង​តាម​ប្រភព​ព័ត៌មាន​ដដែល​នេះ ទីភ្នាក់ងារ​មនុស្សធម៌ OCHA របស់​អង្គការ​សហប្រជាជាតិ បាន​និយាយ​ក្នុង​សេចក្តី​ថ្លែងការណ៍​ថា ចំនួន​ជន​ភៀសខ្លួន​បាន​កើន​ឡើង​យ៉ាង​គំហុក​នៅ​ទូទាំង​តំបន់ Gaza Strip ដែល​តួលេខ​បាន​បន្ត​កើន​ដល់​លើស ១៨៧៥០០​នាក់​ហើយ​ចាប់តាំងពី​ថ្ងៃ​សៅរ៍​សប្តាហ៍​មុន​មក ហើយ​ពួកគេ​ភាគច្រើន​កំពុងតែ​ជ្រកកោន​នៅ​តាម​សាលារៀន​របស់​អង្គការ​សហប្រជាជាតិ។

បើ​តាម​របាយការណ៍​របស់​ទីភ្នាក់ងារ​អង្គការ​សហប្រជាជាតិ តួលេខ​នេះ​ត្រូវ​បាន​រំពឹង​ថា​នឹង​បន្ត​កើន​ឡើង​ថែម​ទៀត ព្រោះ​អ៊ីស្រាអែល នៅ​បន្ត​បើក​ការ​វាយប្រហារ​តាម​ផ្លូវ​អាកាស​ឥត​ឈប់ឈរ​មក​លើ​តំបន់ Gaza។

ជាមួយ​គ្នា​នេះ ក្រុមប្រឹក្សា​សិទ្ធិមនុស្ស​របស់​អង្គការ​សហប្រជាជាតិ ក៏​បាន​លើកឡើង​ផង​ដែរ​ថា ការ​ប្រកាស​ដាក់​វិធានការ​បិទ​ខ្ទប់​ទាំងស្រុង​របស់​អ៊ីស្រាអែល លើ​តំបន់ Gaza Strip ដែល​កាត់​ផ្ដាច់​អគ្គិសនី ស្បៀងអាហារ ទឹក និង​ឥន្ធនៈ ដែល​ជា​ការ​ហាមឃាត់​ក្រោម​ច្បាប់​អន្តរជាតិ ព្រោះ​វា​បង្ក​ការ​គំរាមកំហែង​ដល់​អាយុជីវិត​ជនស៊ីវិល។

ជាមួយ​គ្នា​នេះ អគ្គលេខាធិការ​អង្គការ​សហប្រជាជាតិ​លោក António Guterres ថ្លែង​ថា លោក​ព្រួយបារម្ភ​ជា​ខ្លាំង​ដោយសារ​ការ​ប្រកាស​របស់​អ៊ីស្រាអែល នៅ​ក្នុង​ការ​វាយ​ក្តោប​ក្តាប់​ទាំងស្រុង​លើ​តំបន់​ហ្កាហ្សា។

លោក​បាន​ថ្លែង​នៅ​ក្នុង​សន្និសីទ​សារព័ត៌មាន​មួយ​កាលពី​ថ្ងៃ​ចន្ទ​ថា៖ ស្ថានភាព​មនុស្សធម៌​នៅ​តំបន់ Gaza មាន​ភាព​យ៉ាប់​ខ្លាំង គឺ​មុន​ពេល​ការ​ប្រយុទ្ធ​គ្នា ហើយ​បច្ចុប្បន្ន​នេះ​វា​នឹង​កាន់តែ​យ៉ាប់​ខ្លាំង​ជាង​មុន​ទៀត។

លោក​បាន​ថ្លែង​ដូច្នេះ​បន្ទាប់ពី​រដ្ឋមន្ត្រី​ការពារ​ជាតិ​អ៊ីស្រាអែល បាន​ថ្លែង​ថា លោក​បាន​បញ្ជា​ឱ្យ​មាន​ការ​កាត់​ផ្ដាច់​ចរន្ត​អគ្គិសនី និង​ការ​ចែកចាយ​ម្ហូបអាហារ ប្រេងសាំង និង​សម្ភារៈ​ផ្សេងៗ​ទៀត​ទៅ​កាន់​តំបន់​នេះ។

លោក Gueterres បាន​ស្នើសុំ​ឱ្យ​អង្គការ​សហប្រជាជាតិ​ទទួល​បាន​ការ​អនុញ្ញាត​ក្នុង​ការ​ផ្តល់​ជំនួយ​មនុស្សធម៌​ដល់​ប្រជាជន​ប្រមាណ ២​លាន ៣​សែន​នាក់​នៅ​ក្នុង​តំបន់ Gaza។ លោក​បាន​ជំរុញ​ឱ្យ​សហគមន៍​អន្តរជាតិ​ផ្តល់​ការ​គាំទ្រ​ជា​បន្ទាន់​ដល់​កិច្ចប្រឹងប្រែង​ផ្នែក​មនុស្សធម៌​នេះ។

យ៉ាងណា ការ​ប្រយុទ្ធ​គ្នា​នៅតែ​បន្ត តែ​ភាគី​អ៊ីស្រាអែល បាន​ឱ្យ​ដឹង​ថា សាកសព​ប្រហែល​ជា ១៥០០​នាក់ គឺ​ជន​សកម្ម​ប្រយុទ្ធ​របស់​ក្រុម Hamas ត្រូវ​បាន​រក​ឃើញ​នៅ​ក្នុង​ប្រទេស​អ៊ីស្រាអែល ក្បែរ​តំបន់ Gaza។

អ្នក​នាំពាក្យ​សម្រាប់​កងទ័ព​អ៊ីស្រាអែល លោក Richard Hecht បាន​ប្រាប់​អ្នក​សារព័ត៌មាន​ថា នា​ពេលនេះ កងកម្លាំង​សន្តិសុខ​របស់​អ៊ីស្រាអែល បាន​ស្ដារ​ការ​គ្រប់គ្រង​ឡើងវិញ​ហើយ​នៅ​តំបន់​ព្រំប្រទល់​ជាប់​តំបន់ Gaza។

នៅ​ពេលនេះ​ដែរ មេដឹកនាំ​សហរដ្ឋ​អាមេរិក បារាំង អាល្លឺម៉ង់ អ៊ីតាលី និង​ចក្រភព​អង់គ្លេស បាន​សន្យា​គាំទ្រ​អ៊ីស្រាអែល នៅ​ក្នុង​កិច្ច​ខិតខំ​ប្រឹងប្រែង​ការពារ​ខ្លួនឯង ដែល​ឆ្លើយតប​នឹង​ការ​វាយប្រហារ​ដ៏​ភ្ញាក់ផ្អើល​មួយ​ពី​សំណាក់​ក្រុម Hamas។

នៅ​ក្នុង​សេចក្ដី​ថ្លែងការណ៍​រួម​របស់​មេដឹកនាំ​ប្រទេស​ទាំង ៥ នេះ ត្រូវ​បាន​ចេញ​ផ្សាយ​ដោយ​សេតវិមាន។ ក្នុង​សេចក្ដី​ថ្លែងការណ៍​នេះ មេដឹកនាំ​ទាំង ៥​ប្រទេស​នេះ ក៏​បាន​លើកឡើង​ដែរ​ថា ពួកគេ​ទទួលស្គាល់​នូវ​ភាព​ស្រប​ច្បាប់​របស់​ប្រជាជន​ប៉ាឡេស្ទីន ប៉ុន្តែ​ក្រុម Hamas ដែល​មិន​បាន​ផ្ដល់​ភាព​សុខសាន្ត​អ្វី​ទាល់​តែ​សោះ​សម្រាប់​ប្រជាជន​ប៉ាឡេស្ទីន ក្រៅតែ​ពី​បង្ក​នូវ​ការ​បង្ហូរ​ឈាម។

បើ​តាម​សេចក្ដី​រាយការណ៍​របស់​ទីភ្នាក់ងារ​សារព័ត៌មាន AFP ចំនួន​អ្នក​ស្លាប់​នៅ​ក្នុង​ការ​ប្រយុទ្ធ​គ្នា​មក​ទល់​នឹង​ពេលនេះ ប្រជាជន​នៃ​ប្រទេស​ទាំង​ពីរ​ដែល​បាត់បង់​ជីវិត​បាន​កើន​ដល់​ជាង ១៦០០​នាក់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស