អង្គការសុវណ្ណកុមារសម្ដែងការខកចិត្តចំពោះសមត្ថកិច្ចកម្ពុជា ដែលមិនទាន់ចាប់ខ្លួនអតីតនាយកប្រតិបត្តិអង្គការនេះ គឺលោក អារុណ សុធា និងបក្ខពួក មកដាក់ពន្ធនាគារ បើទោះបីតុលាការបានចេញដីកាឲ្យចាប់ខ្លួនក៏ដោយ។
ទំព័រហ្វេសប៊ុករបស់អង្គការ Sovann komar/Golden Children កាលពីថ្ងៃទី២៣ ខែតុលា ឆ្នាំ២០២៣ បានសរសេររៀបរាប់ថា គិតចាប់តាំងពីសាលាឧទ្ធរណ៍សម្រេចតម្កល់សាលក្រមផ្ដន្ទាទោសអតីតនាយកប្រតិបត្តិអង្គការសុវណ្ណកុមារ លោក អារុណ សុធា ចំនួន ៤ឆ្នាំ ហើយលោក ហ៊ុន ចិន្តា និងអ្នកស្រី ថៃ ស៊ីនួន ជាឪពុកម្ដាយចិញ្ចឹមបីបាច់ថែរក្សាក្មេងនៅក្នុងអង្គការ ត្រូវបានកាត់ទោសឲ្យជាប់ពន្ធនាគាររយៈពេល ៣ឆ្នាំ។
ចំណែកអ្នកស្រី អ៊ឹង វាសនា និមល ជាឪពុកម្ដាយចិញ្ចឹម ក៏សាលាឧទ្ធរណ៍កាត់ទោសឲ្យពួកគេជាប់ពន្ធនាគារ ២ឆ្នាំ ៦ខែដូចតុលាការថ្នាក់ក្រោមសម្រេចដែរ។
ការសម្រេចរបស់តុលាការដែលកាត់ទោសលោក អារុណ សុធា លោក ហ៊ុន ចិន្តា និងអ្នកស្រី ថៃ ស៊ីនួន ព្រមទាំងអ្នកស្រី អ៊ឹង វាសនា និមល ពីបទប្រើហិង្សាដោយចេតនាមានស្ថានទម្ងន់ទោសពាក់ព័ន្ធនឹងការធ្វើទារុណកម្មលើកុមារនៅក្នុងអង្គការអំឡុងពេលពួកគេគ្រប់គ្រង។
ទោះបីជាសាលាដំបូង និងសាលាឧទ្ធរណ៍បានកាត់ទោសឲ្យពួកគេជាប់ពន្ធនាគាររួចហើយក្ដី ប៉ុន្តែអង្គការសុវណ្ណកុមារ អះអាងថា មកដល់ពេលនេះ លោក អារុណ សុធា លោក ហ៊ុន ចិន្តា និងអ្នកស្រី ថៃ ស៊ីនួន ព្រមទាំងអ្នកស្រី អ៊ឹង វាសនា និមល នៅមានសេរីភាពនៅឡើយ។
អតីតនាយកប្រតិបត្តិអង្គការសុវណ្ណកុមារ លោក សុធា អារុណ មិនត្រឹមតែជាប់ទោសរឿងប្រើប្រាស់អំពើហិង្សាលើកុមារនោះទេ លោកក៏ត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារ ៨ឆ្នាំ និងសងជំងឺចិត្តដល់ជនរងគ្រោះចំនួន ៦០លានរៀលក្នុងសំណុំរឿងរំលោភសេពសន្ថវៈលើកុមារ។
អង្គការសុវណ្ណកុមារសម្ដែងការខកចិត្ត ដោយចាត់ទុកការមិនទាន់ចាប់ខ្លួនជនល្មើសដែលត្រូវបានតុលាការផ្ដន្ទាទោសពីបទរំលោភសេពសន្ថវៈកុមារ បទឆបោក និងបទប្រើហិង្សាដោយចេតនាមកដាក់ពន្ធនាគារ ដោយសារតែនគរបាលអសមត្ថភាព ទើបបណ្ដាលឲ្យពួកគេរត់គេចអស់រយៈពេលជិតពីរឆ្នាំ បើទោះបីជាមានដីកាចាប់ខ្លួនពីតុលាការយ៉ាងណាក៏ដោយ។
ប្រភពដដែលបានលើកជាសំណួរថា តើលោក សុធា អារុណ លោក ហ៊ុន ចិន្តា អ្នកស្រី ថៃ ស៊ីនួន និងអ្នកស្រី អ៊ឹង វាសនា និមល អាចរត់គេចដល់ពេលណា? ហើយហេតុអ្វីបានជាសមត្ថកិច្ចកម្ពុជាមិនទាន់ចាប់ខ្លួនបានទៀត?
កាលពីថ្ងៃទី២២ ខែមិថុនា ឆ្នាំ២០២១ សមត្ថកិច្ចបានសម្រេចបង្កកអចលនទ្រព្យ និងគណនីធនាគាររបស់អតីតប្រធានអង្គការសុវណ្ណកុមារ បន្ទាប់ពីចុះស៊ើបអង្កេតដោយរកឃើញភស្តុតាងថា អំឡុងពេលលោក អារុណ សុធា គ្រប់គ្រងរយៈពេលជាង ១៦ឆ្នាំកន្លងមកនេះ បានធ្វើទារុណកម្ម ការរំលោភបំពានសេពសន្ថវៈ ការលួចបន្លំ អំពើពុករលួយ និងការកេងប្រវ័ញ្ចនៅមណ្ឌលកុមារកំព្រាជាដើម។
មេធាវីការពារក្ដីអង្គការសុវណ្ណកុមារ លោក Bradley James Gordon បានប្រាប់សារព័ត៌មាន The Cambodia Daily កាលពីខែកុម្ភៈ ឆ្នាំ២០២១ ថា លោក អារុណ សុធា បានប្រព្រឹត្តអំពើពុករលួយពាក់ព័ន្ធនឹងថវិកាម្ចាស់ជំនួយ ១,៤លានដុល្លារ។ ក្រៅពីប្រព្រឹត្តអំពើពុករលួយហើយ លោកក៏ត្រូវបានកុមារនៅក្នុងអង្គការសុវណ្ណកុមារ អះអាងថាបានរំលោភបំពានផ្លូវភេទលើកុមារ និងបណ្តោយឱ្យមានអំពើហិង្សាលើកុមារជាដើមកាលពីចុងឆ្នាំ២០១៩។
អង្គការសុវណ្ណកុមារ គឺជាអង្គការក្រៅរដ្ឋាភិបាលអន្តរជាតិមួយនៅកម្ពុជា ដែលបានបង្កើតឡើងតាំងពីឆ្នាំ២០០៣ ដោយអ្នកស្រី Elisabeth Rose Johson ប៉ុន្តែអ្នកស្រីបានទទួលមរណភាពកាលពីឆ្នាំ២០១៧។ ក្រោយពីអ្នកស្រី Elisabeth Rose Johson ទទួលមរណភាពមក លោក អារុណ សុធា ដែលជាបុគ្គលិករបស់អង្គការនេះ ត្រូវបានគេតែងតាំងជានាយកប្រតិបត្តិ។
អង្គការសុវណ្ណកុមារ មានចក្ខុវិស័យ និងភារកិច្ចតួនាទីបេសកកម្ម ដើម្បីថែរក្សា ចិញ្ចឹមកុមារទុគ៌ត និងកុមារកំព្រា ហើយបច្ចុប្បន្នមានទីតាំងនៅខណ្ឌច្បារអំពៅ រាជធានីភ្នំពេញ។ ទីតាំងអង្គការនេះក៏ជាដីតំបន់ដែលមានតម្លៃខ្លាំង ព្រោះជាតំបន់វិនិយោគទីក្រុងរណបកោះនារាណ៍ផងដែរ៕