អង្គការគម្រោងយុត្តិធម៌ពិភពលោក (World Justice Project) ចេញរបាយការណ៍ថ្មីមួយដាក់ចំណាត់ថ្នាក់នីតិរដ្ឋនៅកម្ពុជាស្ថិតនៅលំដាប់លេខ១៤១ ក្នុងចំណោមប្រទេសចំនួន ១៤២ នៅលើពិភពលោក ដែលចំណាត់ថ្នាក់នេះកាន់តែអាក្រក់ទៅ បើប្រៀបធៀបនឹងឆ្នាំ២០២២។
យោងតាមសន្ទស្សន៍នីតិរដ្ឋឆ្នាំ២០២៣ របស់អង្គការគម្រោងយុត្តិធម៌ពិភពលោក (World Justice Project (WJP)) បានចេញផ្សាយកាលពីថ្ងៃទី២៥ ខែតុលា នេះ បានចំណាត់ថ្នាក់ការគោរពនីតិរដ្ឋនៅកម្ពុជាទាបជាងគេនៅលើពិភពលោក ដោយស្ថិតនៅលំដាប់លេខរៀងទី១៤១ ក្នុងចំណោមប្រទេសចំនួន ១៤២ នៅលើពិភពលោក ខណៈឆ្នាំ២០២២ កម្ពុជាទទួលបានចំណាត់ថ្នាក់លេខ១៣៦ ក្នុងចំណោម ១៤០ប្រទេស។
មូលហេតុចម្បងដែលទាញកម្ពុជាឲ្យជាប់ចំណាត់ថ្នាក់បាតតារាងខាងការគោរពនីតិរដ្ឋនេះ គឺដោយសារមានការវាយតម្លៃទៅលើការកម្រិតនៃអំណាចរដ្ឋ អំពើពុករលួយ សិទ្ធិមនុស្ស ការអនុវត្តច្បាប់ ប្រព័ន្ធតុលាការ សណ្ដាប់ធ្នាប់ និងសន្តិសុខ និងការបើកចំហរបស់រដ្ឋាភិបាល ជាដើម។
ចំណែកប្រទេសវៀតណាម វិញ ទទួលបានចំណាត់ថ្នាក់៨៧ និងប្រទេសថៃ ជាប់ចំណាត់ថ្នាក់លេខ៨២ ខណៈប្រទេសដែលមានចំណាត់ថ្នាក់អន់ជាងគេបំផុតខាងការគោរពនីតិរដ្ឋលើពិភពលោក គឺប្រទេសវេណេហ្ស៊ុយអេឡា ដែលស្ថិតនៅបាតតារាងក្រោមប្រទេសកម្ពុជា។
អង្គការគម្រោងយុត្តិធម៌ពិភពលោក បញ្ជាក់ថា ការគោរពនីតិរដ្ឋនៅឆ្នាំ២០២៣ នេះ បានធ្លាក់ចុះដែលមានប្រទេសប្រមាណ ៦០% ក្នុងនោះក៏មានប្រទេសកម្ពុជាផងដែរ ដោយសារតែនិន្នាការនៃរបបផ្ដាច់ការ ធ្វើឲ្យនីតិរដ្ឋនៅលើពិភពលោកធ្លាក់ចុះ ពោលគឺចាប់តាំងពីឆ្នាំ២០១៦ រហូតមកដល់បច្ចុប្បន្ននេះ។
កត្តាទាំងនេះបណ្ដាលមកពីអំណាចនីតិប្បញ្ញតិ ប្រព័ន្ធយុត្តិធម៌ និងសង្គមស៊ីវិល រួមមានប្រព័ន្ធផ្សព្វផ្សាយនៅជុំវិញពិភពលោក មិនបានដើរតួនាទីក្នុងការត្រួតពិនិត្យអំណាចប្រតិបត្តិនោះទេ។
តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន លើកឡើងថា ប្រទេសមានចំណាត់ថ្នាក់ទាបជាងគេខាងនីតិរដ្ឋក្នុងពិភពលោក ក្នុងនោះប្រទេសវេណេហ្ស៊ុយអេឡា ជាប់ចំណាត់ថ្នាក់លេខ១ ហើយកម្ពុជាជាប់លេខ២។ ចំណែកប្រទេសអាហ្វហ្គានីស្ថាន ជាប់ចំណាត់ថ្នាក់លេខ៣ ហើយហៃទីជាប់លេខ៤ និងកុងហ្គោ ជាប់លេខ៥។
លោកថា មូលហេតុចម្បងទាញកម្ពុជាឲ្យជាប់ចំណាត់ថ្នាក់បាតតារាបែបនេះ ដោយសារតែតុលាការកម្ពុជាជាស្ថាប័នឯករាជ្យ ស្ថិតនៅក្រោមបញ្ជារបស់គ្រួសារត្រកូលហ៊ុន និងជាតុលាការដែលប្រព្រឹត្តអំពើពុករលួយ បក្ខពួកនិយម ជាដើម។
យោងតាមសន្ទស្សន៍នៃការគោរពនីតិរដ្ឋ ថាប្រទេសដែលមានការគោរពនីតិរដ្ឋល្អជាងគេបំផុត គឺដាណឺម៉ាក បន្ទាប់មកទៀត គឺប្រទេសន័រវែស ហ្វាំងឡង់ និងអាល្លឺម៉ង់។
ជុំវិញរឿងនេះ អ្នករាយការណ៍ពិសេសរបស់អង្គការសហប្រជាជាតិ នៅខែតុលា នេះ បានចេញសេចក្ដីប្រកាសមួយដោយព្រួយបារម្ភពីបញ្ហាសិទ្ធិមនុស្សនៅកម្ពុជា ដោយសារតែការឡើងកាន់អំណាចតពូជនេះ ធ្វើឲ្យប៉ះពាល់ដល់សិទ្ធិមនុស្ស គោលការណ៍ប្រជាធិបតេយ្យ និងច្បាប់អន្តរជាតិ ខណៈអង្គការអន្តរជាតិរកឃើញថា ប្រទេសកម្ពុជាបានក្លាយទៅជាជម្រកនៃការជួញដូរមនុស្ស និងឆបោកតាមប្រព័ន្ធអនឡាញ៕