អគ្គនាយកនៃអគ្គនាយកដ្ឋានពន្ធដារកម្ពុជា លោក គង់ វិបុល ព្រមានថាចាប់ពីឆ្នាំ២០២៤ តទៅ ម្ចាស់អចលនទ្រព្យដែលមិនទាន់បំពេញកាតព្វកិច្ចពន្ធលើអចលនទ្រព្យ និងពន្ធលើដីធ្លីដែលមិនបានប្រើប្រាស់ឱ្យបានទាន់ពេលទេ អគ្គនាយកដ្ឋានពន្ធដារនឹងអនុវត្តតាមច្បាប់ និងលិខិតបទដ្ឋានគតិយុត្តិជាធរមានជាកំហិត ខណៈពេលវេលាកំណត់នៅសល់ត្រឹមតែ ៦០ថ្ងៃទៀតប៉ុណ្ណោះ។
លោក គង់ វិបុល បានចេញសេចក្តីជូនដំណឹងស្ដីពីការលើកលែងទណ្ឌកម្មរដ្ឋបាល ពន្ធបន្ថែម និងការប្រាក់ចំពោះពន្ធលើអចលនទ្រព្យ និងពន្ធលើដីធ្លីដែលមិនបានប្រើប្រាស់កាលពីពេលថ្មីៗនេះថា ដើម្បីទទួលបានការលើកលែងទណ្ឌកម្មរដ្ឋបាល ពន្ធបន្ថែម និងការប្រាក់ចំពោះពន្ធលើអចលនទ្រព្យ និងពន្ធលើដីធ្លីដែលមិនបានប្រើប្រាស់ ម្ចាស់អចលនទ្រព្យទាំងអស់ត្រូវរួសរាន់មកចុះបញ្ជី ឬធ្វើបច្ចុប្បន្នភាពប្រកាស និងបង់ប្រាក់ពន្ធឱ្យបានមុនដំណាច់ឆ្នាំ២០២៣ ជាកំណត់។
អគ្គនាយកនៃអគ្គនាយកដ្ឋានពន្ធដារកម្ពុជារូបនេះលើកឡើងថា ដើម្បីសម្រួលដល់ប្រជាពលរដ្ឋដែលជាម្ចាស់អចលនទ្រព្យដែលមានឆន្ទៈក្នុងការបំពេញកាតព្វកិច្ចប្រកាស និងបង់ពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់ និងជំរុញការចុះបញ្ជីអចលនទ្រព្យ ម្ចាស់អចលនទ្រព្យទាំងអស់ដែលកន្លងមកមិនទាន់បានចុះបញ្ជី និងប្រកាសបង់ប្រាក់ពន្ធ ឬបង់ប្រាក់ពន្ធខ្វះ ឬបង់ប្រាក់ពន្ធយឺតកន្លងមក ក្រសួងសេដ្ឋកិច្ច និងហិរញ្ញវត្ថុ តម្រូវឱ្យបង់ត្រឹមតែប្រាក់ពន្ធប៉ុណ្ណោះ មិនមានការដាក់ទណ្ឌកម្មរដ្ឋបាល ពន្ធបន្ថែម និងការប្រាក់ឡើយ។
លោក គង់ វិបុល បញ្ជាក់ថា ក្នុងករណីអចលនទ្រព្យ និងដីធ្លីដែលមិនបានប្រើប្រាស់ទាំងនោះប្រែប្រួល ដូចជាដីត្រូវបានយកទៅសាងសង់ផ្ទះ អគារ និងសំណង់ផ្សេងៗ ឬផ្ទះ អគារ និងសំណង់ផ្សេងៗត្រូវបានសាងសង់បន្ថែម ឬបន្ថយ ឬរំលាយចោល ឬអចលនទ្រព្យត្រូវបានផ្លាស់ប្ដូរកម្មសិទ្ធិករ អ្នកកាន់កាប់ ឬអ្នកទទួល ប្រយោជន៍ចុងក្រោយនៃអចលនទ្រព្យ អ្នកជាប់ពន្ធដែលជាម្ចាស់អចលនទ្រព្យ ត្រូវផ្ដល់ព័ត៌មានជូនរដ្ឋបាលសារពើពន្ធអំពីបច្ចុប្បន្នភាពអចលនទ្រព្យរបស់ខ្លួនជាបន្ទាន់ ដោយត្រូវភ្ជាប់មកជាមួយនូវឯកសារដែលពាក់ព័ន្ធផងដែរ។
ការអះអាងនេះ ធ្វើឡើងដើម្បីជូនដំណឹងដល់ប្រជាពលរដ្ឋដែលត្រូវបង់ពន្ធ ឱ្យរួសរាន់ទៅចុះបញ្ជីអចលនទ្រព្យរបស់ខ្លួនឱ្យបានមុនដាច់ឆ្នាំ២០២៣ នេះ។
រដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត កំពុងចាត់វិធានការរឹតបន្តឹងការប្រមូលពន្ធគ្រប់ច្រកល្ហកនៅដើមឆ្នាំ២០២៤ ខាងមុខនេះតទៅ ខណៈពន្ធដែលប្រជាពលរដ្ឋត្រូវបង់ជូនរដ្ឋ គឺមានដល់ទៅ ២០ប្រភេទខុសៗគ្នា ទាំងត្រូវបង់ដោយផ្ទាល់ និងដោយប្រយោល ដូចជា ពន្ធលើប្រាក់ចំណូលចាប់ពី ៥% ទៅ ២០% ពន្ធលើចំណេញមូលធនចំនួន ២០% ពន្ធលើអចលនទ្រព្យ ០,១% ពន្ធអាករបំភ្លឺសាធារណៈ ៣%។
បន្ថែមពីនេះ ពន្ធមធ្យោបាយដឹកជញ្ជូនដែលត្រូវកំណត់តម្លៃតាមប្រភេទយានយន្ត ពន្ធប្រថាប់ត្រា ៤% ពន្ធស្នាក់នៅ ២% ពន្ធលើដីធ្លីមិនទាន់បានប្រើប្រាស់ ២% ពន្ធលើថ្លៃឈ្នួលអចលនទ្រព្យ ១០% ពន្ធប៉ាតង់ គឺត្រូវកំណត់តាមប្រភេទអាជីវកម្ម និងពន្ធលើតម្លៃបន្ថែម ១០% ជាដើម។
ជាងនេះទៀត នៅមានពន្ធកាត់ទុក ១៥% ពន្ធអប្បបរមា ១% ពន្ធលើប្រាក់បៀវត្សចាប់ពី ៥% ទៅ ២០% ពន្ធកាត់ទុកពីការចំណេញលើការប្រាក់ ៦% ពន្ធលើប្រាក់ចំណូលប្រចាំឆ្នាំចាប់ពី ០% ទៅ ៣០% ពន្ធប្រថាប់ត្រាមាន ៤% និង ១% ពន្ធកាត់ទុកចាប់ពី ១០% ១៥% និង ១៤% ពន្ធកាត់ទុកពីការបញ្ញើប្រាក់គ្មានដែនកំណត់ ៤% ពន្ធអាករពិសេសលើទំនិញ និងសេវា ១០% និងពន្ធចំណេញមូលធន ២០% ផងដែរ។
ទាក់ទិននឹងការប្រមូលពន្ធនេះ បណ្ឌិត ប៉ា ចន្ទរឿន ធ្លាប់បានលើកឡើងថា ប្រទេសស្វីស គឺជាប្រទេសដែលយកពន្ធគ្រប់មុខដូចប្រទេសដទៃដែរ ដូចជា ពន្ធលើប្រាក់បៀវត្ស ពន្ធអចលនទ្រព្យ ពន្ធយានយន្ត និងពន្ធអាជីវកម្ម ជាដើម ប៉ុន្តែជាការឆ្លើយតបនឹងការប្រមូលពន្ធនេះ រដ្ឋាភិបាលស្វីស បានផ្តល់ជូនប្រជាពលរដ្ឋត្រឡប់មកវិញនូវផ្លូវថ្នល់ស្អាតគ្រប់ទីកន្លែង សន្តិសុខ សុវត្ថិភាពពេញលេញ ផ្តល់សេវាសុខភាពមានគុណភាព ផ្តល់កន្លែងស្នាក់នៅ ថវិកា អាហារ និងការរៀនសូត្រដល់អ្នកក្រីក្រ ព្រមទាំងជួយឧបត្ថម្ភបង្គ្រប់ជីវភាពសម្រាប់គ្រួសារដែលមានចំណូលទាបជាងស្តង់ដារ ជាដើម។
ជាងនេះទៀត រដ្ឋាភិបាលនៃប្រទេសស្វីស ក៏បានផ្តល់ប្រាក់ចិញ្ចឹមកូនដែលទើបនឹងប្រសូតប្រមាណ ៤០០ដុល្លារមួយខែសម្រាប់កូនម្នាក់ក្នុងរយៈពេល ១៨ឆ្នាំ ផ្តល់នូវសង្គមមួយដែលគ្មានការរំលោភបំពាន គ្មានហិង្សា។ លើសពីនេះ ពលរដ្ឋដែលបាត់បង់ការងារ រដ្ឋមានកាតព្វកិច្ចផ្តល់ប្រាក់បៀវត្សប្រមាណ ៧០% នៃប្រាក់ខែចុងក្រោយរបស់ពួកគេសម្រាប់រយៈពេល ១៨ ទៅ ២៤ខែ និងបណ្តុះបណ្តាលលើជំនាញដែលខ្វះខាតឱ្យឥតគិតថ្លៃថែមទៀត។
បណ្ឌិត ប៉ា ចន្ទរឿន បញ្ជាក់ថា ពេលចូលនិវត្តន៍ ពលរដ្ឋស្វីស អាចទទួលបានប្រាក់សោធនដោយទៀងទាត់ ទោះជាពួកគេចាកចេញពីប្រទេសស្វីស ទៅរស់នៅប្រទេសដទៃក៏ដោយ ប៉ុន្តែនៅពេលដែលពួកគេត្រឡប់មកប្រទេសកំណើតវិញ រដ្ឋាភិបាលស្វីស នៅតែមានកាតព្វកិច្ចរ៉ាប់រងក្នុងការចិញ្ចឹមពួកគេដូចមុនដដែល៕