កូនឈើប្រមាណ ១៥ម៉ឺន ៥ពាន់ដើម (១៥៥០០០ដើម) ដែលរួមមានប្រភេទឈើបេង ធ្នង់ នាងនួន និងក្រញូង បាននិងកំពុងដុះលូតលាស់លើផ្ទៃដី ៥៣០ហិកតារនៃសួនភូតគាមឈើប្រណិតភ្នំតាម៉ៅ ក្រោយពីជាង ១ឆ្នាំមុនដែលត្រូវបានក្រុមហ៊ុន ឡេង ណាវ៉ាត្រា ឈូសឆាយដីព្រៃភ្នំតាម៉ៅអស់ជាង ៥០០ហិកតារក្រោមរូបភាពអភិវឌ្ឍ។
អ្នកនាំពាក្យក្រសួងកសិកម្ម លោក ឃឹម ហ្វីណង់ បានប្រាប់អ្នកសារព័ត៌មានថា ក្រោយមានការឈូសឆាយដីព្រៃជាង ៥០០ហិកតារក្រោមរូបភាពអភិវឌ្ឍដោយក្រុមហ៊ុនមួយនៅតំបន់ភ្នំតាម៉ៅ កាលពីជាង ១ឆ្នាំមុន បច្ចុប្បន្ននេះ កូនឈើប្រណិតត្រូវបានដាំដុះឡើងវិញបានប្រមាណ ១៥ម៉ឺន ៥ពាន់ដើមនៅសួនភូតគាមភ្នំតាម៉ៅ លើផ្ទៃដីទំហំ ៥៣០ហិកតារ។ កូនឈើប្រណិតទាំងនោះរួមមានប្រភេទឈើបេង ធ្នង់ នាងនួន ក្រញូង និងច្រែស ជាដើម។
អ្នកនាំពាក្យដដែលបានលើកឡើងថា ចំនួននេះនឹងអាចកើនឡើងជាបន្តទៀត ខណៈស្ថានភាពកូនឈើបច្ចុប្បន្នដុះលូតលាស់បានយ៉ាងល្អប្រសើរ។
អ្នកនាំពាក្យរូបនេះបានឲ្យដឹងទៀតថា ក្នុងឆ្នាំ២០២២ កន្លងទៅ បញ្ជាការដ្ឋានអង្គរក្សបានដាំដុះកូនឈើប្រណិតមានដូចជា បេង ធ្នង់ នាងនួន ក្រញូង និងច្រែស ប្រមាណជាង ១៥ម៉ឺនដើម។ លោកបន្តថា ទោះបីជាឆ្លងកាត់នូវរដូវប្រាំងក៏ដោយ ក៏កូនឈើដែលអាចរក្សាបាននូវការលូតលាស់ល្អ គឺមានតែចំនួន ៩០%។
រដ្ឋបាលព្រៃឈើនៃក្រសួងកសិកម្ម បានដាំបន្ថែម ឬដាំជួសកូនឈើប្រណិតប្រមាណ ២ម៉ឺនកូនបន្ថែមទៀតក្នុងរដូវវស្សាឆ្នាំ២០២៣ នេះ ហើយក៏បានបង្កើតថ្នាលបណ្ដុះកូនឈើមួយកន្លែងដែលមានកូនឈើសម្រាប់បណ្ដុះប្រភេទធ្នង់ បេង ក្រញូង និងនាងនួន ជាង ៨ម៉ឺនកូន ទុកបម្រុងសម្រាប់ដាំជួសផងដែរ។
គិតមកទល់នឹងពេលនេះ គឺមានរយៈពេលប្រមាណ ១ឆ្នាំ ៣ខែហើយដែលអតីតនាយករដ្ឋមន្ត្រីលោក ហ៊ុន សែន បានប្រកាសឲ្យក្រុមហ៊ុន ឡេង ណាវ៉ាត្រា បញ្ឈប់ការឈូសឆាយដីនៅតំបន់ភ្នំតាម៉ៅ នេះ និងប្រគល់ឲ្យស្ថិតក្រោមការការពារ និងអភិរក្សដោយក្រសួងកសិកម្ម។
កាលពីថ្ងៃទី១ ខែសីហា ឆ្នាំ២០២២ ក្រុមហ៊ុនឯកជនចំនួន ៣ រួមមានក្រុមហ៊ុន Bati Tourism & Development ក្រុមហ៊ុន TP Moral Group និងក្រុមហ៊ុន China Poipet Satellite City បានសហការគ្នាដោយមានការឯកភាពពីក្រសួងកសិកម្ម រុក្ខាប្រមាញ់ និងនេសាទ ដាក់គ្រឿងចក្រជាច្រើនគ្រឿងឈូសឆាយព្រៃឈើនៅឧទ្យានសួនសត្វភ្នំតាម៉ៅ ដែលស្ថិតនៅក្នុងឃុំកណ្ដឹង ស្រុកបាទី ខេត្តតាកែវ ដើម្បីប្រកបអាជីវកម្មរបស់ពួកគេ។
ការឈូសឆាយព្រៃឈើនៅឧទ្យានសួនសត្វភ្នំតាម៉ៅ នេះ ត្រូវសកម្មជនព្រៃឈើរកឃើញថា ក្រុមហ៊ុនទាំងនេះមានបំណងបង្កើតអាជីវកម្មដីឡូត៍ដែលអាចលក់បានក្នុងតម្លៃប្រមាណជា ៣៦ដុល្លារអាមេរិកក្នុង ១ម៉ែត្រការ៉េ។ ដូច្នេះ ទំហំដីជិត ៦០០ហិកតារដែលពួកគេទទួលបានសិទ្ធិកាន់កាប់ពីរដ្ឋាភិបាលកម្ពុជាដែលមានទំហំស្មើនឹង ៦លានម៉ែត្រការ៉េនោះ ពួកគេនឹងទទួលបានចំណូលត្រឡប់មកវិញប្រមាណជាង ២០០លានដុល្លារអាមេរិកពីការឈូសឆាយព្រៃនៅតំបន់ឧទ្យានសួនសត្វភ្នំតាម៉ៅ នោះ។
ព្រះរាជក្រឹត្យកាលពីខែសីហា ឆ្នាំ២០២២ បានកំណត់ថា តំបន់ការពារភ្នំតាម៉ៅ មានផ្ទៃដីសរុប ២០២៥ហិកតារ ស្ថិតនៅក្នុងស្រុកបាទី ខេត្តតាកែវ ក្នុងនោះផ្ទៃដី ១០២១ហិកតារជាតំបន់ព្រៃការពារសម្រាប់ស្ដារលទ្ធភាពសត្វព្រៃ ចំណែក ៥៣០ហិកតារជាតំបន់សួនភូតគាមឈើប្រណិតភ្នំតាម៉ៅ និងផ្ទៃដី ៤៧៤ហិកតារជាតំបន់ឧទ្យានសួនសត្វ៕