34 C
Phnom Penh

លោក រ៉ុង ឈុន ប្រកាស​ចូលរួម​ធ្វើ​នយោបាយ​ថ្មី​ជាមួយ​គណបក្ស​កម្លាំង​ជាតិ ដោយ​លាលែង​តំណែង​ពី​គណបក្ស​ភ្លើង​ទៀន

ដោយ ឌឹ ខេមបូឌា ដេលី

បទវិភាគ

លោក រ៉ុង ឈុន នៅ​ថ្ងៃ​ព្រហស្បតិ៍ ទី​៩ វិច្ឆិកា នេះ ប្រកាស​លាលែង​តំណែង​ជា​អនុប្រធាន​គណបក្ស​ភ្លើង​ទៀន និង​ពី​សមាជិក​គណបក្ស​នេះ បន្ទាប់ពី​លោក​បាន​ចូលរួម​ជីវភាព​នយោបាយ​អស់​រយៈពេល​ជិត ១​ឆ្នាំ ដោយ​លោក​នឹង​ទៅ​ចូលរួម​ជីវភាព​នយោបាយ​ជាមួយ​គណបក្ស​កម្លាំង​ជាតិ ដើម្បី​កសាង​កម្លាំង​នយោបាយ​អ្នក​ប្រជាធិបតេយ្យ​ឱ្យ​កាន់តែ​រីក​ធំធាត់​ឆ្ពោះ​ទៅ​រក​ការ​ដឹកនាំ​ប្រទេស​នា​ពេល​ខាងមុខ។

មន្ត្រី​ជាន់ខ្ពស់​គណបក្ស​ភ្លើង​ទៀន លោក រ៉ុង ឈុន ចេញ​សេចក្តី​ប្រកាស​ព័ត៌មាន​នៅ​ថ្ងៃទី​៩ ខែ​វិច្ឆិកា ឆ្នាំ​២០២៣ នេះ​ថា មូលហេតុ​នៃ​ការ​ចេញពី​គណបក្ស​នេះ គឺ​ដោយសារតែ​គណបក្ស​ភ្លើង​ទៀន មិន​អាច​ចូលរួម​ការ​បោះឆ្នោត​បន្ត​ទៅ​ថ្ងៃ​មុខ​ទៀត​បាន​ទេ ដូច្នេះ​ដើម្បី​បន្ត​ចរន្ត​នយោបាយ និង​គោលជំហរ​ដើម​របស់​គណបក្ស​ភ្លើង​ទៀន គឺ​មាន​តែ​បន្ត​ចូលរួម​ជីវភាព​នយោបាយ​ជាមួយ​គណបក្ស​កម្លាំង​ជាតិ ដែល​ទើប​នឹង​បង្កើត​ឡើង​កាលពី​ពេល​ថ្មីៗ​នេះ​តែប៉ុណ្ណោះ។

អតីត​មន្ត្រី​ជាន់ខ្ពស់​គណបក្ស​ភ្លើង​ទៀន រូប​នេះ​អះអាង​ថា ការ​បន្ត​ទៅ​ចូលរួម​ជាមួយ​គណបក្ស​កម្លាំង​ជាតិ គឺជា​ពន្លឺ​មួយ​ដែល​អាច​ជួយ​ឱ្យ​លោក​មាន​ឱកាស​កសាង​កម្លាំង​នយោបាយ​អ្នក​ប្រជាធិបតេយ្យ​ឱ្យ​កាន់តែ​រីក​ធំធាត់ ឆ្ពោះ​ទៅ​រក​ការ​ដឹកនាំ​ប្រទេស​តាមរយៈ​នៃ​ការ​ប្រកួតប្រជែង​ដោយ​ការ​បោះឆ្នោត​មួយ​ដែល​ប្រកប​ដោយ​សេរី ត្រឹមត្រូវ និង​យុត្តិធម៌។

លោក រ៉ុង ឈុន បញ្ជាក់​ថា មាន​តែ​គណបក្ស​កម្លាំង​ជាតិ​តែ​មួយ​គត់​ដែល​មាន​ទស្សនៈ​នយោបាយ ឆន្ទៈ និង​មាន​គោលដៅ​ច្បាស់លាស់ វែងឆ្ងាយ ស័ក្តិសម​ជា​អ្នក​បន្ត​នូវ​ស្មារតី​ដើម​នៃ​គណបក្ស​ភ្លើង​ទៀន ដូច្នេះ​លោក​សូម​ប្រកាស​ចូលរួម​ជីវភាព​នយោបាយ​ជាមួយ​គណបក្ស​នេះ​ចាប់ពី​ពេលនេះ​តទៅ។

កាលពី​ថ្ងៃទី​៣១ ខែ​មករា ឆ្នាំ​២០២៣ អតីត​ប្រធាន​សហភាព​សហជីព​កម្ពុជា លោក រ៉ុង ឈុន បាន​ធ្វើ​សន្និសីទ​សារព័ត៌មាន​ប្រកាស​ចូលរួម​ជីវភាព​នយោបាយ​ជាមួយ​គណបក្ស​ភ្លើង​ទៀន ដើម្បី​ចូលរួម​ការ​ប្រកួតប្រជែង​ការ​បោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា ឆ្នាំ​២០២៣ ប៉ុន្តែ​ជា​អកុសល គណបក្ស​ភ្លើង​ទៀន ត្រូវ​បាន​រារាំង​មិន​ឱ្យ​ចូលរួម​ឈរឈ្មោះ​បោះឆ្នោត​ឡើយ ហើយ​ក៏​នឹង​មិន​អាច​ឈរឈ្មោះ​ឱ្យ​ប្រជាពលរដ្ឋ​បោះឆ្នោត​ឱ្យ​ដែរ​ទៅ​ថ្ងៃ​មុខ។

លោក រ៉ុង ឈុន គឺជា​អតីត​ប្រធាន​សមាគម​គ្រូបង្រៀន​កម្ពុជា​ឯករាជ្យ មុន​នឹង​លោក​ចូល​បម្រើ​ការងារ​ជា​មន្ត្រី​ជាន់ខ្ពស់​នៅ​ក្នុង​ស្ថាប័ន​ជាតិ​រៀបចំ​ការ​បោះឆ្នោត ប៉ុន្តែ​លោក​បាន​លាលែង​តំណែង​មន្ត្រី​ជាន់ខ្ពស់ គ.ជ.ប វិញ​ក្រោយពី​គណបក្ស​សង្គ្រោះ​ជាតិ ត្រូវ​តុលាការ​កំពូល​ប្រកាស​រំលាយ។

លោក​ក៏​បាន​មាន​មុខនាទី​ជា​ប្រធាន​សហភាព​សហជីព​កម្ពុជា ដើម្បី​ដឹកនាំ​តវ៉ា​ទាមទារ​សិទ្ធិ​ការងារ​ឲ្យ​កម្មករ ក្នុង​បំណង​ការពារ​ផល​ប្រយោជន៍​កម្មករ​និយោជិត​នៅ​ប្រទេស​កម្ពុជា​វិញ មុន​នឹង​លោក​ប្រកាស​ចូលរួម​ជីវភាព​នយោបាយ​ជាមួយ​គណបក្ស​ភ្លើង​ទៀន កាលពី​ដើម​ឆ្នាំ​២០២៣ កន្លងទៅ។

ជុំវិញ​សកម្មភាព​ការពារ​ផល​ប្រយោជន៍​ប្រជាពលរដ្ឋ លោក រ៉ុង ឈុន ត្រូវ​បាន​សមត្ថកិច្ច​ចាប់​ខ្លួន​ដាក់​ពន្ធនាគារ​ចំនួន ៣​លើក​រួច​មក​ហើយ ក្នុង​នោះ​នៅ​ថ្ងៃទី​១៥ ខែ​តុលា ឆ្នាំ​២០០៥ លោក​ត្រូវ​បាន​ចាប់​ខ្លួន និង​ចោទប្រកាន់​តាម​ផ្លូវ​តុលាការ ព្រោះតែ​រិះគន់​អំពី​សន្ធិសញ្ញា​បំពេញ​បន្ថែម​កម្ពុជា-វៀតណាម រីឯ​នៅ​ចុង​ខែ​មករា ឆ្នាំ​២០១៤ លោក​ត្រូវ​គេ​ចាប់​ខ្លួន​ម្តង​ទៀត ដោយសារតែ​ដឹកនាំ​ទាមទារ​ឱ្យ​មាន​ការ​ដោះលែង​ប្រធាន​សមាគម​សេដ្ឋកិច្ច​ប្រជាធិបតេយ្យ​ឯករាជ្យ​ក្រៅ​ប្រព័ន្ធ លោក វន់ ពៅ។

រហូត​ដល់​ថ្ងៃទី​៣០ ខែ​កក្កដា ឆ្នាំ​២០២០ លោក រ៉ុង ឈុន ក៏​ត្រូវ​ចាប់​ខ្លួន​ជា​ថ្មី​ទៀត ក្រោយពី​លោក​បាន​ចេញ​សេចក្តី​ថ្លែងការណ៍​អំពី​ការ​បាត់​ដី​របស់​ពលរដ្ឋ​ខ្មែរ​ទៅ​ខាង​វៀតណាម នៅ​ខេត្ត​ត្បូងឃ្មុំ ប៉ុន្តែ​លោក​ត្រូវ​តុលាការ​ដោះលែង​ឱ្យ​នៅ​ក្រៅ​ឃុំ​បណ្ដោះអាសន្ន និង​ដាក់​ឱ្យ​នៅ​ក្រោម​ការ​តាមដាន​របស់​តុលាការ​រហូត​ដល់​ពេល​នេះ។ ដោយសារតែ​បញ្ហា​នេះ លោក​ក៏​ត្រូវ​បាន គ.ជ.ប ដក​បេក្ខភាព​ជា​បេក្ខជន​តំណាងរាស្ត្រ​មណ្ឌល​ភ្នំពេញ​ខាង​គណបក្ស​ភ្លើង​ទៀន ដើម្បី​ចូលរួម​ឈរឈ្មោះ​បោះឆ្នោត​នៅ​ចុង​ខែ​កក្កដា ឆ្នាំ​២០២៣ ផង​ដែរ។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​៩ វិច្ឆិកា នេះ​ថា ការ​ចាកចេញ​របស់​លោក រ៉ុង ឈុន ពី​គណបក្ស​ភ្លើង​ទៀន ទៅ​កាន់​គណបក្ស​កម្លាំង​ជាតិ គឺជា​រឿង​ធម្មតា​ក្នុង​សេណារីយ៉ូ​បន្ត​ដង្ហើម​នយោបាយ​គណបក្ស​ភ្លើង​ទៀន ត្បិត​គណបក្ស​កម្លាំង​ជាតិ នរណា​ក៏​គេ​ដឹង​ដែរ​ថា​ជា​គណបក្ស​ដែល​បាន​កើតឡើង​ក្រោម​ការ​ផ្ចុងផ្ដើម​របស់​ក្រុម​មន្ត្រី​គណបក្ស​ភ្លើង​ទៀន។

លោក សេក សុជាតិ បញ្ជាក់​ថា ក្រោយពី​ទទួល​បាន​បទពិសោធន៍​ពី​គណបក្ស​ភ្លើង​ទៀន គណបក្ស​កម្លាំង​ជាតិ ត្រូវតែ​មាន​ការ​ប្រុងប្រយ័ត្ន​ខ្ពស់​ក្នុង​ការ​ដឹកនាំ​គណបក្ស​របស់​ខ្លួន និង​គួរ​តែ​បង្កើត​ឲ្យ​មាន​ជម្រក​ប្រជាធិបតេយ្យ​ដ៏​សុខសាន្ត​សម្រាប់​ក្រុម​អ្នក​ប្រជាធិបតេយ្យ ដើម្បី​ចង​បាច់​កម្លាំង​រួបរួម​ក្នុង​ការ​ស្ដារ​លទ្ធិប្រជាធិបតេយ្យ​ឡើង​វិញ និង​ត្រូវ​ចៀស​ឱ្យ​ផុត​នូវ​ការ​ដឹកនាំ​ដែល​ប្រកាន់​បក្ខពួក​រហូត​ធ្វើ​ឱ្យ​បែកបាក់​កម្លាំង​នយោបាយ​ខ្លួនឯង​បន្ត​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស