33 C
Phnom Penh

មេដឹកនាំ​បណ្ដា​ប្រទេស​អារ៉ាប់​រួម​គ្នា​ស្នើ​អ៊ីស្រាអែល​បញ្ចប់​សង្គ្រាម តែ​អ៊ីស្រាអែល​ទាត់​ចោល

ដោយ ឌឹ ខេមបូឌា ដេលី

បទវិភាគ

មេដឹកនាំ​បណ្ដា​ប្រទេស​អារ៉ាប់ និង​ឥស្លាម កាលពី​ថ្ងៃ​សៅរ៍ ទី​១១ វិច្ឆិកា បាន​ទៅ​ជួប​ប្រជុំ​គ្នា​នៅ​ក្នុង​ប្រទេស​អារ៉ាប៊ីសាអ៊ូឌីត ដើម្បី​បើក​កិច្ចប្រជុំ​កំពូល​មួយ​ពិនិត្យ​មើល​សង្គ្រាម​អ៊ីស្រាអែល វាយប្រហារ​ទៅ​លើ​ពួក​ហាម៉ាស-ប៉ាឡេស្ទីន ក្នុង​ដែនដី​ហ្កាហ្សា។

មេដឹកនាំ​នៃ​ក្រុម​ប្រទេស​អារ៉ាប់ និង​ប្រទេស​កាន់​សាសនា​អ៊ីស្លាម នេះ បាន​លើក​ពី​បញ្ហា​សង្គ្រាម​នៅ​តំបន់​ហ្កាហ្សា​ដែនដី​ប៉ាឡេស្ទីន ដែល​អ៊ីស្រាអែល កំពុង​វាយប្រហារ​ទៅ​លើ​ក្រុម​ហាម៉ាស។

តាម​សេចក្ដី​រាយការណ៍​រួម​ដែល​កាសែត​អាមេរិក The New York Times បាន​ចុះផ្សាយ​កាលពី​ថ្ងៃទី​១២ ខែ​វិច្ឆិកា ថា លទ្ធផល​នៃ​ជំនួប​កំពូល​នេះ​បាន​រួម​គ្នា​ថ្កោលទោស​ទៅ​លើ​អ៊ីស្រាអែល ហើយ​ស្នើ​ឱ្យ​បញ្ចប់​សង្គ្រាម តែ​មិន​មាន​ជំហរ​រួម​គ្នា​ដាក់​ចេញ​វិធានការ​ណា​មួយ​ជាក់ស្ដែង​លើ​អ៊ីស្រាអែល នោះ​ទេ ហើយ​សូម្បី​ការ​ដាក់​ទណ្ឌកម្ម​សេដ្ឋកិច្ច ឬ​ទណ្ឌកម្ម​នយោបាយ​ការបរទេស ក៏​មិន​អាច​រក​សំឡេង​តែ​មួយ​បាន​ដែរ។

សេចក្ដី​ថ្លែងការណ៍​រួម​របស់​មេដឹកនាំ​ប្រទេស​អារ៉ាប់ និង​ប្រទេស​អ៊ីស្លាម បាន​ហៅ​អ៊ីស្រាអែល បាញ់​ផ្លោង​មីស៊ីល​ទៅ​លើ​តំបន់​ហ្កាហ្សា ដោយ​សម្លាប់​ប្រជាជន​ស៊ីវិល ថា​ជា​អំពើ​ព្រៃផ្សៃ​យង់ឃ្នង។

ប៉ុន្តែ​គេ​សង្កេត​ឃើញ​ជំហរ​រួម​គ្នា​មួយ គឺ​មេដឹកនាំ​ប្រទេស​អារ៉ាប់ និង​អ៊ីស្លាម បាន​ច្រានចោល​ចំពោះ​ការ​លើកឡើង​របស់​អ៊ីស្រាអែល ដែល​អះអាង​ថា​ខ្លួន​មាន​សិទ្ធិ​ស្រប​ច្បាប់​ក្នុង​ការ​ការពារ​ខ្លួន។ តែ​ជាមួយ​គ្នា​នេះ ក្រុម​ប្រទេស​អារ៉ាប់ និង​អ៊ីស្លាម បាន​យល់​ស្រប​គ្នា​ដោយ​បាន​ច្រានចោល​រាល់​ដំណោះស្រាយ​នយោបាយ​ទាំងអស់ ដែល​មាន​ផែនការ​ផ្តាច់​ដែនដី​តំបន់​ហ្កាហ្សា ពី​ដែនដី​តំបន់​ប៉ាឡេស្ទីន។

ប្រធានាធិបតី​អ៊ីរ៉ង់ លោក អ៊ីប្រាហ៊ីម រ៉ៃស៊ី ប្រកាស​ថា ត្រូវតែ​ចាត់ទុក​កងទ័ព​អ៊ីស្រាអែល ជា​អង្គភាព​ភេរវកម្ម។ ចំពោះ​មេដឹកនាំ​ប្រទេស​អាល់ហ្សេរី និង​លីបង់ បាន​ទាមទារ​ឲ្យ​ផ្តាច់​ទំនាក់ទំនង​សេដ្ឋកិច្ច និង​ការទូត​ទាំងស្រុង​ជាមួយ​អ៊ីស្រាអែល និង​បាន​អំពាវនាវ​ឲ្យ​ប្រទេស​អារ៉ាប់ ត្រូវតែ​ឈប់​លក់​ប្រេង​ទៅ​ឲ្យ​អ៊ីស្រាអែល។

ចំពោះ​សង្គ្រាម​សងសឹក​របស់​អ៊ីស្រាអែល នេះ ប្រធានាធិបតី​តួកគី មេដឹកនាំ​អារ៉ាប៊ីសាអ៊ូឌីត បាន​រិះគន់​គោលជំហរ​របស់​ក្រុម​ប្រទេស​លោក​ខាងលិច ថា​គាំទ្រ​អ៊ីស្រាអែល​ជ្រុល​ហួសហេតុ មិន​ខ្វល់​ពី​អាយុ​ជីវិត​ជន​ស្លូតត្រង់​ប៉ាឡេស្ទីន ដែល​ស្លាប់​ដោយសារ​អ៊ីស្រាអែល វាយប្រហារ។

លោក ម៉ាសមូដ អាបាស ប្រធានាធិបតី​ប៉ាឡេស្ទីន វិញ បាន​ថ្លែង​ថា សហរដ្ឋ​អាមេរិក​ត្រូវ​ប្រើ​ឥទ្ធិពល​របស់​ខ្លួន​ទៅ​លើ​អ៊ីស្រាអែល ឱ្យ​បញ្ឈប់​ការ​វាយប្រហារ​លើ​ដែនដី​ហ្កាហ្សា។ ចំណែក​ព្រះអង្គម្ចាស់ ម៉ូហាម៉េដ បេនសាល់ម៉ាន់ នាយករដ្ឋមន្ត្រី​ប្រទេស​អារ៉ាប៊ីសាអ៊ូឌីត បាន​លើកឡើង​ថា មធ្យោបាយ​តែ​មួយ​គត់​ដើម្បី​កសាង​សន្តិភាព និង​ស្ថិរភាព គឺ​អ៊ីស្រាអែល​ត្រូវតែ​បិទ​បញ្ចប់​ការ​ដាក់​អាណានិគម​នៅ​លើ​ដែនដី​ប៉ាឡេស្ទីន។

ក្នុង​សេចក្ដី​ថ្លែងការណ៍​រួម​មួយ មេដឹកនាំ​អារ៉ាប់ និង​មូស្លីម ក៏​បាន​ជំរុញ​ឱ្យ​តុលាការ​ព្រហ្មទណ្ឌ​អន្តរជាតិ ICC បើក​ការ​ស៊ើបអង្កេត​ករណី​ឧក្រិដ្ឋកម្ម​សង្គ្រាម និង​បទឧក្រិដ្ឋ​ប្រឆាំង​មនុស្ស​ជាតិ ដែល​ពួកគេ​អះអាង​ថា​កំពុង​ប្រព្រឹត្ត​ឡើង​ដោយ​កងទ័ព​អ៊ីស្រាអែល នៅ​ក្នុង​ទឹកដី​ប៉ាឡេស្ទីន។

នៅ​ចុងក្រោយ​នៃ​កិច្ចប្រជុំ​កំពូល​មេដឹកនាំ​នៃ​ក្រុម​ប្រទេស​អារ៉ាប់ និង​ប្រទេស​កាន់​សាសនា​អ៊ីស្លាម បាន​ទទូច​ស្នើ​ទៅ​ក្រុមប្រឹក្សា​សន្តិសុខ​អង្គការ​សហប្រជាជាតិ ឱ្យ​ចេញ​ដំណោះស្រាយ​រួម​គ្នា​បង្គាប់​ទៅ​អ៊ីស្រាអែល ឱ្យ​បិទ​បញ្ចប់​សង្គ្រាម។ តែ​យ៉ាងណា ក្រុមប្រឹក្សា​សន្តិសុខ​អង្គការ​សហប្រជាជាតិ ដែល​បាន​ប្រជុំ​គ្នា​ញឹកញាប់ តែ​មិន​អាច​រក​សំឡេង​រួម​បាន​ឡើយ។

សហរដ្ឋ​អាមេរិក ដឹកមុខ​បារាំង អង់គ្លេស បោះឆ្នោត​វេតូ ហើយ​សូម្បី​ពាក្យ​ថា​ថ្កោលទោស​អ៊ីស្រាអែល ក៏​ប្រទេស​សមាជិក​អចិន្ត្រៃយ៍​បី​នេះ មិន​ឯកភាព​ឱ្យ​មាន​នៅ​ក្នុង​សេចក្ដី​ថ្លែងការណ៍​នោះ​ទេ។

ចំណែក​ចិន និង​រុស្ស៊ី បាន​ត្រឹម​សម្ដែង​ការ​ខកចិត្ត​ជា​ខ្លាំង។ សហរដ្ឋ​អាមេរិក​នៅតែ​ប្រកាស​គាំទ្រ​អ៊ីស្រាអែល បោស​សម្អាត​ពួក​ហាម៉ាស ដែល​ក្រុង​វ៉ាស៊ីនតោន ចាត់ទុក​ជា​ក្រុម​ភេរវកម្ម​មួយ​នៅ​មជ្ឈិម​បូព៌ា។

ប៉ុន្មាន​ម៉ោង​ប៉ុណ្ណោះ​បន្ទាប់ពី​មេដឹកនាំ​ប្រទេស​អារ៉ាប់ និង​ប្រទេស​អ៊ីស្លាម ចេញ​សេចក្ដី​ថ្លែងការណ៍​រួម​ថ្កោលទោស ហើយ​ទាមទារ​ឱ្យ​អ៊ីស្រាអែល បញ្ឈប់​សង្គ្រាម​នៅ​លើ​ដែនដី​ហ្កាហ្សា លោក បេនចាមីន នេតាន់យ៉ាហ៊ូ នាយករដ្ឋមន្ត្រី​អ៊ីស្រាអែល បាន​ថ្លែង​តាម​កញ្ចក់​ទូរទស្សន៍​របស់​រដ្ឋ​ទៅ​កាន់​ជន​រួម​ជាតិ​របស់​លោក ដោយ​ទាត់​ចោល​រាល់​ការ​លើកឡើង​របស់​មេដឹកនាំ​នៃ​បណ្ដា​ប្រទេស​អារ៉ាប់។

លោក នេតាន់យ៉ាហ៊ូ ថ្លែង​ថា ពិភពលោក​គួរ​ក្រោកឈរ​ឡើង​ប្រឆាំង​នឹង​ក្រុម​ហាម៉ាស ព្រោះ​ថា​ក្រុម​នេះ​ជា​ក្រុម​ភេរវកម្ម​ដែល​គាំទ្រ​ដោយ​ប្រទេស​អ៊ីរ៉ង់ ហើយ​ចំពោះ​ក្រុម​ហេសបូឡា នៅ​លីបង់ និង​ក្រុម​ហ៊ូទី នៅ​យេម៉ែន ដែល​ជា​កូនអុក​របស់​អ៊ីរ៉ង់ ក៏​ជា​ក្រុម​ភេរវកម្ម​ដែរ។ លោក​សច្ចា​វាយ​កម្ទេច​ពួក​ហាម៉ាស​រហូត​បោស​សម្អាត​អស់​លើ​ដែនដី​ហ្កាហ្សា។

កងទ័ព​អ៊ីស្រាអែល ដែល​បាន​បើក​ការ​វាយលុក​ដោយ​ទ័ព​ថ្មើរជើង​លើ​ដែនដី​ហ្កាហ្សា ត្រូវ​បាន​រាយការណ៍​មក​ថា បាន​វាយ​រុល​កាន់តែ​ជ្រៅ​ចូល​ភាគ​ខាងត្បូង ដោយ​វាយ​ចូល​កណ្ដាល​ក្រុង​ហ្កាហ្សា ក្រោយពី​វាយ​កាន់កាប់​បាន​នៅ​ភាគ​ខាងជើង។

គិត​ត្រឹម​ថ្ងៃទី​១៣ ខែ​វិច្ឆិកា នេះ សង្គ្រាម​អ៊ីស្រាអែល វាយ​សងសឹក​លើ​ពួក​ហាម៉ាស ដែល​បាន​លួច​បាញ់​គ្រាប់​រ៉ុក្កែត​ច្រើន​ពាន់​គ្រាប់​ចូល​ដែនដី​អ៊ីស្រាអែល កាលពី​ថ្ងៃទី​៧ តុលា មក វា​មាន​រយៈពេល ៣៦​ថ្ងៃ​ហើយ។ ក្នុង​ពេលនេះ ប្រជាជន​ប៉ាឡេស្ទីន ស្លាប់​កើន​ឡើង​ជាង ១​ម៉ឺន ១​ពាន់​នាក់ និង​រង​របួស​ជិត ៣​ម៉ឺន​នាក់។ ប្រជាជន​ជាង ១​លាន ៥​សែន​នាក់​រត់​ចេញពី​តំបន់​ហ្កាហ្សា។ តំបន់​ហ្កាហ្សា មាន​ផ្ទៃក្រឡា ៣៦០​គីឡូម៉ែត្រ​ក្រឡា និង​មាន​ប្រជាជន ២​លាន ៣​សែន​នាក់​រស់នៅ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស