ក្រុមអ្នកឃ្លាំមើល ជំរុញឱ្យរដ្ឋាភិបាលជួយរកដំណោះស្រាយជូនពលរដ្ឋដែលកំពុងវ័ណ្ឌកដោយសារការទិញផ្ទះពីក្រុមហ៊ុនចលនទ្រព្យរបស់ឧកញ៉ា ឡេង ណាវ៉ាត្រា និងក្រុមហ៊ុនអចលនទ្រព្យបុរីពិភពថ្មីរបស់ឧកញ៉ា ហុង ពីវ ដោយប្រើកិច្ចសន្យាទិញលក់របស់ក្រុមហ៊ុនដែលបានឯកភាពគ្នាជាមួយអតិថិជនជាមូលដ្ឋាន។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៤ វិច្ឆិកា នេះថា ដើម្បីដោះស្រាយបញ្ចប់បញ្ហារវាងពលរដ្ឋដែលជាជនរងគ្រោះក្នុងការទិញផ្ទះពីក្រុមហ៊ុនអចលនទ្រព្យរបស់ឧកញ៉ា ឡេង ណាវ៉ាត្រា និងក្រុមហ៊ុនអចលនទ្រព្យបុរីពិភពថ្មីរបស់ឧកញ៉ា ហុង ពីវ រដ្ឋាភិបាលត្រូវតែហៅភាគីទាំងសងខាងមកដោះស្រាយដោយប្រើកិច្ចសន្យាដែលពួកគេបានឯកភាពគ្នា ធ្វើជាមូលដ្ឋានក្នុងការសម្រេចចិត្ត នោះទើបអាចផ្តល់យុត្តិធម៌សម្រាប់ភាគីដែលរងគ្រោះបាន។
លោក សេក សុជាតិ លើកឡើងថា ទំនាស់រវាងអតិថិជន និងម្ចាស់ក្រុមហ៊ុនអចលនទ្រព្យទាំងពីរនេះ បានអូសបន្លាយអស់រយៈពេលជាយូរណាស់មកហើយ ប៉ុន្តែដំណោះស្រាយនៅតែជាប់គាំងនៅឡើយ។ ផ្ទុយទៅវិញ ប្រសិនបើមន្ត្រីរដ្ឋាភិបាលដែលមានសមត្ថកិច្ច អន្តរាគមន៍លើបញ្ហានេះ បែរជាលម្អៀងទៅខាងក្រុមហ៊ុនដោយទុកឱ្យជនរងគ្រោះរងនូវការកេងប្រវ័ញ្ច នោះស្ថាប័នមានសមត្ថកិច្ចក៏ត្រូវតែពិនិត្យលើការអនុវត្តច្បាប់លើមន្ត្រីរបស់ខ្លួន ដើម្បីធានានូវប្រព័ន្ធយុត្តិធម៌របស់កម្ពុជាសម្រាប់ការពារជនរងគ្រោះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះ បញ្ជាក់ថា កន្លងមក ពលរដ្ឋតែងក្លាយខ្លួនជាជនរងគ្រោះជានិច្ច។ ជាក់ស្តែង ប្រសិនបើម្ចាស់ក្រុមហ៊ុនអចលនទ្រព្យធ្វើផ្ទះមិនទាន់ពេលតាមកិច្ចសន្យាជូនអតិថិជន គេមិនដែលឃើញពលរដ្ឋដែលជាអ្នកទិញផ្ទះទទួលបានការជួយអន្តរាគមន៍ពីមន្ត្រីមានសមត្ថកិច្ច អនុវត្តវិធានការច្បាប់ទៅលើក្រុមហ៊ុននោះទេ ប៉ុន្តែបើប្រជាពលរដ្ឋគ្មានលុយបង់រំលស់ទាន់ពេលតាមកិច្ចសន្យា គេតែងឃើញម្ចាស់ក្រុមហ៊ុនរឹបអូសផ្ទះពីអតិថិជនជានិច្ច ខណៈមន្ត្រីមានសមត្ថកិច្ចក៏មិនមានវិធានការជួយសម្របសម្រួលដោះស្រាយអ្វីនោះដែរ ដែលបញ្ហានេះកំពុងកើតមានស្ទើរតែគ្រប់ទីកន្លែងនៅទូទាំងប្រទេសទៅហើយ។
ការអះអាងនេះ ធ្វើឡើងបន្ទាប់ពីពលរដ្ឋដែលបានអះអាងថាខ្លួនជាជនរងគ្រោះពីការទិញផ្ទះពីឧកញ៉ា ឡេង ណាវ៉ាត្រា និងការផ្ទុះឡើងនូវការតវ៉ារបស់ពលរដ្ឋដែលបានទិញផ្ទះពីបុរីពិភពថ្មីរបស់ឧកញ៉ា ហុង ពីវ កាលពីពេលថ្មីៗនេះ។
កាលពីថ្ងៃទី១៤ ខែវិច្ឆិកា ឆ្នាំ២០២៣ ម្ចាស់គណនីហ្វេសប៊ុកម្នាក់ដែលមានឈ្មោះថា មនុស្សកំសត់ ដែលទំនងជាមានឈ្មោះពិតថា ចាន់ លាងហ៊ី និង សាន សុខុន បានបង្ហោះសារលើបណ្ដាញសង្គមហ្វេសប៊ុក ដោយភ្ជាប់ជាមួយនឹងលិខិតអះអាងក្នុងការទិញលក់ផ្ទះរបស់ឧកញ៉ា ឡេង ណាវ៉ាត្រា ថា រូបគេបានទិញផ្ទះល្វែង Eo នៅក្នុងបុរី ឡេង ណាវ៉ាត្រា គម្រោងយក្ស 6A ដោយកំណត់ថា ភាគីក្រុមហ៊ុននឹងសាងសង់ផ្ទះឱ្យរួចរាល់ក្នុងរយៈពេល ១៨ខែ ដែលអាចឱ្យអតិថិជនកាន់សោចូលទៅរស់នៅតែម្តង។
ម្ចាស់គណនីហ្វេសប៊ុកខាងលើអះអាងថា ពិតមែនតែកិច្ចសន្យាបានកំណត់ត្រឹមរយៈពេល ១៨ខែ ប៉ុន្តែផ្ទះល្វែង Eo ដែលរូបគេបានទិញនៅក្នុងបុរី ឡេង ណាវ៉ាត្រា ពីគម្រោងយក្ស 6A បានហួសពេលកំណត់រហូតដល់ ១៣ខែទៅហើយ ចំណែករូបគេនៅមិនទាន់អាចកាន់សោចូលទៅរស់នៅបានទៀត ខណៈផ្ទះដែលរូបគេបានទិញនោះ មិនទាន់បានបុកគ្រឹះដើម្បីដាំបង្គោលសសរបានមួយដើមផងនោះ។
លិខិតអះអាងរបស់ឧកញ៉ា ឡេង ណាវ៉ាត្រា ដែលប្រភពខាងលើបានបង្ហោះភ្ជាប់ជាមួយនឹងសំណេររបស់ខ្លួននោះ គឺមានឈ្មោះភាគីអ្នកទិញថា ចាន់ លាងហ៊ី និងឈ្មោះ សាន សុខុន ចំណែកភាគីអ្នកលក់ គឺឈ្មោះ ឡេង ភក្ត្រា ហៅ ឡេង ណាវ៉ាត្រា ដោយកំណត់ត្រង់ប្រការ ៥ ថា ការសាងសង់រយៈពេល ១៨ខែ ដោយគិតចាប់ពីពេលចុះកិច្ចសន្យានៅថ្ងៃទី២៦ ខែមីនា ឆ្នាំ២០២១ ដល់ថ្ងៃទី២៦ ខែកញ្ញា ឆ្នាំ២០២២ ដូច្នេះបើគិតកាលបរិច្ឆេទពីថ្ងៃទី២៦ ខែកញ្ញា ឆ្នាំ២០២២ មកទល់នឹងខែវិច្ឆិកា ឆ្នាំ២០២៣ នេះ គឺមានរយៈពេលប្រមាណ ១៣ខែដូចការអះអាងរបស់ម្ចាស់គណនីហ្វេសប៊ុកខាងលើប្រាកដមែន។
ទាក់ទិននឹងទំនាស់រវាងអតិថិជន និងម្ចាស់បុរីនេះ ពលរដ្ឋដែលជាជនរងគ្រោះពីការទិញផ្ទះក្នុងបុរីពិភពថ្មីរបស់ឧកញ៉ា ហុង ពីវ ក៏បាននាំគ្នាតវ៉ាយ៉ាងខ្លាំងដែរកាលពីពេលថ្មីៗនេះ បន្ទាប់ពីភាគីក្រុមហ៊ុនបានរឹបអូសផ្ទះរបស់ពួកគេដែលគ្មានលទ្ធភាពបង់រំលស់ ស្របពេលអ្នកដែលមានបំណងលក់ផ្ទះឱ្យក្រុមហ៊ុនវិញក្នុងតម្លៃ ៥០% តាមកិច្ចសន្យា ក៏ត្រូវក្រុមហ៊ុនបដិសេធមិនទទួលទិញថែមទៀត ក្រោមលេសថា បើធ្វើតាមសំណើរបស់អតិថិជន ក្រុមហ៊ុនប្រាកដជានឹងក្ស័យធនជាមិនខាន ដែលបញ្ហានេះបានធ្វើឱ្យពលរដ្ឋដែលបានទិញផ្ទះពីក្រុមហ៊ុនបុរីពិភពថ្មីរងនូវការខាតបង់យ៉ាងធ្ងន់ធ្ងរ។
ជុំវិញបញ្ហានេះ កាលពីថ្ងៃទី៩ ខែមិថុនា ឆ្នាំ២០២៣ លោក ហ៊ុន សែន ក្នុងតំណែងជានាយករដ្ឋមន្ត្រី បានអំពាវនាវឱ្យម្ចាស់បុរីដែលមានបញ្ហាជាមួយអតិថិជន រៀបចំនីតិវិធីដោះស្រាយឡើងវិញ ដែលត្រូវសម្របសម្រួលរវាងម្ចាស់បុរី និងអ្នកទិញ និងមានការចូលរួមដោះស្រាយពីភាគីរដ្ឋាភិបាលផងដែរ។
ប៉ុន្តែមួយថ្ងៃបន្ទាប់ គឺនៅថ្ងៃទី១០ ខែមិថុនា លោក ហ៊ុន សែន បែរជាប្រកាសផ្ទាល់មាត់ជំរុញឱ្យម្ចាស់បុរីទាំងអស់នៅក្នុងប្រទេស រឹបអូសផ្ទះរបស់ពលរដ្ឋ ឬបុគ្គលណាមួយដែលក្រុមហ៊ុនយល់ថាមាននិន្នាការប្រឆាំងនឹងរដ្ឋាភិបាល ហើយមិនព្រមបង់ថ្លៃផ្ទះជូនម្ចាស់បុរីទៅវិញ ដែលបញ្ហានេះបានផ្តល់ឱកាសដល់ម្ចាស់ក្រុមហ៊ុនអចលនទ្រព្យ ដូចជា ក្រុមហ៊ុនចលនទ្រព្យរបស់ឧកញ៉ា ឡេង ណាវ៉ាត្រា និងក្រុមហ៊ុនអចលនទ្រព្យបុរីពិភពថ្មីរបស់ឧកញ៉ា ហុង ពីវ ជាដើម បន្តរឹបអូសផ្ទះពីអតិថិជនដែលបានទិញផ្ទះពីក្រុមហ៊ុនរបស់ពួកគេរហូតមកទល់ពេលនេះ៕