ប្រធានាធិបតីឥណ្ឌូនេស៊ី ចូកូ វីដូដូ បានទទូចនៅចំពោះមុខលោក ចូ បៃដិន សមភាគីរបស់លោក ដោយលើកឡើងថា អាមេរិកត្រូវតែប្រឹងប្រែងឲ្យបានច្រើនថែមទៀត ដើម្បីបញ្ឈប់សង្គ្រាមនៅតំបន់ហ្កាហ្សានៃដែនដីប៉ាឡេស្ទីន។
លោក ចូកូ វីដូដូ ថ្លែងថា ការឈប់បាញ់នៅពេលនេះ គឺជារឿងមួយសំខាន់ណាស់សម្រាប់មនុស្សជាតិ។ លោក វីដូដូ បានប្រាប់លោក បៃដិន ថា លោកបាននាំសារដោយផ្ទាល់មាត់ដែលលោក ម៉ាសមូដ អាបាស ប្រធានាធិបតីប៉ាឡេស្ទីន បានប្រាប់លោកឱ្យលើករឿងនេះឡើង។
ជំនួបរវាងមេដឹកនាំឥណ្ឌូនេស៊ី និងសហរដ្ឋអាមេរិក ធ្វើឡើងកាលពីថ្ងៃចន្ទក្នុងសប្ដាហ៍នេះ នៅសេតវិមាន អំឡុងលោក ចូកូ វីដូដូ មានវត្តមាននៅសហរដ្ឋអាមេរិក ដើម្បីមកចូលរួមវេទិកានៃមេដឹកនាំប្រទេសសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក APEC។ ជំនួបនៅឯសេតវិមាន លោក ចូកូ វីដូដូ បានបញ្ជាក់ថា ការបិទបញ្ចប់សង្គ្រាម គឺជាការជួយវិនាសកម្មរបស់មនុស្សជាតិ។
បើតាមបណ្ដាញផ្សាយព័ត៌មាន Aljazeera ជំនួបរវាងលោកប្រធានាធិបតីឥណ្ឌូនេស៊ី និងលោក ចូ បៃដិន នៅសេតវិមាននេះ ត្រូវបានរៀបចំឡើងសំដៅពង្រឹងសម្ព័ន្ធភាពរវាងអាមេរិក និងឥណ្ឌូនេស៊ី មុនពេលដែលលោក ចូ បៃដិន ត្រូវជួបលោក ស៊ី ជីនពីង ប្រធានាធិបតីចិន នៅក្រៅជំនួបកំពូល APEC។
ប៉ុន្តែស្ថានភាពសង្គ្រាមនៅតំបន់ហ្កាហ្សា បានធ្វើឲ្យលោក ចូកូ វីដូដូ ឆក់ឱកាសទទូចឱ្យលោក ចូ បៃដិន ជួយបញ្ចប់សង្គ្រាមអ៊ីស្រាអែល និងពួកហាម៉ាស-ប៉ាឡេស្ទីន។
បើទោះបីជាអំពាវនាវឲ្យមានការឈប់បាញ់ តែរដ្ឋការលោក ចូ បៃដិន បានបង្ហាញការគាំទ្រអ៊ីស្រាអែល ធ្វើសង្គ្រាមដើម្បីសិទ្ធិការពារខ្លួន។
កាលពីសប្ដាហ៍មុន លោក ចូកូ វីដូដូ មុនទៅសហរដ្ឋអាមេរិក លោកបានទៅចូលរួមជំនួបកំពូលពិសេសនៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត ជាមួយមេដឹកនាំបណ្តាប្រទេសអារ៉ាប់ និងប្រទេសអ៊ីស្លាម។ ជំនួបកំពូលនោះ ធ្វើឡើងដើម្បីពិនិត្យអំពីបញ្ហាសង្គ្រាមនៅតំបន់ហ្កាហ្សា។
តែបែបនេះ ពួកមន្ត្រីសហរដ្ឋអាមេរិកបានប្រាប់អ្នកកាសែតថា ជារឿងសំខាន់ដែលលោក ចូ បៃដិន ត្រូវស្តាប់យោបល់ និងការយល់ឃើញរបស់ឥណ្ឌូនេស៊ី។ ពួកមន្ត្រីទាំងនោះលើកឡើងថា លោកប្រធានាធិបតី ចូ បៃដិន ក៏ចង់ឲ្យឥណ្ឌូនេស៊ី ដើរតួនាទីសំខាន់នៅក្នុងការឈានទៅដោះស្រាយវិបត្តិដែលកំពុងតែកើតឡើងនៅមជ្ឈិមបូព៌ានេះដែរ។
តែនៅក្នុងពេលជួបជាមួយលោក វីដូដូ នៅសេតវិមាន លោក ចូ បៃដិន ព្យាយាមផ្ដោតការជជែកគ្នាតែទៅលើការពង្រឹងសហប្រតិបត្តិការយុទ្ធសាស្ត្ររួមជាមួយឥណ្ឌូនេស៊ី។
តាមអ្នកសង្កេតការណ៍ លោក ចូ បៃដិន បានផ្តល់អាទិភាពដើម្បីប្រជែងជាមួយឥទ្ធិពលចិន ក្នុងតំបន់អាស៊ីប៉ាស៊ីហ្វិក ជាងទទួលយកការទទូចរបស់លោក ចូកូ វីដូដូ។
ជាមួយគ្នានេះ គេដឹងថាលោក ចូ បៃដិន និងមន្ត្រីរបស់លោក កំពុងព្យាយាមអូសទាញប្រទេសធំៗនៅអាស៊ីអាគ្នេយ៍ ដូចជា ឥណ្ឌូនេស៊ី និងវៀតណាម ឲ្យចូលរួមក្នុងចំណងសហប្រតិបត្តិការយុទ្ធសាស្ត្ររួមនេះ ដែលប្រទេសហ្វីលីពីន កំពុងក្លាយជាដៃគូសន្តិសុខយុទ្ធសាស្ត្ររបស់សហរដ្ឋអាមេរិក ជប៉ុន ក្នុងការទប់ទល់ឥទ្ធិពលចិន។
ចំពោះឥណ្ឌូនេស៊ី ជាប្រទេសឥស្លាមដ៏ធំជាងគេនៅលើពិភពលោក ត្រូវគេមើលឃើញមានការផ្ទុះការតវ៉ាដ៏ធំប្រឆាំងអ៊ីស្រាអែល។ ប្រទេសនេះគឺជាប្រធានវេននៃកិច្ចប្រជុំរបស់សមាគមអាស៊ានសម្រាប់ឆ្នាំ២០២៣។
ឥណ្ឌូនេស៊ី ដែលគេថាមានឥទ្ធិពលជាងគេក្នុងការគាបសង្កត់ពួកយោធាភូមា ឱ្យផ្ទេរអំណាចទៅរដ្ឋាភិបាលប្រជាធិបតេយ្យឡើងវិញ ប៉ុន្តែនៅតែធ្វើអ្វីមិនសម្រេចទៅលើរបបសឹកភូមា។ ប្រទេសនេះនឹងផ្ទេរតំណែងប្រធានអាស៊ានទៅឱ្យប្រទេសឡាវ សម្រាប់ឆ្នាំ២០២៤ ដែលជាប្រទេសកុម្មុយនីស្តមួយទន់ខ្សោយខ្លាំងចំពោះនយោបាយឯករាជ្យរបស់ខ្លួន។ ឡាវ ក៏ជាប្រទេសមួយក្នុងសមាគមអាស៊ានដែលស្ថិតនៅក្រោមឥទ្ធិពលចិន និងវៀតណាម យ៉ាងខ្លាំង។
បណ្ដារដ្ឋមន្ត្រីការពារជាតិតំបន់អាស៊ីអាគ្នេយ៍ នឹងត្រូវជួបគ្នាក្នុងប្រទេសឥណ្ឌូនេស៊ីក្នុងសប្ដាហ៍នេះ។
កិច្ចប្រជុំថ្នាក់រដ្ឋមន្ត្រីការពារជាតិអាស៊ានប្រចាំឆ្នាំដែលបានចាប់ផ្ដើមនៅថ្ងៃពុធនេះ ធ្វើឡើងក្នុងបរិបទនៃសង្គ្រាមនៅតំបន់មជ្ឈិមបូព៌ា និងនៅអ៊ុយក្រែន ព្រមទាំងភាពតានតឹងនៅសមុទ្រចិនខាងត្បូង ជាទីដែលឆ្មាំសមុទ្រចិន និងហ្វីលីពីន កំពុងប្រឈមមុខដាក់គ្នា។ ឥណ្ឌូនេស៊ី ដែលជាប្រធានអាស៊ានក្នុងឆ្នាំ២០២៣ នេះ ជាអ្នករៀបចំគ្រប់វេទិកាអាស៊ាន។
បើតាមសេចក្ដីប្រកាសព័ត៌មានរបស់លេខាធិការដ្ឋានអាស៊ាន នៅក្នុងចំណោមអ្នកចូលរួម ក៏មានផងដែរវត្តមានរដ្ឋមន្ត្រីការពារជាតិសហរដ្ឋអាមេរិក លោក Lloyd Austin ដែលនឹងត្រូវជួបសមភាគីមកពីបណ្ដាប្រទេសអាស៊ានក្នុងកិច្ចប្រជុំនេះ។ កិច្ចប្រជុំរដ្ឋមន្ត្រីការពារជាតិនេះ មានការចូលរួមពីសមភាគីរុស្ស៊ី សមភាគីចិន ជប៉ុន កូរ៉េខាងត្បូង ឥណ្ឌា នូវែលហ្សេឡង់ និងអូស្ត្រាលី។
លោក Aaron Connelly អ្នកវិភាគម្នាក់មកពីវិទ្យាស្ថានអន្តរជាតិសម្រាប់សិក្សាយុទ្ធសាស្ត្រនៅប្រទេសសិង្ហបុរី បាននិយាយថា ប្រធានបទសំខាន់ៗដែលអាចនឹងត្រូវលើកយកទៅពិភាក្សាក្នុងកិច្ចប្រជុំរដ្ឋមន្ត្រីការពារជាតិអាស៊ាន ក្នុងនោះរួមមានសង្គ្រាមនៅតំបន់ហ្កាហ្សា-ប៉ាឡេស្ទីន សង្គ្រាមអ៊ុយក្រែន និងជម្លោះនៅសមុទ្រចិនខាងត្បូង។
ចំពោះសង្គ្រាមអ៊ីស្រាអែលវាយសងសឹកលើពួកហាម៉ាស-ប៉ាឡេស្ទីន នៅតំបន់ហ្កាហ្សា ដែលជិត ៤០ថ្ងៃមកហើយនេះ មនុស្សស្លាប់កើនឡើង ១ម៉ឺន ២ពាន់នាក់ និងអ្នករងរបួសជិត ៣ម៉ឺននាក់ ហើយជនភៀសខ្លួនរត់ចេញពីតំបន់ហ្កាហ្សា និងតំបន់ West Bank កើនឡើងជិត ២លាននាក់។
នាយករដ្ឋមន្ត្រីអ៊ីស្រាអែល បេនយ៉ាមីន ណេតែនយ៉ាហូ និងគណៈរដ្ឋមន្ត្រីរបស់លោក បានប្រកាសច្រានចោលរាល់សំណើទាំងអស់ដែលឱ្យអ៊ីស្រាអែល បញ្ឈប់សង្គ្រាមលើពួកហាម៉ាស។ អ៊ីស្រាអែល ចាត់ទុកពួកហាម៉ាស ដែលលួចវាយប្រហារលើអ៊ីស្រាអែល កាលពីថ្ងៃទី៧ ខែតុលា គឺជាការវាយប្រហារបែបភេរវកម្ម គឺត្រូវតែបោសសម្អាតពីដែនដីហ្កាហ្សា៕