ព្រះតេជព្រះគុណ សយ សាត ត្រូវសមត្ថកិច្ចខេត្តកំពង់ធំ ចាប់ខ្លួនកាលពីថ្ងៃចន្ទ ទី២០ វិច្ឆិកា ដោយគ្មានដីកាពីតុលាការ ខណៈពុទ្ធបរិស័ទមិនដឹងថាសមត្ថកិច្ចបញ្ជូនព្រះអង្គទៅទីណាទេរហូតដល់ពេលនេះ។
ព្រះតេជព្រះគុណអង្គនេះ កាលពីអំឡុងខែមីនា ឆ្នាំ២០២៣ ធ្លាប់ត្រូវសមត្ថកិច្ចចាប់ផ្សឹកម្តងរួចមកហើយ បន្ទាប់ពីព្រះអង្គបានចូលរួមហែក្បួនធម្មយាត្រាជាមួយសមាគមគ្រូបង្រៀនកម្ពុជាឯករាជ្យ។
សកម្មជនសង្គមមួយរូបបានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី២០ វិច្ឆិកា នេះថា បន្ទាប់ពីចាប់ខ្លួនព្រះភិក្ខុអង្គនេះរួច សមត្ថកិច្ចក៏បានដកហូតទូរស័ព្ទរបស់ព្រះអង្គ។ ជាងនេះទៅទៀត សមត្ថកិច្ចក៏បានបំពានផ្ញើសារតាមទូរស័ព្ទនោះ ដោយប្រើគណនីហ្វេសប៊ុករបស់ព្រះអង្គទៅកាន់ពុទ្ធបរិស័ទថែមទៀត។ សមត្ថកិច្ចបានផ្ញើរសារតាម Messenger ហ្វេសប៊ុករបស់ព្រះអង្គ ហើយបានប្រមាថព្រះអង្គថាជាសង្ឃក្លែងក្លាយដែលគាំទ្រលោក សម សារី និងលោក សម រង្ស៊ី។ អាជ្ញាធរបានព្រមានតាមហ្វេសប៊ុកឆាតនោះថា អ្នកណាដែលវាយប្រហារលោក ហ៊ុន សែន គឺរូបគេមិនលើកលែងឱ្យជាដាច់ខាត។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២១ វិច្ឆិកា នេះថា មិនថាការចាប់ខ្លួនព្រះសង្ឃ សយ សាត ឬការចាប់សកម្មជនសង្គមនានា រួមទាំងសកម្មជននយោបាយផ្សេងទៀត គ្មានអ្វីក្រៅពីរឿងនយោបាយឡើយ ព្រោះអាជ្ញាធរក្រោមបង្គាប់បញ្ជារបស់រដ្ឋាភិបាលដែលដឹកនាំដោយគណបក្សប្រជាជនកម្ពុជា គ្រាន់តែជាកម្លាំងក្រោមបញ្ជារបស់លោក ហ៊ុន សែន សម្រាប់ប្រើក្នុងសេណារីយ៉ូនយោបាយតែប៉ុណ្ណោះ មិនមែនដើម្បីការពារសន្តិសុខសម្រាប់ប្រជាពលរដ្ឋនោះទេ។
លោក ម៉ែន ណាត លើកឡើងថា រដ្ឋាភិបាលថ្មីរបស់លោក ហ៊ុន ម៉ាណែត មិនបានជួយធ្វើឱ្យមុខមាត់របស់ប្រទេសកម្ពុជាល្អជាងពេលដែលលោក ហ៊ុន សែន ឪពុករបស់គាត់ដឹកនាំនោះទេ។ លោកបន្ថែមថា ការអនុវត្តបទបញ្ជារបស់អាជ្ញាធរកម្ពុជាសព្វថ្ងៃនេះ បានបង្ហាញយ៉ាងច្បាស់ពីអំណាចដឹកនាំរបស់រដ្ឋាភិបាលលោក ហ៊ុន សែន ដែលនៅតែគ្រប់គ្រងលើរដ្ឋាភិបាលថ្មីនេះ ខណៈតំណែងជានាយករដ្ឋមន្ត្រីរបស់លោក ហ៊ុន ម៉ាណែត ក៏ត្រូវបង្ហាញឱ្យឃើញថាជានាយករដ្ឋមន្ត្រីដែលមានតែឈ្មោះប៉ុណ្ណោះ។
ព្រះតេជព្រះគុណ សយ សាត មានស្រុកកំណើតនៅខេត្តស្វាយរៀង ប៉ុន្តែព្រះអង្គបានចូលសាងផ្នួសក្នុងព្រះពុទ្ធសាសនាក្នុងព្រះជន្ម ៥៦ព្រះវស្សា នៅវត្តមេត្តាធម្មជាតិ ក្នុងខេត្តកំពង់ស្ពឺ ក្រោយសាងផ្នួស ព្រះអង្គបានចូលរួមការពារព្រៃឈើនៅក្នុងសហគមន៍ព្រៃមេត្តាធម្មជាតិ ដើម្បីការពារព្រៃឈើពីការកាប់បំផ្លាញព្រៃឈើ ឈូសឆាយដីព្រៃ និងការបំផ្លាញពុទ្ធបដិមានៅវត្តមេត្តាធម្មជាតិ ឬសហគមន៍ឧត្ដមស្រែពស់ នៅក្នុងស្រុកឱរ៉ាល់ ខេត្តកំពង់ស្ពឺ ពីសំណាក់ទាហានដែលប្រចាំការនៅតំបន់នោះ។
ក្រោមសកម្មភាពនេះ ព្រះអង្គត្រូវរងបណ្ដឹងនៅតុលាការ ដោយចោទប្រកាន់ពីបទកាន់កាប់ រានទន្ទ្រានដីព្រៃយកធ្វើជាកម្មសិទ្ធិទៅវិញ ដោយសារតែបញ្ហានេះ ព្រះអង្គបានលាចាកសិក្ខាបទមួយរយៈរហូតដល់ឆ្នាំ២០២២ ហើយពេលនោះ ព្រះអង្គក៏បានចូលសាងផ្នួសជាថ្មីទាំងនៅជាប់បណ្ដឹងនៅឡើយ។
រហូតដល់ដើមខែកុម្ភៈ ឆ្នាំ២០២៣ ព្រះអង្គក៏បានចូលរួមធម្មយាត្រាលើកកម្ពស់សីលធម៌សង្គមជាមួយសមាគមគ្រូបង្រៀនកម្ពុជាម្តងទៀត ដោយធ្វើដំណើរពីរាជធានីភ្នំពេញទៅកាន់ខេត្តពោធិ៍សាត់ ប៉ុន្តែនៅអំឡុងខែមីនា ឆ្នាំ២០២៣ ស្នងការខេត្តបាត់ដំបង បានចាប់ផ្សឹកព្រះអង្គដោយចោទប្រកាន់ថាជាព្រះសង្ឃក្លែងក្លាយ។
យ៉ាងណាក៏ដោយ បន្ទាប់ពីស្នងការខេត្តបាត់ដំបង ផ្សឹកព្រះអង្គរួចមក ភិក្ខុអង្គនេះក៏បានចូលបួសក្នុងព្រះពុទ្ធសាសនាវិញក្នុងភេទជាភិក្ខុរហូតដល់ពេលនេះ។
សារព័ត៌មាន The Cambodia Daily នៅមិនទាន់អាចទាក់ទងស្នងការនគរបាលខេត្តកំពង់ធំ លោក ម៉ែន លី ដើម្បីសុំការបំភ្លឺជុំវិញករណីនេះបាននៅឡើយទេរហូតដល់ម៉ោងផ្សាយនេះ៕