នាយករដ្ឋមន្ត្រីថ្មីដែលយកលំអានដឹកនាំពីឪពុក លោក ហ៊ុន ម៉ាណែត បើកកិច្ចប្រជុំលើកដំបូងក្រោយឡើងកាន់តំណែងជានាយករដ្ឋមន្ត្រីថ្មីរបស់កម្ពុជា ជាមួយសមាជិកឧត្ដមក្រុមប្រឹក្សាពិគ្រោះ និងផ្តល់យោបល់ ដែលមានតំណាងគណបក្សក្រៅរដ្ឋាភិបាលចូលរួមជិត ៣០គណបក្ស។
លោក ហ៊ុន ម៉ាណែត ដែលកំពុងដឹកនាំប្រទេសតាមការរៀបចំរបស់លោក ហ៊ុន សែន បានសរសេរលើបណ្ដាញទំនាក់ទំនងតេឡេក្រាមរបស់ខ្លួននៅថ្ងៃទី៦ ខែធ្នូ ឆ្នាំ២០២៣ ថា កិច្ចប្រជុំលើកដំបូងជាមួយនឹងឧត្ដមក្រុមប្រឹក្សាពិគ្រោះ និងផ្ដល់យោបល់នេះ ត្រូវធ្វើឡើងនៅវិមានសន្តិភាព ដែលមានការចូលរួមពីមន្ត្រីរាជរដ្ឋាភិបាល និងតំណាងគណបក្សនយោបាយក្រៅរដ្ឋាភិបាលជាង ២០០នាក់ (២១២នាក់)។
នាយករដ្ឋមន្ត្រីថ្មីកម្ពុជាលោក ហ៊ុន ម៉ាណែត បញ្ជាក់ថា គណបក្សនយោបាយដែលចូលរួមក្នុងកិច្ចប្រជុំនេះរួមមានគណបក្សសំបុកឃ្មុំសង្គមប្រជាធិបតេយ្យ របស់លោក ម៉ម សុណង់ដូ គណបក្សបំណងពលរដ្ឋ របស់លោក អិត សារុំ គណបក្សឯកភាពជាតិខ្មែរ របស់លោក អ៊ុន ជឹម និងគណបក្សខ្មែរតែមួយ របស់លោក គុជ លី ជាដើម។
ការបើកកិច្ចប្រជុំឧត្ដមក្រុមប្រឹក្សាពិគ្រោះ និងផ្តល់យោបល់នេះ ធ្វើឡើងបន្ទាប់ពីគណបក្សក្រៅរដ្ឋាភិបាលទាំងជិត ៣០ នេះបានចងសម្ព័ន្ធជាមួយគណបក្សប្រជាជនកម្ពុជារបស់លោក ហ៊ុន សែន កាលពីពេលថ្មីៗនេះ ក្នុងនោះ តំណាងគណបក្សនយោបាយទាំងនោះក៏ត្រូវបានតែងតាំងជាមន្ត្រីជាន់ខ្ពស់របស់រដ្ឋាភិបាលកម្ពុជាផងដែរ។
អតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៦ ធ្នូ នេះថា ការបង្កើតឧត្ដមក្រុមប្រឹក្សាពិគ្រោះ និងផ្តល់យោបល់នេះនាពេលកន្លងមក លោកពុំដែលឃើញពួកគេជួយកែទម្រង់ការដឹកនាំ ឬជួយដោះស្រាយបញ្ហាជីវភាពរបស់ពលរដ្ឋទេ ដូចជា ការធ្វើចំណាកស្រុក ការជំពាក់បំណុល ការរំលោភសិទ្ធិការងារ និងការរំលោភសិទ្ធិជាមូលដ្ឋានរបស់ពលរដ្ឋ ជាដើម។
លោក មាជ សុវណ្ណារ៉ា លើកឡើងថា សម្រាប់រដ្ឋាភិបាលថ្មីនេះ សមាជិកឧត្ដមក្រុមប្រឹក្សាពិគ្រោះ និងផ្តល់យោបល់មានការចូលរួមពីគណបក្សនយោបាយកាន់តែច្រើន ប៉ុន្តែលោកមិនដឹងថាតើតំណាងគណបក្សដែលក្លាយជាសមាជិកឧត្ដមក្រុមប្រឹក្សាពិគ្រោះ និងផ្តល់យោបល់ទាំងនេះ អាចកែទម្រង់ការដឹកនាំរបស់រដ្ឋាភិបាល ឬជួយដោះស្រាយបញ្ហារបស់ប្រជាពលរដ្ឋបាន ឬក៏អត់នោះទេ ខណៈបញ្ហាក្នុងសង្គមកំពុងកើតឡើងជាបន្តបន្ទាប់នៅពេលនេះ ដូចជា អំពើពុករលួយ ការរំលោភសិទ្ធិកម្មករ និងបំបិទសិទ្ធិសេរីភាពបញ្ចេញមតិ ជាដើម។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា សព្វថ្ងៃនេះ រដ្ឋាភិបាលកម្ពុជាមានស្ថាប័នច្រើនហើយសម្រាប់អភិវឌ្ឍប្រទេសដែលជាសេនាធិការរបស់ខ្លួន ប៉ុន្តែបញ្ហានៅតែកើតមាន ខណៈការអភិវឌ្ឍ និងការកែទម្រង់នានា នៅតែជាបញ្ហាដដែល ដូច្នេះប្រសិនបើតំណាងគណបក្សនយោបាយដែលបានក្លាយជាឧត្ដមក្រុមប្រឹក្សាពិគ្រោះ និងផ្តល់យោបល់នេះ មិនអាចធ្វើអ្វីកើតទេ ដោយចាំតែទទួលប្រាក់ខែ នោះគឺមានន័យថា តួនាទីរបស់ពួកគេកំពុងតែបំផ្លាញថវិកាជាតិដែលពលរដ្ឋបានបង់ពន្ធប៉ុណ្ណោះ។
កាលពីថ្ងៃទី២៦ ខែសីហា ឆ្នាំ២០២៣ ព្រះមហាក្សត្រខ្មែរបានចេញព្រះរាជក្រឹត្យស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សាពិគ្រោះ និងផ្តល់យោបល់ តាមការស្នើសុំរបស់លោក ហ៊ុន ម៉ាណែត ដែលជានាយករដ្ឋមន្ត្រីរបស់កម្ពុជាសម្រាប់រដ្ឋាភិបាលអាណត្តិទី៧ នេះ ខណៈឧត្ដមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងជាលើកដំបូងដោយប្រធានគណបក្សប្រជាជនកម្ពុជាលោក ហ៊ុន សែន កាលពីអាណត្តិទី៦ កន្លងទៅនោះ។
ក្រោយពីព្រះមហាក្សត្រខ្មែរបានចេញព្រះរាជក្រឹត្យស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សាពិគ្រោះ និងផ្តល់យោបល់ លោក ហ៊ុន ម៉ាណែត ក៏បានចេញអនុក្រឹត្យតែងតាំង និងផ្តល់ឋានៈដល់សមាសភាពប្រតិភូនៃឧត្ដមក្រុមប្រឹក្សាពិគ្រោះ និងផ្តល់យោបល់ចំនួន ១៧៤នាក់ ដែលមកពីគណបក្សនយោបាយចំនួន ២៩ ផងដែរ កាលពីចុងខែតុលា ឆ្នាំ២០២៣ កន្លងទៅដែលមានតំណែងស្មើចាប់ពីអគ្គនាយករង អគ្គនាយក អនុរដ្ឋលេខាធិការ រដ្ឋលេខាធិការ រដ្ឋមន្ត្រី និងទេសរដ្ឋមន្ត្រីផងដែរ៕