អតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យមន្ត្រីជាន់ខ្ពស់គណបក្សភ្លើងទៀន កុំប្រើមធ្យោបាយវាយប្រហារគ្នាទៅវិញទៅមក ឬបញ្ឈរតួនាទីនរណាម្នាក់តាមវិធានការផ្សេងៗ ដោយសារតែរឿងផ្ទាល់ខ្លួន បន្ទាប់ពីប្រធានគណបក្សភ្លើងទៀនសម្រេចបញ្ចប់តួនាទីមន្ត្រីប្រតិបត្តិខេត្តសៀមរាប របស់គណបក្សនេះកាលពីពេលថ្មីៗ។
លោក សម រង្ស៊ី បានចេញលិខិតអំពាវនាវមួយនៅថ្ងៃទី៧ ខែធ្នូ ឆ្នាំ២០២៣ នេះ ដោយអំពាវនាវឱ្យពលរដ្ឋខ្មែរ និងគណបក្សនយោបាយដែលស្រឡាញ់ជាតិ និងជាអ្នកគាំទ្រលទ្ធិប្រជាធិបតេយ្យ សហការគ្នាជាធ្លុងមួយដើម្បីធានាភាពជោគជ័យនៃបុព្វហេតុដ៏ត្រឹមត្រូវក្នុងការជួយសង្គ្រោះលទ្ធិប្រជាធិបតេយ្យនៅកម្ពុជាឡើងវិញ។
អតីតមេដឹកនាំបក្សប្រឆាំងលោក សម រង្ស៊ី ដាស់តឿនកុំឱ្យប្រើមធ្យោបាយវាយប្រហារគ្នាទៅវិញទៅមកដោយសារតែរឿងផ្ទាល់ខ្លួន ហើយនិងត្រូវចៀសវាងការចាត់ការវិធានការណាមួយដែលមានបំណងបញ្ឈប់តួនាទី និងការងាររបស់សកម្មជនណាម្នាក់ដែលមានទឹកចិត្តនៅតែស្មោះត្រង់ចំពោះប្រទេសជាតិ និងពលរដ្ឋ។ ជាងនេះទៀត លោក សម រង្ស៊ី សង្កត់ធ្ងន់ថា ការដកលោក សោម សូរិយា គឺជារឿងមិនត្រឹមត្រូវដាច់ខាត។
លោក សម រង្ស៊ី បញ្ជាក់ថា លោកជឿជាក់ថានឹងមានពេលមួយខាងមុខដែលអ្នកស្រឡាញ់ជាតិ អ្នកប្រជាធិបតេយ្យចេះចែកការងារគ្នាធ្វើ និងចេះបែងចែកតួនាទីចំពោះបុគ្គលម្នាក់ ដើម្បីសង្គ្រោះជាតិចេញពីរបបដឹកនាំដែលបំផ្លាញលទ្ធិប្រជាធិបតេយ្យសព្វថ្ងៃនេះឱ្យទាន់ពេលវេលា។
កាលពីថ្ងៃទី២៥ ខែវិច្ឆិកា ឆ្នាំ២០២៣ ប្រធានគណបក្សភ្លើងទៀនលោក ទាវ វណ្ណុល បានចេញសេចក្តីសម្រេចបញ្ចប់តួនាទីលោក សោម សូរិយា ពីប្រធានគណៈកម្មាធិការប្រតិបត្តិគណបក្សខេត្តសៀមរាប ក្រោមហេតុផលថា លោក សោម សូរិយា បានធ្វើសកម្មភាពផ្ទុយនឹងផលប្រយោជន៍របស់គណបក្សដែលប្រឆាំងនឹងលក្ខន្តិកៈ និងបទបញ្ជាផ្ទៃក្នុងគណបក្សធ្ងន់ធ្ងរ។
ទាក់ទិននឹងបញ្ហានេះ អនុប្រធានគណបក្សភ្លើងទៀនលោក សុន ឆ័យ ធ្លាប់បានលើកឡើងថា ខាងក្រុមប្រឆាំងក៏មិនខុសពីក្រុមអ្នកកាន់អំណាចដែរ គឺតែងតែចោទប្រកាន់លើអ្នកដែលរិះគន់ទង្វើខុសឆ្គងរបស់ខ្លួនក្រោមលេសផ្សេងៗ ទោះការរិះគន់នោះដើម្បីកែលំអក៏ដោយ ដែលបញ្ហានេះធ្វើឱ្យអ្នកដែលមាននិន្នាការកណ្តាលដែលចង់ផ្តល់មតិយោបល់ដើម្បីស្ថាបនា ត្រូវរងនូវការចោទប្រកាន់យ៉ាងអយុត្តិធម៌ និងរងនូវការលាបពណ៌យ៉ាងធ្ងន់ធ្ងរថែមទៀត។
លោក សុន ឆ័យ ត្អូញត្អែរថា ការតស៊ូដើម្បីលទ្ធិប្រជាធិបតេយ្យ គឺពិតជារងនូវការលំបាកណាស់ ហើយស្ថានភាពនយោបាយរបស់ប្រទេសកម្ពុជាដែលធ្លាក់ដល់ចំណុចអាក្រក់សព្វថ្ងៃនេះ គឺជាការបង្កឡើងដោយក្រុមអ្នកកាន់អំណាច និងក្រុមប្រឆាំងមួយចំនួន ដែលពួកគេតែងចោទប្រកាន់អ្នករិះគន់កែលំអខ្លួន ថាជាជនក្បត់ ជាដើម ដែលអត្តចរិតនយោបាយបែបនេះបានបំផ្លាញប្រទេសកម្ពុជារហូតដល់ពេលនេះ។
ចំណែកសកម្មជនកិច្ចព្រមព្រៀងសន្តិភាពទីក្រុងប៉ារីសលោក ស្រ៊ុន ស្រ៊ន ក៏ធ្លាប់បានលើកឡើងកាលពីពេលថ្មីៗនេះដែរថា មេដឹកនាំគណបក្សនយោបាយក្រៅរដ្ឋាភិបាលស្ទើរតែគ្រប់បក្សទាំងអស់នៅកម្ពុជា មិនទាន់បានរៀបចំបក្សរបស់ពួកគេឱ្យមានគោលការណ៍ប្រជាធិបតេយ្យពិតប្រាកដនៅផ្ទៃក្នុងបក្សរបស់ខ្លួននៅឡើយទេ។
លោកបន្ថែមថា ជាងនេះទៀត ពួកគេក៏មានចំណុចខ្សោយជាច្រើនដែរ ដោយសារតែអ្នកទាំងនោះរវល់តែប្រឆាំងនឹងបក្សដទៃ តែមិនខំនាំគ្នារៀបចំ និងគ្រប់គ្រងបក្សរបស់ខ្លួនឱ្យស្របតាមលក្ខខណ្ឌប្រជាធិបតេយ្យច្បាស់លាស់ ដែលជាហេតុធ្វើឱ្យបក្សរបស់ពួកគេមានបញ្ហាមិនចេះចប់ ដូចជាការបង្កជម្លោះផ្ទៃក្នុងបក្សរបស់ខ្លួនមិនចប់មិនចេះហើយ ជាដើម។
រីឯអ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ក៏បានលើកឡើងជុំវិញបញ្ហានេះដែរថា គណបក្សនយោបាយនៅកម្ពុជាមានចំនួនជាង ៤០គណបក្សដែលបានចុះបញ្ជីនៅក្រសួងមហាផ្ទៃសព្វថ្ងៃនេះ ប៉ុន្តែភាគច្រើននៃគណបក្សនយោបាយទាំងនោះច្រើនតែប្រើអំណាចបុគ្គល ឬក្រុមរបស់ខ្លួនធ្វើជាច្បាប់សម្រាប់ដឹកនាំគណបក្សរបស់ពួកគេ ជាជាងប្រើច្បាប់ដែលមានតម្លាភាពស្របតាមគោលការណ៍ប្រជាធិបតេយ្យ ដូចជា ការតែងតាំងមន្ត្រីក្នុងបក្ស ឬដកតំណែងមន្ត្រីណាម្នាក់ក្នុងបក្សរបស់ខ្លួន ជាដើម។
លោក សេក សុជាតិ បញ្ជាក់ថា ការដឹកនាំរបស់គណបក្សនយោបាយដោយផ្អែកលើអំណាចបុគ្គល ឬអំណាចក្រុមណាមួយ នឹងធ្វើឱ្យបក្សនោះបាត់បង់ធនធានមនុស្សទាំងអស់ ដែលជាថ្នូរមកវិញ គឺទទួលបានតែអ្នកដែលចេះអែបអបតែប៉ុណ្ណោះ ខណៈអ្នកមានជំនាញ និងចំណេះដឹងអភិវឌ្ឍប្រទេសជាតិពិតប្រាកដ ដែលមានស្មារតីឯករាជ្យ នឹងត្រូវដើរចេញម្តងម្នាក់ៗរហូតធ្វើឱ្យបក្សនយោបាយនោះបាត់បង់នូវគោលដៅជួយជាតិរបស់ខ្លួនទាំងស្រុង៕