ក្រុមអ្នកស្នេហាលទ្ធិប្រជាធិបតេយ្យនៅសហរដ្ឋអាមេរិក និងអូស្ត្រាលី គ្រោងបង្កើតក្រុមអ្នកតស៊ូមតិជាផ្លូវការនៅថ្ងៃទី១០ ខែធ្នូ ឆ្នាំ២០២៣ នេះ ដោយដាក់ឈ្មោះថា «ក្រុមអ្នកតស៊ូមតិកម្ពុជា»។ ការបង្កើតក្រុមនេះ គឺក្នុងបំណងជំរុញឱ្យមានការស្ដារ និងពង្រឹងលទ្ធិប្រជាធិបតេយ្យក្នុងប្រទេសកម្ពុជាឡើងវិញ។
ក្រុមអ្នកតស៊ូមតិកម្ពុជា ដែលហៅកាត់ថា CAT (Cambodian Advocacy Team) បានចេញសេចក្តីប្រកាសព័ត៌មាននៅថ្ងៃទី៨ ខែធ្នូ ឆ្នាំ២០២៣ ចេញពីទីក្រុងមែលប៊ន ប្រទេសអូស្ត្រាលី ថា ក្រុមអ្នកតស៊ូមតិកម្ពុជា ត្រូវបានបង្កើតឡើងដោយក្រុមបញ្ញវន្តខ្មែរដែលមានទស្សនៈរួមក្នុងការជំរុញឱ្យមានការស្ដារ និងពង្រឹងលទ្ធិប្រជាធិបតេយ្យក្នុងប្រទេសកម្ពុជាឡើងវិញ តាមរយៈនៃការតស៊ូមតិជាប្រចាំលើបញ្ហាប្រជាធិបតេយ្យ សិទ្ធិមនុស្ស និងគោលនយោបាយសាធារណៈ។
សេចក្តីប្រកាសព័ត៌មានដដែលនេះ បញ្ជាក់ថា លោក ហុង លីម ដែលជាអតីតសមាជិករដ្ឋសភានៃរដ្ឋវិចតូរីយ៉ា ត្រូវបានជ្រើសរើសជាប្រធានក្រុមការងារ ចំណែកលោក មួង ណារ៉េត ដែលជាអតីតអ្នកសារព័ត៌មានពោរពេញដោយបទពិសោធន៍ និងជាសកម្មជនសហគមន៍ខ្មែរក្នុងក្រុងឡងប៊ិច ដើម្បីជួយដល់សហគមន៍ខ្មែរក្នុងទឹកដីសហរដ្ឋអាមេរិកសព្វថ្ងៃនេះ ក៏ត្រូវបានជ្រើសរើសជាអ្នកនាំពាក្យរបស់ក្រុមអ្នកតស៊ូមតិកម្ពុជានេះផងដែរ។
ប្រភពដដែលបញ្ជាក់ថា ដើម្បីសម្រេចគោលដៅរបស់ខ្លួន ក្រុមអ្នកតស៊ូមតិកម្ពុជា នឹងព្យាយាមគ្រប់លទ្ធភាពដើម្បីធ្វើការជាមួយខ្មែរគ្រប់និន្នាការដែលមានទិសដៅ និងគោលបំណងស្របគ្នាក្នុងការលើកស្ទួយ និងជ្រោងលទ្ធិប្រជាធិបតេយ្យនៅកម្ពុជាដែលកំពុងស្ថិតក្នុងភាពប្រកាសអាសន្នសព្វថ្ងៃនេះ។
គោលបំណងនៃការស្ដារលទ្ធិប្រជាធិបតេយ្យនៅកម្ពុជាឡើងវិញនេះ ធ្វើឡើងបន្ទាប់ពីគេមើលឃើញថា រដ្ឋាភិបាលដែលកំពុងដឹកនាំដោយបក្សកាន់អំណាចសព្វថ្ងៃនេះ កំពុងជាន់ឈ្លី និងបំផ្លាញប្រជាធិបតេយ្យធ្ងន់ធ្ងរអស់រយៈពេលជាង ៣០ឆ្នាំមកនេះ។
មាត្រា១ នៃរដ្ឋធម្មនុញ្ញ ចែងថា ប្រទេសកម្ពុជាប្រកាន់យករបបលទ្ធិប្រជាធិបតេយ្យសេរីពហុបក្ស ប៉ុន្តែក្រោមការដឹកនាំរបស់បក្សកាន់អំណាចសព្វថ្ងៃនេះ ត្រូវរងនូវការជាន់ឈ្លី និងបំផ្លាញគ្រប់រូបភាពយ៉ាងធ្ងន់ធ្ងរពីមេដឹកនាំបក្សកាន់អំណាចលោក ហ៊ុន សែន ដែលជាហេតុធ្វើឱ្យប្រទេសកម្ពុជាកំពុងតែរអិលធ្លាក់បន្តិចម្តងៗទៅរកការដឹកនាំតាមបែបរបបកុម្មុយនីស្តផ្ដាច់ការវិញនៅពេលនេះ។
យ៉ាងណាក៏ដោយ មេដឹកនាំដែលល្បីល្បាញខាងរំលោភច្បាប់លោក ហ៊ុន សែន ធ្លាប់បានលើកឡើងកាលពីដើមខែមិថុនា ឆ្នាំ២០២៣ នេះថា កម្ពុជានៅពេលនេះកំពុងអនុវត្តប្រជាធិបតេយ្យ និងនីតិរដ្ឋបានយ៉ាងល្អពីមួយដំណាក់ទៅមួយដំណាក់។ លោក ហ៊ុន សែន បញ្ជាក់ថា សង្គមប្រជាធិបតេយ្យដែលគ្មានការគោរពច្បាប់ គឺជាសង្គមអនាធិបតេយ្យប៉ុណ្ណោះ។
ទោះជាបែបនេះក្តី ប្រធានវេទិកាពលរដ្ឋលោក គឹម សុខ ធ្លាប់បានលើកឡើងកាលពីពេលថ្មីៗនេះថា ក្នុងកាលៈទេសៈនេះ អ្នកនយោបាយខ្មែរល្មមដល់ពេលត្រូវបញ្ឈប់ប្រទូសរ៉ាយគ្នាហើយ ព្រោះថាការស្ដារលទ្ធិប្រជាធិបតេយ្យតាមស្មារតីនៃកិច្ចព្រមព្រៀងសន្តិភាពក្រុងប៉ារីសថ្ងៃទី២៣ ខែតុលា ឆ្នាំ១៩៩១ គឺកិច្ចការដែលពួកគេត្រូវតែសហការគ្នាធ្វើជាបន្ទាន់បំផុត ដើម្បីបញ្ឈប់ការជាន់ឈ្លីប្រជាធិបតេយ្យពីបក្សកាន់អំណាចបន្តទៀត។
លោក គឹម សុខ បញ្ជាក់ថា កម្ពុជាស្ថិតក្រោមការដឹកនាំរបស់លោក ហ៊ុន សែន ពោរពេញទៅដោយការគំរាមកំហែង ដែលធ្វើឱ្យពលរដ្ឋខ្មែរភ័យខ្លាចគ្រប់ៗគ្នា ព្រោះថារដ្ឋាភិបាលក្តោបក្តាប់អំណាចដោយឯកបក្សមួយនេះ តែងតែរំលោភរដ្ឋធម្មនុញ្ញ រំលោភកិច្ចព្រមព្រៀងអន្តរជាតិ ជាន់ឈ្លីលទ្ធិប្រជាធិបតេយ្យ រំលោភសិទ្ធិមនុស្សជាអចិន្ត្រៃយ៍ទៅហើយ។
ចំណែកតំណាងរាស្ត្រអូស្ត្រាលីដើមកំណើតខ្មែរក្នុងរដ្ឋវិចតូរីយ៉ា លោក តាក់ ម៉េងហ៊ាង បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា បណ្តាប្រទេសដែលចង់បង្កើតចំណងមិត្តភាពការទូតជាមួយប្រទេសកម្ពុជា គឺគេពិនិត្យខ្លាំងណាស់ទៅលើគោលការណ៍របស់កម្ពុជាដែលបានចែងក្នុងកិច្ចព្រមព្រៀងសន្តិភាពទីក្រុងប៉ារីស ព្រោះវាជាកិច្ចសន្យារបស់កម្ពុជាជាមួយបណ្តាប្រទេស ១៨ ផ្សេងទៀត ដែលកម្ពុជានឹងត្រូវធានាឱ្យបាននូវការប្រកាន់ខ្ជាប់នូវរបបលទ្ធិប្រជាធិបតេយ្យ និងការគោរពសិទ្ធិជាមូលដ្ឋានរបស់ពលរដ្ឋ ជាដើម។
ជាងនេះទៀត ស្ថានទូតអូស្ត្រាលីប្រចាំនៅកម្ពុជា អះអាងថា ប្រទេសអូស្ត្រាលី សូមបញ្ជាក់ជាថ្មីនូវការគាំទ្ររបស់ខ្លួនចំពោះលទ្ធិប្រជាធិបតេយ្យ និងការអភិវឌ្ឍនៅប្រទេសកម្ពុជា ក៏ដូចជាសម្រាប់សង្គមមួយដែលពលរដ្ឋអាចបញ្ចេញទស្សនៈរបស់ពួកគេដោយសេរី និងសន្តិភាព និងជាសង្គមមួយដែលច្បាប់ និងស្ថាប័ននានាត្រូវបានការពារ និងលើកកម្ពស់សិទ្ធិមនុស្សឱ្យបានពេញលេញ៕