វត្តពោធិលង្កា នឹងអនុញ្ញាតឱ្យតែសមណសិស្សប៉ុណ្ណោះអាចចូលស្នាក់អាស្រ័យ ក្រោយរៀបចំរួចរាល់ បន្ទាប់ពីបានបិទទ្វារជាងមួយខែកន្លងមក ក្រោយពីរងនូវការរង្គោះរង្គើ និងរំសាយគណៈគ្រប់គ្រងដោយសារមានបញ្ហាបែងចែកបក្ខពួក និងមិនគោរពវិន័យ។
គណៈកម្មការថ្មីនៃវត្តពោធិលង្កា សង្កាត់ស្លក្រាម ក្រុងសៀមរាប ត្រូវបានប្រកាសជាផ្លូវការកាលពីព្រឹកថ្ងៃទី១៨ ខែធ្នូ ឆ្នាំ២០២៣ នេះ ក្រោមវត្តមានព្រះចៅអធិការវត្តរាជបូណ៌ សម្ដេច ពិន សែម មេគណខេត្ត ព្រះចៅអធិការវត្ត តំណាងវត្តទូទាំងខេត្ត និងពុទ្ធបរិស័ទជាច្រើន។
សម្ដេចព្រះព្រហ្មរតនមុនី ពិន សែម មានសង្ឃដីកាណែនាំដល់គណៈគ្រប់គ្រងថ្មីនៃវត្តពោធិលង្កា ត្រូវចេះសហការ និងដឹកនាំវត្តប្រកបដោយប្រសិទ្ធភាព និងមិនត្រូវឱ្យមានអធិករណ៍អ្វីកើតឡើងឡើយ ដោយត្រូវប្រកាន់ធម៌ខន្ដី។ វត្តអារាមជាជម្រកអប់រំកិរិយាធម៌ដល់ពុទ្ធិបរិស័ទយុវជន ដែលជាទំពាំងស្នងឫស្សី និងជាឱកាសល្អសម្រាប់ថែរក្សាការពារសេចក្ដីសុខសាន្តសង្គមជាតិ ដោយប្រកាន់យកព្រះពុទ្ធឱវាទជាគ្រឿងបំភ្លឺផ្លូវ។
ព្រះវិន័យធរគណខេត្តសៀមរាប និងជាអ្នកនាំពាក្យសាលាគណខេត្តសៀមរាប ព្រះតេជព្រះគុណ ពេទ ភឿន មានសង្ឃដីកាថា គណៈសង្ឃនាយកបានសម្រេចតែងតាំងគណៈកម្មការវត្តថ្មីដែលមានគ្រូចៅអធិការ គ្រូសូត្រស្ដាំ គ្រូសូត្រឆ្វេង ព្រះវិន័យធរ និងលេខា។ ព្រះសង្ឃទាំងនោះមកពីវត្តកេសរារាម ក្រុងសៀមរាប ដែលមានការសិក្សាត្រឹមត្រូវ ដឹងធម៌វិន័យច្រើនក្នុងពុទ្ធសាសនា។
ប្រភពដដែលបានមានសង្ឃដីកាថា សមណសិស្សដែលចូលស្នាក់អាស្រ័យនៅក្នុងវត្តពោធិលង្កា សរុប ២៨អង្គ ក្នុងចំណោម ៣៨អង្គ ដែលអង្គខ្លះសម្រេចស្នាក់នៅវត្តរាជបូណ៌ ព្រោះងាយស្រួលរៀនសូត្រនៅសាលាពុទ្ធិក។
ព្រះតេជព្រះគុណ ពេទ ភឿន មានសង្ឃដីកាថា គណៈកម្មការវត្តថ្មីនឹងទទួលបានការគាំទ្រ និងចូលរួមពីពុទ្ធិបរិស័ទក្នុងន័យដើម្បីចូលរួមអភិវឌ្ឍ និងកសាងវត្ត ក៏ដូចជាធ្វើបុណ្យកុសលផ្សេងៗ។
វត្តពោធិលង្កា នឹងអនុញ្ញាតឱ្យតែសមណសិស្សមកពីទីជិតឆ្ងាយប៉ុណ្ណោះស្នាក់អាស្រ័យ ដោយមិនចង់ឱ្យមានរឿងរ៉ាវបែងចែកបក្ខ និងពិបាកគ្រប់គ្រងដូចពេលមុន។
មន្ត្រីសង្ឃជាន់ខ្ពស់ខេត្តសៀមរាប មួយអង្គទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកន្លងមកថា ការនិរទេសព្រះសង្ឃចំនួន ១៤០អង្គចេញពីវត្តពោធិលង្កា ឬវត្តពោធិ៍លើ ទំនងជាការអនុវត្តតាមបទបញ្ជារបស់អ្នកមានអំណាចដែលជាប់ពាក់ព័ន្ធនឹងនយោបាយ ជាជាងការដោះស្រាយវិវាទតាមច្បាប់ និងវិន័យរបស់គណៈសង្ឃក្នុងព្រះពុទ្ធសាសនា។
ប្រភពពីមន្ត្រីសង្ឃដដែលឲ្យដឹងថា មូលហេតុធំបំផុតនៃការបណ្ដេញព្រះសង្ឃនេះ ទំនងមិនមែនដោយសារតែរឿងវិវាទគ្នារវាងព្រះសង្ឃក្នុងវត្តនេះ ឬរឿងចៅអធិការមានស្រីញីនោះទេ ប៉ុន្តែទំនងជាដោយសារតែគេរកឃើញថា ព្រះសង្ឃក្នុងវត្តនេះភាគច្រើនពាក់ព័ន្ធនឹងរឿងនយោបាយដែលមាននិន្នាការមិនស្របនឹងបក្សកាន់អំណាចប៉ុណ្ណោះ ដូច្នេះដើម្បីលុបបំបាត់និន្នាការមិនស្របនេះ គណៈសង្ឃក៏ឆ្លៀតឱកាសនេះប្រើលេសលើបញ្ហារ៉ាំរ៉ៃកន្លងមក ដើម្បីបោសសម្អាតព្រះសង្ឃក្នុងវត្តនេះតែម្តងទៅ។
កាលពីថ្ងៃទី១៣ ខែវិច្ឆិកា ឆ្នាំ២០២៣ សាលាគណខេត្តសៀមរាប បានចេញសេចក្តីជូនដំណឹងស្ដីពីការអនុវត្តវិធានការដោយសហការជាមួយអាជ្ញាធរពាក់ព័ន្ធ បណ្តេញព្រះសង្ឃ ១៤០អង្គ និងតាជីយាយជី ក្មេងវត្តចំនួន ៣១នាក់ចេញពីវត្តពោធិលង្កា ឬវត្តពោធិ៍លើ ដែលស្ថិតក្នុងសង្កាត់ស្លក្រាម ក្រុងសៀមរាប ខេត្តសៀមរាប ដើម្បីរៀបចំរបៀបរៀបរយ និងសណ្ដាប់ធ្នាប់វត្តឡើងវិញ បន្ទាប់ពីវត្តកើតមានបញ្ហាមិនចេះចប់មិនចេះហើយកន្លងមក។
ការចុះអនុវត្តវិធានការនេះ ធ្វើឡើងក្រោយពីសេចក្តីសម្រេចរបស់គណៈសង្ឃនាយកនៃព្រះរាជាណាចក្រកម្ពុជា ស្ដីពីការបញ្ចប់មុខតំណែងចៅអធិការ គ្រូសូត្រឆ្វេង-ស្តាំ និងវិន័យធរ កាលពីថ្ងៃទី១៧ ខែកញ្ញា ឆ្នាំ២០២៣ កន្លងទៅ ក្រោមហេតុផលថា ព្រះសង្ឃក្នុងវត្តនេះមិនបានគោរពប្រតិបត្តិតាមធម៌វិន័យព្រះពុទ្ធសាសនា ព្រមទាំងចែកបក្ខចែកពួកជាក្រុមៗនាពេលកន្លងមក៕