នាយករដ្ឋមន្ត្រីបន្តពូជនៅកម្ពុជា លោក ហ៊ុន ម៉ាណែត ជំរុញឱ្យគ្រឹះស្ថានធនាគារនៅកម្ពុជា ពិនិត្យលទ្ធភាពក្នុងការផ្តល់សេវាកម្មកម្ចីរបស់ខ្លួនឲ្យកាន់តែទូលំទូលាយ ដើម្បីលើកកម្ពស់ហិរញ្ញវត្ថុនៅកម្ពុជា ក្នុងការរួមចំណែកកាត់បន្ថយភាពក្រីក្រ កាត់បន្ថយវិសមភាពសេដ្ឋកិច្ច និងជំរុញកំណើនសេដ្ឋកិច្ចជាតិផងដែរ។
លោក ហ៊ុន ម៉ាណែត លើកឡើងក្នុងពិធីសម្ពោធអគារធនាគារ វីងថៅវើ (Wing Bank) នៅថ្ងៃទី២០ ខែធ្នូ ឆ្នាំ២០២៣ នេះថា លោកសូមលើកទឹកចិត្តដល់ធនាគារវីង និងធនាគារក្នុងស្រុកដទៃទៀត សូមពិនិត្យលទ្ធភាពផ្តល់ឥណទានឲ្យបានកាន់តែច្រើនដល់សហគ្រាស មីក្រូធុនតូច និងមធ្យម ដើម្បីជួយសម្រាលសម្ពាធហិរញ្ញវត្ថុ និងរួមចំណែកដល់ការរក្សាស្ថិរភាពនៃសកម្មភាពសេដ្ឋកិច្ចរបស់កម្ពុជាទៅថ្ងៃមុខ។
លោក ហ៊ុន ម៉ាណែត លើកឡើងថា គ្រប់ធនាគារដែលកំពុងប្រតិបត្តិការក្នុងស្រុកទាំងអស់ ក៏គួរតែពង្រីកឥណទានរបស់ខ្លួនដល់វិស័យកសិកម្ម ជាពិសេសឥណទានសម្រាប់ដំណាំស្រូវ និងឥណទានបៃតង ជាដើម ដើម្បីបង្កើនការនាំចេញអង្ករប្រណិតកម្ពុជា ទៅទីផ្សារអន្តរជាតិ ក្នុងការរួមចំណែកដល់ការពង្រឹងសន្តិសុខស្បៀងរបស់កម្ពុជា។
លោកបន្ថែមថា ជាងនេះទៀត ក៏គួររៀបចំឥណទានឡើងវិញចំពោះវិស័យទេសចរណ៍នៅខេត្តសៀមរាប ជូនអតិថិជនដែលជួបប្រទះការលំបាកផ្នែកហិរញ្ញវត្ថុបណ្ដោះអាសន្នផងដែរ។
នាយករដ្ឋមន្ត្រីបន្តពូជថ្មីរបស់កម្ពុជារូបនេះ ជំរុញឱ្យធនាគារជាតិនៃកម្ពុជា រិះរកវិធីសមស្របដើម្បីបន្ធូរបន្ថយនូវបទប្បញ្ញត្តិមួយចំនួនដែលចាំបាច់ ក្នុងការផ្ដល់លទ្ធភាពឲ្យគ្រឹះស្ថានធនាគារ និងហិរញ្ញវត្ថុ បន្តដើរតួនាទីកាន់តែសំខាន់ក្នុងការរួមចំណែកគាំទ្រក្រុមហ៊ុន សហគ្រាសឯកជន ដើម្បីឱ្យធនាគារទាំងនោះអាចផ្តល់កម្ចីជាមួយនឹងអត្រាការប្រាក់សមរម្យ និងលក្ខខណ្ឌអនុគ្រោះផ្សេងទៀត។
ការអះអាងនេះ ធ្វើឡើងស្របពេលដែលប្រតិបត្តិការរបស់ធនាគារមួយចំនួននៅកម្ពុជា នៅតែបង្កការលំបាកដល់កូនបំណុលនៅពេលដែលកូនបំណុលខ្លះជួបវិបត្តិហិរញ្ញវត្ថុ និងគ្មានលទ្ធភាពសងត្រឡប់។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ ធ្នូ នេះថា ការជំរុញរបស់នាយករដ្ឋមន្ត្រីកម្ពុជាឱ្យគ្រឹះស្ថានធនាគារជួយពង្រីកឥណទានទៅដល់សហគ្រាស ទាំងវិស័យកសិកម្ម និងទេសចរណ៍បែបនេះ គឺជារឿងល្អសម្រាប់ស្ថានភាពសេដ្ឋកិច្ចរបស់កម្ពុជានៅពេលនេះ ប៉ុន្តែទន្ទឹមនេះ រដ្ឋាភិបាលក៏ត្រូវរួមចំណែកក្នុងការជួយប្រជាពលរដ្ឋក្នុងចំណែកណាមួយដែរ មិនមែនរំពឹងតែទៅលើគ្រឹះស្ថានធនាគារតែម្យ៉ាងនោះទេ។
លោក សេក សុជាតិ លើកឡើងថា រដ្ឋាភិបាលគួរជួយបង្កើតការងារឱ្យប្រជាពលរដ្ឋឱ្យបានកាន់តែច្រើន ដោយការធានានូវនិរន្តរភាព និងសុវត្ថិភាពការងារទាំងនោះផងដែរ ទើបធ្វើឱ្យសហគ្រាសនានា ទាំងវិស័យកសិកម្ម និងវិស័យទេសចរណ៍ ឬអាជីវកម្មផ្សេងៗ អាចដំណើរទៅមុខបាន ដែលជាគន្លឹះមួយអាចឱ្យសហគ្រាស ក៏ដូចជាអាជីវកម្មទាំងនោះអាចខ្ចីបំណុលពីធនាគារ ហើយមានលទ្ធភាពសងត្រឡប់ទៅវិញ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ប្រសិនបើរដ្ឋាភិបាលគ្រាន់តែណែនាំទៅដល់ធនាគារ ប៉ុន្តែបែរជារដ្ឋាភិបាលមិនដាក់ចេញនូវគោលនយោបាយជួយទៅដល់អាជីវកម្ម ឬសហគ្រាសទាំងនោះឱ្យមានលទ្ធភាពដំណើរការទៅបានទេ នោះពួកគេក៏មិនមានលទ្ធភាពខ្ចីលុយពីធនាគារដែរ។ ជាងនេះទៀត បើទោះបីជាពួកគេខ្ចី ក៏ពិបាកនឹងមានលទ្ធភាពសងត្រឡប់ទៅវិញដែរ ដែលជាហេតុធ្វើឱ្យប៉ះពាល់ទៅដល់វត្ថុបញ្ចាំរបស់ពួកគេ ដែលអាចប្រឈមនឹងការរឹបអូសពីធនាគារថែមទៀត។
របាយការណ៍ធនាគារជាតិនៃកម្ពុជា បានបង្ហាញកាលពីពេលថ្មីៗនេះថា គិតត្រឹមឆ្នាំ២០២២ កម្ពុជាមានគ្រឹះស្ថានធនាគារជាច្រើនដែលកំពុងធ្វើប្រតិបត្តិការ ដូចជា ធនាគារពាណិជ្ជមាន ៥៨ស្ថាប័ន និងធនាគារឯកទេសមាន ៩ស្ថាប័ន រួមទាំងគ្រឹះស្ថានមីក្រូហិរញ្ញវត្ថុជាច្រើនទៀត។
ទាក់ទិននឹងបញ្ហានេះ អតីតមេដឹកនាំបក្សប្រឆាំងលោក សម រង្ស៊ី បានលើកឡើងកាលពីចុងខែតុលា ឆ្នាំ២០២៣ នេះថា រដ្ឋាភិបាលដែលបញ្ជាដោយលោក ហ៊ុន សែន និងកំពុងដឹកនាំដោយលោក ហ៊ុន ម៉ាណែត ជានាយករដ្ឋមន្ត្រីបន្តពូជថ្មីរបស់កម្ពុជានៅពេលនេះ កំពុងឃុបឃិតជាមួយធនាគារ និងគ្រឹះស្ថានមីក្រូហិរញ្ញវត្ថុ ច្របាច់កពលរដ្ឋក្រីក្រ ដើម្បីទទួលបានប្រាក់ចំណេញកប់ពពកដោយមិនខ្វល់ពីទុក្ខសោករបស់ប្រជារាស្ត្រខ្មែរឡើយ។
លោក សម រង្ស៊ី អះអាងថា ដោយសារតែការឃុបឃិតគ្នារវាងរដ្ឋាភិបាលក្រុងភ្នំពេញជាមួយធនាគារ និងគ្រឹះស្ថានមីក្រូហិរញ្ញវត្ថុខិលខូច ដើម្បីច្របាច់កប្រជាពលរដ្ឋក្រីក្រនេះហើយ ទើបធ្វើឱ្យប្រជាពលរដ្ឋដែលជំពាក់បំណុលធនាគារវ័ណ្ឌករើខ្លួនមិនរួច ក្នុងនោះ កូនបំណុលមួយចំនួនសុខចិត្តសម្លាប់ខ្លួន ហើយការសម្រេចចិត្តបែបនេះ ក៏ដោយសារតែការមិនយកចិត្តទុកដាក់របស់រដ្ឋាភិបាលលើពួកគេដែរ។
ជុំវិញបញ្ហានេះ កាលពីអំឡុងខែសីហា ឆ្នាំ២០២៣ អង្គការសម្ព័ន្ធខ្មែរជំរឿន និងការពារសិទ្ធិមនុស្ស អំពាវនាវឱ្យរដ្ឋាភិបាលកម្ពុជា អនុវត្តច្បាប់ដែលមានស្រាប់ និងធ្វើកំណែទម្រង់វិស័យផ្តល់ឥណទានមួយចំនួននៅកម្ពុជា ដើម្បីបញ្ឈប់ការអនុវត្តការផ្តល់កម្ចីឥណទានបែបកេងប្រវ័ញ្ច និងចាត់វិធានការចាំបាច់ដើម្បីកាត់បន្ថយចំនួនហានិភ័យរបស់ពលរដ្ឋដាក់លក់ដី ដែលគ្រឹះស្ថានខ្លះបានតម្រូវឱ្យអតិថិជនត្រូវតែសងបំណុល ជាដើម។ ជាងនេះទៀត ក៏គួរតែកែប្រែបទបញ្ជាផ្ទៃក្នុង ដោយការបញ្ឈប់ដាក់ប័ណ្ណកម្មសិទ្ធិដីធ្លីជាទ្រព្យបញ្ចាំនៅពេលពួកគេខ្ចីលុយផងដែរ៕