រដ្ឋាភិបាលប្រារព្ធខួប ២៥ឆ្នាំនៃការអនុវត្តនយោបាយឈ្នះឈ្នះ ដែលរដ្ឋាភិបាលចាត់ទុកជាមាគ៌ាដ៏សំខាន់ក្នុងការត្រួសត្រាយផ្លូវឈានទៅបញ្ចប់សង្គ្រាមស៊ីវិលទាំងស្រុងនៅកម្ពុជា ដែលជាគំនិតផ្ដួចផ្ដើមរបស់លោក ហ៊ុន សែន ខណៈក្រុមអ្នកឃ្លាំមើលសង្គមអះអាងថា រដ្ឋាភិបាលក្រោមការដឹកនាំរបស់គណបក្សកាន់អំណាច ហាក់កំពុងព្យាយាមកែប្រែប្រវត្តិសាស្ត្រ។
ថ្លែងក្នុងពិធីអបអរសាទរខួប ២៥ឆ្នាំនៃការបញ្ចប់សង្គ្រាមស៊ីវិលនៅកម្ពុជាស្ថិតក្រោមនយោបាយឈ្នះឈ្នះរបស់លោក ហ៊ុន សែន នៅឯវិមានឈ្នះឈ្នះនៅថ្ងៃទី២៩ ខែធ្នូ លោក ហ៊ុន ម៉ាណែត ថ្លែងថា នយោបាយឈ្នះឈ្នះ ត្រូវបានដាក់ចេញកាលពីថ្ងៃទី២៩ ខែធ្នូ ឆ្នាំ១៩៩៨ ក្រោមការដឹកនាំរបស់លោក ហ៊ុន សែន អតីតនាយករដ្ឋមន្ត្រី។
ថ្នាក់ដឹកនាំគណបក្សប្រជាជនកម្ពុជាដែលដឹកនាំរដ្ឋាភិបាល ជាពិសេសលោក ហ៊ុន សែន បានឱ្យតម្លៃខ្ពស់លើគោលនយោបាយឈ្នះឈ្នះ ដែលបានបញ្ចប់សង្គ្រាមស៊ីវិលទាំងស្រុង ដោយមិនមានការបង្ហូរឈាម និងទទួលបានសន្តិភាពពេញលេញ។
លោក ហ៊ុន ម៉ាណែត បានថ្លែងថា ពិធីអបអរសាទរខួបនៃការបិទបញ្ចប់សង្គ្រាមស៊ីវិលនៅកម្ពុជា និងការអនុវត្តដោយជោគជ័យនូវនយោបាយឈ្នះឈ្នះ គឺជាកម្មវិធីដ៏មានអត្ថន័យជាប្រវត្តិសាស្ត្រមិនអាចកាត់ថ្លៃបាន។ វិមាននយោបាយឈ្នះឈ្នះជានិមិត្តរូបខ្មែរទាំងអស់ និងជានិមិត្តរូបនៃសុខសន្តិភាព។ ដូច្នេះវិមាននេះសង់ឡើងដើម្បីខ្មែរទាំងអស់គ្នា។ ការចងក្រងព្រឹត្តិការណ៍ប្រវត្តិសាស្ត្រ និងដំណើររបស់កម្ពុជា មានសារសំខាន់ណាស់សម្រាប់ការធ្វើដំណើររបស់កម្ពុជា។
លោក ហ៊ុន ម៉ាណែត បានណែនាំឱ្យក្រុមការងារវិមាននយោបាយឈ្នះឈ្នះ បន្តឆ្លាក់រាល់ព្រឹត្តិការណ៍ និងសមិទ្ធផលរបស់កម្ពុជាជាបន្តទៀតនៅវិមាននយោបាយឈ្នះឈ្នះ។ ការធានា ៣យ៉ាងជាស្នូលនៃការអនុវត្តបានជោគជ័យនូវនយោបាយឈ្នះឈ្នះ រួមមាន ទី១ ធានាអាយុជីវិត និងរូបកាយ ទី២ ធានាអាជីព និងមុខរបរ ហើយទី៣ ធានាកម្មសិទ្ធិទ្រព្យសម្បត្តិ។
ប៉ុន្តែក្រុមអ្នករិះគន់និយាយថា ថ្ងៃទី២៣ ខែតុលា ឆ្នាំ១៩៩១ នៃសន្ធិសញ្ញាកិច្ចព្រមព្រៀងទីក្រុងប៉ារីសទៅវិញទេ ដែលជាថ្ងៃផ្តល់កំណើតពិតប្រាកដដល់សិទ្ធិសេរីភាពរបស់ពលរដ្ឋខ្មែរ ហើយថ្ងៃនេះក៏ត្រូវបានលោក ហ៊ុន សែន ព្យាយាមលុបបំបាត់ចោលដែរ។
លោក ហ៊ុន សែន អតីតនាយករដ្ឋមន្ត្រីកម្ពុជា ធ្លាប់បានពន្យល់ច្រើនដងហើយថា ក្រោយរំដោះប្រទេសជាតិកាលពីថ្ងៃទី៧ ខែមករា ឆ្នាំ១៩៧៩ មិនបានធ្វើឱ្យប្រទេសជាតិបញ្ចប់សង្គ្រាមស៊ីវិលទាំងស្រុងឡើយ ខណៈកម្លាំងទ័ពខ្មែរនៅតាមព្រំដែន និងកម្លាំងគ្រប់ភាគីនៅបន្តប្រឈមមុខដាក់គ្នា។
លោក ហ៊ុន សែន លើកឡើងថា ទោះបីមានកិច្ចព្រមព្រៀងទីក្រុងប៉ារីស នៅថ្ងៃទី២៣ ខែតុលា ឆ្នាំ១៩៩១ ទៅហើយក្តី ក៏មិនអាចអូសទាញអ្នកនយោបាយខ្មែរ និងអ្នកជាតិនិយមមកធ្វើការជាមួយគ្នាបាន ខណៈស្ថានភាពផ្ទុះសង្គ្រាមស៊ីវិលឡើងវិញ ងាយនឹងកើតឡើងជាថ្មី។
លោកបន្តថា ចំណែកអាជ្ញាធរអន្តរកាលសហប្រជាជាតិនៅកម្ពុជា ហៅកាត់ថាអ៊ុនតាក់ (UNTAC) ដែលមកជួយរៀបចំការបោះឆ្នោតនៅកម្ពុជា ឆ្នាំ១៩៩៣ និងចំណាយថវិកា ២ពាន់លានដុល្លារនោះ ក៏មិនអាចធានាពីនិរន្តរភាពសន្តិសុខនៅកម្ពុជាដែរ។ មិនតែប៉ុណ្ណោះ ក៏មានស្ថានភាពផ្ទុះអាវុធថ្ងៃទី៥-៦ ខែកក្កដា ឆ្នាំ១៩៩៧ ដែលបក្សប្រជាជនកម្ពុជា និងគណបក្សហ៊្វុនស៊ិនប៉ិច ចោទគ្នាទៅវិញទៅមកថាជាការធ្វើរដ្ឋប្រហារដាក់គ្នាផង។
លោក ហ៊ុន សែន អះអាងថា មេដឹកនាំគណបក្សប្រជាជនកម្ពុជាគ្រប់រូបឱ្យតម្លៃលើគោលនយោបាយឈ្នះឈ្នះ។ តាមរយៈនយោបាយឈ្នះឈ្នះនេះ គណបក្សប្រជាជនកម្ពុជាបច្ចុប្បន្ន និងថ្នាក់ដឹកនាំ មន្ត្រីបក្សដែលដឹកនាំរដ្ឋាភិបាល ចាត់ទុកជាគោលនយោបាយដ៏ធំមួយក្នុងការដឹកនាំប្រទេសកម្ពុជា បន្ទាប់ពីឆ្លងកាត់នូវដំណាក់កាលសង្គ្រាម ដំណាក់កាលនៃរបបប្រល័យពូជសាសន៍ ប៉ុល ពត រួមទាំងដំណាក់កាលសង្គ្រាមផង ចរចាផង រហូតដល់ការលេចឡើងនៃវត្តមានរបស់នយោបាយនេះ។
រដ្ឋាភិបាលក៏បានសម្រេចដាក់បញ្ចូលទិវានយោបាយឈ្នះឈ្នះនៅក្នុងប្រតិទិន គឺសម្រាប់អបអរជ័យជម្នះដែលកម្ពុជាបានបិទបញ្ចប់សង្គ្រាមទាំងស្រុង។ ការបញ្ចូលនយោបាយឈ្នះឈ្នះក្នុងប្រតិទិននេះ ចាប់តាំងពីឆ្នាំ២០២២ មក ប៉ុន្តែមន្ត្រីរាជការ បុគ្គលិក និងកម្មករ មិនត្រូវបានអនុញ្ញាតឈប់សម្រាកនោះទេ។
លោក ហ៊ុន សែន បានបង្គាប់ឱ្យគ្រប់ស្ថាប័នរដ្ឋ និងឯកជនទាំងនេះ ត្រូវរៀបចំចងបដា ពាក្យស្លោក ដើម្បីអបអរសាទរទិវានយោបាយឈ្នះឈ្នះ ដែលមានខ្លឹមសារថា «អរគុណសន្តិភាព! អរគុណនយោបាយឈ្នះឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ!»។
ក្រុមអ្នកឃ្លាំមើលសង្គមសង្កេតឃើញថា រដ្ឋាភិបាលកម្ពុជាដឹកនាំរបស់គណបក្សកាន់អំណាចហាក់ព្យាយាមកែប្រែប្រវត្តិសាស្ត្រតាមរយៈការបង្កើតព្រឹត្តិការណ៍ ឱ្យពលរដ្ឋចូលរួម និងដឹងគុណនយោបាយឈ្នះឈ្នះ ដោយបំភ្លេចព្រឹត្តិការណ៍ប្រវត្តិសាស្ត្រសំខាន់ៗផ្សេងទៀត។ ពួកគាត់ថា នយោបាយឈ្នះឈ្នះមិនបានរួមចំណែកឱ្យភាគីជម្លោះ មកចូលតុចរចាបញ្ចប់សង្គ្រាម និងបង្កើតការបោះឆ្នោតបែបប្រជាធិបតេយ្យដូចកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣ តុលា ឡើយ៕