រដ្ឋមន្ត្រីក្រសួងមហាផ្ទៃ លោក ស សុខា សម្រេចកំណត់អាណត្តិតួនាទី នាយ និងនាយរងប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអន្តរជាតិសរុបជិត ៣០ច្រក (២៧ច្រក) ចំនួនជិត ៤០០នាក់ (៣៦៥នាក់) នៃអគ្គនាយកដ្ឋានអន្តោប្រវេសន៍ត្រឹម ៤ឆ្នាំប៉ុណ្ណោះក្នុងម្នាក់ៗ បន្ទាប់ពីមន្ត្រីច្រកទ្វារតាមព្រំដែនអន្តរជាតិមួយចំនួនលេចធ្លាយរឿងអាស្រូវអំពើពុករលួយកាលពីពេលថ្មីៗនេះ។
រដ្ឋមន្ត្រីក្រសួងមហាផ្ទៃ លោក ស សុខា បានចេញសេចក្តីប្រកាសមួយកាលពីថ្ងៃទី២៩ ខែធ្នូ ឆ្នាំ២០២៣ ដែលត្រូវបានផ្សព្វផ្សាយនៅថ្ងៃទី៤ មករា នេះ ដោយប្រកាសតែងតាំងតំណែង នាយ និងនាយរងប៉ុស្តិ៍ ឱ្យប្រចាំការតាមច្រកទ្វារព្រំដែនអន្តរជាតិមួយចំនួន ដូចជាច្រកទ្វារព្រំដែនអន្តរជាតិ ចាំយាម ច្រកចាំព្រំ ច្រកដូង ច្រកភ្នំជី ច្រកស្ទឹងបត់ ច្រកប៉ោយប៉ែត ច្រកអូរស្មាច់ ច្រកជាំ និងច្រកទ្វារព្រំដែនអន្តរជាតិ ត្រាំងក្រៀល ជាដើម។
ជាងនេះទៀត ក៏នៅមានច្រកទ្វារព្រំដែនអន្តរជាតិ បាវិត ភ្នំដិន ច្រកព្រៃវល្លិ៍ ច្រកត្រពាំងស្រែ ច្រកត្រពាំងផ្លុង ច្រកចក្រី ច្រកព្រែកចាក ច្រកកោះរកា ច្រកក្អមសំណរ ច្រកម៉ឺនជ័យ និងច្រកទ្វារអន្តរជាតិ អូរយ៉ាដាវ ផងដែរ ដែលក្នុងមួយច្រកៗត្រូវមាននាយប៉ុស្តិ៍ម្នាក់ និងនាយករងប៉ុស្តិ៍ដែលជាជំនួយការចាប់ពី ៨នាក់ រហូតដល់ ២៤នាក់តាមតម្រូវការជាក់ស្តែង។
លោក ស សុខា បញ្ជាក់ថា ក្រៅពីច្រកទ្វារព្រំដែនអន្តរជាតិ ក៏នៅមានច្រកទ្វារអន្តរជាតិដែរ ដូចជា ច្រកទ្វារអន្តរជាតិអាកាសយានដ្ឋានភ្នំពេញ សៀមរាប ព្រះសីហនុ កំពង់ផែអន្តរជាតិភ្នំពេញ កំពង់ផែអន្តរជាតិព្រះសីហនុ កំពង់ផែអន្តរជាតិស្ទឹងហាវ និងកំពង់ផែអន្តរជាតិឧកញ៉ា ម៉ុង ឫទ្ធី ផងដែរ ដែលគិតជាចំនួន នាយ និងនាយរងប៉ុស្តិ៍សរុបជិត ១០០នាក់ (៧៦នាក់)។ ក្រៅពីនេះ គឺ នាយ និងនាយរងប៉ុស្តិ៍ជិត ៣០០នាក់ផ្សេងទៀត (២៨៩នាក់) ត្រូវប្រចាំការនៅតាមច្រកទ្វារព្រំដែនអន្តរជាតិទាំងអស់។
លោក សុ សុខា បញ្ជាក់ថា នាយ និងនាយរងប៉ុស្តិ៍នគរបាលច្រកទ្វារដែលបានចប់អាណត្តិ ត្រូវតែងតាំងមុខតំណែងសាជាថ្មី ឬតែងតាំងជា នាយ ឬនាយរងប៉ុស្តិ៍នគរបាលច្រកទ្វារផ្សេងទៀតសម្រាប់អាណត្តិបន្ទាប់ ប៉ុន្តែចំនួនមុខតំណែងនាយរងប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអន្តរជាតិដែលលើសពីការកំណត់ក្នុងសេចក្តីប្រកាសខាងលើនេះ ត្រូវរក្សាទុកនៅដដែល។
ការប្រកាសកំណត់អាណត្តិមុខតំណែង នាយ និងនាយរងប៉ុស្តិ៍តាមច្រកទ្វារអន្តរជាតិ និងច្រកទ្វារព្រំដែនអន្តរជាតិនេះ ធ្វើឡើងបន្ទាប់ពីមន្ត្រីច្រកទ្វារតាមព្រំដែនអន្តរជាតិភាគច្រើនត្រូវបានរកឃើញពីការប្រព្រឹត្តអំពើពុករលួយក្នុងតួនាទីរបស់ខ្លួន ដោយសារតែពួកគេកាន់តួនាទីតែតាមច្រកទ្វារអន្តរជាតិយូរឆ្នាំដោយគ្មានការផ្លាស់ប្ដូររហូតមក។
កាលពីអំឡុងខែធ្នូ ឆ្នាំ២០២៣ រដ្ឋមន្ត្រីក្រសួងមហាផ្ទៃ លោក ស សុខា បានចេញលិខិតមួយដោយទម្លាយថា រដ្ឋបាលខេត្តជាប់ព្រំដែនកម្ពុជា-ឡាវ និងកងកម្លាំងមានសមត្ថកិច្ចមួយចំនួន នៅតែបន្តចេញលិខិតបើកផ្លូវ បណ្ណឆ្លងដែន និងឯកសារឆ្លងដែនមិនប្រក្រតីជូនពលរដ្ឋខ្មែរប្រើប្រាស់ ឆ្លងកាត់ព្រំដែនជាហូរហែ ដែលផ្ទុយនឹងលិខិតបទដ្ឋានគតិយុត្តិជាធរមាន ដោយបង្កផលប៉ះពាល់ដល់សន្តិសុខ សុវត្ថិភាព និងផលប្រយោជន៍ស្របច្បាប់របស់ប្រជាពលរដ្ឋខ្មែរធ្ងន់ធ្ងរ។
លោក ស សុខា អះអាងថា ពាក់ព័ន្ធនឹងបញ្ហានេះ ក្រសួងមហាផ្ទៃ បានណែនាំអភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តជាប់ព្រំដែនទាំងអស់ ឱ្យបញ្ឈប់រាល់ការចេញឯកសារឆ្លងដែនមិនប្រក្រតី និងបញ្ឈប់ការយកកម្រៃក្រៅផ្លូវការពីពលរដ្ឋខ្មែរដែលធ្វើដំណើរចេញ-ចូល ឆ្លងកាត់ព្រំដែនម្តងរួចមកហើយ កាលពីដើមខែតុលា ឆ្នាំ២០២៣ កន្លងទៅ ប៉ុន្តែករណីនេះនៅតែកើតមានដដែល។
ទាក់ទិននឹងបញ្ហានេះ កាលពីថ្ងៃទី៣ ខែតុលា ឆ្នាំ២០២៣ ក្រសួងមហាផ្ទៃ បានចេញសេចក្តីណែនាំមួយដោយព្រមានថា ក្នុងករណីច្រកទ្វារព្រំដែនណាមួយកើតមានបញ្ហាមិនប្រក្រតីបណ្តាលមកពីការអនុវត្តតួនាទីភារកិច្ចមិនបានត្រឹមត្រូវតាមគោលការណ៍ច្បាប់ និងលិខិតបទដ្ឋានគតិយុត្តិដែលបានកំណត់នោះ ក្រសួងមហាផ្ទៃនឹងចាត់វិធានការតាមផ្លូវច្បាប់ជាធរមាន ដោយគ្មានករណីលើកលែងដាច់ខាត។
សេចក្តីណែនាំនេះ តម្រូវឱ្យអាជ្ញាធរតាមច្រកទ្វារព្រំដែនអន្តរជាតិនានា ត្រូវតែបិទច្រករបៀងខុសច្បាប់ទាំងអស់ មុននឹងក្រសួងមហាផ្ទៃបង្កើតច្រកទ្វារព្រំដែនផ្លូវការ និងត្រូវត្រួតពិនិត្យអ្នកដំណើរ ទំនិញ និងមធ្យោបាយចេញចូលឆ្លងកាត់ព្រំដែនផងដែរ។ ការកំណត់នេះ គឺដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែនគ្រប់ប្រភេទឲ្យបានម៉ឺងម៉ាត់ ដើម្បីបង្ក្រាបមេខ្យល់ និងអ្នកសមគំនិត ដែលអូសទាញពលរដ្ឋឱ្យឆ្លងដែនខុសច្បាប់តាមគ្រប់រូបភាព ដើម្បីចៀសវាងនូវការជួញដូរមនុស្ស ការកេងប្រវ័ញ្ចកម្លាំងពលកម្ម និងការប្រព្រឹត្តបទល្មើសផ្សេងៗ ជាដើម។
ទាក់ទិននឹងបញ្ហានេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ធ្លាប់ប្រាប់សារព័ត៌មាន The Cambodia Daily កាលពីពេលថ្មីៗនេះថា ការកាន់តួនាទីរយៈពេលយូររហូតដុះស្នឹមរបស់មន្ត្រីតាមច្រកទ្វារព្រំដែនអន្តរជាតិនានា ក៏ជាហេតុដែលនាំឱ្យការអនុវត្តច្បាប់គ្មានប្រសិទ្ធភាព និងបណ្តាលឱ្យកើតមានអំពើពុករលួយជាប្រព័ន្ធដែរ ដូច្នេះមន្ត្រីដែលប្រចាំការតាមច្រកព្រំដែនអន្តរជាតិ ឬច្រកទ្វារអន្តរជាតិ គួរតែត្រូវបានផ្លាស់ប្ដូរតួនាទីរាល់ ៣ខែ ឬ ៦ខែម្តង ក្នុងនោះ រាល់ការផ្លាស់ចេញ ក៏ត្រូវធ្វើការស៊ើបអង្កេតចំពោះការអនុវត្តការងាររបស់ពួកគេដែរ ដើម្បីធានាភាពស្អាតស្អំ ហើយក៏ជាកត្តាជំរុញឱ្យមានការអនុវត្តការងារមានប្រសិទ្ធភាពបន្តទៀតដែរ៕