ក្រុមអ្នកឃ្លាំមើលសង្គម បដិសេធនូវការលើកឡើងថា សន្តិភាពរបស់កម្ពុជាកើតចេញពីថ្ងៃជ័យជម្នះ ៧មករា ឆ្នាំ១៩៧៩ និងនយោបាយឈ្នះឈ្នះថ្ងៃទី២៩ ខែធ្នូ ឆ្នាំ១៩៩៨ របស់លោក ហ៊ុន សែន និងកំណត់យកទិវាសន្តិភាពនៅកម្ពុជា គឺជាទង្វើក្បត់ជាតិ មានតែកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ប៉ុណ្ណោះ ដែលជាកិច្ចសន្យា និងជាភស្តុតាងសម្រាប់បញ្ជាក់ពីការកសាងសន្តិភាពនៅកម្ពុជាពិតប្រាកដ។
សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៨ ខែមករា ឆ្នាំ២០២៤ នេះថា ការប្រកាសសន្តិភាពនៃរដ្ឋមួយ គឺអាស្រ័យទៅលើច្បាប់របស់ប្រទេសនោះទាំងស្រុង មិនមែនផ្អែកទៅលើគោលនយោបាយបក្សណាមួយ ឬគំនិតបុគ្គលណាម្នាក់នោះទេ ដូច្នេះប្រសិនបើមានការប្រកាស ឬការកំណត់ទិវាអ្វីមួយដែលបញ្ច្រាសទៅនឹងច្បាប់ជាតិ ក៏មានន័យស្នើនឹងក្បត់ជាតិដូច្នោះដែរ។
លោក ស្រ៊ុន ស្រ៊ន លើកឡើងថា បើរដ្ឋាភិបាលកម្ពុជាមិនទទួលស្គាល់ថាកិច្ចព្រមព្រៀងសន្តិភាពទីក្រុងប៉ារីស ជាភស្តុតាងក្នុងការកសាងសន្តិភាពឱ្យកម្ពុជាទេ ឬមិនទទួលស្គាល់ថាកិច្ចព្រមព្រៀងនេះនៅតែមានសុពលភាពសម្រាប់កម្ពុជាទេ រដ្ឋាភិបាលដែលកំពុងដឹកនាំដោយបក្សកាន់អំណាចសព្វថ្ងៃនេះ អាចប្រកាសលុបចោលកិច្ចព្រមព្រៀងនេះបាន នៅពេលនោះពួកគេនឹងឃើញច្បាស់នឹងភ្នែកជាមិនខាន ថាតើនឹងមានភាគីពាក់ព័ន្ធណាខ្លះចេញមុខអន្តរាគមន៍ក្នុងការធានាថា កិច្ចព្រមព្រៀងអន្តរជាតិមួយនេះនៅមានសុពលភាព។
សកម្មជនកិច្ចព្រមព្រៀងសន្តិភាពទីក្រុងប៉ារីសរូបនេះបញ្ជាក់ថា បើរដ្ឋាភិបាលយល់ថាកិច្ចព្រមព្រៀងសន្តិភាពទីក្រុងប៉ារីស មិនបានធានាដល់ការរក្សាសន្តិសុខរបស់ជាតិទេ រដ្ឋាភិបាលគួរតែប្រកាសប្រើរដ្ឋធម្មនុញ្ញអំឡុងទសវត្សរ៍ឆ្នាំ១៩៨០ វិញទៅ មិនចាំបាច់ប្រើរដ្ឋធម្មនុញ្ញដែលប្រសូតចេញពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩៣ ទេ ហើយពួកគេនឹងឃើញច្បាស់ដែរថា រដ្ឋភាគីដែលជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសណាខ្លះ បដិសេធការប្រកាសនេះ។
នាយករដ្ឋមន្ត្រីថ្មីរបស់កម្ពុជា លោក ហ៊ុន ម៉ាណែត បានចេញអនុក្រឹត្យកាលពីថ្ងៃទី១ ខែមករា ឆ្នាំ២០២៤ ដោយកំណត់យកថ្ងៃទី២៩ ធ្នូ ជារៀងរាល់ឆ្នាំជាទិវាសន្តិភាពនៅកម្ពុជា ដែលជាថ្ងៃបុណ្យជាតិផ្លូវការ ក្រោមហេតុផលថា ដើម្បីបង្ហាញពីការស្រឡាញ់សន្តិភាព និងការស្អប់ខ្ពើមសង្គ្រាមផង ដើម្បីរំលឹកដល់ថ្ងៃបញ្ចប់សង្គ្រាមនៅថ្ងៃទី២៩ ខែធ្នូ ឆ្នាំ១៩៩៨ ផង និងដើម្បីរំលឹកគុណអ្នកដែលបានពលី និងវីរភាពដ៏ក្លាហានរបស់អ្នកស្នេហាជាតិដែលខិតខំស្វែងរកសន្តិភាពផងដែរ។
កាលពីថ្ងៃទី៨ ខែមករា ឆ្នាំ២០២៤ លោក ហ៊ុន ម៉ាណែត លើកឡើងថា ទិវាសន្តិភាព ២៩ធ្នូ ប្រារព្ធឡើងដើម្បីប្រជាពលរដ្ឋខ្មែរគ្រប់រូបដែលស្អប់សង្គ្រាម និងស្រឡាញ់សន្តិភាព ដូច្នេះការកំណត់ថ្ងៃប្រារព្ធទិវាសន្តិភាព ២៩ធ្នូ ជាថ្ងៃឈប់សម្រាកក៏គ្មានអ្វីត្រូវខុសដែរ។
គណបក្សប្រជាជនកម្ពុជាដែលដឹកនាំដោយលោក ហ៊ុន សែន បានចាត់ទុកថ្ងៃទី២៩ ខែធ្នូ ឆ្នាំ១៩៩៨ ជាថ្ងៃបញ្ចប់នូវភ្លើងសង្គ្រាមដែលបានឆាបឆេះអស់រយៈពេលជាច្រើនឆ្នាំនៅក្នុងប្រទេសកម្ពុជា ក្រោមហេតុផលថា ថ្ងៃទី២៩ ខែធ្នូ ឆ្នាំ១៩៩៨ នេះ គឺជាថ្ងៃដែលអង្គការចាត់តាំងខ្មែរក្រហមបានរលាយបែកបាក់ពីទឹកដីកម្ពុជា ស្ថិតក្រោមនយោបាយឈ្នះឈ្នះរបស់លោក។
កាលពីថ្ងៃទី២៧ ខែកុម្ភៈ ឆ្នាំ២០២៣ មេដឹកនាំខ្មែរក្រាញអំណាចជាង ៤ទសវត្សរ៍លោក ហ៊ុន សែន ណែនាំមន្ត្រីក្រោមឱវាទរបស់ខ្លួនថា ថ្ងៃទី២៩ ខែធ្នូ ឆ្នាំ១៩៩៨ គឺជាថ្ងៃជោគជ័យនៃនយោបាយឈ្នះឈ្នះរបស់លោក ក្រោយប្រទេសកម្ពុជាកើតមាននូវជម្លោះបែកបាក់ជាតិតាំងពីឆ្នាំ១៤៧៣ ដែលគិតមកទល់នឹងពេលនេះ គឺមានរយៈពេលជាង ៥សតវត្សរ៍ទៅហើយនោះ។
លោក ហ៊ុន សែន អះអាងថា ឆ្នាំ១៩៩៨ គឺជាឆ្នាំដែលបានបញ្ចប់សង្គ្រាមលើទឹកដីកម្ពុជាជាលើកដំបូងក្នុងប្រវត្តិសាស្ត្រដែលមិនធ្លាប់មាន និងបាននាំមកនូវសុខសន្តិភាពរហូតដល់សព្វថ្ងៃនេះ។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា ទាំងថ្ងៃជ័យជម្នះ ៧មករា ឆ្នាំ១៩៧៩ និងនយោបាយឈ្នះឈ្នះថ្ងៃទី២៩ ខែធ្នូ ឆ្នាំ១៩៩៨ សុទ្ធតែជាថ្ងៃដែលបំផ្លាញទឹកដីកម្ពុជាប៉ុណ្ណោះ។ ជាក់ស្តែង ថ្ងៃជ័យជម្នះ ៧មករា ឆ្នាំ១៩៧៩ គ្រាន់តែជាថ្ងៃដែលរដ្ឋាភិបាលខ្មែរដែលស្ថិតក្រោមការគ្រប់គ្រងរបស់រដ្ឋាភិបាលកុម្មុយនីស្តវៀតណាម បើកផ្លូវទទួលយកនយោបាយឈ្លានពានរបស់វៀតណាមមកលើទឹកដីកម្ពុជាប៉ុណ្ណោះ ព្រោះឫសគល់នៃថ្ងៃជ័យជម្នះ ៧ខែមករា ឆ្នាំ១៩៧៩ គឺបានកើតចេញពីផែនការឈ្លានពានទឹកដីដែលបានកកើតចេញមកពីបក្សប្រជាជនបដិវត្តន៍កម្ពុជា តាំងពីឆ្នាំ១៩៥១ មកម្ល៉េះ។
ទាក់ទិននឹងបញ្ហានេះ អតីតមេដឹកនាំបក្សប្រឆាំងលោក សម រង្ស៊ី លើកឡើងកាលពីពេលថ្មីៗនេះថា ថ្ងៃទី៧ ខែមករា ឆ្នាំ១៩៧៩ គឺថ្ងៃដែលខ្មែរបាត់បង់អធិបតេយ្យភាព បាត់បង់ដែនសមុទ្រ បាត់បង់កោះត្រល់ ហើយក៏ជាថ្ងៃដែលក្រុមមេដឹកនាំនៃរដ្ឋាភិបាលក្រុងភ្នំពេញ យកមកធ្វើជាជំនួញនយោបាយ ដើម្បីកេងចំណេញពីព្រឹត្តិការណ៍ប្រវត្តិសាស្ត្រដ៏ចម្រូងចម្រាសដែលពួកគេព្យាយាមបំភ្លៃការពិតរហូតមក៕