លោក សម រង្ស៊ី ប្រធានអតីតគណបក្សសង្គ្រោះជាតិ កំពុងរស់នៅក្នុងប្រទេសបារាំង ចេញសារនៅថ្ងៃទី១១ ខែមករា ឆ្នាំ២០២៤ អំពាវនាវដល់តំណាងកម្លាំងប្រជាធិបតេយ្យទាំងអស់នៅប្រទេសកម្ពុជា ឲ្យរួបរួមសហការគ្នាជាធ្លុងមួយ ដើម្បីលើកកម្ពស់លទ្ធិប្រជាធិបតេយ្យ និងសូមកុំឲ្យមានការវាយប្រហារគ្នាទៅវិញទៅមក ត្រូវតែចែកមុខនាទីគ្នាដើម្បីទទួលបានជ័យជម្នះរួម។
លោក សម រង្ស៊ី បានលើកឡើងថា នៅពេលនេះមានគណបក្សនយោបាយ ៣ ដែលតំណាងឲ្យកម្លាំងប្រជាធិបតេយ្យ ហើយដែលមានអ្នកគាំទ្រចេញមកពីប្រភពដើមតែមួយ គឺគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ។ លោកសូមឲ្យអ្នកគាំទ្រ និងសកម្មជនគណបក្សទាំង ៣ រក្សាភាពស្មោះត្រង់ចំពោះប្រទេសជាតិ និងប្រជារាស្ត្រ មានន័យថារក្សាឧត្តមគតិដើមទាំងអស់គ្នាឈរលើសីលធម៌ សច្ចធម៌ យុត្តិធម៌។
ប្រភពដដែលបានលើកឡើងថា អ្វីដែលសំខាន់បំផុត គឺឧត្តមគតិដើមដែលធ្វើឲ្យព្រលឹងខ្មែរ ព្រលឹងជាតិ រស់រវើកជានិច្ច។ ឈ្មោះគណបក្សមិនសំខាន់ប៉ុន្មានទេ ពីព្រោះអាចប្តូរឈ្មោះគណបក្ស ឬប្តូរគណបក្សតែម្តង តាមអ្វីដែលកាលៈទេសៈតម្រូវ។ អ្វីដែលសំខាន់បំផុត គឺព្រលឹងដែលនៅរស់រវើក ហើយគ្មានការប្រែប្រួលអ្វីឡើយ។
លោកបន្តថា គណបក្សគ្រាន់តែជាសម្បកក្រៅទេ ដែលអាចមានការប្រែប្រួល តែព្រលឹងយើងមានតែមួយ ហើយនៅដដែល។
លោក សម រង្ស៊ី ថាក្នុងការបោះឆ្នោតជ្រើសរើសសមាជិកព្រឹទ្ធសភានៅថ្ងៃទី២៥ ខែកុម្ភៈ ឆ្នាំ២០២៤ ត្រូវតែមានការសហការគ្នារវាងគណបក្សកម្លាំងជាតិ និងគណបក្សឆន្ទៈខ្មែរ ដោយចៀសវាងការប្រកួតប្រជែងគ្នានៅតាមភូមិភាគនីមួយៗ។ បើគណបក្សពីរនេះប្រកួតប្រជែងគ្នានៅក្នុងភូមិភាគណាមួយ គឺគណបក្សទាំងពីរច្បាស់ជាបរាជ័យទាំងពីរ។ ចំពោះអង្គបោះឆ្នោតដែលជាសមាជិកគណបក្សភ្លើងទៀន ត្រូវប្រកាន់វិន័យបោះឆ្នោតដោយសម្ងាត់ឲ្យគណបក្សប្រជាធិបតេយ្យតែមួយនៅក្នុងភូមិភាគនីមួយៗ ដើម្បីធានាជោគជ័យរួមនៃកម្លាំងប្រជាធិបតេយ្យ។ ការជ្រើសរើសគណបក្សណាមួយរវាងគណបក្សកម្លាំងជាតិ និងគណបក្សឆន្ទៈខ្មែរនៅក្នុងភូមិភាគនីមួយៗ នឹងត្រូវសម្រេចក្នុងពេលឆាប់ៗខាងមុខនេះតាមការចាំបាច់។
លោក សម រង្ស៊ី បន្ថែមថា អង្គបោះឆ្នោតមិនចាំបាច់បង្ហាញជំហររបស់ខ្លួនជាសាធារណៈក៏បានដែរ មិនចាំបាច់ឲ្យអ្នកក្រៅដឹងពីជំហររបស់ខ្លួនក៏បានដែរ ដើម្បីធានាសន្តិសុខ និងលំនឹងនៃការងារទៅថ្ងៃមុខសម្រាប់អង្គបោះឆ្នោតម្នាក់ៗ។ អ្វីដែលសំខាន់បំផុត គឺអង្គបោះឆ្នោតត្រូវបោះឆ្នោតដោយសម្ងាត់ តាមសតិសម្បជញ្ញៈរបស់ខ្លួនម្នាក់ៗ ហើយតាមវិន័យដូចបានរៀបរាប់មកនេះ ហើយដែលនឹងត្រូវបញ្ជាក់ក្នុងពេលឆាប់ៗខាងមុខនេះ។
កាលពីថ្ងៃទី៧ ខែធ្នូ ឆ្នាំ២០២៣ លោក សម រង្ស៊ី ក៏បានចេញសារអំពាវនាវមួយដល់សកម្មជន និងអ្នកគាំទ្រលទ្ធិប្រជាធិបតេយ្យឲ្យមានការរួមគ្នា ចៀសវាងការបញ្ឈប់មុខនាទីរបស់សកម្មជន។ សារដ៏ខ្លីរបស់លោក សម រង្ស៊ី បានស្នើកុំឲ្យមានការវាយប្រហារគ្នាទៅវិញទៅមក ដោយសារតែរឿងផ្ទាល់ខ្លួន និងចៀសវាងចាត់វិធានការណាមួយដែលមានបំណងបញ្ឈប់មុខនាទី និងការងាររបស់សកម្មជនណាម្នាក់ ដោយនៅតែរក្សាឧត្តមគតិដើមដដែល។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណារ៉ា បានលើកឡើងកន្លងមកថា សារលោក សម រង្ស៊ី គឺជាការកៀងគរសំឡេងអ្នកប្រជាធិបតេយ្យឡើងវិញឲ្យរួមគ្នាក្នុងការប្រឈមនឹងគណបក្សកាន់អំណាចទៅអនាគត។
គណបក្សភ្លើងទៀន ដែលមិនមានសិទ្ធិចូលរួមបោះឆ្នោតព្រឹទ្ធសភា បានជ្រើសរើសឲ្យគណបក្សឆន្ទៈខ្មែរ ដែលនៅក្នុងសម្ព័ន្ធភាពជាមួយគ្នា ចុះបញ្ជីគណបក្ស និងបេក្ខជននៅគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី៤ ខែធ្នូ ឆ្នាំ២០២៣ កន្លងទៅ។
គណបក្សកម្លាំងជាតិ ដែលមេដឹកនាំបែកចេញពីគណបក្សភ្លើងទៀន ក៏បានចុះបញ្ជីគណបក្ស និងបេក្ខជនឈរឈ្មោះនៅ គ.ជ.ប នៅថ្ងៃទី៦ ខែធ្នូ ឆ្នាំ២០២៣ ដែរ ក៏ប៉ុន្តែគណបក្សទាំងពីរកំពុងប្រឈមមុខដាក់គ្នារឿងអង្គបោះឆ្នោត ដោយអង្គបោះឆ្នោតសុទ្ធសឹងតែជាសមាជិកក្រុមប្រឹក្សាឃុំ-សង្កាត់ជាប់ឆ្នោតតាមរយៈគណបក្សភ្លើងទៀន ជាង ២ពាន់នាក់។
កាលពីពេលថ្មីៗកន្លងទៅនេះ សមាជិកជាន់ខ្ពស់មួយចំនួនរបស់គណបក្សភ្លើងទៀន ត្រូវបានគណបក្សបញ្ឈប់ពីតួនាទីដោយសារព្យាយាមទាក់ទាញសមាជិកក្រុមប្រឹក្សាឃុំ-សង្កាត់គណបក្សភ្លើងទៀន ឲ្យទៅចូលរួមជាមួយគណបក្សកម្លាំងជាតិ ដែលបញ្ហានេះបង្កើតបានជាពាក្យសម្ដីវាយប្រហារគ្នានៅក្នុងចំណោមបក្សប្រឆាំងទាំងពីរ ក៏ប៉ុន្តែគណបក្សភ្លើងទៀន ថាជាការអនុវត្តតាមលក្ខន្តិកៈ និងបទបញ្ជាផ្ទៃក្នុងបក្ស៕