ក្រុមអ្នកឃ្លាំមើលស្ថានការណ៍កម្ពុជា សម្ដែងការសោកស្តាយថា រយៈពេលជាង ៤ខែដែលលោក ហ៊ុន ម៉ាណែត ឡើងកាន់អំណាចជានាយករដ្ឋមន្ត្រីបន្តពីឪពុក មិនត្រឹមតែមិនអាចស្ដារកេរ្តិ៍ឈ្មោះដ៏អសោចរបស់លោក ហ៊ុន សែន បានប៉ុណ្ណោះទេ តែបែរជាជាប់ឈ្មោះជាមេដឹកនាំកខ្វក់ម្នាក់ក្នុងចំណោមមេដឹកនាំកខ្វក់ទាំង ១២នាក់នៅក្នុងវេទិកាសេដ្ឋកិច្ចពិភពលោក (WEF) នៅទីក្រុងដាវូស (Davos) ប្រទេសស្វីស (Switzerland) ថែមទៀត។
អនុប្រធានវេទិកាពលរដ្ឋលោក ម៉ែន ណាត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៨ មករា នេះថា ការចាត់បញ្ចូលលោក ហ៊ុន ម៉ាណែត ចូលទៅក្នុងចំណោមមេដឹកនាំ និងអ្នកជំនួញកខ្វក់ចំនួន ១២រូបដែលមានវត្តមានក្នុងវេទិកាសេដ្ឋកិច្ចពិភពលោកនៅទីក្រុងដាវូស មិនមែនគ្មានភស្តុតាងទេ ព្រោះសារព័ត៌មានអន្តរជាតិនានាក៏បានតាមដានលោក ហ៊ុន ម៉ាណែត កន្លងមកដែរ ជុំវិញការធ្វើជំនួញរបស់ក្រុមគ្រួសារត្រកូលហ៊ុន ដូចជា លោក ហ៊ុន សែន និងលោក ហ៊ុន ម៉ាណែត ជាដើម ទើបគេហ៊ានដាក់បញ្ចូលគាត់ទៅក្នុងចំណោមមេដឹកនាំ និងអ្នកជំនួញកខ្វក់បែបនេះ។
លោក ម៉ែន ណាត លើកឡើងថា ការធ្វើដំណើររបស់លោក ហ៊ុន ម៉ាណែត មកកាន់ទឹកដីអឺរ៉ុប ដើម្បីបញ្ចុះបញ្ចូលអ្នកវិនិយោគឱ្យទៅរកស៊ីនៅកម្ពុជាក្នុងពេលនេះ នឹងត្រូវបរាជ័យទាំងស្រុង ព្រោះអ្នកវិនិយោគល្អៗដែលគោរពច្បាប់ គេនឹងមិនហ៊ានទៅបោះទុនវិនិយោគនៅកម្ពុជានោះទេ ព្រោះពួកគេមិនមែនមិនដឹងអំពីរបៀបដឹកនាំដ៏អាក្រក់របស់លោក ហ៊ុន សែន ដែលបានបន្តមកឱ្យលោក ហ៊ុន ម៉ាណែត នៅពេលនេះទេ។ ជាងនេះទៀត ពួកគេក៏មិនមែនមិនដឹងថា លោក ហ៊ុន ម៉ាណែត កំពុងក្តោបក្តាប់កម្ពុជាឱ្យដូចទៅនឹងលោក ហ៊ុន សែន ដែលជាឪពុករបស់គាត់ដែរ។
អនុប្រធានវេទិកាពលរដ្ឋរូបនេះបញ្ជាក់ថា អ្នកជំនួញដែលបោះទុនវិនិយោគនៅកម្ពុជាកន្លងមក អាចមានអ្នកជំនួញដែលល្អៗដែរ ប៉ុន្តែពួកគេបាននាំគ្នារត់ទៅប្រទេសដទៃអស់ហើយ ដោយសារតែពួកគេមិនអាចរកស៊ីចំណេញក្រោមរដ្ឋាភិបាលដែលពោរពេញដោយអំពើពុករលួយមួយនេះ ដូច្នេះអ្នកវិនិយោគដែលនៅសល់ គឺមានតែពួកម៉ាហ្វីយ៉ា (Mafia) ប៉ុណ្ណោះ ដែលពួកគេបានឃុបឃិតជាមួយមន្ត្រីរដ្ឋាភិបាលរបស់គណបក្សប្រជាជនកម្ពុជា ប្រព្រឹត្តបទល្មើសធំៗ ដូចជា កាប់បំផ្លាញព្រៃឈើ ជួញដូរមនុស្ស លក់គ្រឿងញៀន លាងលុយកខ្វក់ និងចាប់ជំរិត ជាដើម។
អ្នកនាំពាក្យរដ្ឋាភិបាលកម្ពុជា លោក ប៉ែន បូណា បានប្រាប់សារព័ត៌មានក្នុងស្រុកថា ការវាយតម្លៃរបស់កាសែត Politico គ្មានតម្លៃ និងគ្មានប្រយោជន៍ដែលធ្វើឡើងដើម្បីបម្រើរបៀបវារៈនយោបាយរបស់ខ្លួនតែប៉ុណ្ណោះ។ លោកថា តម្លៃពិតរបស់រដ្ឋាភិបាលកម្ពុជាអាស្រ័យលើការគាំទ្ររបស់ពលរដ្ឋ ការគាំទ្រ និងកិច្ចសហប្រតិបត្តិការរបស់សហគមន៍អន្តរជាតិ និងការងារដែលរដ្ឋាភិបាលធ្វើដើម្បីបម្រើរាស្ត្រ។
កាលពីថ្ងៃទី១៥ ខែមករា ឆ្នាំ២០២៤ សារព័ត៌មានព័ត៌មានអន្តរជាតិឈ្មោះ ប៉ូលិទិកូ (POLITOCO) បានចុះផ្សាយអត្ថបទមួយដែលមានចំណងជើងថា The ‘dirty dozen’ of Davos ឬមេដឹកនាំ និងអ្នកជំនួញកខ្វក់ចំនួន ១២រូបដែលមានវត្តមានក្នុងទីក្រុងដាវូស ក្នុងនោះលោក ហ៊ុន ម៉ាណែត ក៏ត្រូវគេបញ្ចូលទៅក្នុងចំណោមមេដឹកនាំ និងអ្នកជំនួញកខ្វក់ចំនួន ១២នាក់នោះផងដែរ។
មេដឹកនាំ និងអ្នកជំនួញកខ្វក់ចំនួន ១២រូបដែលមានវត្តមានក្នុងវេទិកាសេដ្ឋកិច្ចពិភពលោកនៅទីក្រុងដាវូស ទាំងនោះ រួមមាន៖
- នាយករដ្ឋមន្ត្រីខ្មែរ លោក ហ៊ុន ម៉ាណែត
- ប្រធានាធិបតីអាហ្សង់ទីន
- រាជទាយាទអារ៉ាប៊ីសាអ៊ូឌីត
- ប្រធានាធិបតីអាហ្សេបៃហ្សង់
- ប្រធានាធិបតីរវ៉ាន់ដា
- នាយករដ្ឋមន្ត្រីចិន លោក លី ឈាង (Li Qiang)
- ប្រធានាធិបតីហុងគ្រី
- នាយករដ្ឋមន្ត្រីស្លូវ៉ាគី
- ប្រធានាធិបតីប៉ូឡូញ
- និងនាយករដ្ឋមន្ត្រីកាតារ (Qatar)
- ព្រមទាំងអ្នកជំនួញដ៏ធំពីររូបផ្សេងទៀតផងដែរ។
សារព័ត៌មានអន្តរជាតិដដែលនេះ បានចាត់ទុកថា បុគ្គលទាំងនេះជាប្រភេទអ្នកជំនួញទុច្ចរិត ជាមេដឹកនាំផ្ដាច់ការបែបអត្តាធិបតេយ្យដែលល្មោភអំណាច និងផលប្រយោជន៍ផ្ទាល់ខ្លួន មិនគោរពច្បាប់ ដោយជាប់ពាក់ព័ន្ធក្នុងអំពើឃាតកម្មទៅលើអ្នកកាសែត និងបង្ក្រាបបង្ហូរឈាមលើពលរដ្ឋស្លូតត្រង់ ជាដើម ក្នុងនោះមានចំណុចសំខាន់ៗជាច្រើននៃការដឹកនាំបែបផ្ដាច់ការរបស់លោក ហ៊ុន ម៉ាណែត រួមមានការបង្ក្រាបឥតឈប់ឈរលើគណបក្សប្រឆាំង និងអ្នករិះគន់ ការបោះឆ្នោតមិនត្រឹមត្រូវ ការប្រព្រឹត្តអំពើពុករលួយ និងទំនាក់ទំនងបក្ខពួកនិយមរវាងក្រុមអ្នកនយោបាយកាន់អំណាច និងអ្នកជំនួញក្នុងរដ្ឋាភិបាលរបស់គណបក្សប្រជាជនកម្ពុជា ដែលកំពុងគ្រប់គ្រងដោយលោក ហ៊ុន សែន សព្វថ្ងៃនេះ។
ក្រោយឡើងកាន់អំណាចបន្តពីឪពុករយៈពេលជាង ៤ខែ រដ្ឋាភិបាលកម្ពុជាដែលស្ថិតក្រោមការដឹកនាំរបស់គណបក្សប្រជាជនកម្ពុជាដែលបន្តការគ្រប់គ្រងពីលោក ហ៊ុន សែន មកដល់លោក ហ៊ុន ម៉ាណែត ត្រូវគេមើលឃើញថា ស្ថានភាពនៃការរឹតត្បិតសេរីភាពរបស់ពលរដ្ឋ និងសិទ្ធិនយោបាយ នៅតែមានភាពចង្អៀតដដែល។ ជាក់ស្តែង ក្រោយលោក ហ៊ុន ម៉ាណែត ឡើងកាន់អំណាចជានាយករដ្ឋមន្ត្រីជាង ៤ខែមកនេះ ក្នុងនោះ ការរឹតត្បិតសេរីភាពចាប់ផ្តើមលេចចេញជាបណ្តើរៗនៅដើមឆ្នាំនេះ ដូចជា ការចាប់ខ្លួនលោក នី ណាក់ ការឃាត់ខ្លួនសកម្មជនចលនាមាតាធម្មជាតិដែលផ្សព្វផ្សាយពីការការពារកោះកុងក្រៅ និងការចាប់ខ្លួនលោក ខឹម ចាន់វណ្ណៈ នៅពេលនេះ ជាដើម៕