រដ្ឋាភិបាលអូស្ត្រាលី សម្រេចបន្ថែមការដាក់ទណ្ឌកម្មសេដ្ឋកិច្ចទៅលើស្ថាប័នចំនួន៥ ថែមទៀតដែលមានទំនាក់ទំនងទៅនឹងរបបសឹកភូមា ក្រោយពីរបបយោធានេះបានប្រកាសដាក់លក់ភូមិគ្រឹះរបស់អ្នកស្រី អ៊ុងសាន ស៊ូជី ក្នុងតម្លៃ ៩០លានដុល្លារ។
ការដាក់ទណ្ឌកម្មរបស់រដ្ឋាភិបាលអូស្ត្រាលី ទៅលើរបបសឹកភូមា ជាការដាក់កម្រិតទៅកាន់របបសឹកនេះដោយរបបនេះមានទំនាក់ទំនងហិរញ្ញវត្ថុជាមួយក្រុមហ៊ុនទាំងនោះដែលប្រព្រឹត្តឃោរឃៅទៅលើប្រជាជនខ្លួនឯង។
ធនាគារចំនួនពីរដែលនៅតែបន្តសកម្មភាពនឹងរបបនេះ គឺធនាគារពាណិជ្ជកម្មបរទេសភូមា និងធនាគារពាណិជ្ជវិនិយោគភូមា ដែលអាចនឹងត្រូវបានក្លាយទៅជាគោលដៅនៃការដាក់ទណ្ឌកម្មហិរញ្ញវត្ថុ។
មិនតែប៉ុណ្ណោះ ក្រុមហ៊ុនបីទៀតដែលផ្គត់ផ្គង់ប្រេងឥន្ធនៈដល់ប្រតិបត្តិការរបស់ពួកយោធាដែលមានឈ្មោះថា ក្រុមហ៊ុនអាស៊ីសាន់ ក្រុមជំនួញ អាស៊ីសាន់ ក្រុមភស្តុភារប្រេងឥន្ធនៈ Cargo Link ក៏នឹងរងទណ្ឌកម្មហិរញ្ញវត្ថុផងដែរ។
ទណ្ឌកម្មទាំងនោះគឺជាការឆ្លើយតបទៅនឹងការរឹតត្បិតប្រជាជនភូមា ការរីកសាយនៃអំពើហិង្សា និងការបន្តបង្កអសន្តិសុខ នយោបាយ និងសិទ្ធិមនុស្ស។
ក្រុមហ៊ុនទាំងនេះផ្ដល់សញ្ញាច្បាស់លាស់នៃការព្រួយបារម្ភដូចដែលអូស្ត្រាលី មានសម្រាប់ទណ្ឌកម្មដែលកំពុងបន្តកើតមាន ហើយនឹងបន្តក្នុងការដាក់ទណ្ឌកម្មអន្តរជាតិ ជាពិសេសសហការនឹងអាស៊ាន ដើម្បីស្វែងរកដំណោះស្រាយចំពោះវិបត្តិ។
អូស្ត្រាលី បញ្ជាក់ថា អូស្ត្រាលីនឹងបន្តក្នុងការតាមដានសកម្មភាពនៃរបបសឹក ហើយនឹងស្វែងរកការរីកចម្រើនជាមូលដ្ឋាន ហើយក៏នឹងបន្តក្នុងការដាក់គំនាបទៅលើរបបនេះចំពោះអំពើហិង្សាដែលត្រូវដោះលែងអ្នកទោសដែលត្រូវបានចាប់ដោយអយុត្តិធម៌ ជាថ្នូរនឹងទទួលបានសម្ភារៈមនុស្សធម៌ និងការត្រឡប់មកវិញនូវប្រជាធិបតេយ្យ។
ក្នុងបរិបទនេះ អូស្ត្រាលីថាអូស្ត្រាលីនឹងបន្តក្នុងការដាក់ទណ្ឌកម្មចំពោះរបបសឹក ហើយគាំទ្រកិច្ចខិតខំរបស់អាស៊ានក្នុងការដោះស្រាយវិបត្តិនៅភូមា រួមគ្នានឹងកិច្ចខិតខំប្រឹងប្រែងរបស់ប្រធានអាស៊ាន និងប្រេសិតពិសេស។ អូស្ត្រាលីអំពាវនាវឱ្យរបបយោធាអនុវត្តឱ្យបាននូវគោលការណ៍ទាំងប្រាំចំណុច ហើយភ្ជាប់ទំនាក់ទំនងជាវិជ្ជមាន និងមានអត្ថន័យសម្រាប់តំណាងអាស៊ាន។
អូស្ត្រាលីបង្ហាញនូវកម្លាំងចិត្តគាំទ្រដល់ប្រជាជនភូមា ដោយថាប្រជាជនភូមានេះមានសេចក្ដីក្លាហាន ការតាំងចិត្តដើម្បីប្រជាធិបតេយ្យ និងភាពធន់នឹងបញ្ហាសម្លាប់រង្គាលដែលមិនអាចនិយាយបាន ហើយនឹងបន្តក្នុងការធានាជាជំនួយអភិវឌ្ឍន៍ និងមនុស្សធម៌ដល់ជនរងគ្រោះ។
ការដាក់ទណ្ឌកម្មរបស់អូស្ត្រាលី ក្រោយតែប៉ុន្មានថ្ងៃប៉ុណ្ណោះដែលតុលាការកំពូលរបបសឹក បានចេញបង្គាប់ទៅរដ្ឋាភិបាលឱ្យប្រកាសដាក់លក់ភូមិគ្រឹះរបស់មេបក្សប្រឆាំង គឺអ្នកស្រី អ៊ុងសាន ស៊ូជី ក្នុងតម្លៃ ៩០លានដុល្លារ ឬស្មើ ៣១៥ពាន់លានក្យាតនៃប្រាក់ប្រទេសភូមា។
បើតាមដីកាបង្គាប់របស់តុលាការកំពូល ភូមិគ្រឹះរបស់អ្នកស្រី ស៊ូជី ដែលស្ថិតនៅក្រុងយ៉ាំងហ្គន នឹងចាប់ដាក់លក់ចាប់ពីថ្ងៃទី២០ ខែមីនា ខាងមុខនេះ។
វីឡារបស់អ្នកស្រី ស៊ូជី គឺជាមរតកឪពុករបស់អ្នកស្រី គឺលោក អ៊ុងសាន។ វីឡានេះមានរចនាបថជាលំនៅឋានសម័យអាណានិគមអង់គ្លេស។
អ្នកស្រី ស៊ូជី បច្ចុប្បន្នមានអាយុ ៧៨ឆ្នាំហើយ។ អ្នកស្រីប្រឈមមុខនឹងការកាត់ទោស ៣៣ឆ្នាំ ដែលតុលាការសឹកបានកំណត់ទោសដូចនេះក្នុងសំណុំរឿងជាង ១០ ក្នុងនោះមានទាំងទោសក្បត់ជាតិ និងទោសបង្កអសន្តិសុខផងដែរ។
នាពេលនេះ អ្នកស្រី ស៊ូជី មិនត្រូវបានឃុំខ្លួនក្នុងផ្ទះរបស់អ្នកស្រីនោះទេ។ អ្នកស្រីត្រូវបានពួកយោធាយកទៅឃុំខ្លួននៅជាយក្រុងណៃភិដោ។
ការបង្គាប់របស់តុលាការកំពូលនៃរបបសឹក ដែលឱ្យរដ្ឋាភិបាលបិទស្លាកដាក់លក់ភូមិគ្រឹះអ្នកស្រី ស៊ូជី ធ្វើឡើងមុនមួយសប្ដាហ៍ដែលប្រទេសភូមា ចូលដល់ខួប ៣ឆ្នាំនៃព្រឹត្តិការណ៍ថ្ងៃទី១ ខែកុម្ភៈ ឆ្នាំ២០២១ ដែលជារដ្ឋប្រហាររបស់ពួកយោធាដឹកនាំដោយឧត្តមសេនីយ៍ មីន អ៊ុងឡាំង ប្លន់អំណាចរដ្ឋាភិបាលប្រជាធិបតេយ្យដែលដឹកនាំដោយអ្នកស្រី ស៊ូជី។
ថ្ងៃទី១ ខែកុម្ភៈ ឆ្នាំ២០២១ ជាព្រឹត្តិការណ៍យោធាបិទបញ្ចប់របបប្រជាធិបតេយ្យដែលមានអាយុត្រឹមតែប្រាំឆ្នាំប៉ុណ្ណោះ។ រដ្ឋប្រហារនៅពេលនោះ គឺពួកយោធាបង្កើតព្រឹត្តិការណ៍នេះដោយសារតែចោទរដ្ឋាភិបាលគណបក្សសម្ព័ន្ធដើម្បីប្រជាធិបតេយ្យ ដឹកនាំដោយលោកស្រី អ៊ុងសាន ស៊ូជី ជាអ្នកបន្លំសន្លឹកឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ២០២០។
ការបោះឆ្នោតលើកទី២ នៅពេលនោះ គឺបក្សរបស់អ្នកស្រី អ៊ុងសាន ស៊ូជី បន្តឈ្នះភ្លូកទឹកភ្លូកដី ដោយឈ្នះលើគណបក្សរបស់ពួកយោធា។ ការឈ្នះរបស់គណបក្សប្រជាធិបតេយ្យលើកនេះ អាចនាំឱ្យអ្នកស្រី ស៊ូជី ងាយយកអំណាចបាន គឺអំណាចប្រធានាធិបតី ព្រោះអាសនៈសភាស្ទើរទាំងអស់ធ្លាក់ក្នុងដៃរបស់គណបក្សប្រជាធិបតេយ្យនេះ។
របបសឹកភូមា សម្លាប់ក្រុមប្រឆាំងមិនតិចជាង ៦ពាន់នាក់នោះទេ ខណៈជិត ២ម៉ឺននាក់ត្រូវបានចាប់ខ្លួន ហើយក្នុងនោះមានអ្នកនយោបាយកំពូលៗដល់ទៅ ៣០០នាក់ មានទាំងសមាជិកសភា សមាជិកគណៈរដ្ឋមន្ដ្រី ប្រធានាធិបតី មីនម្យីន និងអ្នកស្រី ស៊ូជី។
ពិភពលោករួមគ្នាថ្កោលទោសបន្តបន្ទាប់រហូតមកដល់ពេលនេះ ហើយទាមទារឱ្យរបបសឹកភូមា បញ្ឈប់ការគ្រប់គ្រងអំណាច ដោយផ្ទេរអំណាចទៅឱ្យរដ្ឋាភិបាលស៊ីវិលឡើងវិញ។ សមាគមអាស៊ាន សហភាពអឺរ៉ុប សហរដ្ឋអាមេរិក ប្រទេសកាណាដា អូស្ត្រាលី ជប៉ុន ឥណ្ឌា រួមទាំងអង្គការសហប្រជាជាតិ មិនបានទទួលស្គាល់របបសឹកភូមា ជារបបស្របច្បាប់នោះទេ៕