អតីតនាយកខុទ្ទកាល័យមេដឹកនាំបក្សប្រឆាំង លើកឡើងថា តំណាងអយ្យការអមសាលាឧទ្ធរណ៍ក្រុងភ្នំពេញ ត្រូវតែទទួលខុសត្រូវចំពោះមុខច្បាប់ជុំវិញបញ្ហាសុខភាពលោក កឹម សុខា បន្ទាប់ពីមេដឹកនាំបក្សប្រឆាំងរូបនេះស្នើសុំរកការព្យាបាលជំងឺ ដោយគ្មានការឆ្លើយតបពីតំណាងអយ្យការអមសាលាឧទ្ធរណ៍។
អតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា សរសេរលើទំព័រហ្វេសប៊ុករបស់លោកនៅថ្ងៃទី១៣ កុម្ភៈ នេះថា លោក កឹម សុខា នៅពេលនេះកំពុងត្រូវការការព្យាបាលខាងវេជ្ជសាស្ត្រជាបន្ទាន់ ជុំវិញជំងឺផ្លូវកាយរបស់លោក ព្រោះថាចាប់តាំងពីលោក កឹម សុខា ស្នើសុំស្វែងរកការព្យាបាលតាំងពីថ្ងៃទី៨ កុម្ភៈ រហូតដល់ពេលនេះ ក្រុមប្រឹក្សាជំនុំជម្រះមិនបានឆ្លើយតបនឹងសំណើរបស់លោកនៅឡើយទេ។
លោក មុត ចន្ថា លើកឡើងថា ការទទួលបាននូវការព្យាបាលខាងវេជ្ជសាស្ត្រ គឺជាសិទ្ធិរស់រានមានជីវិតដ៏សំខាន់បំផុតសម្រាប់មនុស្សគ្រប់រូប ដូច្នេះលោក កឹម សុខា ក៏ត្រូវតែមានសិទ្ធិទទួលបាននូវការត្រួតពិនិត្យសុខភាពតាមវេជ្ជសាស្ត្រដោយក្រុមគ្រូពេទ្យជំនាញ និងសិទ្ធិទទួលបាននូវការព្យាបាលត្រឹមត្រូវ ទាន់ពេល និងប្រសិទ្ធភាពដែរ ទោះបីជាលោកត្រូវរងនូវការផ្ដន្ទាទោសដាក់គុកក្នុងផ្ទះមិនឱ្យជួបអ្នកផ្សេងក្រៅពីសាច់ញាតិក៏ដោយ ព្រោះថាបញ្ហាសុខភាពរបស់គាត់នៅពេលនេះ ត្រូវការការយកចិត្តទុកដាក់ជាបន្ទាន់ដោយគ្មានការពន្យារពេល និងមិនត្រូវបង្អង់រង់ចាំអូសបន្លាយពេលទៀតឡើយ។
កាលពីថ្ងៃទី៨ ខែកុម្ភៈ ឆ្នាំ២០២៤ សាលាឧទ្ធរណ៍ក្រុងភ្នំពេញបានបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា លើកទី២ ក្នុងនោះ លោក កឹម សុខា ក៏បានលើកឡើងអំពីបញ្ហាសុខភាពរបស់លោកដែលត្រូវការទទួលការត្រួតពិនិត្យសុខភាព និងព្យាបាលជាបន្ទាន់ផងដែរ ប៉ុន្តែរហូតដល់ពេលនេះ លោក កឹម សុខា មិនទាន់ទទួលបានការឆ្លើយតបពីតំណាងអយ្យការទាំងនោះឡើយ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៣ កុម្ភៈ នេះថា ប្រជាពលរដ្ឋខ្មែរគ្រប់រូបមានសិទ្ធិពេញលេញក្នុងការទទួលបាននូវសិទ្ធិរស់រានមានជីវិត ទោះពួកគេមានតួនាទីជាអ្វី ឬត្រូវជាប់ពិរុទ្ធដោយបទល្មើសអ្វីក៏ដោយ ព្រោះពលរដ្ឋខ្មែរគ្រប់រូប គឺសុទ្ធតែត្រូវរស់ក្រោមដំបូលរដ្ឋធម្មនុញ្ញតែមួយដូចគ្នា ដូច្នេះតុលាការត្រូវពិនិត្យការអនុវត្តច្បាប់ និងការសម្រេចចិត្តរបស់ខ្លួនឱ្យបានត្រឹមត្រូវ ដើម្បីបញ្ចៀសនូវការធ្លាក់ចុះប្រព័ន្ធយុត្តិធម៌របស់កម្ពុជា ព្រោះតែការអនុវត្តតួនាទីរបស់ខ្លួន។
លោក សេក សុជាតិ លើកឡើងថា តុលាការត្រូវជៀសវាងឱ្យបានដាច់ខាតចំពោះការសម្រេចចិត្តក្នុងការអនុវត្តច្បាប់ត្រង់ចំណុចណាមួយដែលនាំទៅដល់ការរើសអើងលើបុគ្គលណាម្នាក់ ព្រោះការធ្វើដូច្នេះ គ្មានផលចំណេញអ្វីសម្រាប់ប្រទេសកម្ពុជាទេ គឺមានតែបំផ្លាញប្រទេសជាតិ និងប្រព័ន្ធយុត្តិធម៌សង្គមទៅវិញប៉ុណ្ណោះ ចំណែកឯអ្នកដែលរងគ្រោះធំជាងគេពីការអនុវត្តច្បាប់បែបនេះ គឺគណបក្សដែលកំពុងដឹកនាំរដ្ឋាភិបាលយ៉ាងពិតប្រាកដ។
មាត្រា២ នៃរដ្ឋធម្មនុញ្ញ បានចែងយ៉ាងច្បាស់ពីសិទ្ធិរស់រានមានជីវិត មានសេរីភាព និងមានសន្តិសុខផ្ទាល់ខ្លួន ចំណែកមាត្រា៣៥ នៃរដ្ឋធម្មនុញ្ញ ក៏បានចែងដែរថា សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការដោះស្រាយយ៉ាងហ្មត់ចត់ពីអង្គការរដ្ឋ ប៉ុន្តែគេសង្កេតឃើញថា សេចក្តីស្នើទាំងឡាយពីប្រជាពលរដ្ឋមិនដែលត្រូវបានរដ្ឋាភិបាលដែលដឹកនាំដោយគណបក្សប្រជាជនកម្ពុជា យកទៅដោះស្រាយឡើយ គឺមានតែធ្វើបាបប្រជាពលរដ្ឋទៅវិញ។
កាលពីថ្ងៃទី៣ ខែមីនា ឆ្នាំ២០២៣ កន្លងទៅ លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសាលាដំបូងរាជធានីភ្នំពេញផ្ដន្ទាទោសចំនួន ២៧ឆ្នាំ ដោយឃុំខ្លួននៅក្នុងផ្ទះ និងដកហូតសិទ្ធិពលរដ្ឋ ព្រមទាំងសិទ្ធិនយោបាយទាំងអស់ បន្ទាប់ពីរងនូវការចោទប្រកាន់ពីបទក្បត់ជាតិ តាមមាត្រា៤៣៩ និងមាត្រា៤៤៣ នៃក្រមព្រហ្មទណ្ឌ ដោយផ្អែកលើប្រសាសន៍របស់មេដឹកនាំបក្សកាន់អំណាចលោក ហ៊ុន សែន។
ក្រោយសាលក្រមនេះ នៅថ្ងៃទី៣០ ខែមីនា ឆ្នាំ២០២៣ លោក កឹម សុខា ក៏បានដាក់ពាក្យប្តឹងទៅកាន់សាលាឧទ្ធរណ៍ជំទាស់ទៅនឹងការសម្រេចរបស់សាលាដំបូងរាជធានីភ្នំពេញផងដែរ ខណៈសាលាដំបូងរាជធានីភ្នំពេញ បានបញ្ជូនពាក្យបណ្ដឹងជំទាស់របស់លោក កឹម សុខា ឡើងទៅសាលាឧទ្ធរណ៍ភ្លាមៗ ក្រោយពិនិត្យលើពាក្យបណ្ដឹងនេះរួចរាល់។
បន្ទាប់ពីលោក កឹម សុខា ត្រូវបានកាត់ទោសដាក់គុកក្នុងផ្ទះ ២៧ឆ្នាំ ដោយមិនអនុញ្ញាតឱ្យជួបអ្នកដទៃក្រៅពីសាច់ញាតិ លោក កឹម សុខា មិនអាចជួបមន្ត្រីស្ថានទូតពីបណ្តាប្រទេសលោកសេរី សមាជិកបក្សប្រឆាំង មន្ត្រីអង្គការសង្គមស៊ីវិល និងមន្ត្រីជាន់ខ្ពស់ពីបណ្តាប្រទេសនានាបានទៀតឡើយ ខណៈជំងឺរបស់លោកដែលត្រូវការការព្យាបាល ក៏ត្រូវរង់ចាំការអនុញ្ញាតពីតុលាការថែមទៀត។
ក្រោយពីមេដឹកនាំបក្សកាន់អំណាចលោក ហ៊ុន សែន បញ្ជាឱ្យតុលាការយកផ្ទះលោក កឹម សុខា ធ្វើជាមន្ទីរឃុំឃាំង សមត្ថកិច្ចទាំងស្លៀកឯកសណ្ឋាន ទាំងក្នុងសម្លៀកបំពាក់ស៊ីវិល បានយាមកាមប្រចាំការនៅបរិវេណផ្ទះរបស់លោក កឹម សុខា ២៤ម៉ោងរៀងរាល់ថ្ងៃ សូម្បីតែមេធាវីដែលការពារក្តីឱ្យលោក កឹម សុខា ក៏ត្រូវបានហាមប្រាមមិនឱ្យចូលទៅជួបគាត់ដែរ បើពួកគេមិនមានលិខិតអនុញ្ញាតពីតុលាការទេនោះ៕