រដ្ឋមន្ត្រីក្រសួងមហាផ្ទៃ លោក ស សុខា ព្រមានអនុវត្តវិធានការធ្វើតេស្ដរកសារធាតុញៀនលើមន្ត្រីកងកម្លាំងនៃក្រសួងមហាផ្ទៃ ទាំងមន្ត្រីនគរបាលជាតិ និងមន្ត្រីពន្ធនាគារមិនដកដៃ និងមិនរើសមុខឡើយ ដើម្បីធានាភាពជាគំរូនៃមន្ត្រីអនុវត្តច្បាប់នៅប្រទេសកម្ពុជា។
រដ្ឋមន្ត្រីក្រសួងមហាផ្ទៃ លោក ស សុខា លើកឡើងក្នុងពិធីបិទវគ្គបណ្ដុះបណ្ដាលមន្ត្រីនគរបាលនៅសាលានគរបាលជាតិភូមិភាគ១ ខេត្តស្ទឹងត្រែង កាលពីថ្ងៃទី១៣ ខែកុម្ភៈ ឆ្នាំ២០២៤ ថា យុទ្ធនាការបោសសម្អាតមន្ត្រីកងកម្លាំងនគរបាលជាតិនៃក្រសួងមហាផ្ទៃ រយៈពេល ៥ខែចុងក្រោយនេះ បានរកឃើញមន្ត្រីប្រព្រឹត្តបទល្មើសដែលពាក់ព័ន្ធដោយការប្រើប្រាស់ រក្សាទុក និងចែកចាយគ្រឿងញៀនជាបន្តបន្ទាប់ ដែលត្រូវបានបណ្ដេញចេញ ឬបន្ថយស័ក្ដិរហូតឈានដល់ដកហូតមុខនាទីចេញពីក្របខ័ណ្ឌថែមទៀត។
លោក ស សុខា អះអាងថា ខ្លួនលោកផ្ទាល់ និងអគ្គស្នងការនគរបាលជាតិ រួមទាំងមន្ត្រីជាន់ខ្ពស់ទទួលបន្ទុកបោសសម្អាតក្នុងយុទ្ធនាការនេះ ក៏មិនចង់បណ្តេញមន្ត្រីដែលពាក់ព័ន្ធទាំងអស់នោះដែរ ប៉ុន្តែដោយសារតែពួកគេគឺជាសាច់ស្អុយដែលត្រូវតែកាត់ចោលដោយខានមិនបាន ព្រោះថាការធ្វើបែបនេះ គឺជាការសម្អាតផ្ទះខ្លួនឯងមុននឹងរៀបចំផែនការអភិវឌ្ឍន៍ជាតិបន្តទៀត ដើម្បីឈានទៅដល់អភិវឌ្ឍធនធានមនុស្សសម្រាប់សង្គមជាតិទាំងមូល។
ឧបនាយករដ្ឋមន្ត្រីបក្សកាន់អំណាច លោក ស សុខា បញ្ជាក់ថា ក្នុងនាមជាមន្ត្រីកងកម្លាំងនគរបាលជាតិ ត្រូវមានស្មារតីម៉ឺងម៉ាត់ក្នុងការប្រយុទ្ធប្រឆាំងគ្រឿងញៀន ដោយផ្ដើមចេញពីខ្លួនឯងជាមុន ព្រោះថាប្រសិនបើកងកម្លាំងណាម្នាក់ផុងខ្លួនក្នុងការប្រើប្រាស់ ឬពាក់ព័ន្ធបទល្មើសគ្រឿងញៀន រួមទាំងបទល្មើសផ្សេងៗក្នុងសង្គមនោះ ពួកគេនឹងមិនអាចធ្វើជាកងកម្លាំងគំរូនៃការអនុវត្តច្បាប់បានទេ ហើយក្រសួងមហាផ្ទៃ ក៏នឹងត្រូវបណ្ដេញពួកគេចេញពីក្របខ័ណ្ឌដោយគ្មានការលើកលែងដែរ។
គ្រឿងញៀននៅប្រទេសកម្ពុជា ត្រូវគេមើលឃើញថា គឺជាថ្នាំពេញនិយមបំផុតសម្រាប់អ្នកមានលុយ និងអ្នកមានអំណាច។ គេក៏បានរកឃើញដែរថា មន្ត្រីធំៗ និងឧកញ៉ាមួយចំនួន សុទ្ធតែបានជួញដូរ រក្សាទុក ចែកចាយ និងប្រើប្រាស់គ្រឿងញៀន ដើម្បីស្វែងរកការសប្បាយ ជាពិសេសគឺដើម្បីបង្កើនចំណង់ផ្លូវភេទ ហើយពួកគេក៏ជាអ្នកផ្គត់ផ្គង់ថ្នាំទាំងនេះនៅក្នុងទីផ្សារស្រុកខ្មែរដែរ ក្រោមការចង្អុលបង្ហាញពីអ្នកមានអំណាចដែលនៅកាងនៅពីក្រោយថែមទៀត។
ទាក់ទិននឹងបញ្ហានេះ កាលពីថ្ងៃទី៣០ ខែសីហា ឆ្នាំ២០២៣ រដ្ឋមន្ត្រីក្រសួងមហាផ្ទៃ លោក ស សុខា បានណែនាំអង្គភាពដែលចំណុះឱ្យក្រសួងមហាផ្ទៃ រឹតបន្តឹងចំពោះបញ្ហាគ្រឿងញៀនលើមន្ត្រីរបស់ខ្លួនគ្រប់អង្គភាពថា ចំពោះអ្នកដែលមានមុខនាទីភារកិច្ចជាកងកម្លាំងប្រដាប់អាវុធ បើសិនមានការស្រាវជ្រាវឃើញថាមានការពាក់ព័ន្ធជាមួយការប្រើប្រាស់ និងជួញដូរគ្រឿងញៀន មិនគួររក្សាទុកនៅជាកងកម្លាំងដើម្បីបំពេញមុខនាទីភារកិច្ចទៀតទេ។
អ្នកនាំពាក្យក្រសួងមហាផ្ទៃ លោក ទូច សុខៈ បានអះអាងកាលពីពេលថ្មីៗនេះថា គិតមកដល់ពេលនេះ ក្រសួងមហាផ្ទៃបានអនុវត្តយុទ្ធនាការបោសសម្អាតមន្ត្រីកងកម្លាំងដែលពាក់ព័ន្ធនឹងគ្រឿងញៀន ដោយការបណ្ដេញចេញពីក្របខ័ណ្ឌប្រមាណ ១០០នាក់ហើយ ក្នុងនោះមន្ត្រីជាង ៥០នាក់ ត្រូវបានរកឃើញថាជាប់ពាក់ព័ន្ធនឹងគ្រឿងញៀន និងមន្ត្រីប្រមាណ ៥០នាក់ផ្សេងទៀត ត្រូវបានរកឃើញថាល្មើសនឹងវិន័យកងកម្លាំងនគរបាលជាតិ ខណៈក្រសួងការពារជាតិ ក៏បានលុបឈ្មោះនាយទាហានដែលពាក់ព័ន្ធនឹងគ្រឿងញៀនជាបន្តបន្ទាប់ដែរ នៅដើមឆ្នាំ២០២៤ នេះ។
កាលពីចុងខែធ្នូ ឆ្នាំ២០២២ ក្រសួងមហាផ្ទៃ បានបញ្ចេញសេចក្តីរាយការណ៍ថា ក្នុងចំណោមអ្នកជាប់ឃុំជិត ៤ម៉ឺននាក់ក្នុងពន្ធនាគារនៅទូទាំងប្រទេស មាន ៥០% ជាប់ឃុំដោយសារបទល្មើសគ្រឿងញៀន ខណៈមួយថ្ងៃ សមត្ថកិច្ចឃាត់ខ្លួនអ្នកប្រើប្រាស់ និងជួញដូរចន្លោះពី ១០ ទៅ ២០នាក់នៅតាមបណ្ដាខេត្តមួយចំនួនទូទាំងប្រទេស ដែលពួកគេភាគច្រើនជាយុវជន។
ទាក់ទិននឹងបញ្ហានេះ ក្រសួងមហាផ្ទៃធ្លាប់បានបង្ហាញរបាយការណ៍របស់ខ្លួនកាលពីពេលថ្មីៗនេះថា សមត្ថកិច្ចបង្ក្រាបបានគ្រឿងញៀនមិនត្រឹមតែរយគីឡូក្រាមទេ គឺចូលដល់រាប់តោនឯណោះ ព្រោះថាកន្លងមក ប្រទេសកម្ពុជាត្រូវជនទុច្ចរិតប្រើជាកន្លែងផលិតគ្រឿងញៀនយកទៅប្រទេសក្រៅផង ជាកន្លែងធ្វើចរាចរសម្រាប់ឆ្លងកាត់ទៅប្រទេសទី៣ ផងដែរ ប៉ុន្តែពេលនេះ ក្រុមឧក្រិដ្ឋជនបាននាំគ្នាមកផលិតសម្រាប់ផ្គត់ផ្គង់ទីផ្សារនៅក្នុងប្រទេសកម្ពុជាតែម្តង ខណៈវិធានការបង្ក្រាប គឺនៅមានកម្រិតនៅឡើយ។
ជុំវិញបញ្ហានេះ ប្រជាពលរដ្ឋដែលរស់នៅតាមទីជនបទក្នុងបណ្តាខេត្តមួយចំនួន បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលថ្មីៗនេះថា ការចែកចាយគ្រឿងញៀននៅតាមភូមិ-ឃុំរបស់ពួកគេ មិនមែនអាជ្ញាធរមូលដ្ឋានមិនដឹងទេ ប៉ុន្តែមន្ត្រីនគរបាលខ្លះទុកឱ្យអ្នកលក់គ្រឿងញៀនទាំងនោះបន្តចែកចាយប៉ុណ្ណោះ ព្រោះពួកគេក៏បានលុយកាក់ពីអ្នកលក់គ្រឿងញៀនទាំងនោះដែរ ខណៈការអនុវត្តវិធានការច្បាប់ គឺប្រើតែទៅលើជនរងគ្រោះដែលជាអ្នកប្រើប្រាស់ប៉ុណ្ណោះ ចំណែកមន្ត្រីខិលខូចដែលចែកចាយ នៅតែប្រព្រឹត្តបទល្មើសបំពានច្បាប់ដដែល។
អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញរបាយការណ៍របស់ខ្លួនកាលពីថ្ងៃទី៧ ខែកុម្ភៈឆ្នាំ២០២៤ នេះថា គ្រឿងញៀន និងសារធាតុផ្សំ បានលុកលុយចូលប្រទេសកម្ពុជាជិត ១ពាន់តោន (៦០០តោន) ដែលអាជ្ញាធរកម្ពុជាបង្ក្រាបបានដោយគិតចាប់តាំងពីឆ្នាំ២០២០ រហូតដល់ចុងឆ្នាំ២០២៣ កន្លងទៅនេះ ក្នុងនោះ ជនសង្ស័យជាង ៧ម៉ឺននាក់ត្រូវបានឃាត់ខ្លួនក្នុងចំណោមករណីដែលសមត្ថកិច្ចបានបង្ក្រាបជាង ៣ម៉ឺនករណី៕