ព្រះមហាក្សត្រព្រះបាទ នរោត្តម សីហមុនី បានត្រាស់បង្គាប់លើកលែងទោសដល់អ្នកស្រី សេង ច័ន្ទដា ហៅ ខូវ ច័ន្ទដា ភរិយាក្រោយរបស់សពឧកញ៉ា ខូវ ជឺលី ដែលស្ថាប័នតុលាការតាំងពីសាលាដំបូងរហូតដល់កំពូល សម្រេចផ្ដន្ទាទោសដាក់ពន្ធនាគារ ២០ឆ្នាំ ពាក់ព័ន្ធសំណុំរឿង «ប៉ុនប៉ងឃាតកម្ម» ឲ្យមានសេរីភាពវិញ តាមសេចក្ដីក្រាបបង្គំទូលថ្វាយរបស់លោក ហ៊ុន ម៉ាណែត នាយករដ្ឋមន្ត្រី។
យោងតាមព្រះរាជក្រឹត្យចុះថ្ងៃទី១១ ខែតុលា ឆ្នាំ២០២៣ ដែលផ្សព្វផ្សាយជាសាធារណៈនៅថ្ងៃទី១៩ ខែកុម្ភៈ ឆ្នាំ២០២៤ បានឲ្យរកឃើញថា ទណ្ឌិតជាស្ត្រីឈ្មោះ សេង ច័ន្ទដា ហៅ ខូវ ច័ន្ទដា ភរិយារបស់សពឧកញ៉ា ខូវ ជឺលី ត្រូវបានព្រះមហាក្សត្រលើកលែងទោសឲ្យមានសេរីភាពវិញតាមសេចក្ដីក្រាបបង្គំទូលថ្វាយរបស់លោក ហ៊ុន ម៉ាណែត នាយករដ្ឋមន្ត្រី។
ក្នុងព្រះរាជក្រឹត្យដដែលឲ្យដឹងថា លោកនាយករដ្ឋមន្ត្រី ហ៊ុន ម៉ាណែត ត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ។
រឿងក្តីដ៏ស្មុគស្មាញនេះជាប់ពាក់ព័ន្ធនឹងទ្រព្យសម្បត្តិដ៏ច្រើនរបស់លោកឧកញ៉ា ខូវ ជឺលី ដែលមានកូន ១២នាក់ ហើយប្រពន្ធរបស់គាត់ឈ្មោះ សេង ច័ន្ទដា ត្រូវបានផ្ដន្ទាទោសដាក់ពន្ធនាគារ ២០ឆ្នាំពីបទរៀបចំផែនការធ្វើឃាត។
ដើមបណ្ដឹងនៅក្នុងរឿងក្តីដែលបានទៅដល់តុលាការកំពូលកាលពីឆ្នាំ២០១២ នេះ គឺអ្នកស្រី ស៊ុន សូត្ថា កូនស្រីរបស់លោក ខូវ ជឺលី និងជាភរិយារបស់លោក ស៊ុន ចាន់ថុល ដែលបច្ចុប្បន្នជាឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC)។
លោកស្រី សេង ច័ន្ទដា ហៅ ខូវ ច័ន្ទដា ភេទស្រី អាយុ ៦០ឆ្នាំ ភរិយាក្រោយរបស់សពឧកញ៉ា (៣ជំនាន់) ខូវ ជឺលី ដែលត្រូវបានស្ថាប័នតុលាការ ៣ថ្នាក់ពីដំបូងដល់កំពូល សម្រេចផ្ដន្ទាទោសដាក់ពន្ធនាគារកំណត់ ២០ឆ្នាំ ពាក់ព័ន្ធសំណុំរឿង «ប៉ុនប៉ងឃាតកម្ម» តាមអំណាចសាលដីកាព្រហ្មទណ្ឌស្ថាពរលេខ២២៧ ចុះថ្ងៃទី០៥ ខែតុលា ឆ្នាំ២០១២ របស់តុលាការកំពូល។
ក្នុងករណីប៉ុនប៉ងមនុស្សឃាតនេះ មនុស្ស ៥នាក់ត្រូវបានឃាត់ខ្លួន និងចោទប្រកាន់ គឺមានឈ្មោះ ចាន់ សុខា, នាង ស៊ីណាត, សុខ ឡាក់, យាន សុធារិទ្ធិ និងអ្នកស្រី សេង ច័ន្ទដា ដែលប្រព្រឹត្តកាលពីថ្ងៃទី១៣ ខែមិថុនា ឆ្នាំ២០១០។ ជនជាប់ចោទទាំងនោះក៏ត្រូវបានសាលាដំបូងរាជធានីភ្នំពេញ ជំនុំជម្រះចំនួន ៦លើក បន្ទាប់មកនៅថ្ងៃទី១៥ ខែកុម្ភៈ ចៅក្រមបានសម្រេចផ្ដន្ទាទោសឈ្មោះ ចាន់ សុខា និង នាង ស៊ីណាត ដាក់ពន្ធនាគារ ១៨ឆ្នាំ ឯជនជាប់ចោទ សុខ ឡាក់ និងអ្នកស្រី សេង ច័ន្ទដា ហៅ ខូវ ច័ន្ទដា ត្រូវបានផ្ដន្ទាទោសដាក់ពន្ធនាគារ ២០ឆ្នាំ ក្នុងនោះដែរ លោក យាន សុធារិទ្ធិ ត្រូវបានសម្រេចឱ្យរួចខ្លួន។
បន្ទាប់ពីតុលាការប្រកាសសាលដីការួច នៅក្នុងឆ្នាំ២០១២ លោក ស៊ុន ចាន់ថុល ដែលជាដើមបណ្ដឹងក្នុងសំណុំរឿងនេះ បានថ្លែងប្រាប់អ្នកសារព័ត៌មានថា នេះជាសាលដីកាដ៏ត្រឹមត្រូវ ដ៏យុត្តិធម៌ ដល់ជនរងគ្រោះ ដល់រូបលោក និងគ្រួសាររបស់លោក។
លោក ស៊ុន ចាន់ថុល អះអាងថា ការពិតគឺបានចេញមក អ្នកមានអ្នកក្រ មនុស្សចាស់ ក្មេងប្រុស ឬស្រី ប្រព្រឹត្តខុស គឺត្រូវទទួលទោសដូចៗគ្នា គ្មាននរណាមួយអង្គុយលើច្បាប់បានទេ គឺស្មើភាពគ្នាទាំងអស់៕