អតីតមេដឹកនាំបក្សប្រឆាំងលោក សម រង្ស៊ី លើកឡើងថា ថ្ងៃទី២៧ ខែកុម្ភៈ ឆ្នាំ២០២៤ គឺជាខួប ២៧ឆ្នាំនៃការបង្កើតសហភាពអ្នកប្រជាធិបតេយ្យខ្មែរ និងជាថ្ងៃបង្រួបបង្រួមកម្លាំងអ្នកប្រជាធិបតេយ្យលើកដំបូងដែរ ហើយក៏ជាថ្ងៃខួប ២៧ឆ្នាំដែលលោក ហ៊ុន សែន ចាប់ផ្តើមកម្ទេចអ្នកប្រជាធិបតេយ្យគ្រប់ល្បិចកលផងដែរ។
អតីតមេដឹកនាំបក្សប្រឆាំងលោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី២៧ ខែកុម្ភៈ ឆ្នាំ២០២៤ នេះថា លោកមើលឃើញថា អស់រយៈពេល ២៧ឆ្នាំមកហើយដែលលោក ហ៊ុន សែន ខ្លាចការរួបរួមគ្នារវាងអ្នកស្នេហាជាតិ និងអ្នកប្រជាធិបតេយ្យ។
លោកបន្ថែមថា ដោយសារតែការភ័យខ្លាចបែបនេះហើយ ទើបលោក ហ៊ុន សែន ប្រើគ្រប់ល្បិចកលទុច្ចរិតដើម្បីកម្ទេចសហភាពអ្នកប្រជាធិបតេយ្យខ្មែរ ហៅតាមអង់គ្លេសថា Union of Cambodian Democrats ឬ UCD ដែលបានបង្កើតឡើងនៅថ្ងៃទី២៧ ខែកុម្ភៈ ឆ្នាំ១៩៩៧ រវាងព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច និងសម្តេច សឺន សាន ប្រធានគណបក្សប្រជាធិបតេយ្យសេរីនិយមព្រះពុទ្ធសាសនា ខ្លួនលោកផ្ទាល់ដែលជាប្រធានគណបក្សជាតិខ្មែរនៅពេលនោះ ហើយនិងលោក ប៊ួ ហ៊ែល ប្រធានគណបក្សខ្មែរឯករាជ្យ។
គណបក្សនយោបាយទាំងបួន ជួបប្រជុំគ្នានៅក្រុងបាងកក ថារួមគ្នាជាធ្លុងមួយដើម្បីទៅប្រកួតប្រជែងជាមួយលោក ហ៊ុន សែន ដែលទើបនឹងធ្វើរដ្ឋប្រហារទម្លាក់ព្រះអង្គម្ចាស់ នរោត្តម រណឫទ្ធិ ហើយនិងបក្សប្រជាជនកម្ពុជាដឹកនាំដោយលោក ជា ស៊ីម។
ពេលព្រះអង្គម្ចាស់ នរោត្តម រណឫទ្ធិ យាងទៅបង្រៀននិស្សិតនៅសាកលវិទ្យាល័យប្រទេសបារាំង លោក សម រង្ស៊ី បានឆ្លៀតទៅជួបលោក ហ៊ុន សែន មុននៅឯក្រុងតាខ្មៅ ដោយមិនបានឲ្យដៃគូដឹងឡើយ។ លោកបានប្រាប់អ្នកកាសែតផ្សាយក្នុងកាសែតភ្នំពេញប៉ុស្តិ៍ ថា៖ “លោកអាចធ្វើការជាមួយលោក ហ៊ុន សែន បាន”។
ព្រះអង្គម្ចាស់ នរោត្តម រណឫទ្ធិ លាន់ព្រះឱស្ឋអំពីលោក សម រង្ស៊ី នៅមុខជនភៀសខ្លួនខ្មែរ និងសមាជិកគណបក្សទាំងអស់ក្នុងសណ្ឋាគារ Shangri-La នាពេលរសៀលថ្ងៃមួយថា៖ “…និយាយគ្នាថា បើទៅភ្នំពេញ ត្រូវទៅទាំងអស់គ្នា ឥឡូវស្រាប់តែលួចទៅមុនបាត់។”
លោក សម រង្ស៊ី រៀបរាប់ក្នុងទំព័រហ្វេសប៊ុកនោះថា ល្បិចកលដែលលោក ហ៊ុន សែន បានបំបែកបំបាក់ការរួបរួមអ្នកប្រជាធិបតេយ្យនៅពេលនោះ គឺគាត់ចាប់ផ្តើមបំបែកបំបាក់អ្នកគាំទ្រសម្តេច សឺន សាន មុនគេបង្អស់ បន្ទាប់មកគាត់ព្យាយាមសម្លាប់រូបលោកក្នុងព្រឹត្តិការណ៍គប់គ្រាប់បែកនៅថ្ងៃទី៣០ ខែមីនា ឆ្នាំ១៩៩៧ ថែមទៀត។
លោកបន្ថែមថា ចុងក្រោយ គាត់ក៏សម្រេចធ្វើរដ្ឋប្រហារដណ្តើមពីព្រះអង្គម្ចាស់ នរោត្តម រណឫទ្ធិ នៅដើមខែកក្កដា ឆ្នាំ១៩៩៧ ដែរ ដើម្បីកម្ចាត់ព្រះអង្គពីឆាកនយោបាយនៅប្រទេសកម្ពុជាតែម្តង។
អតីតមេដឹកនាំបក្សប្រឆាំងរូបនេះបញ្ជាក់ថា លោក ហ៊ុន សែន ក៏បានប្រើអំណាច និងល្បិចកលទុច្ចរិតបំបែកបំបាក់ការសហការរវាងរូបលោកជាមួយប្រធានគណបក្សសង្គ្រោះជាតិ លោក កឹម សុខា ក្នុងការបង្កើតគណបក្សសង្គ្រោះជាតិ កាលពីឆ្នាំ២០១២ ម្តងទៀតដែរ ដោយសារតែគាត់ដឹងថាការរួបរួមរបស់អ្នកស្នេហាជាតិ និងអ្នកប្រជាធិបតេយ្យក្រោមផ្លាកគណបក្សសង្គ្រោះជាតិ នឹងធ្វើឲ្យរបបគាត់ដួលរលំអំណាច ដូច្នេះគាត់ក៏ប្រើល្បិចរំលាយគណបក្សសង្គ្រោះជាតិនៅឆ្នាំ២០១៧ តែម្តង។
ទោះជាយ៉ាងណាក៏ដោយ កាលពីចុងខែមីនា ឆ្នាំ២០២៣ មេដឹកនាំបក្សកាន់អំណាច លោក ហ៊ុន សែន អះអាងថា ការតាមកម្ទេចជនក្បត់ជាតិដែលមានផែនការផ្តួលរំលំរដ្ឋាភិបាលរបស់លោក និងមានបំណងរំលាយរបបរាជានិយម គឺដើម្បីតែការពារសន្តិភាពនៅកម្ពុជាប៉ុណ្ណោះ មិនមែនបំបែកបំបាក់ក្រុមណាមួយឡើយ។
លោក ហ៊ុន សែន អះអាងថា ការប្ដេជ្ញាបង្ក្រាបលើក្រុមក្បត់ជាតិមិនមែនមានតែប្រទេសកម្ពុជាទេ សូម្បីប្រទេសអាល្លឺម៉ង់ ដែលបានប្រកាសសន្តិភាពតាំងពីយូរណាស់មកហើយនោះ ក៏នៅតែមានការចាប់ខ្លួនក្រុមដែលរដ្ឋាភិបាលប្រទេសអាល្លឺម៉ង់ ចោទថាជាជនក្បត់ជាតិដែរ ខណៈរដ្ឋាភិបាលកម្ពុជាគ្រាន់តែអនុវត្តច្បាប់ដើម្បីការពារសន្តិភាពរបស់កម្ពុជាប៉ុណ្ណោះ។
បែបនេះក្តី អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ធ្លាប់បានលើកឡើងកាលពីពេលថ្មីៗនេះថា ការប្ដេជ្ញាការពារសន្តិភាពរបស់លោក ហ៊ុន សែន គ្រាន់តែជាលេសក្នុងការបង្ក្រាបអ្នកប្រជាធិបតេយ្យតាមរយៈនៃការចោទប្រកាន់ពីបទល្មើសផ្សេងៗទៅតាមមាត្រាច្បាប់ដែលក្រុមរបស់គាត់ជាអ្នកបង្កើតឡើងប៉ុណ្ណោះ។
លោក គឹម សុខ បញ្ជាក់ថា គណបក្សប្រជាជនកម្ពុជានឹងមិនអាចគ្រប់គ្រងអំណាចបន្តទៀតបានទេ ប្រសិនបើកម្លាំងអ្នកប្រជាធិបតេយ្យរួបរួមគ្នា ដូច្នេះលោក ហ៊ុន សែន មិនខ្លាចនឹងប្រើល្បិចគ្រប់បែបយ៉ាងទាំងអស់ក្នុងការបំបែកបំបាក់ និងកម្ទេចអ្នកប្រជាធិបតេយ្យ ក្រោមពាក្យការពារសន្តិភាព ហើយល្បិចទុច្ចរិតដ៏អាក្រក់របស់លោក ហ៊ុន សែន បែបនេះ ក៏កំពុងបន្តអនុវត្តដោយលោក ហ៊ុន ម៉ាណែត កូនប្រុសរបស់គាត់ផងដែរ ដែលកំពុងកាន់អំណាចបន្តពីឪពុករបស់គាត់សម្រាប់រដ្ឋាភិបាលថ្មីនេះ។
កម្ពុជាដែលស្ថិតក្រោមការដឹកនាំរបស់គណបក្សកាន់អំណាចដែលមានលោក ហ៊ុន សែន ជាមេដឹកនាំជាង ៤០ឆ្នាំមកនេះ ត្រូវគេមើលឃើញថា មេដឹកនាំខ្មែររូបនេះកំពុងទាញប្រទេសកម្ពុជាទៅគ្រប់គ្រងតាមបែបសន្តតិវង្សក្នុងរង្វង់គ្រួសាររបស់គាត់នៅពេលនេះ ហើយការបង្រួបបង្រួមរបស់កម្លាំងអ្នកប្រជាធិបតេយ្យ គឺជារនាំងទប់ស្កាត់ក្នុងការគ្រប់គ្រងអំណាចតាមបែបគ្រួសារនិយមរបស់គាត់យ៉ាងខ្លាំង ដូច្នេះដើម្បីបន្តកាន់អំណាចបន្តពូជក្នុងវង្សត្រកូលរបស់គាត់ឱ្យបានយូរអង្វែង ការកម្ចាត់អ្នកប្រជាធិបតេយ្យគឺជាវិធានការទី១ ចម្បងបំផុតដែលលោក ហ៊ុន សែន ត្រូវអនុវត្តតទៅថ្ងៃមុខ។
គួររំឭកថា ក្រោយថ្ងៃរដ្ឋប្រហារឆ្នាំ១៩៩៧ លោក ហ៊ុន សែន បានបញ្ជូនមនុស្សឲ្យចរចាអូសទាញអ្នករត់ចេញទៅទីក្រុងបាងកក ប្រទេសថៃ ទាំងអម្បាលម៉ានឲ្យវិលទៅវិញ ហើយមានមនុស្សជាច្រើនវិលទៅវិញ ទៅលុតជង្គង់សុំទោសលោក ហ៊ុន សែន។
រឿងនេះមិនខុសពីអ្វីមេមនោគមន៍វិជ្ជាកុម្មុយនីស្ត វឡាឌីមៀ ឡេនីន ហៅមនុស្សដែលវិលទៅជួយពង្រឹងមេដឹកនាំផ្ដាច់ការថា៖ មនុស្សល្ងីល្ងើមានប្រយោជន៍ useful idiot នោះដែរ៕