ក្រសួងធនធានទឹក និងឧតុនិយម អំពាវនាវទៅអាជ្ញាធរដែនដី និងប្រជាពលរដ្ឋ ឲ្យចូលរួមសហការក្នុងការប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេសបណ្ដាជនបទដែលនៅឆ្ងាយពីប្រភពទឹក ពីព្រោះបាតុភូត អែល នីណូ (EL Nino) ធ្វើខ្យល់ក្តៅ ទឹកក្តៅ បង្កឱ្យមានមហន្តរាយធម្មជាតិ និងផលវិបាកអាកាសធាតុខ្លាំង។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឲ្យដឹងថា បាតុភូត EI Nino ធ្វើឲ្យខ្យល់ក្តៅ ទឹកក្តៅ បង្កឱ្យមានមហន្តរាយធម្មជាតិ និងផលវិបាកអាកាសធាតុខ្លាំង ដូចជាបានបង្កើនកម្តៅនៃភពផែនដី និងធ្វើឱ្យមានការប្រែប្រួលអាកាសធាតុខ្លាំងនៅតាមតំបន់ជាច្រើន មិនចំពោះតែកម្ពុជានោះទេ។
សេចក្តីជូនដំណឹងពីក្រសួង បានលើកឡើងថា ផលវិបាកនៃបាតុភូត អែល នីណូ នឹងធ្វើឱ្យមានភ្លៀងព្យុះកំណាច រាំងស្ងួតចម្លែក ប្តូររដូវ ប្តូរទម្លាប់អាកាសធាតុ។ កន្លែងខ្លះមានភ្លៀងច្រើនជ្រុល កន្លែងខ្លះកាន់តែរាំងស្ងួតខ្លាំង។ រដូវប្រាំងក្នុងឆ្នាំ២០២៤ នេះ ប្រទេសកម្ពុជាប្រឈមនឹងអាកាសធាតុក្ដៅហើយស្ងួត នាំឲ្យភ្លៀងកក់ខែធ្លាក់តិចជាងឆ្នាំ២០២៣។
តាមរយៈការព្យាករពីក្រសួងធនធានទឹក អាកាសធាតុក្ដៅហើយស្ងួតនេះ នាំឲ្យកើតមានបាតុភូតផ្គររន្ទះ និងខ្យល់កួច ឬខ្យល់កំបុតត្បូង ដែលអាចកើតមានច្រើននៅក្នុងខែមេសា និងខែឧសភា។
ប្រភពខាងលើបានលើកឡើងថា នៅក្នុងសប្ដាហ៍ទី១ នៃខែមីនា ឆ្នាំ២០២៤ នេះ អាចនឹងកើតមានភ្លៀងកក់ខែនៅតំបន់មាត់សមុទ្រ ហើយចូលដល់សប្ដាហ៍ទី២ ក្នុងខែដដែលនេះ អាចនឹងមានភ្លៀងកក់ខែតិចតួចនៅតំបន់ទំនាបកណ្ដាលភាគពាយ័ព្យស្ថិតក្នុងខេត្តបាត់ដំបង និងបន្ទាយមានជ័យ។
អ្នកនាំពាក្យក្រសួងធនធានទឹក លោក ចាន់ យុត្ថា បានថ្លែងប្រាប់សារព័ត៌មានក្នុងស្រុកថា ប្រឈមនឹងបាតុភូតសកល អែល នីណូ (EL Nino) ប្រទេសកម្ពុជានឹងរងកម្ដៅកម្រិត ៤១អង្សាសេក្នុងខែមេសា ខាងមុខ។ ការឡើងកម្ដៅនេះ ធ្វើឲ្យប្រឈមនឹងស្ថានភាពក្ដៅហួតហែង ហើយខ្យល់កន្ទ្រាក់ ផ្គររន្ទះ នឹងកើតឡើងព្រមគ្នា។
ប្រភពដដែលបានគូសបញ្ជក់ថា ក្រសួងត្រៀមទឹកសម្រាប់ប្រើប្រាស់ក្នុងការដាំដុះស្រូវប្រាំង និងទឹកសម្រាប់ប្រើប្រាស់នាពេលខាងមុខ ជាពិសេសសម្រាប់ខេត្តពោធិ៍សាត់ ដែលអាចប្រឈមនឹងការខ្វះទឹកប្រើប្រាស់។
ក្រុមអ្នកឃ្លាំមើលសង្គមលើកឡើងថា តាមការសង្កេតកន្លងមក អ្នករងផលប៉ះពាល់ដោយផ្ទាល់ពីអាកាសធាតុក្ដៅហើយស្ងួត គឺប្រជាកសិករប្រកបរបរកសិកម្មដែលធ្វើស្រែប្រវាស់មេឃ និងពលរដ្ឋភាគច្រើនដែលរស់នៅជាយក្រុងប្រឈមនឹងការខ្វះប្រើប្រាស់រៀងរាល់រដូវវស្សា។
កន្លងមក អាជ្ញាធរនៅក្នុងខេត្តដែលមានសក្ដានុពលធ្វើកសិកម្មមួយចំនួន បានជូនដំណឹងឱ្យកសិករផ្អាកការធ្វើស្រែប្រាំងដោយអះអាងថា បារម្ភពីការខ្វះទឹកសម្រាប់ប្រើប្រាស់ក្នុងរដូវប្រាំង។ ចំណែកកសិករដែលពឹងអាស្រ័យតែលើការធ្វើស្រែប្រាំង ព្រួយបារម្ភនឹងបញ្ហាប្រឈម ក្រោយការផ្អាកមិនឱ្យបង្កបង្កើនផលស្រូវនៅរដូវប្រាំងលើកទី២ ពីព្រោះប៉ះពាល់ជីវភាពរបស់ពួកគេ និងការជំពាក់បំណុលធនាគារ៕