ក្រុមអ្នកឃ្លាំមើលសង្គមលើកឡើងថា ការកៀរគរអ្នកគាំទ្រក្នុងប្រទេសអូស្ត្រាលី និងប្រទេសញូវហ្សេលែន ឱ្យទៅទទួលលោក ហ៊ុន ម៉ាណែត ដែលទៅចូលរួមកិច្ចប្រជុំអូស្ត្រាលី-អាស៊ាន នៅពេលនេះ បង្ហាញថារដ្ឋាភិបាលថ្មីនេះនឹងមិនស្ដារប្រជាធិបតេយ្យ មិនគោរពសិទ្ធិមនុស្សបានឡើយ។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៤ មីនា នេះថា ការបាតុកម្មទាមទាររបស់ពលរដ្ឋខ្មែរក្នុងប្រទេសអូស្ត្រាលី ឱ្យរដ្ឋាភិបាលលោក ហ៊ុន ម៉ាណែត ស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ គឺជារឿងត្រឹមត្រូវ ព្រោះរដ្ឋាភិបាលថ្មីដែលកំពុងដឹកនាំដោយលោក ហ៊ុន ម៉ាណែត នៅពេលនេះ ក៏កំពុងអនុវត្តនយោបាយបំបិទសំឡេងអ្នកប្រជាធិបតេយ្យ និងសំឡេងសកម្មជនសង្គមនានាតាមរបៀបដឹកនាំរបស់លោក ហ៊ុន សែន ឪពុករបស់គាត់ដែរ ក្នុងនោះ លោក ហ៊ុន ម៉ាណែត ក៏ជាប់ឈ្មោះជាមេដឹកនាំគាបសង្កត់ឆ្លងដែនខ្លាំងជាងលោក ហ៊ុន សែន ទៀត។
លោក ម៉ែន ណាត លើកឡើងថា តាមរយៈនៃការដឹកនាំដោយការគាបសង្កត់សិទ្ធិសេរីភាពរបស់ប្រជាពលរដ្ឋបែបនេះ លោក ហ៊ុន ម៉ាណែត នឹងមិនអាចទាក់ទាញអ្នកវិនិយោគនៅប្រទេសអូស្ត្រាលី ឱ្យទៅបណ្ដាក់ទុននៅកម្ពុជា ដូចជាការលើកឡើងរបស់គាត់ក្នុងពេលជួបជុំអ្នកគាំទ្រនៅទីក្រុងមែលប៊ន កាលពីពេលថ្មីៗនេះបានទេ។
លោកបន្ថែមថា ការជួបជុំអ្នកគាំទ្រក្នុងប្រទេសអូស្ត្រាលី នៅពេលនេះ ក៏មិនខុសពីការជួបជុំអ្នកគាំទ្រលោក ហ៊ុន ម៉ាណែត នៅប្រទេសបារាំង កាលពីពាក់កណ្តាលខែមករា ឆ្នាំ២០២៤ ដែរ ដែលលោក ហ៊ុន ម៉ាណែត អះអាងពីការដើរគោះទ្វារឱ្យក្រុមហ៊ុនអន្តរជាតិទៅវិនិយោគនៅកម្ពុជា ប៉ុន្តែទីបំផុត គ្មានអ្នកវិនិយោគណាហ៊ានទៅបោះទុនវិនិយោគនោះទេ ដោយសារតែពួកគេខ្លាចរអាពីការដឹកនាំរបស់លោក ហ៊ុន ម៉ាណែត សព្វថ្ងៃនេះ។
អ្នកឃ្លាំមើលសង្គមរូបនេះបញ្ជាក់ថា ការដឹកនាំរបស់លោក ហ៊ុន ម៉ាណែត ដែលស្ថិតក្នុងទម្រង់ដឹកនាំតាមរបៀបលោក ហ៊ុន សែន សព្វថ្ងៃនេះ នឹងមិនអាចជួយប្រទេសកម្ពុជាឱ្យរីកចម្រើនទេ គឺមានតែបំផ្លាញកម្ពុជាប៉ុណ្ណោះ។ ជាក់ស្តែង ដូចជាការបំផ្លាញប្រជាធិបតេយ្យ បំផ្លាញនីតិរដ្ឋ បំផ្លាញប្រព័ន្ធយុត្តិធម៌សង្គម និងបំផ្លាញសេដ្ឋកិច្ចរបស់កម្ពុជា ជាដើម ស្របពេលដែលធនធានធម្មជាតិខ្មែរក៏ចេះតែហិនហោចទៅៗក្រោមបណ្ដាញសែស្រឡាយ បក្ខពួក ដែលរុំព័ទ្ធដោយប្រព័ន្ធដឹកនាំគ្រួសារនិយមបន្តពីលោក ហ៊ុន សែន មកលោក ហ៊ុន ម៉ាណែត នៅពេលនេះ។
ការអះអាងនេះ ធ្វើឡើងស្របពេលដែលនាយករដ្ឋមន្ត្រីកម្ពុជាលោក ហ៊ុន ម៉ាណែត កំពុងមានវត្តមាននៅក្នុងប្រទេសអូស្ត្រាលី ដើម្បីចូលរួមកិច្ចប្រជុំអូស្ត្រាលី-អាស៊ាន ដែលត្រូវចាប់ផ្តើមនៅថ្ងៃចន្ទដើមសប្តាហ៍នេះ។
កិច្ចប្រជុំកំពូលអូស្ត្រាលី-អាស៊ាន ក្នុងទីក្រុង Melbourne មានរយៈពេល ៣ថ្ងៃ ដោយចាប់ផ្ដើមពីថ្ងៃចន្ទ រហូតដល់ថ្ងៃពុធ សប្ដាហ៍នេះ។ កិច្ចប្រជុំកំពូលនេះ ធ្វើឡើងដើម្បីរំឭកដល់ខួប ៥០ឆ្នាំដែលប្រទេសអូស្ត្រាលី បានក្លាយជាដៃគូខាងក្រៅដំបូងបំផុតរបស់អាស៊ានកាលពីអំឡុងទសវត្សរ៍១៩៧០ នោះ។
ជុំវិញកិច្ចប្រជុំកំពូលអូស្ត្រាលី-អាស៊ាន នៅពេលនេះ នាយករដ្ឋមន្ត្រីកម្ពុជាលោក ហ៊ុន ម៉ាណែត ដែលត្រូវតំណាងប្រទេសកម្ពុជាក្នុងនាមជាសមាជិក បានធ្វើដំណើរទៅចូលរួមកិច្ចប្រជុំនេះតាំងពីថ្ងៃទី១ ខែមីនា មកម្ល៉េះ ក្នុងបំណងទៅជួបអ្នកគាំទ្ររបស់ខ្លួនក្នុងប្រទេសអូស្ត្រាលី មុននឹងលោកចូលរួមកិច្ចប្រជុំកំពូលនេះ។
វត្តមានរបស់លោក ហ៊ុន ម៉ាណែត ក្នុងប្រទេសអូស្ត្រាលី នៅពេលនេះ មិនមែនមានតែអ្នកគាំទ្រគណបក្សប្រជាជនកម្ពុជាទេដែលស្វាគមន៍លោក ក្នុងនោះក្រុមអ្នកស្នេហាប្រជាធិបតេយ្យ ក្រុមអ្នកនយោបាយប្រឆាំង និងសកម្មជនសង្គមរាប់រយនាក់ ក៏បានប្រមូលផ្តុំគ្នានៅមុខវិមានរដ្ឋសភាប្រទេសអូស្ត្រាលី ទីក្រុងមែលប៊ន (Melbourne) ធ្វើបាតុកម្មក្នុងបំណងទាមទារឱ្យនាយករដ្ឋមន្ត្រីកម្ពុជាលោក ហ៊ុន ម៉ាណែត ស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញដែរ។
ជុំវិញការធ្វើបាតុកម្មនេះ អ្នកស្រាវជ្រាវការអភិវឌ្ឍន៍សង្គម បណ្ឌិត សេង សារី ប្រាប់សារព័ត៌មាន The Cambodia Daily អំឡុងពេលចូលរួមបាតុកម្មថា ពលរដ្ឋខ្មែរដែលចូលរួមបាតុកម្មប្រឆាំងនឹងវត្តមានលោក ហ៊ុន ម៉ាណែត និងពលរដ្ឋដែលចូលរួមទទួលស្វាគមន៍លោក ហ៊ុន ម៉ាណែត គឺមានលក្ខណៈផ្ទុយគ្នាស្រឡះ។
បណ្ឌិត សេង សារី លើកឡើងថា គ្រាន់តែប្រតិភូអមដំណើរលោក ហ៊ុន ម៉ាណែត មានចំនួនជាង ៥០០នាក់ ចំណែកប្រជាពលរដ្ឋដែលទៅពីប្រទេសញូវហ្សេលែន និងប្រជាពលរដ្ឋក្នុងប្រទេសអូស្ត្រាលី មានប្រមាណ ៦០០នាក់ទៀត ប៉ុន្តែវត្តមានរបស់អ្នកទាំងនោះគ្រាន់តែទៅបង្ហាញមុខឱ្យលោក ហ៊ុន ម៉ាណែត បានឃើញ ដើម្បីការពារផលប្រយោជន៍របស់ពួកគេដែលទទួលបានពីការដឹកនាំរបស់គណបក្សប្រជាជនកម្ពុជាប៉ុណ្ណោះ មិនមែនចូលរួមដោយទឹកចិត្តស្រឡាញ់ដូចពលរដ្ឋខ្មែរដែលចូលរួមបាតុកម្មនោះទេ។
កាលពីថ្ងៃទី២ ខែមីនា ឆ្នាំ២០២៤ ប្រជាពលរដ្ឋខ្មែរ ភូមា យៀកណាម មកពីតាមបណ្តារដ្ឋ និងទីក្រុងនានាប្រមាណជាង ៥០០នាក់ក្នុងប្រទេសអូស្ត្រាលី បានប្រមូលផ្ដុំធ្វើបាតុកម្មប្រឆាំងនឹងការដឹកនាំដោយការរំលោភប្រជាធិបតេយ្យ និងរំលោភសិទ្ធិមនុស្សរបស់នាយករដ្ឋមន្ត្រីបន្តពូជថ្មីលោក ហ៊ុន ម៉ាណែត អំឡុងពេលដែលនាយករដ្ឋមន្ត្រីកម្ពុជារូបនេះនឹងត្រូវចូលរួមកិច្ចប្រជុំអាស៊ាន-អូស្ត្រាលី ក្នុងទីក្រុងមែលប៊ន (Melbourne) នៅថ្ងៃទី៤ ខែមីនា ឆ្នាំ២០២៤ នេះ។
ប្រជាពលរដ្ឋខ្មែរដែលចូលរួមធ្វើបាតុកម្មទាមទារឱ្យរាជរដ្ឋាភិបាលខ្មែរដោះលែង លោក កឹម សុខា ប្រធានគណបក្សសង្គ្រោះជាតិ មេធាវីអន្តរជាតិ កញ្ញា សេង ធារី ប្រធានសហជីពនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ រួមទាំងអ្នកទោសនយោបាយដែលកំពុងរងនូវបណ្តឹងតាមផ្លូវតុលាការ និងកំពុងជាប់ឃុំក្នុងពន្ធនាគារទាំងអយុត្តិធម៌សព្វថ្ងៃនេះផងដែរ។
គួរបញ្ជាក់ថា ប្រទេសភូមា ឬមីយ៉ាន់ម៉ា ពុំមានតំណាងចូលរួមក្នុងនាមប្រទេសជាសមាជិកអាស៊ានទេ ព្រោះតែពុំព្រមអនុវត្តតាមសេចក្តីសម្រេចជាឯកច្ឆន្ទនៃមេដឹកនាំប្រទេសសមាជិកអាស៊ាននាក្រុងចាកាតា ប្រទេសឥណ្ឌូនេស៊ី។ ចំពោះរបៀបវារៈនៃកិច្ចប្រជុំកំពូលអូស្ត្រាលី-អាស៊ាន គឺផ្ដោតលើផលប្រយោជន៍រួម ទាំងសន្តិសុខ ទាំងសេដ្ឋកិច្ច។
នាយករដ្ឋមន្ត្រីអូស្ត្រាលី Anthony Albanese ថាការផ្ដាច់ខ្លួនពីសហគមន៍អាស៊ាន ជាការខាតបង់ឥតប្រយោជន៍។
ពលរដ្ឋសរុបក្នុងសហគមន៍អាស៊ានមានចំនួនជាង ៦៥០លាននាក់ និងមានទំហំសេដ្ឋកិច្ចជាទឹកប្រាក់ប្រមាណ ៣ម៉ឺនលានដុល្លារ។ អូស្ត្រាលីបានព្យាយាមបញ្ចុះបញ្ចូលសមាជិកអាស៊ានឲ្យមូលមតិចុះកិច្ចព្រមព្រៀងគាំទ្រប្រទេសហ្វីលីពីន ដែលកំពុងមានជម្លោះជាមួយប្រទេសចិន រឿងដែនទឹកក្នុងសមុទ្រចិនខាងត្បូង ដែលក្រុងកង់បេរ៉ា និងក្រុងម៉ានីល បានធ្វើសមយុទ្ធនាវាចរណ៍នាខែវិច្ឆិកា ឆ្នាំ២០២៣។
ជាមួយគ្នានេះ រដ្ឋាភិបាលអូស្ត្រាលី ក៏បានចាប់ផ្តើមបង្កើនកម្លាំងក្រុមមានសមត្ថកិច្ចសហព័ន្ធតាមដាន ឃ្លាំមើលសកម្មភាពជ្រៀតជ្រែកពីបរទេសដោយរដ្ឋាភិបាលផ្ដាច់ការមួយចំនួន ហៅថា Australian Security Intelligence Organization (ASIO) ដែលព្យាយាមបង្កការគាបសង្កត់ គំរាមកំហែងឆ្លងប្រទេសទៅក្នុងសហគមន៍ជនជាតិផ្សេងៗរស់នៅប្រទេសអូស្ត្រាលី ដែលរិះគន់របបផ្ដាច់ការ។
រាជាណាចក្រកម្ពុជា គឺជាប្រទេសមួយក្នុងបណ្តាប្រទេសមួយចំនួនដែលគេរកឃើញក្នុងឆ្នាំ២០២៣ ដោយការស្រាវជ្រាវពីអង្គការ Freedom House ដូចជាប្រទេសចិន ភូមា ធើកម៉េនីស្ថាន ជាដើម៕