រឿងទាក់ទងនឹងសាច់ញាតិត្រកូល ហ៊ុន មួយបែបទៀត គឺអភិបាលខេត្តកំពត ដែលគេនិយមហៅថាតុលាការមុខដែក គឺលោក ម៉ៅ ធនិន្ទ កំពុងរងនូវការចោទប្រកាន់ថា បានកាត់ឆ្វៀលដីសាធារណៈរបស់រដ្ឋនៅតំបន់ភ្នំទ្វារ ក្នុងភូមិល្អាង ឃុំល្អាង ស្រុកដងទង់ ខេត្តកំពត តាមដងផ្លូវជាតិលេខ៣ ម្តុំបូជនីយដ្ឋានលោកយាយម៉ៅ និងកន្លែងផ្សេងៗជាច្រើនទៀត ទៅឱ្យម្តាយបង្កើតរបស់លោក គឺអ្នកស្រី គង់ ម៉ៃ ដែលមានស្វាមីឈ្មោះ ម៉ៅ សាកន ធ្វើជាម្ចាស់កម្មសិទ្ធិ។
ប្រជាពលរដ្ឋក្នុងខេត្តកំពត ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១១ មីនា នេះថា លោក ម៉ៅ ធនិន្ទ មានក្រុមការងារជាបក្ខពួករបស់គាត់ដែលជាមន្ត្រីសុរិយោដីក្នុងខេត្តកំពត ដូចជា លោក ស៊ីវ តុង អនុប្រធានការិយាល័យសុរិយោដីខេត្តកំពត លោក សឹម ពិសិដ្ឋ ប្រធានការិយាល័យរៀបចំដែនដី នគរូបនីយកម្ម និងសំណង់ ស្រុកឈូក ខេត្តកំពត លោក ព្រាប សុផាត អនុប្រធានមន្ទីររៀបចំដែនដី នគរូបនីយកម្ម និងសំណង់ ខេត្តកំពត និងមានមន្ត្រីពាក់ព័ន្ធជាច្រើនទៀតដែលជាប់ពាក់ព័ន្ធក្នុងការគប់គិតប្រព្រឹត្តអំពើពុករលួយច្បាមយកដីសាធារណៈរបស់រដ្ឋ ឱ្យទៅអភិបាលខេត្តកំពត លោក ម៉ៅ ធនិន្ទ សព្វថ្ងៃនេះ។
ប្រភពព័ត៌មានដដែលលើកឡើងថា ក្រុមអាជ្ញាធរដែលជាបក្ខពួកអភិបាលខេត្តកំពត លោក ម៉ៅ ធនិន្ទ កំពុងដើររាតត្បាតយកដីរដ្ឋគ្រប់ទីកន្លែងរហូតរំលោភយកដីរបស់ប្រជាពលរដ្ឋថែមទៀត ដូចជានៅម្តុំភ្នំទ្វារ នៅភ្នំថ្កូវ នៅឃុំត្រពាំងឃ្លាំង ស្រុកឈូក ខេត្តកំពត ជាដើម ខណៈសារព័ត៌មានក្នុងស្រុកនានា និងអាជ្ញាធរក្នុងខេត្តកំពត មិនហ៊ានអនុវត្តច្បាប់ចំពោះអំពើរំលោភដីរដ្ឋ និងដីប្រជាពលរដ្ឋនេះទេ ដោយសារតែមន្ត្រីអាជ្ញាធរខេត្តទាំងនោះខ្លាចអំណាចលោក ម៉ៅ ធនិន្ទ ដោយសារតែគាត់ជាក្មួយប្រសារបស់មេដឹកនាំបក្សកាន់អំណាចលោក ហ៊ុន សែន។
ប្រជាពលរដ្ឋរងគ្រោះក្នុងខេត្តកំពត បញ្ជាក់ថា ការដោះស្រាយវិវាទដីធ្លីរបស់លោក ម៉ៅ ធនិន្ទ កន្លងមក គ្រាន់តែជារូបភាពបិទបាំងទង្វើពុករលួយរបស់គាត់ប៉ុណ្ណោះ ប៉ុន្តែការពិត គឺអភិបាលខេត្តកំពត រូបនេះកំពុងប្រព្រឹត្តអំពើស្មោកគ្រោកជាងពលរដ្ឋដែលមានជម្លោះដីធ្លី ដែលគាត់បានដោះស្រាយកន្លងមករាប់រយដងឯណោះ ខណៈវិវាទភាគច្រើន គាត់ដោះស្រាយដោយប្រើអំណាចជាក្មួយប្រសារបស់លោក ហ៊ុន សែន ជាជាងការដោះស្រាយតាមគតិបណ្ឌិតយុត្តិធម៌ច្បាប់។
ការអះអាងនេះ ធ្វើឡើងបន្ទាប់ពីរដ្ឋបាលខេត្តកំពត បានចេញលិខិតបដិសេធមួយទៅកាន់អ្នកតាមដានស្ថានការណ៍កម្ពុជាលោក សុខ សុគន្ធ ដែលបានលើកឡើងពីការរំលោភយកដីធ្លីរបស់រដ្ឋពីសំណាក់អភិបាលខេត្តកំពត លោក ម៉ៅ ធនិន្ទ សព្វថ្ងៃនេះ។
កាលពីថ្ងៃទី៤ ខែមីនា ឆ្នាំ២០២៤ រដ្ឋបាលខេត្តកំពត បានចេញសេចក្តីប្រកាសព័ត៌មានមួយដោយអះអាងថា ការលើកឡើងពីលោក សុខ សុគន្ធ ហៅ ជេម សុខ អំពីការរំលោភយកដីរដ្ឋធ្វើជាកម្មសិទ្ធិពីសំណាក់អភិបាលខេត្តកំពត លោក ម៉ៅ ធនិន្ទ គ្រាន់តែជាការចោទប្រកាន់ដោយគ្មានភស្តុតាង ក្នុងបំណងញុះញង់ឱ្យមានការរើសអើងមន្ត្រីរាជការសាធារណៈប៉ុណ្ណោះ។
សេចក្តីប្រកាសព័ត៌មាននោះបញ្ជាក់ថា ទីតាំងដែលស្ថិតនៅភ្នំទ្វារ ភូមិល្អាង ឃុំល្អាង ស្រុកដងទង់ ខេត្តកំពត មានអាស្រមលោកយាយម៉ៅ ដែលប្រជាពលរដ្ឋចាត់ទុកជាទីសក្ការៈ តែងតែមានសភាពកកស្ទះ និងមានគ្រោះថ្នាក់ជារឿយៗ។ ហេតុដូចនេះហើយបានជាមានសំណូមពរពីមជ្ឈដ្ឋាននានាក្នុងខេត្តកំពត ទើបលោក ម៉ៅ ធនិន្ទ ផ្ដួចផ្ដើមសាងសង់ទីសក្ការៈអាស្រមលោកយាយម៉ៅ នៅខាងលើភ្នំទ្វារ វិញ មិនមែនជាការរំលោភយកដីរដ្ឋធ្វើជាកម្មសិទ្ធិនោះទេ។
ទោះជាយ៉ាងណាក៏ដោយ អ្នកតាមដានស្ថានការណ៍ប្រទេសកម្ពុជាលោក សុខ សុគន្ធ ទាមទារឱ្យបញ្ជាក់ពីដីនៅម្តុំជើងភ្នំទ្វារ ស្ថិតក្នុងទីតាំងខាងលើ ថាជាកម្មសិទ្ធិរបស់អ្នកណាឱ្យពិតប្រាកដ បន្ទាប់ពីមន្ទីរធម្មការ និងសាសនាខេត្តកំពត បានចេញលិខិតបញ្ជាក់ថា ដីដែលលោក ម៉ៅ ធនិន្ទ ផ្ដួចផ្ដើមសាងសង់ទីសក្ការៈអាស្រមលោកយាយម៉ៅ នៅខាងលើភ្នំទ្វារ នោះ គឺជាដីដែលស្ថិតក្រោមការគ្រប់គ្រងរបស់មន្ទីរធម្មការ និងសាសនាខេត្តកំពត។
លើសពីនេះ លោក សុខ សុគន្ធ លើកជាសំណួរថា តើមន្ទីរធម្មការ និងសាសនាខេត្តកំពត ពិតជាមានសិទ្ធិគ្រប់គ្រងដីរដ្ឋនៅតំបន់នោះមែនដែរឬក៏អត់?
ទាក់ទិននឹងបញ្ហានេះ ប្រជាពលរដ្ឋក្នុងខេត្តពោធិ៍សាត់ ទម្លាយប្រាប់សារព័ត៌មាន The Cambodia Daily នៅថ្ងៃទី១១ មីនា នេះដែរថា កាលពីលោក ម៉ៅ ធនិន្ទ នៅជាអភិបាលខេត្តពោធិ៍សាត់ គាត់ក៏បានរំលោភយកដីរដ្ឋលក់យកលុយដាក់ហោប៉ៅខ្លួនឯងមិនតិចដែរ ដូចជា ដីនៅកោះថាស ក្នុងស្រុកភ្នំក្រវាញ ដីនៅតំបន់ភ្នំ១៥០០ ក្នុងស្រុកវាលវែង និងដីក្នុងទីរួមខេត្តពោធិ៍សាត់ ចំណុចបឹងកំប្លោក ជិតរ៉ារថភ្លើងខេត្តពោធិ៍សាត់ ដែលបានលក់ទៅឱ្យក្រុមហ៊ុនស្ថានីយប្រេងឥន្ធនៈឈ្មោះ ប៉ា ប៉ា ជាដើម ខណៈមន្ត្រីអាជ្ញាធរខេត្តពោធិ៍សាត់ គ្មាននរណាម្នាក់ហ៊ានទម្លាយរឿងអាស្រូវនេះទេ ព្រោះតែពួកគេខ្លាចអំណាចក្មួយប្រសាលោក ហ៊ុន សែន ម្នាក់នេះ។
ប្រភពប្រជាពលរដ្ឋបញ្ជាក់ថា ដើម្បីបិទបាំងរឿងទុច្ចរិតខ្លួនឯង លោក ម៉ៅ ធនិន្ទ តែងតែធ្វើកម្មវិធីសប្បុរសបន្លំភ្នែកប្រជាពលរដ្ឋ ដូចជាចែកអំណោយជាអង្ករដល់ប្រជាពលរដ្ឋក្រីក្រ ដូចជា អ្នកប្រកបមុខរបរជាអ្នករត់ម៉ូតូឌុប ជាដើម ប៉ុន្តែអ្វីដែលគាត់បានបំផ្លាញទ្រព្យសម្បត្តិជាតិ គឺមានចំនួនលើសពីការធ្វើសប្បុរសធម៌របស់គាត់រាប់រយដងឯណោះ។
ទាក់ទិននឹងបញ្ហានេះ មន្ត្រីរាជការមានឋានៈតូចតាចមួយចំនួននៅខេត្តព្រះសីហនុ ក៏បានបង្ហាញពីការភ្ញាក់ផ្អើលយ៉ាងខ្លាំងម្តងរួចមកហើយកាលពីអំឡុងឆ្នាំ២០២១ នៅពេលដែលពួកគេបានទទួលព័ត៌មានថា ភរិយាលោក ម៉ៅ ធនិន្ទ អភិបាលខេត្តពោធិ៍សាត់ គឺអ្នកស្រី ហ៊ុន ចាន់ធី មានចំណែកដីនៅលើដែនគម្របព្រៃឈើឆ្នាំ២០០២ ក្នុងខេត្តព្រះសីហនុ។
ក្រុមអ្នកឃ្លាំមើលសង្គម ប្រជាពលរដ្ឋ និងមន្ត្រីរាជការមួយចំនួននៅខេត្តព្រះសីហនុ នាំគ្នាភ្ញាក់ផ្អើលជាខ្លាំង បន្ទាប់ពីបានឃើញឯកសារស្នើកាត់ឆ្វៀលដីចេញពីផែនទីគម្របព្រៃឈើឆ្នាំ២០០២ ដែលមានទំហំផ្ទៃដី ៥ហិកតាស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ជូនពលរដ្ឋចំនួន ១០គ្រួសារដែលសុទ្ធតែជាអ្នកមានទ្រព្យធន និងមានអំណាចក្នុងជួររាជរដ្ឋាភិបាលបច្ចុប្បន្ន ហើយក្នុងនោះក៏មានឈ្មោះអ្នកស្រី ហ៊ុន ចាន់ធី ភរិយារបស់លោក ម៉ៅ ធនិន្ទ អតីតអភិបាលខេត្តពោធិ៍សាត់ ម្នាក់ដែរ៕