សហជីព និងសង្គមស៊ីវិលខ្លះបានរិះគន់រដ្ឋាភិបាលថា ការតែងតាំងលោក ឈូក បណ្ឌិត អតីតអភិបាលក្រុងបាវិត ដែលគេស្គាល់ថាជាអ្នកដែលបានបាញ់កម្មការិនីរោងចក្រ កៅវ៉េ ចំនួន ៣នាក់ឲ្យរងរបួសធ្ងន់ ជាអគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃ គឺជាគំរូមិនល្អនៅក្នុងសង្គម ដែលបង្ហាញឲ្យឃើញពីអយុត្តិធម៌សង្គមបន្តកើតមានកាន់តែធ្ងន់ធ្ងរ។
អនុក្រឹត្យចុះថ្ងៃទី៣០ ខែមករា ឆ្នាំ២០២៤ ដែលចេញផ្សាយកាលពីសប្តាហ៍មុន បានឲ្យដឹងថា អតីតអភិបាលក្រុងបាវិត លោក ឈូក បណ្ឌិត ដែលធ្លាប់បង្កអំពើហិង្សាលើកម្មករក្នុងការតវ៉ាកាលពី ១២ឆ្នាំមុន ត្រូវបានតែងតាំងជាអគ្គនាយករងរដ្ឋបាលនៅក្រសួងមហាផ្ទៃ។
ទាក់ទងទៅនឹងការតែងតាំងនេះដែរ មន្ត្រីកម្មវិធីការងាររបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ បានឲ្យដឹងថា អតីតអភិបាលក្រុងបាវិត ដែលបានចំណាយពេលភាគច្រើននៅក្នុងមន្ទីរពេទ្យនៅពេលអនុវត្តទោសក្នុងពន្ធនាគារ បន្ទាប់ពីតុលាការខេត្តស្វាយរៀង រកឃើញថា មានទោសពីបទបាញ់ប្រហារទៅលើកម្មការិនីឱ្យរងរបួស។
លោកថា នេះជាទង្វើនិទណ្ឌភាពដ៏រសើបមួយដែលកំពុងតែញាំញីនៅក្នុងសង្គមកម្ពុជា។ លោកថា បញ្ហានិទណ្ឌភាពនេះ ធ្វើឱ្យមានការកើនឡើងនូវការរំលោភអំណាច និងអំពើពុករលួយ ហើយជាលទ្ធផល ភាពអយុត្តិធម៌សង្គមបន្តកើតមានកាន់តែធ្ងន់ធ្ងរ ចំណែកពលរដ្ឋកាន់តែបន្តរងគ្រោះជាបន្តបន្ទាប់ និងបាត់បង់ទំនុកចិត្តលើប្រព័ន្ធយុត្តិធម៌នៅកម្ពុជា។
ចំណែកលោក អាត់ ធន់ ប្រធានសហភាពការងារកម្ពុជា បានថ្លែងថា លោកមានការភ្ញាក់ផ្អើលចំពោះការតែងតាំងលោក ឈូក បណ្ឌិត អតីតអភិបាលក្រុងបាវិត ដែលជាជនដៃដល់ប្រើកាំភ្លើងបាញ់ទៅលើកម្មករចំនួន ៣នាក់កាលពីឆ្នាំ២០១២។
លោកថា ការតែងតាំងនេះ ធ្វើឲ្យកម្មករដែលរងនូវភាពអយុត្តិធម៌មិនសប្បាយចិត្ត។ លោកថា អ្វីដែលសង្គមស៊ីវិលចង់បាន និងចង់ឃើញ គឺការតែងតាំងបុគ្គលម្នាក់ដែលមានស្នាដៃ និងចេះយកចិត្តទុកដាក់គិតគូរដល់ផលប្រយោជន៍ប្រជាពលរដ្ឋ។
អតីតអភិបាលក្រុងបាវិត លោក ឈូក បណ្ឌិត ធ្លាប់បានដកកាំភ្លើងខ្លីបាញ់ប្រហារលើកម្មការិនីរោងចក្រស្បែកជើង កៅវ៉េ (Kaoway) ក្នុងក្រុងបាវិត ខេត្តស្វាយរៀង បណ្តាលឱ្យកម្មការិនី ៣នាក់រងរបួសធ្ងន់ អំឡុងក្នុងពេលពួកគេតវ៉ាទាមទារលក្ខខណ្ឌការងារឱ្យល្អប្រសើរ កាលពីថ្ងៃទី២០ ខែកុម្ភៈ ឆ្នាំ២០១២។ លោក ឈូក បណ្ឌិត ត្រូវបានសាលាដំបូងខេត្តស្វាយរៀង កាត់ទោសដាក់ពន្ធនាគារ ១ឆ្នាំកន្លះ និងពិន័យជាប្រាក់ចំនួន ៣៨លានរៀល ឬជិត ១ម៉ឺនដុល្លារ ជាសំណងដល់ជនរងគ្រោះទាំង ៣នាក់ ពីបទ «បង្ករបួសស្នាមដោយអចេតនា»។
បណ្ដឹងនេះ ត្រូវបានប្តឹងផ្តល់គ្នាដល់សាលាឧទ្ធរណ៍ និងតុលាការកំពូល ប៉ុន្តែតុលាការទាំងពីរបានសម្រេចតម្កល់សាលក្រមសាលាដំបូងខេត្តទុកជាបានការ។
បន្ទាប់ពីគេចខ្លួនជាងបីឆ្នាំ លោកក៏បានចេញសារភាពនៅថ្ងៃទី៨ ខែសីហា ឆ្នាំ២០១៥ ក្រោយពេលដែលអតីតនាយករដ្ឋមន្ត្រីលោក ហ៊ុន សែន បានប្រកាសគាំទ្រចំណាត់ការរបស់ប៉ូលិសអន្តរជាតិ (Interpol) ក្នុងការតាមចាប់ខ្លួន ប៉ុន្តែលោក ឈូក បណ្ឌិត ត្រូវបានសមត្ថកិច្ចដោះលែងឱ្យរួចខ្លួនពីពន្ធនាគារកាលពីដើមខែកុម្ភៈ ឆ្នាំ២០១៧ ក្រោយអនុវត្តទោសគ្រប់ចំនួន។
កាលពីថ្ងៃទី១៨ ខែមីនា ឆ្នាំ២០២២ កន្លងមក លោក ឈូក បណ្ឌិត ក្រោយពេលចេញពីពន្ធនាគារ ក៏ត្រូវបានប្រមុខរដ្ឋស្ដីទី និងជាប្រធានព្រឹទ្ធសភាលោក សាយ ឈុំ បានដំឡើងឋានន្តរស័ក្ដិពីវរមន្ត្រីថ្នាក់លេខ៣ ទៅជាឧត្ដមមន្ត្រីថ្នាក់លេខ៤ នៃក្របខ័ណ្ឌមន្ត្រីរាជការរដ្ឋបាលជាន់ខ្ពស់ក្រសួងមហាផ្ទៃ។ ការដំឡើងឋានន្តរស័ក្ដិនេះ ធ្វើឡើងតាមសំណើរបស់លោក ហ៊ុន សែន ក្នុងពេលលោកជានាយករដ្ឋមន្ត្រី៕