មន្ត្រីជាន់ខ្ពស់អង្គការក្រៅរដ្ឋាភិបាលដែលធ្វើការលើវិស័យការងារ លើកឡើងថា វិធានការរបស់ក្រសួងការងារ និងបណ្តុះបណ្តាលវិជ្ជាជីវៈ ក្នុងការលក់ឡាយឡុងទ្រព្យសម្បត្តិរោងចក្រកាត់ដេរ Y&W GARMENT ដើម្បីដោះស្រាយការទាមទាររបស់កម្មករនិយោជិត គឺជាវិធានការឆ្លើយដ៏មានប្រសិទ្ធភាពចំពោះសេចក្តីត្រូវការរបស់កម្មករ។
អ្នកគ្រប់គ្រងផ្នែកការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី២១ មីនា ថា នៅពេលនេះមជ្ឈមណ្ឌលសង់ត្រាល់ កំពុងស្រាវជ្រាវព័ត៌មានជាក់លាក់បន្ថែមទៀត ដើម្បីឱ្យដឹងថាតើសំណងដែលក្រុមហ៊ុន Y&W GARMENT ត្រូវសងទៅដល់កម្មករនិយោជិតទាំងនោះមានចំនួនប៉ុន្មាន ហើយទ្រព្យសម្បត្តិក្រុមហ៊ុន ក្រសួងការងារប្រកាសលក់ឡាយឡុងទាំងនោះអាចទូទាត់សំណងដល់កម្មករនិយោជិតដែរឬក៏អត់។
លោក ឃុន ថារ៉ូ លើកឡើងថា អង្គការសង់ត្រាល់មិនទាន់ទទួលបានព័ត៌មានផ្លូវការណាមួយនៅឡើយទេជុំវិញទំហំទ្រព្យសម្បត្តិរបស់ក្រុមហ៊ុនដែលនឹងត្រូវលក់ឡាយឡុងយកលុយទៅសងកម្មករនិយោជិតនោះ ដូច្នេះអង្គការសង់ត្រាល់កំពុងតាមដានករណីនេះយកចិត្តទុកដាក់ ដើម្បីជួយដោះស្រាយសេចក្តីត្រូវការបន្ទាន់របស់កម្មករនិយោជិត ដូចជា ការដោះស្រាយបំណុលធនាគារ អាហារទ្រទ្រង់ជីវិតប្រចាំថ្ងៃ និងការចំណាយលើថ្លៃឈ្នួលផ្សេងៗ ដូចជា ថ្លៃទឹក ថ្លៃភ្លើង និងថ្លៃឈ្នួលផ្ទះ ជាដើម។
មន្ត្រីសង្គមស៊ីវិលរូបនេះបញ្ជាក់ថា អង្គការសង់ត្រាល់នឹងសិក្សាស្រាវជ្រាវឱ្យដឹងកាន់តែច្បាស់ថែមទៀតថា តើទ្រព្យសម្បត្តិក្រុមហ៊ុនដែលត្រូវលក់ឡាយឡុងនោះ នឹងអាចទូទាត់សំណងដល់កម្មករនិយោជិតបានទំហំប៉ុនណា។ ជាងនេះទៀត សង់ត្រាល់ ក៏នឹងសិក្សាលម្អិតបន្ថែមដែរជុំវិញនីតិវិធីគណនារបស់ក្រសួងការងារ ដើម្បីឱ្យដឹងថា តើកម្មករនិយោជិតទទួលបានចំណុចអ្វីខ្លះជុំវិញការទូទាត់សំណងទាំងនោះ ដោយផ្អែកតាមគោលការណ៍ច្បាប់ស្ដីពីការងារ និងយោងទៅតាមប្រភេទកិច្ចសន្យាការងាររបស់កម្មករនិយោជិតទាំងនោះ ជាមួយនឹងក្រុមហ៊ុន Y&W GARMENT នេះ។
កាលពីថ្ងៃទី២០ ខែមីនា ឆ្នាំ២០២៤ កម្មករនិយោជិតប្រមាណជា ៦០០នាក់ បានប្រមូលផ្តុំគ្នាបិទផ្លូវត្រង់ចំណុចភ្លើងស្តុបបាគូ ភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ដើម្បីទាមទារឱ្យថៅកែរោងចក្រ Y&W GARMENT បើកប្រាក់ខែឱ្យពួកគេ។
កម្មករម្នាក់ដែលចូលរួមតវ៉ានៅពេលនោះ បានអះអាងថា កាលពីថ្ងៃទី១២ ខែមីនា ឆ្នាំ២០២៤ មន្ត្រីសាលារាជធានីភ្នំពេញ និងមន្ត្រីក្រសួងការងារ បានសន្យាថានឹងដោះស្រាយបើកប្រាក់ខែឱ្យពួកគេនៅថ្ងៃទី២០ ខែមីនា ឆ្នាំ២០២៤ នេះ ដូច្នេះហើយបានជាពួកគេជួបជុំគ្នានៅថ្ងៃនេះតែម្តង។
ជុំវិញបញ្ហានេះ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងមួយស្ដីពីការបើកប្រាក់ឈ្នួល និងប្រាក់បំណាច់ផ្សេងៗជូនកម្មករនិយោជិតរបស់រោងចក្រ Y&W GARMENT កាលពីថ្ងៃទី២០ ខែមីនា ឆ្នាំ២០២៤ ថានៅពេលនេះ ទ្រព្យសម្បត្តិក្រុមហ៊ុនកំពុងដាក់ដេញថ្លៃ ខណៈក្រសួងការងារ ក៏ទទួលបានប្រាក់កក់ពីក្រុមហ៊ុនដេញថ្លៃមួយចំនួនហើយ។
ក្រសួងការងារ បញ្ជាក់ថា កម្មករនិយោជិតទាំងអស់ត្រូវទៅសាលាខណ្ឌដង្កោ នៅថ្ងៃទី២៣ ខែមីនា ឆ្នាំ២០២៤ ដើម្បីពិនិត្យឈ្មោះអ្នកដែលត្រូវទទួលសំណងនេះតាមលេខរៀង ដោយភ្ជាប់ប័ណ្ណសម្គាល់ខ្លួនជាកម្មករច្បាប់ដើម ឬកិច្ចសន្យាការងារ សៀវភៅការងារកម្មករ ឬប័ណ្ណសមាជិក ប.ស.ស ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន និងប័ណ្ណបើកប្រាក់ឈ្នួលប្រចាំខែរបស់កម្មករនិយោជិតផងដែរ បើមាន។
កាលពីថ្ងៃទី៩ ខែមីនា ឆ្នាំ២០២៤ កម្មករកម្មការិនីរោងចក្រកាត់ដេរសម្លៀកបំពាក់ Y&W Garment ដែលស្ថិតនៅតាមបណ្តោយផ្លូវលេខ២១៧ សង្កាត់ស្ពានថ្ម ខណ្ឌដង្កោ រាជធានីភ្នំពេញ ប្រមាណ ២០០០នាក់ បានប្រមូលផ្តុំគ្នា និងដង្ហែក្បួនទៅក្រសួងការងារ ដើម្បីស្នើសុំដំណោះស្រាយ ក្រោយថៅកែរោងចក្រប្រកាសក្ស័យធន ក្រោមហេតុផលគ្មានអ្នកបញ្ជាទិញ និងគេចខ្លួនមិនដោះស្រាយប្រាក់ឈ្នួល និងប្រាក់បំណាច់ផ្សេងទៀតឱ្យកម្មករនៅពេលនេះ។
ជុំវិញបញ្ហានេះ កាលពីថ្ងៃទី១២ ខែមីនា ឆ្នាំ២០២៤ សាលាដំបូងរាជធានីភ្នំពេញ បញ្ជាក់ថា មានកម្មករជាង ៤ពាន់នាក់ (៤៨៤៩នាក់) ដែលម្ចាស់រោងចក្រឈ្មោះ YUEN PO FAI រត់ចោលរោងចក្រមិនទទួលខុសត្រូវបើកប្រាក់ខែ និងអត្ថប្រយោជន៍ផ្សេងៗ ដូចជា ប្រាក់ឈ្នួលលើកទី២ ក្នុងខែកុម្ភៈ ឆ្នាំ២០២៤ ប្រាក់បំណាច់ជួសការឈប់សម្រាប់ប្រចាំឆ្នាំចំនួន ១៨ថ្ងៃ ប្រាក់ជួសការជូនដំណឹងជាមុន និងប្រាក់អតីតភាពការងារក្នុងឆមាសទី១ ឆ្នាំ២០២៤ ផងដែរ ដែលគិតជាសរុបមានចំនួនទឹកប្រាក់ចំនួនជាង ៣លានដុល្លារអាមេរិក (៣២៩៥២៩៥ដុល្លារ)៕