ក្រុមអ្នកវិភាគជំរុញឱ្យស្ថាប័នតុលាការ ស៊ើបអង្កេតលើអតីតប្រធានអង្គការតម្លាភាពកម្ពុជាលោក ព្រាប កុល និងអនុប្រធានអង្គភាពប្រឆាំងអំពើពុករលួយ លោក ស៊ាន បូរ៉ាត ជុំវិញការករណីឆបោករបស់ក្រុមហ៊ុន ប៊្រីលាន ស៊ីធី របស់ឧកញ៉ា ឡេង ចាន់ណា និងក្រុមហ៊ុន CIC Partner។
ប្រភពដដែលបញ្ជាក់ថា តុលាការក៏ត្រូវដោះលែងលោក យ៉ង់ ប៉ាក់ ជាមុនដែរ ដើម្បីឱ្យបុគ្គលរូបនេះមានឱកាសបង្ហាញភស្តុតាងជុំវិញការលើកឡើងពីការបាត់លុយ ៨០លានដុល្លារអាមេរិកដែលពាក់ព័ន្ធនឹងលោក ព្រាប កុល កាលពីពេលកន្លងទៅនោះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៧ ខែមីនា ឆ្នាំ២០២៤ នេះថា តាមក្រឹត្យក្រមយុត្តិធម៌ តុលាការត្រូវតែបើកការស៊ើបអង្កេតលើលោក ព្រាប កុល ជាបន្ទាន់ ព្រោះថាការស៊ើបអង្កេតនេះមិនមែនទាល់តែលោក ព្រាប កុល បានប្រព្រឹត្តអំពើឆបោកនោះទេ ប៉ុន្តែការស៊ើបអង្កេតនេះត្រូវតែធ្វើឡើងដាច់ខាតលើបុគ្គលទាំងឡាយណាដែលជាប់ពាក់ព័ន្ធនឹងអំពើឆបោកនេះ ព្រោះថាលោក ព្រាប កុល ក៏បានជាប់សង្ស័យក្នុងរឿងនេះដែរ បើតាមការលើកឡើងរបស់លោក យ៉ង់ ប៉ាក់ កន្លងមកនោះ។
លោក គឹម សុខ លើកឡើងថា ភាពមិនប្រក្រតីពាក់ព័ន្ធនឹងលោក ព្រាប កុល ក្នុងរឿងបាត់លុយចំនួន ៨០លានដុល្លារអាមេរិកនេះ គឺនៅត្រង់ថា គ្រាន់តែលោក យ៉ង់ ប៉ាក់ លើកឡើងពីករណីនេះដែលពាក់ព័ន្ធនឹងលោក ព្រាប កុល រួមជាមួយលោក គុយ វ៉ាត ស្រាប់តែតុលាការចាត់វិធានការចាប់ខ្លួនលោក យ៉ង់ ប៉ាក់ ភ្លាមៗបន្ទាប់ពីលោក ព្រាប កុល បានដាក់ពាក្យបណ្ដឹងជុំវិញរឿងនេះ ដោយពឹងផ្អែកតែទៅលើលិខិតអះអាងរបស់ក្រុមហ៊ុន CIC Partner ដែលបានបដិសេធថា លោក ព្រាប កុល មិនពាក់ព័ន្ធនឹងរឿងបាត់លុយទាំង ៨០លានដុល្លារអាមេរិកនោះ។
អ្នកវិភាគរូបនេះរៀបរាប់ថា ករណីបាត់លុយ និងមិនបង់ការប្រាក់ក្នុងក្រុមហ៊ុន CIC Partner នេះ មានករណីគួរសង្ស័យជាច្រើនដែលតម្រូវតែមានការស៊ើបអង្កេតជាចាំបាច់ ព្រោះថាពេលក្រុមហ៊ុនបាត់លុយរហូតគ្មានលទ្ធភាពបង់ការប្រាក់ ហេតុអ្វីលោក ឡែម ចាន់សម្រេច និងលោក ថន វណ្ណដុង ដែលជាប្រធានក្រុមប្រឹក្សាភិបាលថ្មី មិនប្តឹងឱ្យមានការស៊ើបអង្កេតលើលោក គុយ វ៉ាត ព្រោះលុយនេះបានបាត់ក្នុងដំណាក់កាលដែលលោក គុយ វ៉ាត ធ្វើជាប្រធានក្រុមប្រឹក្សាភិបាល ដូច្នេះគ្មានវិធីផ្សេងណាល្អជាងបើកការស៊ើបអង្កេតទេ ដើម្បីឱ្យដឹងថា បុគ្គលណាលួចលុយនោះ ឬក៏មានការលួចជាប្រព័ន្ធដូចការលើកឡើងរបស់លោក យ៉ង់ ប៉ាក់ មែនឬក៏អត់។
លោក គឹម សុខ បញ្ជាក់ថា ក្រៅពីស៊ើបអង្កេតលើអ្នកពាក់ព័ន្ធដែលបាត់លុយក្នុងក្រុមហ៊ុន CIC Partner ក៏ត្រូវតែមានការស៊ើបអង្កេតលើលោក ស៊ាន បូរ៉ាត ផងដែរ បើទោះបីជាប្រធានក្រុមហ៊ុន ប៊្រីលាន ស៊ីធី អ្នកស្រី ឡេង ចាន់ណា ត្រូវបានចាប់ខ្លួនហើយក៏ដោយ ព្រោះទំហំទឹកប្រាក់ប្រមាណជា ៣០០លានដុល្លារអាមេរិក មិនអាចត្រឹមតែអ្នកស្រី ឡេង ចាន់ណា និងបក្ខពួកដែលត្រូវបានចាប់ខ្លួនពីរនាក់ផ្សេងទៀត បានប្រព្រឹត្តនោះទេ ព្រោះវីដេអូ និងរូបថតជាច្រើនសន្លឹកបានបង្ហាញករណីឆបោកនេះជាប់ពាក់ព័ន្ធនឹងលោក ស៊ាន បូរ៉ាត យ៉ាងខ្លាំង។
កាលពីថ្ងៃទី១២ ខែមីនា ឆ្នាំ២០២៤ នាយកក្រុមហ៊ុន ប៊្រីលាន ស៊ីធី អ្នកស្រី ឡេង ចាន់ណា ត្រូវបានសមត្ថកិច្ចចាប់ខ្លួនពីបទឆបោកតាមរយៈនៃការខ្ចីលុយផ្តល់ការប្រាក់ក្នុងទំហំទឹកប្រាក់ប្រមាណជា ៣០០លានដុល្លារអាមេរិក ប៉ុន្តែអនុប្រធានប្រឆាំងអំពើពុករលួយលោក ស៊ាន បូរ៉ាត ដែលជាប់សង្ស័យក្នុងរឿងនេះ នៅតែអាចដើរហើរសេរីក្រៅច្បាប់នៅឡើយសព្វថ្ងៃនេះ។
ជាងនេះទៀត ក្រុមហ៊ុន ខេមបូឌាន អ៊ីនវេសស្ទ័រ ឃែបភីថល ផាតនើរ ម.ក (Cambodian Investors Capital Partners Plc.) ដែលហៅកាត់ថា CIC Partner ក៏កំពុងជាប់សង្ស័យក្នុងករណីឆបោកដែរ ជុំវិញការផ្តល់កម្ចីដើម្បីទទួលបានការប្រាក់ប្រមាណជា ២០០លានដុល្លារអាមេរិកដែរ ដែលកំពុងរងនូវការតវ៉ាទាមទារពីជនរងគ្រោះនៅពេលនេះ ប៉ុន្តែអ្នកពាក់ព័ន្ធ ដូចជាលោក គុយ វ៉ាត, លោក ព្រាប កុល, លោក ឃីម សុខហេង និងលោក សោម សម្បត្តិ ជាដើម មិនទាន់ត្រូវបានបើកការស៊ើបអង្កេតពីស្ថាប័នមានសមត្ថកិច្ចនៅឡើយទេ ខណៈជនរងគ្រោះដែលទម្លាយរឿងនេះ គឺលោក យ៉ង់ ប៉ាក់ កំពុងរងនូវការចោទប្រកាន់ និងឃុំខ្លួនក្នុងពន្ធនាគារនៅឡើយ។
ទាក់ទិននឹងបញ្ហានេះ កាលពីថ្ងៃទី១៥ ខែមករា ឆ្នាំ២០២៤ ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ បានរៀបរាប់លើបណ្ដាញសង្គមហ្វេសប៊ុកថា អ្នកក្លាហានម្នាក់ឈ្មោះ ព្រាប កុល ដែលធ្លាប់តស៊ូមតិខាង «តម្លាភាពសង្គម» បានកសាងស្នាដៃដ៏ធំមួយដោយបង្កើតក្រុមហ៊ុនអចលនទ្រព្យខ្នាតយក្សមួយដែលមានឈ្មោះថា Zillenium Group។
ប្រភពខាងលើលើកឡើងថា មុននឹងបង្កើតក្រុមហ៊ុនអចលនទ្រព្យខ្នាតយក្ស Zillenium Group នេះ លោក ព្រាប កុល ក៏ត្រូវគេសង្ស័យថាបានលួចយកលុយប្រមាណ ៨០លានដុល្លារអាមេរិកពីក្រុមហ៊ុន CIC Partner ដោយសហការជាមួយលោក គុយ វ៉ាត និងក្រុមប្រឹក្សាមួយចំនួនទៀត។ ដោយសារតែបញ្ហានេះ បានធ្វើឱ្យអ្នកវិនិយោគជាង ៥០០នាក់ (៥៤៦នាក់) ដែលបានបោះទុនវិនិយោគក្នុងក្រុមហ៊ុននេះ បាត់បង់ទ្រព្យធន លុយកាក់ និងក្ស័យធនគ្រប់គ្នា។
យ៉ាងណាក៏ដោយ ក្រោយការលើកឡើងនេះ សាលាដំបូងរាជធានីភ្នំពេញបានចេញដីកាបញ្ជាឱ្យចាប់ខ្លួនលោក យ៉ង់ ប៉ាក់ ភ្លាមៗក្រោមបទចោទ ញុះញង់ឱ្យមានការរើសអើង និងបរិហារកេរ្តិ៍ជាសាធារណៈ បន្ទាប់ពីរដ្ឋមន្ត្រីប្រតិភូអមនាយករដ្ឋមន្ត្រីលោក ព្រាប កុល ដាក់ពាក្យបណ្តឹងទៅតុលាការកាលពីថ្ងៃទី១៩ ខែមករា ឆ្នាំ២០២៤ កន្លងទៅ៕