មន្ត្រីជាន់ខ្ពស់រដ្ឋាភិបាលថ្មីកម្ពុជាទម្លាយថា លោក ហ៊ុន សែន កំពុងរៀបចំផ្លាស់ប្ដូរមនុស្សក្នុងគណបក្សដែលមិនមែនជាបក្ខពួក និងវង្សត្រកូលរបស់គាត់ជាបន្តបន្ទាប់នៅពេលនេះ ដើម្បីសម្រេចផែនការគ្រប់គ្រងអំណាចមួយជំហានទៀត គឺតែងតាំងលោក ហ៊ុន ម៉ាណែត ជាប្រធានគណបក្សប្រជាជនកម្ពុជា លោក ហ៊ុន ម៉ានី និងលោក នេត សាវឿន នឹងត្រូវតែងតាំងជាអនុប្រធានគណបក្សផងដែរ។
មន្ត្រីជាន់ខ្ពស់រដ្ឋាភិបាលថ្មីរបស់លោក ហ៊ុន ម៉ាណែត ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីរក្សាសុវត្ថិភាពផ្ទាល់ខ្លួននៅថ្ងៃទី២៨ មីនា នេះថា ព័ត៌មានដ៏រសើបពីផ្ទៃក្នុងគណបក្សប្រជាជនកម្ពុជា កំពុងខ្សឹបខ្សៀវតៗគ្នាថា គណបក្សប្រជាជនកម្ពុជានឹងក្លាយជាគណបក្សរបស់គ្រួសារត្រូលហ៊ុនផ្ដាច់មុខក្នុងការទទួលផែនការពីរដ្ឋាភិបាលវៀតណាម ព្រោះលោក ហ៊ុន សែន កំពុងប្រើវិធីគ្រប់បែបយ៉ាង ទាំងឪពុកទាំងកូន កម្ចាត់មន្ត្រីជាន់ខ្ពស់ចាស់ៗ និងកូនៗមន្ត្រីទាំងនោះចេញពីគណបក្សប្រជាជនកម្ពុជាឱ្យអស់ មុននឹងគាត់អស់លទ្ធភាពគ្រប់គ្រងបក្សនេះនៅថ្ងៃមុខ។
ប្រភពដដែលអះអាងថា ដោយសារតែលោក ហ៊ុន សែន មានផែនការបែបនេះហើយ ទើបគាត់ព្យាយាមឱ្យលោក ហ៊ុន ម៉ាណែត តែងតាំងកូនៗដែលជាមនុស្សស្និទ្ធនឹងក្រុមគ្រួសាររបស់គាត់ឱ្យកាន់តំណែងក្នុងជួររដ្ឋាភិបាលឱ្យកាន់តែច្រើន ដើម្បីបញ្ចូលអ្នកទាំងនោះទៅជាសមាជិកគណៈកម្មាធិការកណ្តាលរបស់គណបក្សប្រជាជនកម្ពុជា ដែលនឹងកាន់តែងាយស្រួលក្នុងការស្នើតែងតាំងលោក ហ៊ុន ម៉ាណែត លោក ហ៊ុន ម៉ានី និងលោក នេត សាវឿន ជាមន្ត្រីកំពូលរបស់គណបក្សនាពេលខាងមុខ។
មន្ត្រីរដ្ឋាភិបាលខាងលើបញ្ជាក់ថា ការតែងតាំងលោក ហ៊ុន ម៉ានី ជាឧបនាយករដ្ឋមន្ត្រីមិនមែនមានគោលដៅសំខាន់ក្នុងការកែទម្រង់រដ្ឋបាលសាធារណៈព្រោះតែគាត់ដឹកនាំក្រសួងមុខងារសាធារណៈនោះទេ ប៉ុន្តែគោលដៅធំបំផុត គឺដើម្បីជំរុញឱ្យកូនប្រុសពៅក្នុងគ្រួសារត្រកូលហ៊ុនមួយនេះ ទៅកាន់តំណែងជាមនុស្សកំពូលបន្ទាប់ក្នុងបក្សកាន់អំណាចតែប៉ុណ្ណោះ។
ការអះអាងនេះ ធ្វើឡើងបន្ទាប់ពីកូនប្រុសច្បងឧក្រិដ្ឋជនព្រៃឈើឧកញ៉ា ទ្រី ភាព គឺលោក ទ្រី ដាលុច ត្រូវបានតែងតាំងជាអគ្គលេខាធិការរងនៃគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កាលពីពេលថ្មីៗនេះ។
ព្រះមហាក្សត្រខ្មែរបានចេញព្រះរាជក្រឹត្យកាលពីថ្ងៃទី១៤ ខែកុម្ភៈ ឆ្នាំ២០២៤ ដែលទើបនឹងត្រូវបានផ្សព្វផ្សាយនៅថ្ងៃទី២៨ មីនា នេះ សម្រេចត្រាស់បង្គាប់តែងតាំងមុខតំណែង និងផ្ដល់ឋានៈជាអគ្គលេខាធិការរងនៃគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ដល់កូនប្រុសបង្កើតរបស់ឧកញ៉ា ទ្រី ភាព គឺឧកញ៉ា ទ្រី ដាលុច តាមសំណើរបស់នាយករដ្ឋមន្ត្រីកម្ពុជាលោក ហ៊ុន ម៉ាណែត ដែលបានទូលថ្វាយកាលពីពេលកន្លងទៅនោះ។
ជាងនេះទៀត លោក ទ្រី ដាលុច ក៏ទទួលបានការត្រាស់បង្គាប់តែងតាំង និងផ្ដល់ឋានៈជាទីប្រឹក្សាឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជាលោក ស៊ុន ចាន់ថុល តាមសំណើទូលថ្វាយរបស់លោក ហ៊ុន ម៉ាណែត ផងដែរកាលពីទី២៣ ខែធ្នូ ឆ្នាំ២០២៣ កន្លងទៅ។
លោក ទ្រី ដាលុច ជាកូនប្រុសច្បងរបស់លោក ទ្រី ភាព ដែលជាឈ្មួញឈើខុសច្បាប់ដ៏ល្បីឈ្មោះនៅកម្ពុជា ទទួលបានការតែងតាំងគោរមងារជាឧកញ៉ាកាលពីថ្ងៃទី១៩ ខែមីនា ឆ្នាំ២០១៣ ផងដែរ ប៉ុន្តែគោរមងារជាឧកញ៉ានេះ ត្រូវបានបញ្ចប់ទៅវិញដើម្បីរក្សាក្របខ័ណ្ឌជានាយរងខុទ្ទកាល័យបញ្ជាការដ្ឋានកងរាជអាវុធហត្ថលើផ្ទៃប្រទេសកាលពីថ្ងៃទី២៦ ខែកញ្ញា ឆ្នាំ២០១៩ កន្លងទៅ។
តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន ធ្លាប់បានព្រមានកាលពីពេលថ្មីៗនេះថា ប្រទេសកម្ពុជាបានធ្លាក់ចូលទៅក្នុងការគ្រប់គ្រងផ្ដាច់មុខនៃគ្រួសារនិយមរបស់ត្រកូលហ៊ុនថែមមួយកម្រិតទៀតហើយ ក្រោយការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត និងការរៀបចំតែងតាំងសាច់ញាតិ និងបក្ខពួកខ្លួនឯងឱ្យចូលទៅកាន់តួនាទីកាន់តែខ្ពស់ៗ ដោយកម្ចាត់អ្នកដទៃឱ្យចេញផុតពីតួនាទីសំខាន់ៗក្នុងជួររដ្ឋាភិបាលថ្មីនេះ។
ជាក់ស្តែង ក្រោយរដ្ឋសភាជាតិបោះឆ្នោតផ្ដល់សេចក្តីទុកចិត្តលើរាជរដ្ឋាភិបាលថ្មី លោក ហ៊ុន ម៉ាណែត បានតែងតាំងមន្ត្រីរដ្ឋាភិបាលតាមសែស្រឡាយបក្ខពួកជាបន្តបន្ទាប់ ក្នុងនោះសមាជិករដ្ឋាភិបាលទាំងជាង ១ពាន់នាក់ (១៥៤៧នាក់) ត្រូវគេមើលឃើញថា សុទ្ធតែជាបក្ខពួក និងសែស្រឡាយសាច់ញាតិរបស់ត្រកូលហ៊ុនទាំងអស់ ខណៈស្ថាប័នកំពូលរបស់ប្រទេស ដូចជាស្ថាប័នរដ្ឋសភា ស្ថាប័នរដ្ឋាភិបាល និងស្ថាប័នតុលាការ ក៏ត្រូវបានក្តោបក្តាប់ដោយវង្សត្រកូលរបស់លោក ហ៊ុន សែន ដែរនៅពេលនេះ។
មាត្រា១ នៃរដ្ឋធម្មនុញ្ញចែងថា ប្រទេសកម្ពុជា ជាព្រះរាជាណាចក្រដែលប្រតិបត្តិតាមលទ្ធិប្រជាធិបតេយ្យ សេរីពហុបក្ស ប៉ុន្តែកម្ពុជាក្រោមការត្រួតត្រាអស់រយៈពេលជាង ៤០ឆ្នាំរបស់លោក ហ៊ុន សែន ត្រូវគេមើលឃើញថា ដែនដីសុវណ្ណភូមិមួយនេះកំពុងធ្លាក់ទៅក្នុងការគ្រប់គ្រងតាមបែបគ្រួសារនិយមដូចប្រទេសកុម្មុយនីស្តផ្ដាច់ការទៅហើយសព្វថ្ងៃនេះ ខណៈការដឹកនាំដែលផ្ទេរអំណាចពីឪពុកទៅកូនដែលធ្លាប់តែកើតមានក្នុងរបបដឹកនាំកុម្មុយនីស្ត ក៏បានកើតឡើងនៅប្រទេសកម្ពុជានាពេលនេះផងដែរ៕