អ្នកឃ្លាំមើលស្ថានការណ៍កម្ពុជា លើកឡើងថា ប្រព័ន្ធអំណាចចាក់ស្រេះរបស់ត្រកូលហ៊ុន នឹងត្រូវរៀបចំឡើងឱ្យកាន់តែរឹងមាំថែមទៀតនៅពេលលោក ហ៊ុន សែន កាន់តំណែងជាប្រធានព្រឹទ្ធសភា ព្រោះលោក ហ៊ុន សែន បារម្ភអំពីសុខភាពរបស់គាត់។
អនុប្រធានវេទិកាពលរដ្ឋលោក ម៉ែន ណាត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៣ មេសា នេះថា តំណែងជាប្រធានព្រឹទ្ធសភារបស់លោក ហ៊ុន សែន នៅពេលនេះ គឺដើម្បីជួយពង្រឹងអំណាចឱ្យកូនប្រុសរបស់គាត់ គឺលោក ហ៊ុន ម៉ាណែត ដែលកំពុងកាន់តំណែងជានាយករដ្ឋមន្ត្រីនៅពេលនេះ ឱ្យកាន់តែរឹងមាំបន្ថែមទៀត ព្រោះថាអ្វីដែលលោក ហ៊ុន សែន បារម្ភបំផុតនៅពេលនេះ គឺសុខភាពរបស់គាត់ មិនអនុញ្ញាតឱ្យគាត់អាចរៀបចំប្រព័ន្ធអំណាចគ្រួសាររបស់គាត់បានជោគជ័យប៉ុណ្ណោះ។
ប្រភពដដែលអះអាងថា សេណារីយ៉ូដែលអាចកើតមាន គឺលោក ហ៊ុន ម៉ាណែត នឹងត្រូវរៀបចំឱ្យធ្វើជាប្រធានគណបក្សប្រជាជនកម្ពុជា លោក ហ៊ុន ម៉ានី នឹងត្រូវរៀបចំឱ្យធ្វើជាប្រធានរដ្ឋសភា ខណៈលោក ហ៊ុន ម៉ានិត នឹងត្រូវរៀបចំឱ្យធ្វើជាអគ្គមេបញ្ជាការកងទ័ពជាតិ ហើយលោក ហ៊ុន សែន នឹងធ្វើជាប្រមុខស្តីទីតាមរយៈតំណែងជាប្រធានព្រឹទ្ធសភានៅពេលនេះ។
លោក ម៉ែន ណាត លើកឡើងថា មុនពេលដែលលោក ហ៊ុន សែន កាន់តំណែងជាប្រធានព្រឹទ្ធសភា ទោះគាត់ចង់សម្រេចអ្វីមួយដែលពាក់ព័ន្ធនឹងព្រះមហាក្សត្រ ក៏គាត់មានការព្រួយបារម្ភពីការមិនពេញចិត្តរបស់មន្ត្រីជាន់ខ្ពស់ផ្ទៃក្នុងបក្សកាន់អំណាចដែរ។
លោកបន្តថា លោក ហ៊ុន សែន កំពុងតែលួងលោមអ្នកទាំងនោះឱ្យទទួលយកការរៀបចំអំណាចគ្រួសាររបស់គាត់ទៅថ្ងៃមុខបន្តទៀត ជាពិសេសគឺគាត់មិនចង់ឲ្យមានអរិយភាពណាមួយកើតឡើងនៅផ្ទៃក្នុងបក្សកាន់អំណាច ដែលជាហេតុនាំទៅដល់ការបំផ្លាញប្រព័ន្ធអំណាចគ្រួសារត្រកូលហ៊ុនដែលគាត់កំពុងតែរៀបចំសព្វថ្ងៃនេះទេ។
ដូច្នេះ តំណែងជាប្រធានព្រឹទ្ធសភារបស់គាត់នៅពេលនេះ នឹងបង្កភាពងាយស្រួលសម្រាប់គាត់ក្នុងការសម្រេចរឿងអ្វីមួយដែលពាក់ព័ន្ធនឹងព្រះមហាក្សត្រកាន់តែខ្លាំង និងមិនធ្វើឱ្យទាស់ភ្នែករបស់មន្ត្រីជាន់ខ្ពស់ផ្ទៃក្នុងរបស់បក្សកាន់អំណាចដែរ ដោយផ្អែកទៅលើតំណែងជាប្រធានព្រឹទ្ធសភាដែលត្រូវក្លាយជាប្រមុខរដ្ឋស្តីទីនៅពេលអវត្តមានព្រះមហាក្សត្រនៅក្នុងប្រទេសនោះ។
ការអះអាងនេះ ធ្វើឡើងស្របពេលដែលលោក ហ៊ុន សែន ត្រូវបានសមាជិកព្រឹទ្ធសភាបោះឆ្នោតជ្រើសរើសឱ្យគាត់ធ្វើជាប្រធានព្រឹទ្ធសភាសម្រាប់រដ្ឋាភិបាលអាណត្តិទី៧ នៅពេលនេះ។
អ្នកឃ្លាំមើលសង្គម និងនយោបាយ លោក វ៉ន ចាន់ឡូត បានលើកឡើងក្នុងកិច្ចពិភាក្សានេះដែរថា ការឡើងមកកាន់តំណែងជាប្រធានព្រឹទ្ធសភារបស់លោក ហ៊ុន សែន នៅពេលនេះ គឺដើម្បីជួយការដឹកនាំកូនប្រុសរបស់គាត់លោក ហ៊ុន ម៉ាណែត ដែលជានាយករដ្ឋមន្ត្រីនៅពេលនេះផងដែរ ជាពិសេសគឺជួយនយោបាយការបរទេសរបស់រដ្ឋាភិបាលថ្មីដែលកំពុងបរាជ័យ ក្រោយពីលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីជិត ១ឆ្នាំមកនោះ។
លោក វ៉ន ចាន់ឡូត បញ្ជាក់ថា តំណែងជាប្រធានព្រឹទ្ធសភារបស់លោក ហ៊ុន សែន នៅពេលនេះក៏កំពុងជួយគាត់ឱ្យមានប្រជាប្រិយភាពនយោបាយឡើងវិញដែរ ព្រោះថារយៈពេលជិត ១ឆ្នាំដែលគាត់ចាកចេញពីតំណែងជានាយករដ្ឋមន្ត្រី ពលរដ្ឋមិនបានបង្ហាញចំណាប់អារម្មណ៍ទៅលើគាត់ដូចមុនទេ។
លោកបន្ថែមថា ក្នុងន័យនេះ សម្រាប់មន្ត្រីជាន់ខ្ពស់បក្សកាន់អំណាចផ្សេងទៀត ដូចជា លោក ស ខេង លោក សាយ ឈុំ និងអ្នកស្រី ម៉ែន សំអន ជាដើម កំពុងបាត់បង់ប្រជាប្រិយភាពនយោបាយកាន់តែខ្លាំងបណ្តើរៗនៅពេលនេះ ដោយសារតែពួកគេមិនមានតំណែងក្នុងជួររដ្ឋាភិបាលដូចលោក ហ៊ុន សែន។
កាលពីថ្ងៃទី៣ ខែមេសា ឆ្នាំ២០២៤ ព្រឹទ្ធសភាកម្ពុជាបានបើកកិច្ចប្រជុំលើកដំបូងសម្រាប់អាណត្តិទី៥ របស់ខ្លួន ក្នុងនោះ លោក ហ៊ុន សែន ក៏ត្រូវបានបោះឆ្នោតជ្រើសរើសជាប្រធានព្រឹទ្ធសភាសម្រាប់អាណត្តិថ្មីនេះជំនួសលោក សាយ ឈុំ។ លោក ហ៊ុន សែន នៅពេលនេះ ក៏កំពុងកាន់តំណែងខ្ពស់ផ្សេងទៀតនៅក្នុងគណបក្ស និងក្នុងស្ថាប័នព្រះមហាក្សត្រដែរ ហើយលោកក៏ជាប្រធានបក្សកាន់អំណាចផង និងជាប្រធានឧត្ដមក្រុមប្រឹក្សាព្រះមហាក្សត្រផង។
មន្ត្រីជាន់ខ្ពស់រដ្ឋាភិបាលថ្មីរបស់លោក ហ៊ុន ម៉ាណែត ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីរក្សាសុវត្ថិភាពផ្ទាល់ខ្លួនកាលពីពេលថ្មីៗនេះថា ព័ត៌មានដ៏រសើបពីផ្ទៃក្នុងគណបក្សប្រជាជនកម្ពុជា កំពុងខ្សឹបខ្សៀវតៗគ្នាថា លោក ហ៊ុន សែន កំពុងរៀបចំឱ្យលោក ហ៊ុន ម៉ាណែត ធ្វើជាប្រធានគណបក្សប្រជាជនកម្ពុជា លោក ហ៊ុន ម៉ានី និងលោក នេត សាវឿន ធ្វើជាអនុប្រធានគណបក្សផងដែរ។
ប្រភពដដែលបញ្ជាក់ថា គណបក្សប្រជាជនកម្ពុជានឹងក្លាយជាគណបក្សរបស់គ្រួសារត្រូលហ៊ុនផ្ដាច់មុខក្នុងការទទួលផែនការពីរដ្ឋាភិបាលវៀតណាម ព្រោះលោក ហ៊ុន សែន កំពុងប្រើវិធីគ្រប់បែបយ៉ាង ទាំងឪពុក ទាំងកូន កម្ចាត់មន្ត្រីជាន់ខ្ពស់ចាស់ៗ និងកូនៗរបស់មន្ត្រីទាំងនោះ ចេញពីគណបក្សប្រជាជនកម្ពុជាឱ្យអស់ មុននឹងគាត់អស់លទ្ធភាពគ្រប់គ្រងបក្សនេះនៅថ្ងៃមុខ៕