នាយករដ្ឋមន្ត្រីជាកូនសន្យានឹងចាត់ចែងតាមនីតិវិធីច្បាប់ ស្នើប្រមុខរដ្ឋស្តីទីដែលត្រូវជាឪពុក ដើម្បីឲ្យអតីតតំណាងរាស្ត្រគណបក្សសង្គ្រោះជាតិមណ្ឌលស្វាយរៀង លោក គង់ សភា វិលមកប្រទេសកម្ពុជាវិញ បន្ទាប់ពីមន្ត្រីបក្សប្រឆាំងរូបនេះដាក់លិខិតស្នើសុំការលើកលែងទោស។
នាយករដ្ឋមន្ត្រីលោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី១៨ ខែមេសា ឆ្នាំ២០២៤ នេះថា ជូនចំពោះលោក គង់ សភា។ លោកបានទទួលរួចហើយនូវលិខិតសូមអភ័យទោសរបស់លោក ដូច្នេះលោកសូមស្វាគមន៍ និងចាត់ចែងតាមនីតិវិធី ដើម្បីឱ្យមន្ត្រីជាន់ខ្ពស់គណបក្សសង្គ្រោះជាតិរូបនេះអាចវិលត្រឡប់មកកាន់មាតុប្រទេសវិញ ហើយលោកសង្ឃឹមថា នឹងមានឱកាសជួបសន្ទនាជាមួយគ្នានៅពេលខាងមុខ។
កាលពីថ្ងៃទី៩ ខែកុម្ភៈ ឆ្នាំ២០២៤ អតីតតំណាងរាស្ត្រគណបក្សសង្គ្រោះជាតិមណ្ឌលស្វាយរៀង លោក គង់ សភា បានចេញលិខិតមួយដែលត្រូវបានផ្សព្វផ្សាយកាលពីថ្ងៃព្រហស្បតិ៍ ទី១៨ មេសា ដោយស្នើសុំឱ្យនាយករដ្ឋមន្ត្រីកម្ពុជាលោក ហ៊ុន ម៉ាណែត ជួយអន្តរាគមន៍លើកលែងទោសឱ្យរូបលោកដែលតុលាការបានផ្ដន្ទាទោសកន្លងមក ព្រមទាំងសុំឱ្យទម្លាក់ចោលនូវបទចោទប្រកាន់ទាំងអស់ផងដែរ។
លោក គង់ សភា រៀបរាប់ក្នុងលិខិតថា លោកពិតជាមានការសោកស្តាយយ៉ាងខ្លាំងរាល់ទង្វើ និងសកម្មភាពមួយចំនួនរបស់លោកកាលពីពេលកន្លងទៅ ដែលបានធ្វើឱ្យប៉ះពាល់ដល់ដំណើរការអភិវឌ្ឍ សន្តិភាព ស្ថិរភាព និងគោលនយោបាយនានារបស់រាជរដ្ឋាភិបាលកម្ពុជា ដូច្នេះលោកសូមឱ្យរាជរដ្ឋាភិបាលអភ័យទោសចំពោះរូបលោក និងជាពិសេស លោកសូមអភ័យទោសចំពោះនាយករដ្ឋមន្ត្រីកម្ពុជាលោក ហ៊ុន ម៉ាណែត តែម្តង។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៩ មេសា នេះថា ការស្នើសុំការលើកលែងទោសរបស់មន្ត្រីបក្សប្រឆាំងទៅកាន់នាយករដ្ឋមន្ត្រីកម្ពុជា គឺជារឿងធម្មតាសម្រាប់អ្នកនយោបាយដែលចង់បានសិទ្ធិធ្វើនយោបាយឡើងវិញ ហើយក៏កាន់តែធម្មតាថែមទៀតសម្រាប់ស្ថានភាពនយោបាយនៅកម្ពុជាសព្វថ្ងៃនេះ ព្រោះបក្សកាន់អំណាចក៏ទន្ទឹងរង់ចាំមន្ត្រីបក្សប្រឆាំងទាំងនោះសូមការអភ័យទោស ក្នុងបំណងឱ្យពួកគេផ្ដាច់ខ្លួនពីលោក សម រង្ស៊ី ដែរ។
លោក សេក សុជាតិ លើកឡើងថា បើមើលតែមួយជ្រុង ការសូមអភ័យទោសទៅកាន់នាយករដ្ឋមន្ត្រី ដើម្បីឱ្យជួយអន្តរាគមន៍លើកលែងទោស ពិតជាធម្មតាមែន ប៉ុន្តែបើគិតពីស្ថានភាពនយោបាយរបស់កម្ពុជាទាំងមូលវិញ គឺពិតជាប៉ះពាល់ធ្ងន់ធ្ងរណាស់ ព្រោះវាបង្ហាញថា កម្លាំងនយោបាយរបស់អ្នកប្រជាធិបតេយ្យកំពុងតែបែកខ្ញែកគ្នាកាន់តែខ្លាំង ស្របពេលដែលទីលាននយោបាយខ្មែរស្ថិតក្នុងការគ្រប់គ្រងស្ទើរតែទាំងស្រុងដោយឯកបក្សទៅហើយនោះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការស្នើសុំនេះ ទំនងជាធ្វើឡើងដោយការសម្រេចចិត្តបុគ្គលផ្ទាល់ខ្លួនប៉ុណ្ណោះ ហើយទង្វើបែបនេះក៏ស្ថិតក្នុងការសង្ស័យរបស់ពលរដ្ឋដែរដែលអាចជាការរៀបចំក្នុងកម្រិតណាមួយរបស់អ្នកនយោបាយ ព្រោះថាកន្លងមក គេមើលឃើញថា មន្ត្រីបក្សក្រៅរដ្ឋាភិបាលមួយចំនួនតែងតែមានទំនាក់ទំនងជាមួយមេដឹកនាំបក្សកាន់អំណាច ដែលពួកគេទាំងនោះបានធ្វើកិច្ចការមួយចំនួនដែលជាវត្ថុបំណងរបស់បក្សកាន់អំណាច ហើយទង្វើបែបនេះបានជះឥទ្ធិពលអាក្រក់យ៉ាងខ្លាំងដល់អ្នកតស៊ូដើម្បីលទ្ធិប្រជាធិបតេយ្យពិតប្រាកដនៅកម្ពុជាសព្វថ្ងៃនេះ។
លោក គង់ សភា ជាកូនប្រុសមួយរូបរបស់លោក គង់ គាំ ដែលធ្លាប់រងការវាយដំឲ្យរបួសធ្ងន់ធ្ងរពីសំណាក់ក្រុមបាតុកររបស់បក្សកាន់អំណាច កាលពីឆ្នាំ២០១៥ ទាំងដែលលោកនៅជាតំណាងរាស្ត្រគណបក្សសង្គ្រោះជាតិនៅឡើយ ប៉ុន្តែបន្ទាប់ពីគណបក្សសង្គ្រោះជាតិត្រូវបានរំលាយ កាលពីចុងឆ្នាំ២០១៧ លោកក៏បាននិរទេសមករស់នៅបរទេសរហូតដល់សព្វថ្ងៃនេះ។
ជាងនេះទៀត កាលពីថ្ងៃទី១៧ ខែកក្កដា ឆ្នាំ២០២៣ លោក គង់ សភា ក៏ត្រូវបានគណៈកម្មការរៀបចំការបោះឆ្នោតរាជធានីភ្នំពេញ (PEC) ពិន័យជាប្រាក់ចំនួន ១០លានរៀល ព្រមទាំងលុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឱ្យគេបោះឆ្នោតចំនួន ២០ឆ្នាំដែរ បន្ទាប់ពីរងនូវការចោទប្រកាន់ពីបទធ្វើសកម្មភាពណែនាំ និងញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោត ក្នុងដំណើរការបោះឆ្នោតកាលពីខែកក្កដា ឆ្នាំ២០២៣ កន្លងទៅនោះ។
យ៉ាងណាក៏ដោយ កាលពីដើមខែមិថុនា ឆ្នាំ២០២៣ មេដឹកនាំបក្សកាន់អំណាចលោក ហ៊ុន សែន បានប្រកាសក្នុងឋានៈជានាយករដ្ឋមន្ត្រីថា មន្ត្រីបក្សប្រឆាំងរូបណាដែលប្រកាសផ្ដាច់ខ្លួនចេញពីអតីតមេដឹកនាំបក្សប្រឆាំងលោក សម រង្ស៊ី លោកនឹងស្វាគមន៍ជានិច្ច ប៉ុន្តែលោកក៏នឹងដាក់ទោសផងដែរ បើអ្នកណាហ៊ានភ្ជាប់ជាមួយលោក សម រង្ស៊ី នោះ។
បែបនេះក្តី កាលពីថ្ងៃទី២៥ ខែកក្កដា ឆ្នាំ២០២២ កន្លងទៅ លោក គង់ សភា រួមជាមួយអតីតតំណាងរាស្ត្រគណបក្សជំទាស់ ២នាក់ផ្សេងទៀតដែលកំពុងរស់នៅដោយនិរទេសខ្លួននៅក្រៅប្រទេស ដូចជា លោក ហេង ដាណារ៉ូ និងលោក អ៊ូ ច័ន្ទឬទ្ធិ ធ្លាប់បានស្នើសុំលោក ហ៊ុន សែន ឱ្យជួយអន្តរាគមន៍ដើម្បីបានលើកលែងទោសម្តងរួចមកហើយ ប៉ុន្តែលោក ហ៊ុន សែន មិនបានផ្តល់សញ្ញាវិជ្ជមានណាមួយដល់ពួកគេនៅឡើយទេរហូតមកទល់ពេលនេះ។
ទំនងដោយសារតែបែបនេះហើយ បានជាលោក គង់ សភា ស្នើសុំទៅលោក ហ៊ុន ម៉ាណែត ដោយផ្ទាល់ឱ្យជួយលើកលែងទោសដល់រូបលោកនៅពេលនេះតែម្តង៕