បុរសខ្លាំងក្តាប់អំណាចផ្ដាច់មុខនៅកម្ពុជាលោក ហ៊ុន សែន ប្រកាសឱ្យមេធាវីរបស់លោកដកពាក្យបណ្ដឹងលើសំណុំរឿងដែលលោកបានប្តឹងមន្ត្រីបក្សប្រឆាំងលោក ជា ប៉ូច កាលពីចុងឆ្នាំ២០២៣។
លោកអះអាងថា ការដកពាក្យបណ្ដឹងនេះ ធ្វើឡើងក្នុងស្មារតីបង្រួបបង្រួមជាតិខ្មែរឡើងវិញ និងលើកលែងទោសឲ្យមនុស្សផ្សេងៗទៀតដែលទទួលកំហុស បន្ទាប់ពីប្រកាសផ្ដាច់ខ្លួនចេញពីអតីតមេដឹកនាំបក្សប្រឆាំងលោក សម រង្ស៊ី។
មេដឹកនាំបក្សកាន់អំណាចលោក ហ៊ុន សែន សរសេរលើទំព័រហ្វេសប៊ុករបស់ខ្លួនទាំងយប់កាលពីថ្ងៃទី២៣ ខែមេសា ឆ្នាំ២០២៤ នេះថា លោកបានទទួលលិខិតសារភាពកំហុស និងការសូមអភ័យទោសរបស់លោក ជា ប៉ូច រួចហើយ ដូច្នេះលោកនឹងបញ្ជាឱ្យមេធាវីរបស់លោកដកពាក្យបណ្ដឹងចេញពីតុលាការ ដើម្បីបញ្ចប់រឿងក្ដីដែលលោកបានប្តឹងលោក ជា ប៉ូច កាលពីឆ្នាំមុននោះឲ្យបានឆាប់។
លោក ហ៊ុន សែន លើកឡើងថា លោកសូមយកឱកាសនេះបញ្ជាក់ថា លោកនឹងទទួលយកការសុំទោសពីមនុស្សផ្សេងទៀតដែលទទួលកំហុស និងប្រកាសផ្ដាច់ខ្លួនចេញពីអតីតមេដឹកនាំបក្សប្រឆាំងលោក សម រង្ស៊ី ប៉ុន្តែលោកក៏នឹងមិនអត់ឱនឲ្យជនណា ឬក្រុមណាក៏ដោយដែលបន្តដើរតាមលោក សម រង្ស៊ី ដែរ។
មេដឹកនាំបក្សកាន់អំណាចរូបនេះបញ្ជាក់ថា លោកនឹងបន្តប្រើផ្លូវច្បាប់ដើម្បីចាត់ការលើក្រុមណា ឬបុគ្គលណាដែលជេរប្រមាថមួលបង្កាច់មកលើគណបក្សប្រជាជនកម្ពុជា ឬលើរូបលោកតទៅទៀតដោយគ្មានការលើកលែង។
លោក ហ៊ុន សែន អះអាងថា លោកមិនអាចអត់ឱនឲ្យបានទេចំពោះជនណា ឬក្រុមណាក៏ដោយ មិនថាខ្មែរ ឬបរទេសឡើយ ដែលចង់ដុតផ្ទះរបស់លោកដើម្បីតែចម្អិនពងមាន់ខ្លួនឯងនោះ។
កាលពីថ្ងៃទី២៣ ខែមេសា ឆ្នាំ២០២៤ សមាជិកគណៈកម្មាធិការអចិន្ត្រៃយ៍នៃគណបក្សភ្លើងទៀន លោក ជា ប៉ូច បានផ្ញើលិខិតមួយទៅកាន់លោក ហ៊ុន សែន ដោយរៀបរាប់ថា លោកពិតជាមានការសោកស្តាយជាពន់ពេកដែលបានធ្វើសកម្មភាព និងប្រើប្រាស់ពាក្យពេចន៍មួយចំនួននាពេលកន្លងមក ដែលបានធ្វើឱ្យប៉ះពាល់ដល់ការអភិវឌ្ឍ សន្តិភាព ស្ថិរភាព និងគោលនយោបាយរបស់រាជរដ្ឋាភិបាលកម្ពុជា ជាពិសេសគឺប៉ះពាល់ដល់កិត្តិយសរបស់លោក ហ៊ុន សែន តែម្តង។
លោក ជា ប៉ូច ស្នើសុំឱ្យលោក ហ៊ុន សែន លើកលែងទោសឱ្យរូបលោកដែលធ្លាប់បានប្រព្រឹត្តខុសនាពេលកន្លងមក ហើយលោកប្ដេជ្ញាថានឹងផ្ដាច់ខ្លួនចេញពីអតីតមេដឹកនាំប្រឆាំងលោក សម រង្ស៊ី និងឈប់ធ្វើការជាមួយក្រុមការងារគណបក្សសង្គ្រោះជាតិ រួមទាំងបក្សភ្លើងទៀនទាំងអស់ ដោយសារតែលោកអស់ជំនឿលើគោលនយោបាយបរទេសនិយមរបស់ក្រុមប្រឆាំងទាំងនោះ។
តំណាងរាស្ត្រគណបក្សសង្គ្រោះជាតិលោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៤ មេសា នេះថា ការសរសេរលិខិតសូមអភ័យទោសលោក ហ៊ុន សែន ពីមន្ត្រីបក្សប្រឆាំងមួយចំនួន មិនមែនជារឿងចម្លែកទេ ព្រោះនរណាក៏ដឹងដែរថា លោក ហ៊ុន សែន ដឹកនាំនយោបាយគ្រាន់តែដើម្បីបំបែកបំបាក់ក្រុមអ្នកប្រជាធិបតេយ្យក្នុងបំណងធានាគ្រប់គ្រងអំណាចឱ្យបានតត្រកូលប៉ុណ្ណោះ មិនមែនជាការដឹកនាំនយោបាយបង្រួបបង្រួមជាតិទេ។
កាលពីថ្ងៃទី១៣ ខែឧសភា ឆ្នាំ២០២៣ លោក ហ៊ុន សែន បានទម្លាយសំឡេងរបស់លោក ជា ប៉ូច ដែលលើកឡើងក្នុងកិច្ចប្រជុំមួយជាមួយសមាជិកគណបក្សភ្លើងទៀន អំពីការប្ដេជ្ញាចិត្តទម្លាក់លោក ហ៊ុន សែន ឲ្យបាន ប៉ុន្តែលោកមិនបានបញ្ជាក់ថានឹងត្រូវធ្វើតាមវិធីណានោះទេ។
បន្ទាប់ពីសារសំឡេងនេះបែកធ្លាយ លោក ជា ប៉ូច ក៏បានធ្វើដំណើរចេញទៅប្រទេសថៃ ភ្លាមៗក្រោមហេតុផលព្យាបាលជំងឺបេះដូង ប៉ុន្តែនៅថ្ងៃទី១៤ ខែឧសភា លោក ជា ប៉ូច បានសរសេរលិខិតមួយច្បាប់ទៅកាន់លោក ហ៊ុន សែន ដែរដោយប្រកាសបដិសេធចំពោះសារសំឡេងបែកធ្លាយនោះថាជាសារសំឡេងកាត់ត។
ប៉ុន្តែនៅថ្ងៃទី១៥ ខែឧសភា ឆ្នាំ២០២៣ លោក ជា ប៉ូច បែរជាចេញលិខិតសុំទោសលោក ហ៊ុន សែន ទៅវិញ ដោយបញ្ជាក់ថា ពាក្យទម្លាក់នោះ គឺសំដៅដល់ការបោះឆ្នោតតាមបែបប្រជាធិបតេយ្យដែលធ្វើឡើងជារៀងរាល់ ៥ឆ្នាំម្តងតែប៉ុណ្ណោះ មិនមែនតាមវិធីណាផ្សេងនោះទេ។
យ៉ាងណាក៏ដោយ នៅថ្ងៃទី២១ ខែឧសភា ឆ្នាំ២០២៣ លោក ហ៊ុន សែន បានបដិសេធមិនទទួលយកការសុំទោសរបស់មន្ត្រីជាន់ខ្ពស់គណបក្សភ្លើងទៀន លោក ជា ប៉ូច ឡើយ ដោយលោកអះអាងថា លោក ជា ប៉ូច ជាមនុស្សក្រឡេចក្រឡុច។
ប៉ុន្តែនៅទីបំផុត លោក ហ៊ុន សែន បញ្ជាក់ថា លោកទុកឱកាសឲ្យលោក ជា ប៉ូច ធ្វើការសម្រេចចិត្តដើម្បីខ្លួនឯង និងក្រុមគ្រួសាររហូតដល់ថ្ងៃទី៣០ ខែឧសភា ឆ្នាំ២០២៣ មុននឹងលោកសម្រេចចិត្តប្តឹងទៅតុលាការ ប៉ុន្តែលោក ជា ប៉ូច ក៏សម្រេចចិត្តសូមទោសលោក ហ៊ុន សែន នៅពេលនេះទៅវិញ បន្ទាប់ពីលោក ហ៊ុន សែន បានប្តឹងទៅតុលាការកាលពីឆ្នាំមុននោះ។
ចាប់តាំងពីការផ្លាស់ប្ដូរនាយករដ្ឋមន្ត្រីកម្ពុជាមក គេសង្កេតឃើញថា ពីរនាក់ឪពុកកូន គឺលោក ហ៊ុន សែន និងលោក ហ៊ុន ម៉ាណែត បានក្លាយជាបុគ្គលកំពូលដែលអ្នកនយោបាយប្រឆាំងនាំគ្នាសុំការលើកលែងទោស ដើម្បីឱ្យពួកគេទទួលបានសិទ្ធិសេរីភាពក្នុងការធ្វើនយោបាយ ឬរស់រានដោយស្របច្បាប់ក្នុងប្រទេសកម្ពុជាវិញ។
ជាក់ស្តែង លោក ហ៊ុន ម៉ាណែត បានសន្យាបើកផ្លូវឱ្យអតីតតំណាងរាស្ត្រគណបក្សសង្គ្រោះជាតិ លោក គង់ សភា វិលទៅប្រទេសកម្ពុជាវិញ បន្ទាប់ពីមន្ត្រីជាន់ខ្ពស់បក្សប្រឆាំងរូបនេះដាក់លិខិតស្នើសុំការលើកលែងទោសខ្លួនកាលពីថ្ងៃទី១៨ ខែមេសា ឆ្នាំ២០២៤ កន្លងទៅនេះ។
ចំណែកលោក ហ៊ុន សែន ក៏ត្រូវគេមើលឃើញថា នៅតែកាងអំណាចក្នុងការលើកលែងទោសឱ្យអ្នកនយោបាយប្រឆាំងបន្តទៀតដែរ បើទោះបីលោកលាលែងតំណែងពីនាយករដ្ឋមន្ត្រីហើយក៏ដោយ។ ក្នុងន័យនេះ បង្ហាញថា ការក្តាប់អំណាចពីរនាក់ឪពុកកូននេះ កំពុងចាប់ច្របាច់ការគ្រប់គ្រងប្រទេសកម្ពុជាកាន់តែខ្លាំងឡើងៗសព្វថ្ងៃនេះ៕