អតីតមេដឹកនាំបក្សប្រឆាំងលោក សម រង្ស៊ី អះអាងថា ការផ្ទុះឃ្លាំងគ្រាប់នៅខេត្តកំពង់ស្ពឺ គឺជាការធ្វើឡើងដោយចលនាប្រដាប់អាវុធផ្ទៃក្នុងរបស់គណបក្សប្រជាជនកម្ពុជាដែលប្រឆាំងត្រកូលហ៊ុន ដើម្បីទាមទារឲ្យដកលោក ហ៊ុន សែន និងលោក ហ៊ុន ម៉ាណែត ចេញពីអំណាចដែលកំពុងត្រួតត្រាកម្ពុជាតជំនាន់នៅពេលនេះ។
លោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី២៨ ខែមេសា ឆ្នាំ២០២៤ នេះថា ការរៀបចំឲ្យផ្ទុះឃ្លាំងគ្រាប់ក្បែរទីក្រុងភ្នំពេញ គឺជាទង្វើនៃការប្រកាសប្រឆាំងរបស់ចលនាផ្ទៃក្នុងរបស់គណបក្សប្រជាជនកម្ពុជា ដែលមានដើមកំណើតពីវៀតណាម ដើម្បីទាមទារឲ្យមានការទម្លាក់អំណាចលោក ហ៊ុន សែន និងកូនរបស់គាត់ប៉ុណ្ណោះ។
លោក សម រង្ស៊ី អះអាងថា លោក ហ៊ុន សែន កំពុងតែភ័យស្លន់ស្លោខ្លាំងណាស់ ហើយគាត់ក៏លែងទុកចិត្តអង្គរក្សដែលធ្លាប់ការពារគាត់កន្លងមកដែរ ព្រោះលោក ហ៊ុន សែន បានទៅពឹងពាក់ចិនកុម្មុយនីស្ត ឲ្យជួយការពារអាយុជីវិតរបស់គាត់ និងក្រុមគ្រួសាររបស់គាត់ជំនួសឱ្យអង្គរក្សទាំងអស់នោះរួចទៅហើយ។
អតីតមេដឹកនាំបក្សប្រឆាំងរូបនេះបញ្ជាក់ថា ដោយសារតែមូលហេតុនេះហើយបានជារដ្ឋមន្ត្រីក្រសួងការបរទេសចិន លោក វ៉ាង យី អះអាងកាលពីថ្ងៃទី២៤ ខែមេសា កន្លងទៅថ្មីៗនេះថា ប្រទេសចិនព្រមទាំងកងទ័ពចិន នឹងការពារអាយុជីវិត ព្រមទាំងសុវត្ថិភាពក្រុមគ្រួសារលោក ហ៊ុន សែន ឱ្យបាន ប៉ុន្តែតាមរយៈការអះអាងនេះ ក៏បានបញ្ជាក់ដែរថា របបដឹកនាំរបស់លោក ហ៊ុន សែន ក៏នឹងជិតដល់ទីបញ្ចប់ដែរ។
កាលពីថ្ងៃទី២៧ ខែមេសា ឆ្នាំ២០២៤ កងទ័ពជើងគោកយោធភូមិភាគទី៣ បានចេញលិខិតមួយទៅកាន់អគ្គមេបញ្ជាការរងនៃកងយោធពលខេមរភូមិន្ទថា ករណីផ្ទុះឃ្លាំងគ្រាប់ដែលបានកើតឡើងនៅទីតាំងឃ្លាំងគ្រាប់បច្ចេកទេសយោធភូមិភាគទី៣ បានបណ្តាលឱ្យនាយទាហាន ២០នាក់ស្លាប់ រួមមាននាយទាហានខេត្តកោះកុង ១៥នាក់ និងនាយទាហាននៃទីបញ្ជាការភូមិភាគទី៣ ចំនួន ៥នាក់ផងដែរ។
ប្រភពដដែលបញ្ជាក់ថា ករណីនេះបង្កឱ្យមានការខូចខាតរថយន្ត ៥គ្រឿង ខូចខាតអគារធ្ងន់ធ្ងរចំនួន ៤ខ្នង ក្នុងនោះអគារដែលជាឃ្លាំងគ្រាប់ ៣ខ្នង និងអគារស្នាក់នៅ ១ខ្នង ព្រមទាំងធ្វើឱ្យខូចខាតផ្ទះពលរដ្ឋដែលនៅក្បែរនោះចំនួន ២៥ខ្នងថែមទៀត។
ជុំវិញបញ្ហានេះ នាយករដ្ឋមន្ត្រីតពូជថ្មីលោក ហ៊ុន ម៉ាណែត ក៏បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៧ ខែមេសា ឆ្នាំ២០២៤ នេះដែរថា លោកមានក្តីរន្ធត់ក្តុកក្តួលឥតឧបមាដែលបានទទួលដំណឹងអំពីឧបទ្ទវហេតុផ្ទុះគ្រាប់នៅយោធភូមិភាគទី៣ ក្នុងខេត្តកំពង់ស្ពឺ ដែលបានបង្កឱ្យយោធិនចំនួន ២០នាក់ពលីជីវិត និងយោធិនមួយចំនួនទៀតរងរបួស។
លោក ហ៊ុន ម៉ាណែត បញ្ជាក់ថា រាជរដ្ឋាភិបាលនឹងទទួលរ៉ាប់រងទាំងស្រុងទៅលើការចំណាយរៀបចំពិធីបុណ្យសពយោធិនដែលបានបាត់បង់ជីវិតក្នុងឧបទ្ទវហេតុនេះ និងផ្តល់ការឧបត្ថម្ភជាថវិកាជូនគ្រួសារយោធិនពលីចំនួន ២ម៉ឺនដុល្លារអាមេរិកក្នុងមួយគ្រួសារសពផងដែរ ខណៈយោធិនដែលរងរបួសក្នុងឧបទ្ទវហេតុនេះ ក្នុងម្នាក់ៗក៏ទទួលបានថវិកាចំនួន ២០លានរៀលដែរ។
ចាប់តាំងពីថ្ងៃទី២៧ រហូតដល់ថ្ងៃទី២៩ ខែមេសា នេះ រដ្ឋាភិបាលកម្ពុជាមិនបានបង្ហាញពីមូលហេតុដែលបណ្តាលឱ្យផ្ទុះឃ្លាំងគ្រាប់នេះនៅឡើយទេ ខណៈលោក ហ៊ុន ម៉ាណែត ដែលជានាយករដ្ឋមន្ត្រី និងកងយោធពលខេមរភូមិន្ទទាំងមូល ក៏មិនបានបង្ហាញពីមូលហេតុនៃការផ្ទុះនេះដែរ ក្រៅតែពីបញ្ជាក់ថាជាឧបទ្ទវហេតុ ឬជាការផ្ទុះដោយចៃដន្យនោះ។
ជុំវិញការផ្ទុះឃ្លាំងគ្រាប់នេះ អ្នកតាមដានស្ថានការណ៍កម្ពុជាលោក សុខ សុគន្ធ បានលើកឡើងកាលពីថ្ងៃទី២៨ ខែមេសា ឆ្នាំ២០២៤ នេះដោយបង្ហាញពីចម្ងល់ថា ក្រោយមេដឹកនាំបក្សកាន់អំណាចលោក ហ៊ុន សែន ប្រតិកម្មទៅកាន់រដ្ឋាភិបាលវៀតណាម ជុំវិញករណីព្រែកជីកហ្វូណន បាន ១ថ្ងៃ ស្រាប់តែករណីផ្ទុះឃ្លាំងគ្រាប់នេះបានកើតឡើង ដូច្នេះសេណារីយ៉ូនេះស្ថិតក្នុងករណីដែលគួរឱ្យសិក្សាជុំវិញប្រតិកម្មរបស់លោក ហ៊ុន សែន ទៅកាន់វៀតណាម ដែរ ក្នុងចំណោមសេណារីយ៉ូមួយចំនួនទៀត។
លោក សុខ សុគន្ធ លើកឡើងថា ករណីទី១ អាចជាឧបទ្ទវហេតុចៃដន្យ ដោយសារតែកម្ពុជាមានអំពើពុករលួយដែលនាំឱ្យមានការរៀបចំទុកដាក់ជាតិផ្ទុះមិនបានត្រឹមត្រូវតាមបច្ចេកទេស ចំណែកករណីទី២ គឺអាចជាប់ពាក់ព័ន្ធនឹងប្រតិកម្មរបស់លោក ហ៊ុន សែន ទៅកាន់រដ្ឋាភិបាលវៀតណាម ព្រោះបណ្ដាញចារកម្មវៀតណាម ដែលត្រូវបានរៀបចំតាមរយៈនយោបាយប្រជាសាស្ត្ររបស់វៀតណាម បានចូលទៅរស់នៅក្នុងទឹកដីកម្ពុជាចាប់តាំងពីអំឡុងទសវត្សរ៍ឆ្នាំ១៩៨០ មកម្ល៉េះ។
អ្នកឃ្លាំមើលស្ថានការណ៍កម្ពុជារូបនេះបញ្ជាក់ថា វៀតណាមបានធ្វើនយោបាយប្រជាសាស្ត្រកាន់តែខ្លាំងចូលទឹកដីកម្ពុជាចំនួន ៣លើក គឺនៅអំឡុងទសវត្សរ៍ឆ្នាំ១៩៤០ ទសវត្សរ៍ឆ្នាំ១៩៧០ និងឆ្នាំ១៩៧៩ ដូច្នេះមកដល់ពេលនេះ ជនជាតិវៀតណាម ស្ទើរតែក្លាយជាខ្មែរទាំងស្រុងទៅហើយ ដែលរដ្ឋាភិបាលខ្មែរមិនអាចបែងចែកថាពួកគេជាវៀតណាម ឬជាខ្មែរនោះទេ ក្នុងនោះក៏ជនជាតិវៀតណាមជាច្រើនបានបង្កប់ខ្លួនក្នុងជួររដ្ឋាភិបាលខ្មែរស្ទើរតែគ្រប់កន្លែង។
លោក សុខ សុគន្ធ បញ្ជាក់ថា មានឧត្តមសេនីយ៍ផ្កាយ៤ ម្នាក់ បានទម្លាយប្រាប់លោកថា ខ្លួនគាត់ផ្ទាល់គឺជាជនជាតិវៀតណាមសុទ្ធសាធ មិនមែនខ្មែរទេ ប៉ុន្តែនៅអំឡុងឆ្នាំ១៩៧៩ លោកស្ថិតនៅក្នុងអង្គភាពរណសិរ្សរំដោះជាតិ ប៉ុន្តែក្រោយមក លោកក៏ត្រូវបានរដ្ឋាភិបាលខ្មែរដំឡើងឋានៈជាបន្តបន្ទាប់ និងមានតួនាទីកាន់តែខ្ពស់ក្នុងកងទ័ពខ្មែររហូតមកទល់ពេលនេះ ហើយបើទោះជារូបលោកមានវ័យជាង ៦០ឆ្នាំហើយក៏ដោយ ក៏មិនបានត្រូវរដ្ឋាភិបាលដាក់ឱ្យចូលនិវត្តន៍ដែរ។
យ៉ាងណាក៏ដោយ កាលពីថ្ងៃទី២៣ ខែមេសា ឆ្នាំ២០២៤ រដ្ឋាភិបាលកុម្មុយនីស្តចិន បានប្រកាសជំហរប្រឆាំងដាច់ខាតចំពោះការជ្រៀតជ្រែកកិច្ចការផ្ទៃក្នុងរបស់រដ្ឋាភិបាលកម្ពុជា ក្នុងនោះមហាយក្សកុម្មុយនីស្តចិន ក៏គូសបញ្ជាក់បន្ថែមដែរថា កម្ពុជានិងចិន គឺនៅជាមិត្តដែកថែបដែលនៅក្បែរគ្នា និងជួយគ្នាក្នុងគ្រាលំបាកជានិច្ច៕