តុលាការកំពូល សម្រេចតម្កល់សាលដីការបស់សាលាឧទ្ធរណ៍ដែលបានផ្ដន្ទាទោសកញ្ញា ឈឹម ស៊ីថរ និងថ្នាក់ដឹកនាំសហជីព ៦នាក់ផ្សេងទៀតពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ ទុកជាបានការដដែល ក្នុងសវនាការនៅថ្ងៃទី៣ ខែឧសភា ឆ្នាំ២០២៤ នេះ។
ការបើកសវនាការប្រកាសសាលក្រមនេះ ធ្វើឡើងបន្ទាប់ពីថ្នាក់ដឹកនាំសហជីពណាហ្គាវើលដ៍ ប្តឹងទៅតុលាការកំពូលជំទាស់ទៅនឹងសេចក្តីសម្រេចនៅសាលាឧទ្ធរណ៍ក្រុងភ្នំពេញ លើសំណុំរឿងរបស់ខ្លួនកាលពីពេលកន្លងទៅនោះ។
កាលពីថ្ងៃទី២៥ ខែឧសភា ឆ្នាំ២០២៣ សាលាដំបូងរាជធានីភ្នំពេញបានប្រកាសសាលក្រមផ្ដន្ទាទោសប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដាក់ពន្ធនាគាររយៈពេល ២ឆ្នាំ ចំណែកកញ្ញា ឈឹម សុខន អ្នកស្រី សុន ស្រីពេជ្រ អ្នកស្រី ហៃ សុភាព អ្នកស្រី ឃ្លាំង សុបិន្ត និងកញ្ញា ទូច សេរីមាស ត្រូវតុលាការផ្ដន្ទាទោសដាក់ពន្ធនាគាររយៈពេល ១៨ខែ ប៉ុន្តែតម្រូវឱ្យស្ថិតក្រោមការត្រួតពិនិត្យរបស់តុលាការ។
ដោយឡែកអ្នកស្រី រី សុវណ្ណឌី លោក សុខ ណារិទ្ធិ និងលោក សុខ គង្គា ក៏ត្រូវតុលាការផ្ដន្ទាទោសរយៈពេល ១ឆ្នាំដែរ តែត្រូវព្យួរក្រោមបទចោទ “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” ដូចគ្នា ដែលប្រព្រឹត្តនៅប្រទេសកម្ពុជា កាលពីអំឡុងឆ្នាំ២០២២ និងរយៈពេលបន្តបន្ទាប់មកទៀត តាមបញ្ញត្តិមាត្រា៤៩៤ និង ៤៩៥ នៃក្រមព្រហ្មទណ្ឌ ក្នុងនោះ សាលាឧទ្ធរណ៍ភ្នំពេញក៏បានសម្រេចតម្កល់សាលក្រមរបស់សាលាដំបូងរាជធានីភ្នំពេញ កាលពីថ្ងៃទី១៩ ខែតុលា ឆ្នាំ២០២៣ ទុកជាបានការផងដែរ។
នៅថ្ងៃទី៣ ខែឧសភា ឆ្នាំ២០២៤ នេះ សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ប្រមាណជា ៥០នាក់ បានប្រមូលផ្តុំគ្នានៅមុខតុលាការកំពូល ដើម្បីបង្ហាញការគាំទ្រកញ្ញា ឈឹម ស៊ីថរ និងថ្នាក់ដឹកនាំសហជីពផ្សេងទៀត ដោយលើកបដាទាមទារឱ្យតុលាការដោះលែងកញ្ញា ឈឹម ស៊ីថរ និងអំពាវនាវឱ្យបញ្ឈប់ការប្រើប្រាស់ប្រព័ន្ធតុលាការ ដើម្បីធ្វើទុក្ខបុកម្នេញ ចាប់ និងឃុំខ្លួនមេដឹកនាំសហជីពរបស់ពួកគេបន្តទៀត។
ជុំវិញបញ្ហានេះ សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ចេញសេចក្តីថ្លែងការណ៍នៅថ្ងៃទី៣ ឧសភា នេះថា ប្រធានសហជីពក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានជាប់ពន្ធនាគារលើកទីពីរជាង ៥០០ថ្ងៃហើយ (៥២៤ថ្ងៃ) ដែលស្មើនឹង ១ឆ្នាំ ៥ខែ ៧ថ្ងៃ បើគិតមកដល់ថ្ងៃទី៣ ខែឧសភា ឆ្នាំ២០២៤ នេះ។
ប្រភពដដែលលើកឡើងថា ការចាប់ខ្លួនកញ្ញា ឈឹម ស៊ីថរ និងសមាជិកសហជីពដទៃទៀតដាក់ពន្ធនាគារទាំងអយុត្តិធម៌កន្លងមក គឺជាការដាក់ទណ្ឌកម្មយ៉ាងធ្ងន់ធ្ងរលើថ្នាក់ដឹកនាំ និងសមាជិកសហជីពដែលអនុវត្តសិទ្ធិទាមទារលំហសេរីភាព ដែលចង់បានដំណោះស្រាយសម្រាប់កម្មករនិយោជិតដែលរងនូវការរំលោភសិទ្ធិការងារពីសំណាក់ក្រុមហ៊ុនណាហ្គាវើលដ៍កន្លងមក។
សហជីពខាងលើអំពាវនាវឱ្យតុលាការកំពូលក្រុងភ្នំពេញ ដោះលែងប្រធានសហជីពកញ្ញា ឈឹម ស៊ីថរ ឱ្យមានសេរីភាពពេញលេញឡើងវិញ រួមទាំងទម្លាក់បទចោទឱ្យថ្នាក់ដឹកនាំ និងសមាជិកសហជីពទាំង ៧នាក់ទៀត ឱ្យទទួលបាននូវយុត្តិធម៌គ្រប់ៗគ្នាដែរ។
ចំណែកមជ្ឈមណ្ឌលសិទ្ធិមនុស្សកម្ពុជា អំពាវនាវឱ្យតុលាការទម្លាក់ចោលរាល់បទចោទចំពោះកញ្ញា ឈឹម ស៊ីថរ និងសមាជិកសហជីពផ្សេងទៀតរបស់សហជីពក្រុមហ៊ុនណាហ្គា និងបញ្ឈប់រាល់ទម្រង់នៃការធ្វើទុក្ខបុកម្នេញទៅលើសកម្មភាពសហជីពតទៅថ្ងៃមុខទៀត។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនយ៉ាងហិង្សាកាលពីដើមខែមករា ឆ្នាំ២០២២ អំឡុងពេលកញ្ញាព្យាយាមចូលរួមធ្វើកូដកម្មជាមួយក្រុមកូដករផ្សេងទៀត និងត្រូវបានចាប់ឃុំបណ្ដោះអាសន្នក្នុងពន្ធនាគារអស់រយៈពេល ២ខែ ប៉ុន្តែកញ្ញាត្រូវបានដោះលែងឱ្យនៅក្រៅឃុំវិញកាលពីខែមីនា ឆ្នាំ២០២២ កន្លងទៅនេះ។
ប៉ុន្តែមេដឹកនាំសហជីពរូបនេះ ត្រូវបានសមត្ថកិច្ចក្រុងភ្នំពេញ ចាប់ខ្លួនជាលើកទី២ នៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ ក្រោមហេតុផលថា កញ្ញាចាកចេញពីប្រទេសកម្ពុជាទៅចូលរួមកិច្ចប្រជុំមួយជាមួយអង្គការអន្តរជាតិស្ដីពីសិទ្ធិកម្មករនៅទីក្រុងម៉ែលប៊ន ប្រទេសអូស្ត្រាលី ដោយគ្មានការអនុញ្ញាតពីចៅក្រមស៊ើបសួរ ដែលអំពើនេះគឺបានបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គម និងវប្បធម៌របស់ប្រទេសជាតិ ខណៈសេចក្តីស្នើទាំងឡាយរបស់ប្រជាពលរដ្ឋ ត្រូវបានដោះស្រាយ និងពិនិត្យយ៉ាងហ្មត់ចត់ពីអង្គការរដ្ឋ។
ទោះជាយ៉ាងណាក៏ដោយ រាជរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ ត្រូវគេមើលឃើញថា បានអនុវត្តផ្ទុយពីមាត្រាដែលបានចែងក្នុងរដ្ឋធម្មនុញ្ញទាំងស្រុង ដោយការអនុវត្តច្បាប់ចាប់ខ្លួនអ្នកតវ៉ាទាមទារសិទ្ធិសេរីភាពដាក់គុកជាបន្តបន្ទាប់ ក្រោមបទចោទដែលមិនសមហេតុផល ដែលគេសង្ស័យថាជាការអនុវត្តច្បាប់ក្រោមនិន្នាការនយោបាយរបស់គណបក្សប្រជាជនកម្ពុជា៕